Kadawyanna a daytoy ket nalaga a lubid, sinulid, wenno tali. Maar-aramat idi dagiti iket a pagtiliw iti ik-ikan (Ec 9:12; Isa 19:8; Mt 4:18-21), tumatayab (Pr 1:17) ken dadduma pay nga animal. (Isa 51:20). Karaman kadagiti kangrunaan a material a naaramat iti pannakaaramid dagitoy isu ti lino, linabag ti palma, ken papiro.

 Nupay kasta, naan-anay a naiduma ti nakaaramatan dagiti iket a metal. Iti templo, naaramat dagiti iket a gambang kas arkos dagiti paratok ti ad-adigi a naawagan iti Jaquin ken Boaz (kitaenyo ti PARATOK), ket maysa nga iket, wenno aramid nga iniket, a gambang ti nagpaay kas rehas ti altar ti sakripisio.​—Ex 27:4, 5; 38:4; 1Ar 7:16-18, 41, 42; Jer 52:22, 23.

 Piguratibo nga Usar. Iti Biblia, masansan a maar-aramat ti “iket” iti piguratibo a pamay-an kas mangiladawan iti wagas a panangsilo iti sabsabali​—palawlawan ken kautibuen ida wenno iyeg ida iti pannakadidigra. (Job 18:8; 19:6; Sal 66:11; Un 1:13; Eze 12:13; 17:20; 19:8; 32:3; Os 5:1; 7:12; Mik 7:2) Ti wagas nga inusar dagiti Caldeo iti panangparmekda kadagiti nasion bayat ti panangisaknapda iti pagturayanda ket naipadis iti maysa nga iket a pagdaklis. (Hab 1:6, 15-17) Kasta met, ti iket nayarig iti pammasablog ken iti nasikap a puso ti imoral a babai. (Pr 29:5; Ec 7:26) Inyebkas ti salmista ti panagtalekna nga isu ispalen ni Jehova manipud kadagiti iket a mangsimbalud (Sal 25:15; 31:4; 140:5, 12) ket dagidiay mangiwaywayat iti kakasta nga iket isudanto ti masiluan.​—Sal 9:15; 35:7, 8; 57:6; 141:10.

 Maipapan iti pannakaaramid ken usar ti nadumaduma nga iket, kitaenyo ti IKET A PAGDAKLIS; MANAGTILIW ITI TUMATAYAB; PANAGANUP KEN PANAGKALAP.