Mag-andam sa “Tingog sang Mga Estranghero”

“Indi gid sila magasunod sa isa ka estranghero kundi magapalagyo gikan sa iya, bangod indi nila kilala ang tingog sang mga estranghero.”​—⁠JUAN 10:5.

1, 2. (a) Ano ang reaksion ni Maria sang gintawag ni Jesus ang iya ngalan, kag ano ang ginsiling ni Jesus antes sini nga ginapakita sini nga hitabo? (b) Ano ang nagabulig sa aton agod makapabilin nga suod kay Jesus?

NAKITA sang ginbanhaw nga si Jesus ang babayi nga nagatindog malapit sa iya wala-unod nga lulubngan. Kilala gid niya ang babayi. Sia si Maria Magdalena. Halos duha ka tuig antes sini, ginpagua niya ang mga demonyo gikan sa sini nga babayi. Sugod sadto nag-upod ining babayi sa iya kag sa iya mga apostoles, nga nagaatipan sang ila mga kinahanglanon sa adlaw-adlaw. (Lucas 8:1-3) Apang, sa sini nga tion nagahibi si Maria, nga nasubuan sing tuman bangod nakita niya nga napatay si Jesus, kag karon bisan ang iya bangkay nadula! Gani ginpamangkot sia ni Jesus: “Babayi, ngaa nagahibi ka? Sin-o ang imo ginapangita?” Nagahunahuna nga sia ang hardinero, nagsabat ang babayi: “Ginuo, kon ginkuha mo sia, sugiri ako kon diin mo sia ginbutang, kag kuhaon ko sia.” Dayon nagsiling si Jesus: “Maria!” Sa gilayon, nakilala sang babayi ang pamilyar nga paagi sang paghambal niya sa iya. “Manunudlo!” tuaw niya sing malipayon. Kag ginhakos niya sia.​—⁠Juan 20:15.

² Ginapakita sining kasaysayan sa makatalandog nga paagi ang ginsiling ni Jesus mga pila ka tion antes sini. Ginapaanggid ang iya kaugalingon sa isa ka manugbantay kag ang iya mga sumulunod sa mga karnero, nagsiling sia nga ang manugbantay nagatawag sa iya mga karnero paagi sa ngalan kag kilala nila ang iya tingog. (Juan 10:​3, 4, 14, 27, 28) Sa pagkamatuod, subong nga ang karnero nakakilala sa iya manugbantay, nakilala man ni Maria ang iya Manugbantay, si Cristo. Matuod man  ini sa mga sumulunod ni Jesus karon. (Juan 10:16) Subong nga ang mahinantupon nga dulunggan sang karnero nagabulig sa iya nga mangin malapit sa iya manugbantay, ang aton espirituwal nga paghantop nagabulig man sa aton sa paglakat sing suod sa mga tikang sang aton Maayo nga Manugbantay, si Jesucristo.​—⁠Juan 13:15; 1 Juan 2:⁠6; 5:⁠20.

3. Ano ang pila ka pamangkot nga ginapahanumdom sang ilustrasyon ni Jesus tuhoy sa toril sang karnero?

³ Apang, suno sa amo man nga ilustrasyon, ang ikasarang sang karnero nga makilala ang mga tingog sang tawo nagabulig sa iya nga makilala indi lamang ang iya abyan kundi ang kaaway man sini. Importante gid ini bangod malimbungon ang mga nagapamatok sa aton. Sin-o sila? Paano sila nagapanghikot? Paano naton maamligan ang aton kaugalingon? Agod mahibaluan naton, tan-awon naton kon ano pa ang ginsiling ni Jesus sa iya ilustrasyon tuhoy sa toril sang karnero.

‘Sia nga Wala Nagasulod Paagi sa Ganhaan’

4. Suno sa ilustrasyon tuhoy sa manugbantay, sin-o ang ginasunod sang mga karnero, kag sin-o ang wala nila ginasunod?

⁴ Si Jesus nagsiling: “Sia nga nagasulod paagi sa ganhaan amo ang manugbantay sang mga karnero. Ang manugbantay sa ganhaan nagabukas sa sining isa, kag ang mga karnero nagapamati sa iya tingog, kag ginatawag niya ang iya kaugalingon nga mga karnero sa ngalan kag ginagiyahan sila pagua. Sang napagua na niya ang tanan nga iya, nagalakat sia sa unahan nila, kag ang mga karnero nagasunod sa iya, bangod nakilala nila ang iya tingog. Indi gid sila magasunod sa isa ka estranghero kundi magapalagyo gikan sa iya, bangod indi nila kilala ang tingog sang mga estranghero.” (Juan 10:2-5) Talupangda nga gingamit ni Jesus ang tinaga nga “tingog” sing tatlo ka beses. Duha ka beses nga naghambal sia tuhoy sa tingog sang isa ka manugbantay, apang sa ikatlo nga tion, ginpatuhuyan niya ang “tingog sang mga estranghero.” Ano nga sahi sang estranghero ang ginapatuhuyan ni Jesus?

