Ungenelisa Ukwenza Izinqumo Ezinhle Lanxa Kungelamthetho OseBhayibhilini
KUNGENZEKA usesemncane abazali bakho babekunika imithetho eminengi. Kodwa wathi usukhulakhulile wakuzwisisa ukuthi babekwenza lokhu ngoba babekuthanda futhi befuna ukukuvikela. Lanxa khathesi usungumuntu omdala, kumele ukuthi usakulandela okunye abakufundisa khona.
UBaba wethu osezulwini uJehova usinika imithetho esebenzisa iLizwi lakhe iBhayibhili. Ngokwesibonelo, kafuni sikhonze izithombe, sifebe kumbe sitshontshe. (U-Eksodusi 20:1-17; ImiSebenzi 15:28, 29) Nxa siqhubeka sisondela kuJehova siyananzelela ukuthi usinika imithetho ngoba uyasithanda futhi ufuna ukusivikela.—Kwabase-Efesu 4:15; U-Isaya 48:17, 18; 54:13.
Kodwa ayisizozonke izimo lapho iBhayibhili elisinika khona imithetho. Yikho abanye becabanga ukuthi nxa kungelamthetho endabeni ethile kutsho ukuthi sebengazenzela umathanda. Bathi nxa kuyikuthi into yakhona ibiqakathekile kuNkulunkulu, ubezahle afake umthetho ophathelane lendaba leyo.
Labo abacabanga ngendlela le bajayele ukwenza izinqumo ezimbi abacina bezisola ngazo. Bayehluleka ukuzwisisa ukuthi iBhayibhili alilamithetho kuphela kodwa liyasitshengisa lendlela uNkulunkulu acabanga ngayo. Nxa sibala iBhayibhili siyafunda ngalokho okuthokozisa uJehova lalokho okungamthokozisiyo. Ukwenza njalo kuyawuqeqetsha umzwangedwa wethu besekusinceda ukuthi senze izinqumo ezinhle. Nxa singakhetha kuhle, uJehova uyathokoza, lathi futhi siyathokoza.—Kwabase-Efesu 5:1.
Izibonelo Ezinhle EziseBhayibhilini
IBhayibhili lisitshela ngamadoda labesifazana bakudala abanengi abenza izinqumo ezithokozisa uJehova lanxa kwakungelamthetho otshoyo ukuthi benzeni. Omunye wabo nguJosefa. UmkaPhothifa wamncenga ukuthi alale laye kodwa yena wala lanxa ngalesosikhathi kwakungelamthetho othi ukufeba kubi. UJosefa wananzelela ukuthi nxa engalala laye uyabe esenza into embi futhi ‘esonela uNkulunkulu.’ (UGenesisi 39:9) Kumele ukuthi wayekwazi ukuthi uJehova watshela u-Adamu lo-Eva ukuthi abantu abatshadileyo kumele bathembeke.—UGenesisi 2:24.
Nansi esinye isibonelo. KumiSebenzi 16:3 sitshelwa ukuthi uPhawuli waqala wasoka uThimothi engakahambi laye kuhambo lwakhe engumnali. Uvesi 4 usitshela ukuthi uPhawuli loThimothi bahamba emadolobheni “betshela abazalwane izinqumo ezazenziwe ngabaphostoli labadala eJerusalema ukuze bazilandele.” Esinye isinqumo sasingesokuthi kwakungaselasidingo sokuthi amaKhristu asokwe. (ImiSebenzi 15:5, 6, 28, 29) Manje kungani uPhawuli wasoka uThimothi? “Wamsoka ngoba wonke amaJuda akulezondawo ayesazi ukuthi uyise [kaThimothi] wayengumGrikhi.” UPhawuli wayengafuni ukukhuba abanye. Wayefuna amaKhristu enze ‘okuqondileyo phambi kukaNkulunkulu ukuze yonke imizwangedwa yabantu ikunanzelele lokho.’—2 KwabaseKhorinte 4:2; 1 KwabaseKhorinte 9:19-23.
