Tõod sebre 22:1-30
-
F sẽn segd n tall manesem ning ne f to rũnga (1-4)
-
Pag pa segd n yeelg rao fuugu, rao me pa segd n yeelg pag fuug ye (5)
-
Fo sã n yã liuul sẽn be a tʋk pʋgẽ bɩ f ra maan-a wẽng ye (6, 7)
-
Fo segd n ninga kogr f roogã zugẽ (8)
-
Bũmb toor-toor b sẽn pa segd n kalem taaba (9-11)
-
Fo segd n ninga f futã noy a naasã zerdo (12)
-
Noy pag ne rao lagengã wɛɛngẽ (13-30)
22 “Fo sã n yã f saam-biig loalg wall a pesg sẽn meneme, fo pa segd n maan wa f pa yã-a ye.+ Fo segd n tall-a lame n tɩ kõ f saam-biigã.
2 La f saam-biigã zak sã n pa pẽ foo, wall f pa mi-a, fo segd n talla rũngã n kuili. Rũngã na n paa fo nengẽ n tãag f saam-biigã sẽn na n wa gẽesd-a. Dẽ, fo segd n lebs-a-la a rũngã.+
3 Yaa woto la fo segd n maan ne a bõanga, a fuugu, la f saam-biig bũmb ning fãa sẽn menem tɩ fo yã. Fo pa segd n maan wa f pa yã ye.
4 “Fo sã n yã f saam-biig bõang wall a loalg sẽn lʋɩ n gãe sorã zugu, fo pa segd n maan wa f pa yã ye. Fo segd n sõng-a lame tɩ y yik rũngã.+
5 “Pag pa segd n yeelg rao fuugu, rao me pa segd n yeelg pag fuug ye. Bala yãmb Wẽnnaam a Zeova kisa ned sẽn maand woto.
6 “Fo sã n kẽnd sor zug n wa yã liuul tʋk t’a kambã wall a gɛlã be be, yaa tɩɩg zug wall tẽnga, tɩ ma wã wũg a kambã wall a gɛlã zugu, fo pa segd n dɩk ma wã ne a kambã fãa ye.+
7 Fo segd n basa ma wã t’a looge. La fo tõe n wʋka a kambã. Maan woto sẽn na yɩl tɩ bũmb fãa yɩ sõma ne foo, la tɩ f vɩɩmd n kaoose.
8 “Fo sã n me ro-paalle, fo segd n ninga kogr f roogã zugẽ,+ sẽn na yɩl tɩ ned sã n wa yi be n lʋɩ, bɩ zɩɩm taal ra zĩnd f zakã neb zug ye.
9 “Fo pa segd n bʋd kood buk a yiib f viyn pʋʋgẽ ye.+ Sã n pa rẽ, bũmb ning fo sẽn bʋdã sẽn na n womã, ne viyn pʋʋgã sẽn na n womã fãa na n lebga Wẽnnaam doogã rẽnda.
10 “Fo pa segd n balg loalg ne bõang n naag taab tɩ b ko ye.+
11 “Fo pa segd n yeelg fuug b sẽn wʋg ne pe-kõbd la lẽ gĩs sẽn naag taab ye.+
12 “Fo segd n ninga f fu-goabgã f sẽn tar n pindẽ wã noy a naasã zerdo.*+
13 “Rao sã n dɩk pag n kẽ ne-a, n wa kisg-a,
14 n dõd-a t’a talla manesem-wẽnga, la a sãam a yʋʋrã n yeel yaa: ‘Mam dɩka pʋg-kãngã, la mam sẽn kẽ ne-a wã, m pa yã kaset sẽn wilgd t’a ra pa mi rao ye.’
15 Dẽ, bi-puglã ba wã ne a ma wã segd n kõo kãsem-dãmbã sẽn be tẽngã rignoorẽ wã kaset sẽn wilgd tɩ bi-puglã ra pa mi rao ye.