5. Ngaa wala naton ginaabiabi ang sahi sang estranghero nga ginsambit sa Juan kapitulo 10?

⁵ Wala ginabinagbinag ni Jesus ang sahi sang estranghero nga dapat naton abiabihon​—⁠isa ka tinaga nga sa orihinal nga lenguahe sang Biblia nagakahulugan sing “gugma sa mga estranghero.” (Hebreo 13:2) Sa ilustrasyon ni Jesus, ang estranghero indi isa ka dinapit nga bisita. “Wala [sia] nagasulod sa toril paagi sa ganhaan kundi nagataklas sa iban nga duog.” Isa sia ka “makawat kag manug-ati.” (Juan 10:1) Sin-o ang una nga indibiduwal nga ginsambit sa Pulong sang Dios nga nangin makawat kag manug-ati? Si Satanas nga Yawa. Makita naton ang ebidensia sa tulun-an nga Genesis.

Sang ang Tingog sang Isa ka Estranghero Una nga Nabatian

6, 7. Ngaa nagakaigo tawgon si Satanas nga isa ka estranghero kag isa ka makawat?

⁶ Ginalaragway sang Genesis 3:1-5 kon paano ang tingog sang isa ka estranghero nabatian sa duta sa una nga higayon. Ginasugid sang rekord nga ginpalapitan ni Satanas ang una nga babayi, si Eva, paagi sa isa ka man-ug kag nakighambal sa iya sa malalangon nga paagi. Matuod nga sa sining kasaysayan wala gintawag sing literal si Satanas nga “isa ka estranghero.” Apang, ginapakita sang iya mga buhat nga sa madamo nga paagi kaangay sia sang estranghero nga ginlaragway sa ilustrasyon ni Jesus sa Juan kapitulo 10. Binagbinaga ang pila ka pagkaanggid.

⁷ Ginsiling ni Jesus nga ang estranghero indi direkta nga nagapalapit sa iya mga biktima sa toril sang karnero. Amo man si Satanas, ginpalapitan niya ang iya biktima sing indi direkta, nga nagagamit sing isa ka man-ug. Ining malalangon nga pagpalapit nagbuyagyag kon ano gid si Satanas​—⁠isa ka malimbungon nga kawatan. Isa pa, tuyo sang estranghero sa toril nga kawatan sing mga karnero ang may kinamatarong nga tag-iya sini. Sa katunayan, mas malain pa sia sa isa ka makawat, kay tuyo man niya nga ‘magpatay kag maglaglag.’ (Juan 10:10) Sing kaanggid, si Satanas isa ka makawat. Bangod ginlimbungan niya si Eva, ginkawat niya ang katutom ni Eva sa Dios. Dugang pa, nagdala man sing kamatayon si Satanas sa mga tawo. Gani, isa sia ka manugpatay.

8. Paano ginpatiko ni Satanas ang mga pinamulong kag mga motibo ni Jehova?

⁸ Ang pagkadibunayag ni Satanas makita sa paagi sang pagpatiko niya sang mga pinamulong kag mga motibo ni Jehova. “Nagsiling gid bala ang Dios nga indi kamo magkaon gikan sa tanan nga kahoy sa hardin?” pamangkot niya kay Eva. Nagpakunokuno si Satanas nga nakibot sia, subong bala nga daw nagsiling sia: ‘Ngaa indi gid makatarunganon ang Dios?’ Nagsiling pa sia: “Nakahibalo ang Dios nga sa adlaw nga magkaon kamo gikan sini magamuklat ang inyo mga mata.” Talupangda ang iya ginsiling: “Nakahibalo ang Dios.” Daw  nagsiling si Satanas: ‘Nahibaluan ko ang nahibaluan sang Dios. Nahibaluan ko ang iya mga motibo, kag malain ini.’ (Genesis 2:​16, 17; 3:​1, 5) Makapasubo nga wala ginsikway nanday Adan kag Eva ang tingog sini nga estranghero. Sa baylo, ginpamatian nila ini kag nagdala sing kasakitan sa ila kaugalingon kag sa ila kaanakan.​—⁠Roma 5:​12, 14.