UPhawuli loThimothi babehlala betshengisa ukuthi balendaba labanye nxa besenza izinqumo. Bala indaba ekuRoma 14:15, 20, 21 laku-1 Khorinte 8:9-13; 10:23-33, ukuze ubone ukuthi uPhawuli wayezimisele ukwekela ukwenza ezinye izinto lanxa zingazimbi ukuze angakhubi abanye futhi enze kube nzima ukuthi bakhonze uJehova. UPhawuli wabhala ngoThimothi wathi: “Kangilaye omunye onjengaye ozakuba lendaba lani ngenhliziyo yonke ngoba abanye bonke baqakathekisa lokho bona abakufunayo hatshi okufunwa nguJesu Khristu. Kodwa liyakwazi ukuthi uThimothi watshengisa ukuthi yena ufanele sibili ngoba njengomntwana osebenza loyise, wasebenza lami gadalala ukuze izindaba ezinhle ziqhubekele phambili.” (KwabaseFiliphi 2:20-22) Kumele silingisele isibonelo esihle sikaPhawuli loThimothi. Lanxa kwakungelamthetho endabeni leyo, kabazange benze lokho okwakufunwa yibo kodwa balingisela uJehova leNdodana yakhe ngokwenza izinqumo ezazizanceda abanye ukuthi bakhonze uJehova.
UJesu Khristu uyisibonelo esihle kulazo zonke. ENtshumayelweni yaseNtabeni wachasisa ukuthi kumele silalele imithetho uJehova asinika yona siphinde sizwisise lokuthi yindaba esiphe imithetho leyo. Nxa singenza njalo sizakwenza izinqumo ezinhle lanxa kungelamthetho. (UMathewu 5:21, 22, 27, 28) UJesu, uPhawuli, uThimothi loJosefa abazange bacabange ukuthi bangazenzela umathanda nxa kungelamthetho otshoyo ukuthi benzeni. Batshengisa ukuthi babelandela indlela uNkulunkulu acabanga ngayo ngoba balalela imithetho emibili uJesu athi mikhulu kulayo yonke, ethi kumele sithande uJehova lomakhelwane.—UMathewu 22:36-40.
Kuthiwani Ngathi?
IBhayibhili alifanani lezincwadi zomthetho eziyabe zibhalwe konke umuntu okumele akwenze lalokho okungamelanga akwenze. UJehova uyathokoza kakhulu nxa esibona sizama ukwenza izinto azifunayo lanxa kuyabe kungelamthetho ocacileyo endabeni yakhona. Ngamanye amazwi akumelanga silindele ukuthi uNkulunkulu ahlale esitshela lokho afuna sikwenze kodwa siyenelisa ‘ukuqedisisa lokho okuyintando yakhe.’ (Kwabase-Efesu 5:17; KwabaseRoma 12:2) UJehova uyathokoza nxa singenza njalo ngoba kuyabe kutshengisa ukuthi asigijimisi okufunwa yithi kodwa sifuna ukwenza lokho okumjabulisayo. Kuyabe kutshengisa lokuthi siyalubonga uthando asitshengisa lona yikho sifuna ukumlingisela lathi sibathande abanye. (IZaga 23:15; 27:11) Kanti njalo nxa singasebenzisa iBhayibhili ukuze sizwisise lokho uJehova afuna sikwenze, sizakuba ngabangane bakhe abaseduze futhi sibe lempilakahle.
Ake sibone ukuthi singazenza njani izinqumo ezinhle.
Ukukhetha Ezokuzilibazisa
Akucabange ngejaha elifuna ukuthenga i-album yezingoma ezithile. Liyazithanda ingoma ezikuyo kodwa likhathazeka ngokuthi amanye amazwi asezingomeni ezilapho akhuluma bhadla ngendaba zemacansini futhi asebenzisa amabala angcolileyo. Liyakwazi lokuthi umhlabeleli lo uhlabela ezondile futhi ekhuthaza udlakela. Ijaha leli liyamthanda uJehova njalo lilendaba lendlela acabanga ngayo lazizwa ngayo. Manje lingenzani ukuze liqedisise intando kaNkulunkulu endabeni le?
