Jeremias 52:1-34
52 Agtawen ni Zedekias+ iti 21 idi nagbalin nga ari, ket nagturay iti 11 a tawen idiay Jerusalem. Ti nanangna ket ni Hamutal+ nga anak ni Jeremias a taga-Libna.
2 Inar-aramidna ti dakes iti imatang ni Jehova, kas iti amin nga inaramid ni Jehoiakim.+
3 Napasamak dagita iti Jerusalem ken Juda gapu iti pungtot ni Jehova, agingga a pinapanawna ida iti imatangna.+ Kalpasanna, nagrebelde ni Zedekias iti ari ti Babilonia.+
4 Iti maikasiam a tawen ti panagturay ni Zedekias, iti maika-10 nga aldaw ti maika-10 a bulan, napan ni Ari Nabucodonosor* ti Babilonia ken ti intero nga armadana iti Jerusalem tapno rautenda dayta. Nagkampo ken nangaramidda iti pader iti aglikmut ti Jerusalem.+
5 Ket napalawlawan ti siudad agingga iti maika-11 a tawen ti panagturay ni Ari Zedekias.
6 Iti maikasiam nga aldaw ti maikapat a bulan,+ nakaro ti bisin iti siudad, ket awan ti makan dagiti umili.+
7 Kamaudiananna, naabutan ti pader ti siudad. Ket iti rabii, naglibas iti siudad ti amin a soldado. Dimmalanda iti nagbaetan ti dua a pader nga asideg iti hardin ti ari, bayat a pinalawlawan dagiti Caldeo ti siudad; ket nagturongda idiay Araba.+
8 Ngem kimmamat ti armada dagiti Caldeo, ket nakamatanda ni Zedekias+ idiay tanap ti Jerico, isu a nawarawara ti amin a soldadona.
9 Tiniliwda ti ari sa impanda iti ari ti Babilonia idiay Ribla iti daga ti Hamat, ket sinentensiaanda.
10 Pinapatay ti ari ti Babilonia dagiti annak a lallaki ni Zedekias iti imatangna, ken pinapatayna met idiay Ribla ti amin a prinsipe ti Juda.
11 Kalpasanna, binulsek ti ari ti Babilonia ni Zedekias,+ pinosasanna iti gambang, impanna idiay Babilonia, ken pinagtalinaedna iti pagbaludan agingga a natay.
12 Iti maika-10 nga aldaw ti maikalima a bulan, iti maika-19 a tawen ti panagturay ni Nabucodonosor* nga ari ti Babilonia, napan idiay Jerusalem ni Nabuzaradan a panguluen dagiti guardia ken katulongan ti ari ti Babilonia.+
13 Pinuoranna ti balay ni Jehova,+ ti balay* ti ari, ken amin a balay iti Jerusalem. Pinuoranna met ti amin a dadakkel a balbalay.
14 Dagiti pader ti Jerusalem ket rinebba ti intero nga armada dagiti Caldeo, a kadua ti panguluen dagiti guardia.+
15 Impanaw ni Nabuzaradan a panguluen dagiti guardia ti sumagmamano a nanumo a tattao ken amin nga umili a nabati iti siudad. Innalana met dagiti nakikapponen iti ari ti Babilonia, agraman ti amin a nabati nga eksperto a trabahador.+
16 Ngem imbati ni Nabuzaradan a panguluen dagiti guardia ti dadduma a kapanglawan nga umili ket pinilitna ida nga agtrabaho kadagiti kaubasan.+
17 Dinadael dagiti Caldeo dagiti gambang nga adigi+ ti balay ni Jehova ken dagiti kareton+ ken ti gambang a Baybay+ nga adda iti balay ni Jehova, sa impanda ti amin a gambang idiay Babilonia.+
18 Innalada pay dagiti lata, pala, pagiddep iti apuy, malukong,+ kopa,+ ken amin a gambang nga alikamen a maus-usar iti panagserbi iti templo.