9. Ngaa mapaabot naton nga ang tingog sang mga estranghero mabatian karon?

⁹ Ginagamit ni Satanas ang kaanggid man nga mga paagi agod patalangon ang katawhan sang Dios karon. (Bugna 12:9) Sia ang “amay sang kabutigan,” kag ang mga kaangay sa iya nga nagatinguha sa pagpatalang sa mga alagad sang Dios mga kaanakan niya. (Juan 8:44) Talupangdon naton ang pila ka paagi nga ang tingog sining mga estranghero mabatian karon.

Kon Paano Mabatian ang Tingog sang mga Estranghero Karon

10. Ano ang isa ka paagi nga mabatian ang tingog sang mga estranghero?

¹⁰ Malimbungon nga mga pangatarungan. Si apostol Pablo nagsiling: “Indi kamo magpadala sa nanarisari kag tuhay nga mga panudlo.” (Hebreo 13:9) Ano nga sahi sang mga panudlo? Sanglit ‘makadala’ ini sa aton palayo, maathag nga ginapatuhuyan ni Pablo ang mga panudlo nga makapahuyang sang aton espirituwal nga pagkatimbang. Sin-o ang nagabungat sining tuhay nga mga panudlo? Ginsilingan ni Pablo ang grupo sang Cristianong mga gulang: “Gikan sa inyo mismo magabangon ang mga tawo kag magapamulong sing tiko nga mga butang agod ipahilayo ang mga disipulo sunod sa ila.” (Binuhatan 20:30) Sa pagkamatuod, subong sang panahon ni Pablo, ang pila ka indibiduwal nga mga miembro anay sang Cristianong kongregasyon nagatinguha karon sa pagpatalang sa mga karnero paagi sa paghambal sing “tiko nga mga butang”​—⁠indi bug-os nga matuod kag bug-os nga kabutigan. Subong sang ginsiling ni apostol Pedro, nagagamit sila sing “huwad nga mga pulong”​—⁠mga pulong nga daw matuod apang wala gid gali sing pulos.​—⁠2 Pedro 2:3.

11. Paano ginabuyagyag sang mga pinamulong sa 2 Pedro 2:​1, 3 ang pamaagi kag katuyuan sang mga apostata?

¹¹ Ginbuyagyag pa ni Pedro ang mga pamaagi sang mga apostata paagi sa pagsiling nga “magapasulod [sila] sing malaglagon nga mga sekta.” (2 Pedro 2:​1, 3) Subong nga ang makawat sa ilustrasyon ni Jesus tuhoy sa toril sang karnero wala nagasulod “paagi sa ganhaan kundi nagataklas sa iban nga duog,” ang mga apostata nagapalapit man sa aton nga nagatiid. (Galacia 2:⁠4; Judas 4) Ano ang tuyo nila? Si Pedro nagdugang: “Sila magahingalit sa inyo.” Sa pagkamatuod, bisan ano pa ang isiling sang mga apostata agod pakamatarungon ang ila kaugalingon, ang katuyuan gid nila amo ang ‘pagpangawat kag pagpatay kag paglaglag.’ (Juan 10:10) Mag-andam batok sa sining mga estranghero!

12. (a) Paano ang aton mga pagpakig-upod makapadayag sa aton sa tingog sang mga estranghero? (b) Sa ano magkaanggid ang mga taktika ni Satanas kag sang mga estranghero karon?

