Genesis 30:1-43
30 Raquelqa qulluq kasqanraykum ñañanta chiqnirqa, chaymi Jacobta nirqa: “Waway mana kaptinqa wañurusaqmi”, nispa.
2 Hinaptinmi Jacobqa piñakuspan nirqa: “¿Ñuqaqa Dioschu kani? Paymi qulluqta unanchasurqanki”, nispa.
3 Chaymi Raquelqa nirqa: “Serviqniy Bilawanyá waway kananpaq puñuy.+ Chaynapi paypa wawankuna waway hinaña kananpaq”, nispa.
4 Chaymi Raquelqa serviqnin Bilata Jacobman quykurqa warmin kananpaq, hinaptinmi Jacobqa Bilawan puñurqa.+
5 Chaymi Bilaqa wiksayakuruspan Jacobpa churinta wachakururqa.
6 Hinaptinmi Raquelqa nirqa: “Diosqa juezniy hina kaspanmi uyariykuwan, hinaspam qari wawata quykullawan”, nispa. Chayraykum suticharqa Danwan*.+
7 Raquelpa serviqnin Bilaqa kaqmanta wiksayakuruspanmi Jacobpa churinta wachakurqa.
8 Chaymi Raquelqa nirqa: “Anchatam ñañaywan atipanakurqaniku, kayqaya wawayuq rikuriruni”, nispa. Chayraykum suticharqa Neftaliywan*.+
9 Leapas manaña wachakusqanraykum serviqnin Zilpataña Jacobman quykurqa warmin kananpaq.+
10 Chaymi Leapa serviqnin Zilpaqa Jacobpa churinta wachakurqa.
11 Hinaptinmi Leaqa nirqa: “¡Mayna kusikuypaqmi kayqa!”, nispa. Chaymi suticharqa Gadwan*.+
12 Leapa serviqnin Zilpaqa kaqmanta wiksayakuruspanmi Jacobpa churinta wachakurqa.
13 Hinaptinmi Leaqa nirqa: “¡Ancha kusisqam kachkani! Kusisqa kasqaytachá warmikunapas niwanqaku”, nispa.+ Chayraykum suticharqa Aserwan*.+
14 Huk punchawmi Rubenqa+ trigo rutuy tiempopi purichkaspan ruruyuq mandragora qurata* tarirurqa, hinaspam maman Leaman aparqa. Hinaptinmi Raquelqa Leata nirqa: “Wawaykipa apamusqan mandragora qurapa ruruntayá quykullaway”, nispa.
15 Leañataqmi nirqa: “¿Qusaywan kachkaspaykipas wawaypa apamusqan mandragora qurapa ruruntaraqchu munachkanki?”, nispa.+ Hinaptinmi Raquelqa nirqa: “Wawaykipa apamusqan mandragora qurapa rurunta quykuwaptikiqa manam michakusaqchu kunan tuta Jacobwan puñunaykitaqa”, nispa.
16 Chaymi tutaykuqta Jacob kutiykamuptin Leaqa taripaq lluqsispan nirqa: “Kunan tutaqa ñuqawanmi puñunayki, wawaypa apamusqan mandragora qurapa ruruntam Raquelman quykuni ñuqawan puñunaykipaq”, nispa. Chaymi Jacobqa chay tuta Leawan puñurqa.
17 Diosqa Leapa mañakusqantam uyariykurqa, chaymi kaqmanta wiksayakuruspan Jacobpa pichqa kaq churinta wachakurqa.
18 Chaymi Leaqa nirqa: “Serviqniy Zilpata qusayman quykusqayraykum Diosqa pagoyta quykuwan”, nispa. Chaymi wawanta suticharqa Isacarwan*.+
19 Chaymanta qipatam Leaqa kaqmanta wiksayakuruspan Jacobpa churinta wachakurqa.+
20 Chaymi Leaqa nirqa: “Diosqa munasqaytam quykuwan. Kunanqa suqta qari churinkunata wachakusqayraykuch qusayqa kuyawanqaña”, nispa.+ Chaymi wawanta suticharqa Zabulonwan*.+