19 Innala ti panguluen dagiti guardia dagiti palanggana,+ pagikkan iti beggang, malukong, lata, kandelero,+ kopa, ken malukong a naaramid iti puro a balitok ken pirak.+
20 Ti gambang iti dua nga adigi, iti Baybay, iti 12 a gambang a baka+ iti sirok ti Baybay, ken kadagiti kareton nga inaramid ni Ari Solomon para iti balay ni Jehova ket saanen a natimbang gapu iti kaaduna.
21 Ti tunggal adigi ket 18 a kasiko* ti kangatona, 12 a kasiko ti sirkumperensiana,*+ uppat a ramayan* ti kapuskolna, ken awan nagyan ti unegna.
22 Gambang ti pannakaulo dagiti adigi; lima a kasiko ti kangato ti maysa a pannakaulo;+ ken naaramid iti gambang ti nalaga a dekorasion ken dagiti sinanprutas a granada iti aglikmut dagiti pannakaulo. Kasta met laeng ti itsura ti maikadua nga adigi ken dagiti sinanprutas a granada.
23 Adda 96 a sinanprutas a granada iti sikiganda; 100 amin a sinanprutas a granada iti aglikmut ti nalaga a dekorasion.+
24 Impanaw met ti panguluen dagiti guardia ni Seraias+ a nangato a padi, ni Sofonias+ a maikadua a padi, ken ti tallo a parabantay iti ruangan.+
25 Nangala manipud iti siudad iti maysa nga opisial iti korte a mangidaulo kadagiti soldado ken pito a nasinged a kakadua ti ari a nasarakan iti siudad. Innalana pay ti sekretario ti pangulo ti armada, daydiay mangum-ummong kadagiti umili iti daga, ken ti 60 a lallaki manipud kadagiti ordinario nga umili nga adda pay laeng iti siudad.
26 Impanaw ida ni Nabuzaradan a panguluen dagiti guardia ket impanna ida iti ari ti Babilonia idiay Ribla.
27 Pinatay ida ti ari ti Babilonia idiay Ribla+ iti daga ti Hamat. Iti kasta, naipanaw ti Juda manipud iti dagada.+
28 Dagitoy ti tattao nga impanaw ni Nabucodonosor:* iti maikapito a tawen, 3,023 a Judio.+
29 Iti maika-18 a tawen ti panagturay ni Nabucodonosor,*+ 832 a tattao* ti naala idiay Jerusalem.
30 Iti maika-23 a tawen ti panagturay ni Nabucodonosor,* impanaw ni Nabuzaradan a panguluen dagiti guardia ti 745 a Judio.+
Ti amin a naipanaw ket 4,600 a tattao.*
31 Idi maika-37 a tawen a pannakaipanaw ni Ari Jehoiakin+ ti Juda, iti maika-25 nga aldaw ti maika-12 a bulan, nagbalin ni Evil-merodak nga ari ti Babilonia ket winayawayaanna* ni Ari Jehoiakin ti Juda, ket inruarna iti pagbaludan.+
32 Nasayaat ti panangtratona ken Jehoiakin ken inikkanna iti saad a nangatngato ngem iti dadduma nga ari a kaduana idiay Babilonia.
33 Gapuna, inikkat ni Jehoiakin ti badona kas balud, ket kanayon a nakipangan iti ari bayat a sibibiag.
34 Inaldaw a naikkan iti taraon manipud iti ari ti Babilonia, bayat a sibibiag, agingga iti ipapatayna.
Footnotes
^ Lit., “Nabucodorosor,” sabali pay nga ispelingna.
^ Lit., “Nabucodorosor,” sabali pay nga ispelingna.
^ Wenno “palasio.”
^ Lit., “12 a kasiko ti kaatiddog ti tali a manglikmut iti dayta.”
^ Lit., “Nabucodorosor,” sabali pay nga ispelingna.
^ Lit., “Nabucodorosor,” sabali pay nga ispelingna.
^ Wenno “kararua.”
^ Lit., “Nabucodorosor,” sabali pay nga ispelingna.
^ Wenno “kararua.”
^ Lit., “intal-ona ti ulo.”
