Biiblã sɩd yaa Wẽnnaam Gomd bɩ?

“Gʋlsg Sõamyã zãng yaa Wẽnnaam n kõ tõndo: La a bee bark zãmsg yĩnga, la tɩ wilg ned a kongre, la saglg yĩnga, la tɩ zãms tɩrlem, tɩ Wẽnnaam ned tõe n bɩ la a maan tʋʋm sõma fãa.”—2 TƖMOTE 3:16, 17.

AD TƲM-TƲMD a Poll gom-kãensã sɩd tar pãnga! B wilgda Biiblã yõod sẽn ta zĩig ningã. Yaa vẽeneg tɩ yaa Biiblã babg ning b sẽn da zoe n gʋls n sa a Poll wakatẽ wã yell la a sẽn gomã, rat n yeel tɩ babg-ning neb wʋsg sẽn boond tɩ kãab-kʋdgã. La d tõe n yeelame tɩ yaa woto me ne Biiblã sɛb 66 fãa, sɛb nins a Zezi karen-biisã sẽn gʋlsã me sẽn naage.

Yãmb me nanda Biiblã ne y sũur fãa wa a Poll bɩ? Y kɩsa sɩd tɩ yaa Wẽnnaam n vẽneg neb nins sẽn gʋls-a wã bɩ? A Zezi pipi karen-biisã ra tẽeda woto, la hal ne rũndã me, kiris-neb hakɩkã ket n tẽeda woto. Pĩnd neb wʋsg me ra tẽeda rẽ. Wala makre, Ãngeletɛɛr ned a John Wycliffe sẽn yɩ tũudum taoor soab a ye, n vɩɩmd yʋʋmd 1 300 wã sẽnesã ra yeelame tɩ Biiblã ‘gomd fãa yaa sɩda.’ Biiblã gom-biis võor wilgr sebr a ye (Nouveau dictionnaire biblique) goma a Poll goam nins sẽn be sõsgã sɩngrẽ wã yelle, n yeel tɩ “sẽn yaa Wẽnnaam n vẽneg Biiblã gʋlsdbã yĩnga, a goamã fãa yaa sɩda.”

Nebã wa n pa le nand Biiblã ye

La sẽn nan pa kaoose, neb wʋsg yikame n pa le tagsdẽ tɩ Biiblã yaa Wẽnnaam Gomd ye. Sebr a yembr (Guide illustré des religions dans le monde) yeelame tɩ “neb nins fãa sẽn yet tɩ b yaa kiris-nebã [ket n] yeta ne noor tɩ Biiblã yaa Wẽnnaam Gomde, la tɩ yaa Biiblã n wilgd  bãmb b sẽn segd n vɩɩmd to-to, la b sẽn segd n tẽ bũmb ninsã.” La baa sã n da yaa woto pĩnd me, d sã n ges b tʋʋmã, d mikdame tɩ pa le yaa woto ye. Rũndã-rũndã, neb wʋsg tagsdame tɩ Biiblã goam yaa ninsaalb tagsg bala, la tɩ d pa tõe n teeg-b ye. B sak n deegame tɩ Biiblã gʋlsdb ra yaa wẽn-tũudb hakɩka, la b yetame tɩ baa b sã n makame n na n taas nebã Wẽnnaam goam sẽn tar pãnga, bãmb me yaa koangdb wa tõndo, la tɩ rẽ me, b bãngrã la b yam-vẽenemã ra pa ta rũndã-rũndã nebã rẽnd ye.

Sɩd-sɩda, rũndã-rũndã neb nins sẽn sɩd sakd Biiblã goamã, n basdẽ t’a remsd b tagsgã, la a wilgd-b b sẽn segd n vɩɩmd to-to wã sõor paoodame. Rẽ yĩnga y pa wae n wʋmd neb sẽn yet tɩ Biiblã sagls yaa pĩnd wẽndẽ rẽnda, la tɩ d pa tõe n le tũ-b sɩda? Neb wʋsg wẽnda Biiblã noyã tɩ zemsd ne b raabo, tɩ sã n mik tɩ wõnda b tũubã yaa toog bɩ b pʋd n yãk yam n pa tũudẽ ye. Neb kẽer sẽn yet tɩ b yaa kiris-neb kɩɩsda Biiblã noy vẽeneg-vẽenega, n yooda, n tʋmd pʋ-lik tʋʋm toor-toore, la b yũud rãam tɩ loogdẽ.—1 Korẽnt dãmba 6:9, 10.

Bõe yĩng tɩ b maand woto? A Sir Charles Marston sẽn yɩ tẽn-vaeesdã wilga bʋʋm a yembre. A sebr a ye, (La Bible a dit vrai) a sẽn gʋls yʋʋmd 1900 soabã sẽnes pʋgẽ, a yeelame tɩ bãmb wakatẽ neb kẽer sẽn wa n sɩng sɛb yiisg n wɩt Biiblã, “wʋsg saka b goamã nana-nana n pa kɩɩs ye.” Rẽ yĩnga, ket n yaa woto rũndã-rũndã me bɩ? Y tagsg segd n yɩɩ wãn ne goam wall sɛb nins bãngdb kẽer sẽn gʋlsd n wɩt Biiblã, n wilgdẽ tɩ d pa tõe n teeg-a wã? Karm-y sõsg ning sẽn pʋgdã t’a gomda rẽ yelle.