¹² Makahalalit nga mga kaupdanan. Ang tingog sang mga estranghero mahimo mabatian paagi sa mga kaupod naton. Ang makahalalit nga pagpakig-upod makatalagam ilabi na  sa mga pamatan-on. (1 Corinto 15:33) Dumduma nga ginpuntariya ni Satanas si Eva​—⁠ang mas lamharon kag indi tanto ka eksperiensiado sa nahaunang tawhanon nga mag-asawa. Ginkumbinsi niya si Eva nga di-makatarunganon nga gindingutan sia ni Jehova sang iya kahilwayan, samtang indi ini matuod. Ginhigugma ni Jehova ang iya tawhanon nga mga tinuga kag nagaulikid sia sa ila kaayuhan. (Isaias 48:17) Sa karon man, ginatinguhaan sang mga estranghero nga kumbinsihon kamo nga mga pamatan-on nga di-nagakaigo nga ginadumilian kamo sang inyo mga ginikanan sang inyo kahilwayan. Ano ang mahimo nga epekto sining mga estranghero sa inyo? Ang isa ka Cristianong dalagita nagbaton: “Sa pila ka tion nagluya ang akon pagtuo bangod sang akon mga kaklase. Pirme nila ginasiling nga ang akon relihion madumilion kag di-makatarunganon.” Apang, ang matuod amo nga ginahigugma ka sang imo mga ginikanan. Gani kon ginahaylo ka sang imo mga kabutho nga indi magsalig sa imo mga ginikanan, indi magpatalang kaangay ni Eva.

13. Anong maalamon nga dalanon ang ginsunod ni David, kag ano ang isa ka paagi nga mailog naton sia?

¹³ Nahanungod sa makahalalit nga mga pagpakig-upod, si salmista David nagsiling: “Wala ako maglingkod upod sa mga tawo nga butigon; kag wala ako nagasulod upod sa mga nagahinago kon ano sila.” (Salmo 26:4) Sa liwat, natalupangdan mo bala ang kinaiya nga kinaandan sa mga estranghero? Ginahinago nila kon sin-o sila​—⁠subong nga ginhinago ni Satanas kon sin-o sia paagi sa paggamit sing isa ka man-ug. Sa karon, ginahinago sang imoral nga mga tawo kon sin-o gid sila kag ang ila matuod nga mga tinutuyo paagi sa paggamit sa Internet. Sa mga chat room, ang malaut nga mga adulto mahimo pa gani magpakunokuno nga mga pamatan-on agod tiplangon ka. Mga pamatan-on, palihug maghalong gid kamo kay basi mahalitan kamo sa espirituwal.​—⁠Salmo 119:101; Hulubaton 22:3.

14. Paano ang media, kon kaisa, nagabalhag sang tingog sang mga estranghero?

¹⁴ Butig nga mga panumbungon. Bisan pa ang pila ka balita tuhoy sa mga Saksi ni Jehova makatarunganon, kon kaisa nagapagamit ang media agod iwaragwag ang sayop nga opinyon nga tingog sang mga estranghero. Halimbawa, sa isa ka pungsod sayop nga ginbalita nga ginsuportahan sang mga Saksi ang rehimen ni Hitler sadtong Bug-os Kalibutan nga Inaway II. Sa isa pa ka pungsod, ginsumbong sang isa ka report nga ginaguba sang mga Saksi ang mga simbahan. Sa pila ka pungsod ginasumbong sang media ang mga Saksi nga wala kuno ginapabulong ang ila mga kabataan kag subong man hungod nga ginakunsinti ang mabug-at nga mga sala nga ginahimo sang mga masigkatumuluo. (Mateo 10:22) Walay sapayan sini, ang sinsero nga mga tawo nga nakakilala sa aton nakahibalo nga ini nga mga panumbungon indi matuod.

15. Ngaa indi maalamon nga patihan ang tanan nga ginapresentar sa media?

¹⁵ Ano ang dapat naton himuon kon nagaatubang kita sang mga panumbungon nga ginapalapnag sang tingog sining mga estranghero? Dapat naton pamatian ang laygay sa Hulubaton  14:15: “Ang bisan sin-o nga di-eksperiensiado nagatuo sa tagsa ka pulong, apang ang isa nga maalam nagabinagbinag sang iya mga tikang.” Indi maalamon nga patihan ang tanan nga ginapresentar subong kamatuoran sa media. Bisan pa indi kita diskompiado sa tanan nga sekular nga impormasyon, nahibaluan gid naton nga “ang bug-os nga kalibutan yara sa gahom sang isa nga malauton.”​—⁠1 Juan 5:19.

“Tilawi ang Inspirado nga mga Hambal”

16. (a) Paano ginapakita sang panimuot sang literal nga mga karnero ang kamatuoran sang pinamulong ni Jesus sa Juan 10:4? (b) Ano ang ginapalig-on sang Biblia nga himuon naton?