Encwadini umphostoli uPhawuli ayibhalela abaseGalathiya waqamba imisebenzi yenyama lezithelo zomoya. Kumele ukuthi uyakwazi ukuthi izithelo zomoya zigoqela uthando, ukuthokoza, ukuthula, ukubekezela, umusa, ubuhle, ukholo, ubumnene lokuzibamba. Kodwa kuthiwani ngemisebenzi yenyama? UPhawuli wabhala wathi: “Imisebenzi yenyama iyazikhanyela njalo yile: Ukufeba, lokungcola, lokuxhwala, lokukhonza izithombe, lokusebenzelana lemimoya, lenzondo, lokuxabana, lomhawu, lolaka, lezimpikiswano, lokwehlukana, lokulandela imfundiso zabantu, lomona, lokudakwa, lamadili axokozelayo lezinye izinto ezinjengalezi. Ngilixwayisa ngezinto lezi kusesengaphambili ngendlela engake ngalixwayisa ngayo, ngithi abalomkhuba wokwenza izinto lezi abasoze balithole ilifa loMbuso kaNkulunkulu.”—UGalathiya 5:19-23.
Nanzelela amazwi asekucineni athi, “lezinye izinto ezinjengalezi.” UPhawuli kazange aqambe zonke izinto eziyimisebenzi yenyama. Yikho akulangqondo ukuthi umuntu athi, ‘IBhayibhili liyangivumela ukuthi ngenze loba yini uPhawuli angayiqambanga emisebenzini yenyama.’ Kodwa kumele umuntu ngamunye asebenzise amandla akhe okucabanga ukuze abone ezinye izinto ‘ezinjengalezo,’ ezingaqanjwanga nguPhawuli. Labo abenza ngabomo izinto ezingaqanjwanga kodwa ‘ezinjengalezo’ abasoze balithole ilifa loMbuso kaNkulunkulu.
Lokhu kutsho ukuthi kumele siqedisise lokho okungamthokozisiyo uJehova. Kunzima yini ukwenza lokho? Ake sithi udokotela wakho ukutshela ukuthi udle izithelo ezinengi kanye lemibhida kodwa ungadli ama-pie, i-ice cream, lezinye izinto ezinjengalezo. Kungaba nzima yini ukubona ukuthi kumele ulidle yini ikhekhe? Khathesi khangela futhi izinto eziqanjwe emisebenzini yenyama lesezithelweni zomoya kaNkulunkulu. Ucabanga ukuthi ingoma esikhulume ngazo phezulu zona zingena kukuphi? Kuyazicacela ukuthi awungeni lapho okulothando, ubuhle, ukuzibamba kumbe kwezinye impawu eziqanjwe ezithelweni zomoya. Ijaha lelo ngeke lidinge ukuthi kuze kube lomthetho ocacileyo otshoyo ukuthi uJehova kawuthandi umculo onjalo. Lokhu esixoxe ngakho kuyasebenza lasekukhetheni esikubalayo, amamuvi, inhlelo ze-TV, imidlalo ekukhompiyutha, amawebhusayithi atshiyeneyo lokunye okunjalo.
Ukukhetha Indlela Yokugqoka Lokuzilungisa
IBhayibhili liphinda lisincede sikhethe kuhle endabeni yokugqoka leyokuzilungisa. Lokhu kunceda wonke amaKhristu ukuthi agqoke kuhle futhi ngendlela efaneleyo. Lalapha sithola ithuba lokwenza okuthokozisa uBaba wethu osezulwini kulokwenza loba yini esiyifunayo. Njengoba sibonile ukuthi uJehova kazange asinike umthetho ocacileyo endabeni ethile akutsho ukuthi kalandaba lokwenziwa ngabantu. Abantu bagqoka ngendlela ezitshiyeneyo kusiya ngokuthi bavela ngaphi futhi izitayila ziyatshintsha ngokuhamba kwesikhathi. Lanxa kunjalo uNkulunkulu uyasinceda ukuthi sigqoke njalo sizilungise kuhle kungelani lokuthi sihlala ngaphi lokuthi yisiphi isikhathi esiphila kuso.
