“NAPAPAGAAN ak nen inmalis ak dia,” kuan nen Allen. * “Agko amta no wala ray nakaarok odino kasin awaten da ak.” Si Allen et mana-adjust ed balon kongregasyon to a masulok ya 1,400 kilometro so kaarawi tod abung da.

No inmalis ka ed sananey a kongregasyon, nayarin napapagaan ka met. Antoy makatulong pian makapan-adjust ka? Antoy sarag mon gawaen no aliwa manayan mainomay itan a singa ed inisip mo? Balet no aliwan sika so inmalis, panon mon natulongan ya man-adjust iramay inmalis ed kongregasyon yo?

Isipen iyan alimbawa: No saray kiew et iyalis ed sananey a lugar, nairapan ira. No bebekaen ed dalin so kiew, maslak ed saray lamot to et puputoten pian mainomay ya iyalis. Tan no niyalis la, ontubo la iray balon lamot to. Mipadpara, nayarin nairapan ka met nen inmalis ka ed sananey a kongregasyon. Diad datin kongregasyon mo, singa wala la ray “lamot” mo nen awalaan ka na maapit ya kakaaro tan apasalan mo lay espiritual ya rotinam. Natan et kaukolan moy manpatubo lamet na balon lamot pian onaligwas kad balon lugar. Antoy makatulong ed sika? Say pangiyaplika na saray prinsipyo ed Biblia. Amtaen tayo so pigara ed saratan.

Say toon regular ya manbabasa na Salita na Dios et “singa kiew ya intanem ed abay na manag-agus iran danum, sakey a kiew a manbubunga no panaon to tan agnamamagaan iray bulong to. Tan amin a gawaen to et onaligwas.”​—Sal. 1:1-3.

No kaukolan na kiew so regular a nasalog pian mansiansian mabuna, kaukolan met na sakey a Kristiano so regular ya manaral na Salitay Dios pian mansiansian mabiskeg ed espiritual. Sirin, itultuloy moy inagew-agew a pambasa na Biblia tan regular ya piaral ed kongregasyon. Pansiansiaen so niyugalim lan panagdayew na pamilya tan personal a panagaral. Amin ya pankaukolan mod espiritual diad datin kongregasyon mo et kaukolan mo met diad balon kongregasyon mo.

“Siopaman a paiinawaen toy arum et nainawaan met.”​—Pro. 11:25.

Ombiskeg ka tan makapan-adjust kan tampol no sigpot kan mibiang ed ministeryo. “Say manunan akatulong ed sikami nen asawak et say impan-auxiliary payunir mi kasabi mid balon kongregasyon mi,” kuan nen Kevin, sakey ya elder. “Akabisado min tampol iray agagi, saray payunir, tan say teritorya.” Oniay imbaga nen Roger, ya inmalis ed lugar ya masulok a 1,600 kilometro so kaarawi tod datin ayaman to: “Say baleg a makatulong pian makapan-adjust ed balon kongregasyon et say lanang ya pampulong anggad posible. Ontan met, ibagam ed saray elder ya akaparaan kan ontulong, nayarin diad panlinis na Kingdom Hall, onsandi ka no walay agto niparaan so parte to ed aral, odino diad pangilugan mod arum paonlad aral. No naimano na saray agagi ya walay balo ed kongregasyon a masakripisyo, maliket da kan awaten.”

“Ilukas yo met a maong so puso yo.”​—2 Cor. 6:13.

Inatnat yoy panangaro yo ed agagi. Nen si Melissa tan say pamilya to et inmalis ed sananey a kongregasyon, nansagpotan day nawalaan na balon kakaaro. “Mililimog kami ed saray agagi diad  Kingdom Hall antis tan kayari na aral,” so kuan to. “Kanian walay panaon min nakatongtong ira aliwan basta labat ira ibano.” Tinmulong met iya pian nakabisadon tampol na pamilya da so ngaran na agagi. Innatnat da met so panangaro rad agagi diad impamarawes dad sikara, kanian apaapit ira ed balon kakaaro da. Inyarum to: “Inala mi ray phone number da tan inter mi met so number mi, pian nakontak da kami tan nipila da kamid espiritual iran kimey tan arum nin aktibidad.”

No pampapagaan mo no panon kan mitongtong ed saray agmo ni kabat, nayari kan onggapo ed simplin paraan. Singa bilang, imis ka​—anggano agka komportable ed gapo. Anlemew so liknaan na arum ed sika no imisan mo ra, ta say “maligsan mata et paliketen toy puso.” (Pro. 15:30, paimanod leksab) “Sipor ak lan mabaing,” kuan nen Rachel, ya inmalis ed lugar ya arawrawi ed binalegan to. “No maminsan et kaukolan kon piliten so sarilik ya mitongtong ed saray agagi ed balon kongregasyon ko. Mananap ak na sakey ya akayurong labat diad Kingdom Hall tan anggapoy katongtong to. Nayarin sikatoy mabaing met a singa siak.” Akin ta no panseetan moy mitongtong ed sakey ya agmo ni kabat antis tan kayari na aral?