¹⁶ Apang, paano naton mapat-od kon bala nagapakig-angot kita sa isa ka abyan ukon sa isa ka kaaway? Bueno, nagsiling si Jesus nga ang mga karnero nagasunod sa manugbantay “bangod nakilala nila ang iya tingog.” (Juan 10:4) Indi ang literal nga dagway sang manugbantay ang nagapahulag sa mga karnero nga sundon sia; kundi ang iya tingog. Ginasaysay sang isa ka libro tuhoy sa kadutaan sang Biblia nga ang isa ka dumuluaw nagsiling anay nga makilala sang mga karnero ang ila manugbantay paagi sa iya panapton, indi sa iya tingog. Nagsabat ang isa ka manugbantay nga ang tingog amo ang ila nakilala. Agod pamatud-an ini, nagbayluhanay sila sing panapton sang dumuluaw ukon estranghero. Nagasuksok sang panapton sang manugbantay, gintawag sang estranghero ang mga karnero, apang wala sila magsapak. Wala nila makilala ang iya tingog. Apang, sang gintawag sila sang manugbantay, bisan pa tuhay ang iya panapton, nagpalapit gilayon ang mga karnero. Sa amo, ang isa mahimo nga may dagway sang isa ka manugbantay, apang para sa mga karnero, wala ini nagapamatuod nga manugbantay gid sia. Daw ginaanalisar sang mga karnero ang tingog sang nagapanawag, kag ginapaanggid ini sa tingog sang manugbantay. Ang Pulong sang Dios nagasiling sa aton nga himuon man ini​—⁠“tilawi ang inspirado nga mga hambal agod makita kon bala naghalin ini sa Dios.” (1 Juan 4:⁠1; 2 Timoteo 1:13) Ano ang makabulig sa aton agod mahimo ini?

17. (a) Paano kita mangin pamilyar sa tingog ni Jehova? (b) Ang ihibalo tuhoy kay Jehova magabulig sa aton nga himuon ang ano?

¹⁷ Halangpunon nga kon labi naton nga kilala ang tingog, ukon mensahe, ni Jehova, labi nga mamutikan naton ang tingog sang isa ka estranghero. Ginapakita sang Biblia kon paano naton mapalambo ini nga ihibalo. Ini nagasiling: “Ang imo mga dulunggan makabati sing pulong sa likod nimo, nga nagasiling: ‘Amo ini ang dalan. Lakat sa sini, kamo nga katawhan.’” (Isaias 30:21) Ini nga “pulong” sa likod naton nagahalin sa Pulong sang Dios. Sa kada tion nga ginabasa naton ang Pulong sang Dios, daw subong bala nga ginapamatian naton ang tingog sang aton Daku nga Manugbantay, si Jehova. (Salmo 23:1) Gani, kon labi nga ginatun-an naton ang Biblia, labi nga mangin pamilyar kita sa tingog sang Dios. Kag ining hanuot nga ihibalo magabulig sa aton nga makilala gilayon ang tingog sang mga estranghero.​—⁠Galacia 1:8.

18. (a) Ano ang nadalahig sa pagkilala sa tingog ni Jehova? (b) Suno sa Mateo 17:​5, ngaa dapat naton tumanon ang tingog ni Jesus?

¹⁸ Ano pa ang nadalahig sa pagkilala sa tingog ni Jehova? Magluwas sa pagpamati, nagalakip ini sang pagtuman. Talupangda liwat ang Isaias 30:21. Ang Pulong sang Dios nagapahayag: “Amo ini ang dalan.” Huo, paagi sa pagtuon sa Biblia, mabatian naton ang panuytoy ni Jehova. Madason, nagsugo sia: “Lakat sa sini.” Luyag ni Jehova nga manghikot kita suno sa aton nabatian. Sa amo, paagi sa pag-aplikar sang aton natun-an, ginapakita naton nga wala lamang naton nabatian ang tingog ni Jehova kundi ginatuman man ini. (Deuteronomio 28:1) Ang pagtuman sa tingog ni Jehova nagakahulugan man sang pagtuman sa tingog ni Jesus, kay si Jehova mismo nagsiling sa aton nga himuon ini. (Mateo 17:5) Ano ang ginapahimo sa aton ni Jesus, ang Maayo nga Manugbantay? Ginatudluan niya kita sa paghimo sing mga disipulo kag pagsalig sa “matutom kag mainandamon  nga ulipon.” (Mateo 24:45; 28:18-​20) Ang pagtuman sa iya tingog nagakahulugan sang aton dayon nga kabuhi.​—⁠Binuhatan 3:23.

