Tõod sebre 24:1-22
24 “Rao sã n kẽ kãadem ne paga, n wa pa le rat-a a sẽn yã bũmb sẽn pa zems a nengẽ yĩnga, a segd n gʋlsa basg sebr n kõ-a,+ la a yiis-a a zakẽ wã.+
2 A sã n yi raoã zakẽ wã n looge, a tõe n tɩ lebga rao a to paga.+
3 Ra-kãng sã n kisg-a, n gʋls basg sebr n kõ-a la a yiis-a a zakẽ wã, wall ra-kãng sẽn kẽ kãadem ne-a wã maana kaalem,
4 a pipi sɩdã sẽn bas-a wã pa tar sor n na n le rɩk-a n maan a paga, pagã sẽn dẽgmã poor ye. Bala rẽ yaa bũmb a Zeova sẽn kisi. Yãmb pa segd n wa ne yel-wẽnd soolem ning yãmb Wẽnnaam a Zeova sẽn na n kõ yãmb tɩ yɩ y pʋɩɩrã pʋgẽ ye.
5 “Rao sã n kẽ kãadem paalem, b pa segd n bas t’a kẽng zabre, wall b kõ-a tʋʋmd buud a to ye. A segd n kell n zĩnda yir yʋʋmd tõr n pa maan baa fʋɩ, n noog a pagã sũuri.+
6 “Ned pa segd n deeg a to neer bɩ a neer kugr n gãnege, a sẽn tar a samd yĩng ye.+ Bala woto na n yɩɩ a sẽn deeg bũmb a soabã sẽn teeg n vɩ.*
7 “B sã n yã ned sẽn yõk a saam-biig sẽn yaa Israyɛll neda, n nams-a la a koos-a,+ sẽn yõk-a a to wã segda ne kũum.+ Yãmb segd n yiisa bũmb ning fãa sẽn yaa wẽng yãmb sʋka.+
8 “Wãood* sã n yõk ned wall bũmbu, gũus-y neer n maan bũmb nins fãa maan-kʋʋdbã sẽn yaa Levi buudã nebã sẽn na n wilg yãmbã.+ Gũus-y neer n maan mam sẽn yeel-b bũmb ningã kɛpɩ.
9 Tẽeg-y yãmb Wẽnnaam a Zeova sẽn maan a Miryam bũmb ning sorã zugã, yãmb sẽn wa n yi Ezɩptã.+
10 “Sẽn yaa bũmb ning fãa la f peng f to,+ fo pa segd n kẽ a zakẽ wã n deeg bũmb ning a sẽn na n gãneg ne foomã ye.
11 Fo segd n yalsa yɩnga, tɩ ned ning fo sẽn pengã tall bũmb ning a sẽn na n gãnegã n wa kõ-fo.
12 La a sã n bee pakr pʋgẽ, fo pa segd n kẽ gãag tɩ bũmb ning a sẽn gãnegã ket n be ne foo ye.+
13 Fo segd n maana f sẽn tõe fãa n lebs-a bũmb ning a sẽn gãnegã, wĩndgã sã n wa kẽ bala. Woto, a na n kẽe gãag ne a fuugã,+ la a ning foo barka. Dẽ, fo na n yɩɩ tɩrg yãmb Wẽnnaam a Zeova taoore.
14 “Fo sã n dɩk ned sẽn be pakr pʋgẽ, la sẽn yaa naong soab tʋʋma, fo pa segd n wẽg-a, a yaa fo saam-biig wall sãan sẽn be yãmb soolmã tẽnsẽ ye.*+
15 Fo segd n yao-a-la a ligdã baraar bala,+ nand tɩ wĩndgã kẽ. Bala a bee pakr pʋgẽ, la a teeg a yaoodã n vɩ. Sã n pa rẽ, a na n kelem n boola a Zeova fo sẽn pa yao-a wã yĩnga, la yel-wẽnd taal na n zĩnda fo zugu.+
16 “B pa segd n kʋ ba-rãmba, bũmb b kamb sẽn maan yĩng ye. B pa segd n kʋ kamb me, bũmb b ba-rãmb sẽn maan yĩng ye.+ B segd n kʋʋ ned a meng yel-wẽnd yĩnga.+
17 “Yãmb pa segd n kao sãan bɩ kɩɩb* bʋʋd kɛgr ye.+ La yãmb pa segd n deeg pʋg-kõor fuug n gãneg n yaool n peng-a bũmb ye.+
18 Tẽeg-y tɩ yãmb ra yaa yembs Ezɩpt soolmẽ wã, tɩ yãmb Wẽnnaam a Zeova fãag yãmb beenẽ.+ Yaa rẽ yĩng la mam sẽn yet yãmb tɩ y maan woto wã.
19 “Fo sã n kẽeb f pʋʋgã, n yĩm ka-gĩnd pʋʋgã pʋgẽ bɩ f ra lebg n tɩ rɩk ye. Fo segd n basa rẽ n kõ sãambã, kɩɩbsã la pʋg-kõapã,+ sẽn na yɩl tɩ fo Wẽnnaam a Zeova ning bũmb nins f sẽn maandã fãa barka.+
20 “Fo sã n wa wobd* f oliiv tɩɩga, fo pa segd n leb wilẽ wã n le tɩ wob ye. Biis nins sẽn na n pa wã na n yɩɩ sãambã, kɩɩbsã la pʋg-kõapã rẽnda.+
21 “Yãmb sã n tigs y viyn pʋʋgã biisi, yãmb pa segd n lebg n tɩ yiis sẽn pa wã ye. Na n yɩɩ sãambã, kɩɩbsã la pʋg-kõapã rẽnda.
22 Tẽeg-y tɩ yãmb ra yaa yembs Ezɩpt soolmẽ wã. Yaa rẽ yĩng la mam sẽn yet yãmb tɩ y maan woto wã.
Vẽnegr toor-toore
^ Bɩ, “sẽn deeg a vɩɩmã. sẽn deeg a sɩɩgã.”
^ Ebre wã gom-bil ning b sẽn lebg tɩ “wãoodã” võor yalmame. Tõe n yɩɩ yĩn-gãongã bãas buud toor-toor sẽn longde. Le tõe n yɩɩ bãas kẽer sẽn yõkd fut la roto.
^ Ebre, “rignoyẽ wã ye.”
^ Ebre, “biig sẽn pa tar ba.”
^ Ebre, “pãbd.”