Siempre, nayarin eksayted kan mikabat ed agagi diad unonan pigaran simba. Balet say ontan ya liknaan et nayarin naandi diad ilabas na panaon. No ontan, ompan kaukolan moy mansagpot pian nitultuloy moy nawalaan na balon kakaaro.

Wala ray kiew a mas mabayag ya onlamot nen say arum diad balon pasen ya akataneman da. Mipadpara, aliwan parepareho so kapeles na kada sakey ya man-adjust ed balon kongregasyon da. No medyo abayag ka lan inmalis balet ta naiirapan ka nin siansia ya man-adjust, makatulong irayan prinsipyo ed Biblia:

“Ag-itayo ontutundan manggawa na maabig, ta diad manepeg a panaon et manani itayo no ag-itayo onkesaw.”​—Gal. 6:9.

Ikdan mo ni mas dakel a panaon so sarilim ya man-adjust nen say inilaloan mo. Singa bilang, dakel ya misioneron nipasal ed Gilead so pigay taon nin nansiansia ed asainmin dad arum ya bansa antis iran pinmawil ed bansa ra pian ombisita. Akatulong itan pian napaapit ira ed saray agagi ed lugar ya panlilingkoran da tan makapan-adjust ira ed duman kultura.

Si Alejandro, ya aminpiga lan inmalis, et amta to ya agnayarin apuraen so pan-adjust. Inkuan to: “Diad samay sampot ya inyalis mi et imbaga nen asawak, ‘Amin ya kaarok et walad datin kongregasyon ta!’” Impanonot tod asawa to ya ontan a mismo so imbaga to duay taon lay apalabas—nen inmalis ira. Balet legan na saman ya duaran taon, impanengneng toy personal ya interes ed arum tan nagmaliw ya maapit a kakaaro to iramay datin agto kabat.

“Agmo ibabaga, “Akin et mas maabig iray agew nensaman nen say natan?” ta aliwa kan marunong no itepet mo ’ya.”​—Ecl. 7:10.

Agmo ikokompara so balon kongregasyon mo ed samay dati. Singa bilang, saray agagi ed balon kongregasyon mo et nayarin mas mabaing odino mas maistorya nen say apasalan mo. Manpokus kad saray positibon ugali ra, a singa ed labay mon gawaen dad sika. Wala ray inmalis ya kasabi rad balon kongregasyon da et agda inilaloan ya nitepet dad  sarili ra, ‘Talaga kasin inarok so “amin ya agagi”?’​—1 Ped. 2:17.

“Mantultuloy kayon onkerew, tan naikdan kayo.”​—Luc. 11:9.

Itultuloy moy manpikasi pian onkerew na tulong. “Agmo itan aanosan ya bukor,” kuan nen David a sakey ya elder. “Dakel iray bengatla ya nagawaan tayo labat diad tulong nen Jehova. Ipikasim itan!” Onabobon ed satan si Rachel ya abitla niman. Imbaga to: “No nalilikna mi nen asawak ya singa agkami kabiangan na kongregasyon, espisipiko min ipipikasi ed si Jehova ya, ‘Ipaamtam komon ed sikami no walay gagawaen mi a sengegan ya naiirapan so arum ya onapit ed sikami.’ Insan mangigana kami na mas dakel a panaon ya nakaiba iray agagi.”

Atateng, no nanairapan ya mibagay ed arum so ananak yo, ipikasi yo itan a kaiba ira. Tulongan yo ran nawalaan na balon kakaaro diad pangiyuksoy yo na makapaseseg iran panlilimog na agagi.

Antoy nagawaan mo pian natulongan iray balon inmalis ed kongregasyon yo? Diad gapo ni labat et panseetan mo lay magmaliw ya tuan kaaro. Pian nagawaan itan, isip mo no anto ray nayarin naapresyam no sika so inmalis, insan gawam iratan. (Mat. 7:12) Sarag mo kasin ipila iray balo ni diad panagdayew na pamilya yo odino diad pambantay na binulan a programa na JW Broadcasting? Sarag mo kasi ran imbitaan ya miulop ed sika diad ministeryo? No imbitaan mo ran mangan anggano simpli labat so itaryam, agda nalingwanan so pamarawes mo. Anto ni ray nitulong mo ed saray balon inmalis ed kongregasyon yo?

“Kasabi mi ed balon kongregasyon mi,” kuan nen Carlos, “walay sister ya inikdan to kami listaan na saray tindaan ya mamuray lako da. Baleg ya tulong itan.” Saray balon inmalis ed lugar ya duma so klima et naapresya da no ibaga yod sikara no antoy nayarin isulong da no ampetang, ambetel, odino mamauran. Sarag mo met iran tulongan a magmaliw ya mas epektibo ed ministeryo no istoryaen mod sikara so history na lugar yo odino ibagam ed sikara no anto ray relihyon na totoo ditan.

Si Allen ya abitla niman et masulok lan sakey taon to ed balon kongregasyon to. Imbaga to: “Diad gapo et kaukolan koy mansagpot pian nakabat iray agagi. Balet natan et singak la ra kapamilya, tan malikeliket ak.” A-realize nen Allen ya diad inyalis to et ag-abawasan so kakaaro to noagta naaruman, a nayarin mansiansia ran kakaaro to legay bilay.