‘Magapalagyo Sila Gikan sa Iya’

19. Ano dapat ang aton reaksion sa tingog sang mga estranghero?

¹⁹ Kon amo, ano dapat ang aton reaksion sa tingog sang mga estranghero? Kaangay sa reaksion sang mga karnero. Si Jesus nagsiling: “Indi gid sila magasunod sa isa ka estranghero kundi magapalagyo gikan sa iya.” (Juan 10:5) Duha ang aton reaksion. Una, ‘indi gid kita magsunod’ sa isa ka estranghero. Huo, sikwayon gid naton ang isa ka estranghero. Sa katunayan, sa Griego nga Biblia, ang mga tinaga nga “indi gid” nagapaalinton sing pinakamabaskog nga paagi sang pagpabutyag sing pagsikway sa amo nga lenguahe. (Mateo 24:35; Hebreo 13:5) Ikaduha, ‘magapalagyo kita gikan sa iya,’ ukon magapalayo sa iya. Amo lamang ini ang husto nga himuon sa mga nagapanudlo sang indi nahisanto sa tingog sang Maayo nga Manugbantay.

20. Ano ang aton reaksion kon nagaatubang kita sang (a) malimbungon nga mga apostata, (b) makahalalit nga mga kaupod, (c) di-makatarunganon nga mga report sa media?

²⁰ Busa, kon nagaatubang sang mga nagapabutyag sang mga ideya sang apostata, dapat naton himuon ang ginasiling sang Pulong sang Dios: “Magbantay kamo sa mga nagatuga sing mga pagbinahinbahin kag makapasandad nga mga higayon nga supak sa panudlo nga natun-an ninyo, kag likawi ninyo sila.” (Roma 16:17; Tito 3:10) Subong man, dapat iaplikar sang Cristianong mga pamatan-on nga nagaatubang sang mga katalagman sa makahalalit nga mga kaupod ang laygay ni Pablo sa pamatan-on nga si Timoteo: “Palagyo ka sa mga kailigbon nga pinamatan-on.” Kag kon nagaatubang sang butig nga mga panumbungon sa media, dumdumon naton ang dugang nga laygay ni Pablo kay Timoteo: “Magaliso sila [ang mga nagapamati sa tingog sang mga estranghero] sa butig nga mga sugilanon. Apang, magmaligdong ka sa tanan nga butang.” (2 Timoteo 2:22; 4:3-5) Bisan kon daw ano pa katahom pamatian ang tingog sang mga estranghero, magpalagyo kita gikan sa tanan nga butang nga magapaluya sang aton pagtuo.​—⁠Salmo 26:⁠5; Hulubaton 7:​5, 21; Bugna 18:​2, 4.

21. Ano nga padya ang nagahulat sa mga nagasikway sa tingog sang mga estranghero?

²¹ Paagi sa pagsikway sa tingog sang mga estranghero, ginasunod sang hinaplas-sang-espiritu nga mga Cristiano ang pinamulong sang Maayo nga Manugbantay nga mabasa sa Lucas 12:32. Si Jesus nagsiling sa ila: “Indi kamo mahadlok, diutay nga panong, kay nahamut-an sang inyo Amay nga ihatag sa inyo ang ginharian.” Sing kaanggid, malangkagon nga ginapaabot sang “iban nga mga karnero” nga mabatian ang mga pulong ni Jesus: “Kari, kamo nga ginpakamaayo sang akon Amay, panublia ninyo ang ginharian nga gin-aman sa inyo kutob sa pagtukod sang kalibutan.” (Juan 10:16; Mateo 25:34) Daw ano ka makalilipay nga padya ang nagahulat sa aton kon sikwayon naton ang “tingog sang mga estranghero”!

Madumduman Mo Bala?

• Paano nagakabagay kay Satanas ang paglaragway sa estranghero nga ginsambit sa ilustrasyon ni Jesus tuhoy sa toril sang karnero?

• Paano mabatian ang tingog sang mga estranghero karon?

• Paano naton makilala ang tingog sang mga estranghero?

• Ano dapat ang aton reaksion sa tingog sang mga estranghero?

[Mga Pamangkot sa Pagtinuon]

[Retrato sa pahina 15]

Nakilala ni Maria si Cristo

[Retrato sa pahina 16]

Ang estranghero wala nagapalapit sing direkta sa mga karnero

[Retrato sa pahina 18]

Ano ang aton reaksion sa tingog sang mga estranghero?