Genesis 12:1-20
12 Abrantam Jehova Dios nirqa: “Llaqtaykimanta lluqsiy aylluykikunata hinaspa taytaykipa ayllunkunata saqispayki, hinaspayá maymi nisqay allpaman riy.+
2 Qanmantam runakuna miranqa, bendeciptiymi sutikipas ancha riqsisqa kanqa, qamraykutaqmi wakin runakunatapas bendecisaq.+
3 Bendecisuqnikikunatam bendecisaq, ñakasuqnikikunatam ñakasaq.+ Qamraykum bendecisaq kay pachapi llapallan runakunata”, nispa.+
4 Chaymi Abranqa Jehova Diospa nisqanta kasukurqa, hinaspam Lotwan kuska ripukurqa. Abranqa 75 watanpim karqa Haran llaqtamanta ripukuspanqa.+
5 Abranqa warmin Saraita+ hinaspa sobrinon Lotta+ pusarikuspanmi Canaan lawman rirqa,+ aparqataqmi Haran llaqtapi huñukusqan tukuy ima kapuqninkunatapas,+ pusarqataqmi serviqnin runakunatapas. Canaanman chayaruptinkupas,
6 Abranqa hinallam chaylawninta rirqa Sichem*+ llaqtakama, chayqa kachkan More lawpi hatun sachakunapa kasqanpim.+ Chaypiqa Canaan runakunam yacharqaku*.
7 Chaypim Jehova Diosqa Abranman rikuriykurqa, hinaspam nirqa: “Miraynikikunamanmi kay allpata qusaq”, nispa.+ Hinaptinmi Abranqa Jehova Diospaq animalta kañapunanpaq altarta ruwarqa.
8 Chaymantam Abranqa Betel+ llaqtapa waklawnin intipa qispimunan urqukunapa kasqan lawman rirqa, hinaspam carpanta chaypi sayachirqa. Betel llaqtaqa karqa intipa siqaykunan lawpim, Hai+ llaqtañataqmi karqa intipa qispimunan lawpi. Chaypitaqmi Abranqa Jehova Diospaq animalta kañananpaq rumita pirqarqa,+ hinaspam Jehova Diosta sutinmanta qayakuspan hatuncharqa.+
9 Chaymantam Abranqa carpankunata paskaruspan Negueb+ qichwaman rirqa kaypi-chaypi samastin.
10 Canaan nacionpi kachkaptinmi muchuy* karurqa.+ Chaymi Abranqa Egipto nacionman rirqa chaypi yachananpaq.+
11 Hinaptinmi Egiptoman chayaykuchkaspanña warmin Saraita nirqa: “Qamqa kuyayllapaq sumaq warmim kanki.+
12 Egipto runakunachiki qawaykususpayki ‘paypa warminmi’ ninqaku. Hinaspachá wañurachiwanqaku, qamtañataqchá mana imanasunkichu.
13 Chaynaqa, paniy kasqaykitamá ninki chaynapi mana imanawanankupaq chaynataq mana wañurachiwanankupaq”, nispa.+
14 Chaymantam Abranqa Egiptoman chayarurqa, hinaptinmi chaypi runakunaqa qawarqaku warmin Sarai kuyayllapaq kasqanta.
15 Egipto nacionta kamachiqpa* yanapaqninkunapas kuyayllapaq kasqanta qawaykuspankum kamachiqman willarqaku, chaynapim Saraiqa kamachiqpa wasinman pusasqa karqa.
16 Egiptota kamachiqqa Sarairaykum Abrantaqa allinta chaskiykurqa, chaymi Abranmanqa quykurqa ovejakunata, vacakunata, asnokunata hinaspa camellokunata. Qurqataqmi warmikunatapas qarikunatapas serviqnin kananpaq.+
17 Jehova Diosñataqmi Abranpa warmin Sarairayku+ kamachiqtawan wasinpi kaqkunata unquywan ñakarichirqa.
18 Chaymi Egiptota kamachiqqa Abranta qayachispan nirqa: “¿Imatataq kaytaqa ruwaruwanki? ¿Imanasqataq mana willawarqankichu warmiki kasqanta?
19 ¿Imanasqataq ‘paniymi’ nirqanki?+ Yaqallam paywan casarakuruni. ¡Kayqaya warmiki, kunanqa pusarikuspaykiyá ripukuy!”, nispa.
20 Hinaspam runankunata kamachirqa Abrantawan warminta aviamunankupaq. Chaynapim Abranqa tukuy imantin ripukurqa.+
