Tõod sebre 30:1-20
30 “Gom-kãensã fãa sã n wa pids yãmb zutu, barkã la kãab-wẽns nins mam sẽn ning yãmb taoorã+ sã n wa pids yãmb zutu, tɩ yãmb zĩnd buud nins yãmb Wẽnnaam a Zeova sẽn sãeeg yãmbã pʋsẽ+ n tẽeg rẽ,+
2 n lebg n wa yãmb Wẽnnaam a Zeova nengẽ,+ tɩ yãmb ne y kambã kelg a koɛɛgã ne y sũurã fãa la ne y sɩɩgã* fãa,+ wa sẽn zems bũmb nins fãa mam sẽn togs yãmb rũndã wã,
3 yãmb Wẽnnaam a Zeova na n kɩtame tɩ yãmb neb nins sẽn da be yembdã lebg n wa.+ A na n zoee y nimbãanega,+ la a yiis yãmb buud toɛy-toɛyã yãmb Wẽnnaam a Zeova sẽn sãeeg yãmbã pʋsẽ n le tigmi.+
4 Baa yãmb nin-buiidã sã n sãeegame n tãag dũniyã tɛk fãa, yãmb Wẽnnaam a Zeova na n tigma yãmb be, n tall-y n lebg n wa.+
5 Yãmb Wẽnnaam a Zeova na n tall-y lame n tɩ kẽes soolem ning y yaab-rãmbã sẽn da so wã pʋgẽ, tɩ y sooge. A na n kɩtame tɩ bũmb fãa yɩ sõma ne-yã, la a kɩt tɩ y sõorã lebg wʋsg n yɩɩd y yaab-rãmbã.+
6 Yãmb Wẽnnaam a Zeova na n yɩlga yãmb ne y yagensã sũyã,*+ sẽn na yɩl tɩ y nong y Wẽnnaam a Zeova ne y sũurã fãa la ne y sɩɩgã* fãa, la y kell n vɩɩmde.+
7 Rẽ poore, yãmb Wẽnnaam a Zeova na n kɩtame tɩ kãab-wẽn-kãensã fãa wa y bɛɛbã sẽn da kis yãmb la b namsd yãmbã zutu.+
8 “Dẽ, yãmb na n le kelga a Zeova koɛɛgã, la y tũ a noy nins fãa mam sẽn taasd yãmb rũndã wã.
9 Yãmb Wẽnnaam a Zeova na n kɩtame tɩ tʋʋm nins fãa y sẽn tʋmdã yɩ sõma wʋsg ne-yã,+ n kɩt tɩ y paam kamb la rũms wʋsgo, tɩ y tẽngã bõn-koaadlã me lebg wʋsgo. Bala a Zeova sũur na n le yɩɩ noogo, t’a kɩt tɩ bũmb fãa yɩ sõma ne-yã, wa a sũur sẽn da noom ne y yaab-rãmbã.+
10 Woto, y na n kelga yãmb Wẽnnaam a Zeova koɛɛgã, n tũ a goamã la a noyã sẽn gʋls Tõogã seb-kãngã pʋgẽ wã. Yãmb na n lebg n waa y Wẽnnaam a Zeova nengẽ ne y sũurã fãa la ne y sɩɩgã* fãa.+
11 “No-kãngã mam sẽn taasd yãmb rũndã wã pa toog wʋsg ne-yã, bɩ n yɩɩd yãmb nug ye.*+
12 No-kãng pa be saasẽ, tɩ y na n yeel yaa: ‘Ãnda n na n dʋ saasẽ n tall-a n wa kõ tõndo, sẽn na yɩl tɩ d wʋm la d tũ?’+
13 A leb n pa be mogrã rʋʋndẽ, tɩ yãmb na n yeel yaa: ‘Ãnda n na n pasg mogrã n tɩ tall-a n wa kõ tõndo, sẽn na yɩl tɩ d wʋm la d tũ?’
14 Bala gomdã pẽe yãmb wʋsgo. A bee yãmb noorẽ wã la y sũurẽ wã,+ tɩ y tõe n tũ.+
15 “Ade! Rũndã mam ningda vɩɩm ne naare, la kũum ne yel-beed yãmb taoore.+
16 Yãmb sã n kelg yãmb Wẽnnaam a Zeova noyã mam sẽn taasd yãmb rũndã wã, n nong yãmb Wẽnnaam a Zeova,+ n kẽnd a soayã zutu, la y kell n sakd a goamã, ne a noyã la a tõodã, yãmb na n kell n vɩɩmdame,+ la y lebg wʋsgo. La yãmb Wẽnnaam a Zeova na n ning-y-la bark soolem ning y sẽn dabd n na n tɩ soogã pʋgẽ.+
17 “La y sũyã sã n wẽnemd n bas Wẽnnaam+ tɩ y pa kelge, n bas tɩ y yam kẽ wẽnnaam-dãmb a taab tɩ y wõgemd b taoor n waoog-ba,+
18 mam yeta yãmb rũndã tɩ y na n sãamame.+ Yãmb pa na n vɩɩmd n kaoos soolem ning y sẽn na n dʋʋg Zʋrdẽ kʋɩlgã n tɩ soogã pʋgẽ ye.
19 Saasã la tẽngã yaa mam kaset rũndã, tɩ mam ninga vɩɩm ne kũum, la bark ne kãab-wẽng yãmb taoore.+ Yãmb segd n yãka vɩɩm, tɩ yãmb ne y yagensã kell n vɩɩmde,+
20 n nong y Wẽnnaam a Zeova,+ n kelgd a koɛɛgã, la y gãd-a kãn-kãe.+ Bala yaa yẽ la yãmb vɩɩm, la yaa yẽ maasem yĩng la y na n vɩɩmd n kaoos soolem ning a Zeova sẽn pʋlem t’a na n kõo a Abrahaam, a Izaak la a Zakoob sẽn yaa yãmb yaab-rãmbã pʋgẽ.”+
Vẽnegr toor-toore
^ Ges-y gom-biis võor bilgrã zĩigẽ.
^ Ebre, “kẽesa yãmb ne y yagensã sũy bãongo.”
^ Ges-y gom-biis võor bilgrã zĩigẽ.
^ Ges-y gom-biis võor bilgrã zĩigẽ.
^ Ebre, “bɩ pa zãr ne yãmb ye.”