16 Bi-puglã ba wã segd n yeela kãsem-dãmbã yaa: ‘Mam dɩka m bi-puglã n kõ ra-kãngã t’a maan a paga, la a kisg-a lame,
17 n dõd-a t’a talla manesem-wẽnga, n yetẽ yaa: “Mam mikame tɩ fo bi-puglã pa tar kaset sẽn wilgd t’a ra pa mi rao ye.” La ad kaset sẽn wilgd tɩ mam bi-puglã ra pa mi rao ye.’ Rẽ poore, b na n tẽega fuugã kãsem-dãmbã taoore.
18 Tẽngã kãsem-dãmb+ na n yõka raoã n sɩbge.+
19 B na n yeelame t’a yao wanzuri sɩkl* koabga, tɩ b kõ bi-puglã ba, bala raoã sãama Israyɛll pa-kuil yʋʋre.+ Bi-puglã na n kell n yɩɩ a paga. B pa na n sak tɩ raoã kao kãadmã, n tãag a yõor tɛka.
20 “La sã n mik tɩ yaa sɩda, tɩ kaset pa be n wilgdẽ tɩ bi-puglã ra pa mi raoa,
21 b segd n talla bi-puglã n wa a ba wã zak rignoorẽ, t’a tẽngã neb lob-a kug n kʋ, bala a maana bũmb sẽn yaa yãnd+ Israyɛlle, a sẽn yo a sẽn wa n ket n be a ba wã zakẽ wã yĩnga.+ Yaa woto la yãmb segd n yiis bũmb ning fãa sẽn yaa wẽng yãmb sʋka.+
22 “B sã n yã rao sẽn kẽed ne pag sẽn yaa rao a to paga, bãmb b yiibã fãa segda ne kũum. Rao ning sẽn kẽ ne pagã, la pagã me.+ Yaa woto la yãmb segd n yiis bũmb ning fãa sẽn yaa wẽng Israyɛlle.
23 “B sã n dɩk pa-kuil n kõ rao t’a na n maan a paga, tɩ rao a to yã-a tẽngã pʋgẽ n kẽ ne-a,
24 yãmb segd n talla b yiibã fãa n wa tẽngã rignoorẽ n lob-b kug tɩ b ki. Yaa pagã sẽn pa kelem tẽngã pʋgẽ wã yĩnga, la raoã sẽn ning a to pag yãndã yĩnga.+ Yaa woto la yãmb segd n yiis bũmb ning fãa sẽn yaa wẽng yãmb sʋka.
25 “La sã n mikame tɩ yaa weoogẽ la raoã yã pʋg-sadã b sẽn dɩk n kõ wã, n modg-a n kẽ ne-a, rao ning sẽn kẽ ne-a wã bal n segd ne kũum.
26 Yãmb pa segd n maan pʋg-sadã bũmb ye. Pʋg-sadã pa maan yel-wẽnd n segd ne kũum ye. Yellã wõnda rao sẽn zab ne a to n kʋ-a.+
27 Bala yaa weoogẽ la raoã yã pʋg-sadã b sẽn dɩk n kõ wã. Pʋg-sãdã kelmame, la ned ra kae n na n fãag-a ye.
28 “La rao sã n yã pa-kuil b sẽn nan pa rɩk n kõ, n yõk-a n kẽ ne-a tɩ b yã-ba,+
29 rao ning sẽn kẽ ne-a wã segd n kõo bi-puglã ba wã wanzuri sɩkl pis-nu. La bi-puglã na n lebga a paga.+ Raoã sẽn ning-a yãndã yĩnga, b pa na n sak t’a kao kãadmã, n tãag a yõor tɛka.
30 “Rao pa segd n peeg a ba paga, n ning a ba wã yãnd ye.+
Vẽnegr toor-toore
^ Yaa zerd b sẽn naag taab n sẽbe.
^ Sɩkl zemsa garam 11,4. Ges-y vẽnegr ning sẽn yaa B14.