21 Chaymantapas Leaqa warmi wawanta wachakuruspanmi suticharqa Dinawan.+
22 Diosqa manam Raqueltaqa qunqarqachu. Chayraykum mañakusqanta uyariykuptin Raquelqa wiksayakururqa.+
23 Wiksayakuruspanmi qari wawata wachakurqa, hinaspam nirqa: “Diosmi pinqaypi kasqaymanta hurquykuwan”, nispa.+
24 Hinaspam suticharqa Joseywan*+ “Jehova Diosmi huk wawatawan quykuwan” nisqanrayku.
25 Joseyta Raquel wachakusqan qipallatam Jacobqa suedron Labanta nirqa: “Aviawayñayá wasiyman hinaspa llaqtayman kutikunaypaq.+
26 Warmiykunatawan churiykunata quykuwaptikiqa ripukusaqmi, paykunaraykum llamkapurqayki. Qamqa yachankim imayna llamkapusqayta”, nispa.+
27 Chaymi Labanqa nirqa: “Kuyawaspaykiqa amaraqyá ripukuychu. Yacharunim qamrayku Jehova Dios bendeciwasqanta”, nispa.
28 Labanqa nirqaraqmi: “Imapas mañawasqaykitam qusqayki”, nispa.+
29 Chaymi Jacobqa nirqa: “Qamqa allintam yachanki imayna llamkapusqayta hinaspa michipuptiy ovejaykikunawan cabraykikuna mirarusqantapas.+
30 Manaraq kaypi kachkaptiyqa aschallam kapusurqanki, kunanmi ichaqa miraruspan achkayarun. Chayamusqaymantapacham Jehova Diosqa yanapasuchkanki. Hinaptinqa, ¿haykapiñamá aylluypaqqa llamkasaq?”, nispa.+
31 Hinaptinmi Labanqa nirqa: “¿Ima qunaytataq munanki?”, nispa. Jacobñataqmi nirqa: “¡Ama imatapas quwaychu! Ichaqa hinalla michisqayraykum kayta mañakusqayki.+
32 Kunanmi ovejakunapawan cabrakunapa kasqanman riptinchik rakinki chiqchitawan muru ovejakunata hinaspa yananiraq malta carnerokunata chaynataq chiqchitawan muru cabrakunata. Haykam kunanmantapacha chayna naceqkunam ñuqapaq kanqa.+
33 Chaynapi qipa punchawkunata ñuqapa kaqta qawaq hamuspayki suwapaq mana hapiwanaykipaq. Cabraykunatam chiqchillata utaq murullata rikunki, rikunkitaqmi yananiraq malta carneroykunatapas, sichu mana chayna kaptinqa suwa kasqaypaqmi hapiwanki”, nispa.
34 Labanñataqmi nirqa: “¡Allinmi! Chaynayá kachun”, nispa.+
35 Chay punchawmi Labanqa rakirqa allqa utaq muru chivokunata chaynataq chiqchi utaq muru cabrakunatapas. Rakirqataqmi yuraq muru ovejakunatapas chaynataq yananiraq malta carnerokunatapas. Hinaspam chay cabrakunatawan ovejakunataqa churinkunawan michichirqa.
36 Hinaspam Jacobpa kasqanmanta kimsa punchaw puriyta chay animalkunata qatichirqa, Jacobñataqmi Labanpa wakin animalninkunata hinapi michirqa.
37 Chaymi Jacobqa kuchurqa estoraque, almendras hinaspa armon sutiyuq sachakunata, hinaspam qaranta kaypi-chaypi tillparqa muru-muru kananpaq.
38 Chay kaspikunatam yarqakunaman hinaspa animalkunapa maymi tomanankuman churarqa, chaynapi yakuta tomaq rispanku kaspikunapa kasqanpi hapikunanpaq.
39 Chay uywakunapa uñankunam karqa allqakuna, chiqchikuna hinaspa murukuna chay kaspikunapa kasqanpi hapikusqanrayku.
40 Chaymantam Jacobqa rakirqa malta carnerokunata, hinaspapas wakin animalkunatam allqa hinaspa yananiraq animalkunawan hukllawarqa. Chaymantam Jacobqa paypaq kaq animalkunata Labanpa animalninkunamanta rakirqa.
41 Chaymi puqusqa animalkuna hapikuptin, Jacobqa kaspikunata yarqaman churaq chayta qawastin animalkuna hapikunanpaq.
42 Umpu animalkuna hapikuptinñataqmi mana imatapas churaqchu. Chaymi chay umpu animalkunaqa Labanpaq karqa, puqusqa kaqkunañataqmi Jacobpaq.+
43 Chayraykum Jacobqa apuyarurqa. Paypam karqa achka ovejankuna, cabrankuna, camellonkuna, asnonkuna chaynataq serviqninkunapas.+
Willakuykuna
^ “Dan” ninanqa: “Juez”, ninanmi.
^ “Neftaliy” ninanqa: “Atipanakusqay”, ninanmi.
^ “Gad” ninanqa: “Mayna kusikuypaqmi”, ninanmi.
^ “Aser” ninanqa: “Kusisqa”, ninanmi.
^ Warmikunam niqku chay ruruta mikuruspaqa wiksayakuy atisqankuta.
^ “Isacar” ninanqa: “Payqa pagoymi”, ninanmi.
^ “Zabulon” ninanqa: “Kuyawanqaña”, ninanmi.
^ Kaypiqa Josifias ninantam Josey nichkan. “Josey” ninanqa: “Jehova Diosyá yapachun” utaq “Jehova Diosyá astawan quchun”, ninanmi.