Ngokwesibonelo u-1 Thimothi 2:9, 10 uthi: “Labesifazana kumele bacece ngezigqoko ezilesithunzi, ezingadlulisi amalawulo futhi ezitshengisa ukuthi bazisebenzisa kuhle ingqondo zabo, kungabi ngezitayila zokweluka inwele kumbe ngegolide langamaphareli loba ngezigqoko ezidula kakhulu kodwa ngendlela efanele abesifazana abathi bazinikele kuNkulunkulu, okutsho ukuthi bacece ngemisebenzi emihle.” Yikho amadoda labesifazana abangamaKhristu kumele bacabangisise ngokuthi abantu abasemphakathini wabo bathi yikuphi ukugqoka lokuzilungisa okufanele labo ‘abazinikele kuNkulunkulu.’ Kuqakathekile ukwenza njalo ngoba indlela esigqoka ngayo ingayitshintsha indlela abantu ababona ngayo iBhayibhili. (2 KwabaseKhorinte 6:3) Sifuna ukuba yizibonelo ezinhle, ngakho asisoze siqakathekise kakhulu ukugqoka esikufunayo khona kucaphula kumbe kukhuba abanye.—UMathewu 18:6; KwabaseFiliphi 1:10.
Nxa singabakwazi ukuthi indlela esigqoka kumbe esizilungisa ngayo iyabakhuba abanye, kumele senze njengoPhawuli sitshintshe ukuze sincede abanye bakhonze uJehova. UPhawuli wathi: “Ngilingiselani njengoba lami ngilingisela uKhristu.” (1 KwabaseKhorinte 11:1) Wabhala ngoJesu wathi: “LoKhristu kazange azithokozise.” Nanku umcijo oqakathekileyo uPhawuli ayewutshela wonke amaKhristu: “Thina esilamandla kufanele sithwale ubuthakathaka balabo abangelamandla kulokuthi sizithokozise thina. Ngamunye wethu kathokozise umakhelwane wakhe, amenzele okuhle okuzamakha.”—KwabaseRoma 15:1-3.
Qeqetsha Amandla Akho Okucabanga
Singenzani ukuze siqeqetshe amandla ethu okucabanga ukwenzela ukuthi senelise ukuthokozisa uJehova lanxa kungelamthetho endabeni ethile? Kumele sibale iBhayibhili nsuku zonke, sizame ukuzwisisa elikutshoyo futhi sicabangisise ngesikubalayo ukuze sifunde okunengi ngalokho okuthokozisa uJehova njalo senze izinqumo ezinhle. Kodwa lokhu akwenzakali ngelanga elilodwa. Njengoba nje kuthatha isikhathi ukuthi umntwana akhule, ukusondela kuJehova lokwenza izinqumo ezinhle kuthatha isikhathi ukuthi kubonakale. Yikho kumele sibekezele. Akumelanga sidane kumbe siphele amandla nxa sibona siphuza ukuthuthuka. Kodwa ukuhamba kwesikhathi ayisikho okuzasenza sithuthuke. Kumele ngalesosikhathi sibe sibala iBhayibhili futhi sisenza konke okusemandleni ethu ukuze sithokozise uJehova.—KumaHebheru 5:14.
Nxa uJehova esinika umthetho besesiwulandela siyabe sitshengisa ukuthi siyamlalela. Kodwa nxa kungelamthetho, siyazama ukwenza izinqumo ezimthokozisayo futhi ukwenza njalo kutshengisa ukuthi siyamthanda sibili lokuthi siyafuna ukumthokozisa. Nxa iminyaka iqhubeka ihamba sikhonza uJehova njalo sisondela kuye sizafuna ukumlingisela kakhulu yena leNdodana yakhe. Sizavumela ukuthi iBhayibhili lisincedise senze izinqumo ezimthokozisayo. Nxa singathokozisa uBaba wethu osezulwini kukho konke esikwenzayo lathi sizathokoza kakhulu.
[Umfanekiso]
Abantu bagqoka ngendlela ezitshiyeneyo kusiya ngokuthi bavela ngaphi kodwa kumele siqondiswe liBhayibhili ukuze sikhethe kuhle