Magdiretso sa kaundan

Magdiretso sa listahan sang kaundan

Ano ang Dapat Ninyo Ipapanubli sa Inyo mga Anak?

Ano ang Dapat Ninyo Ipapanubli sa Inyo mga Anak?

 Ano ang Dapat Ninyo Ipapanubli sa Inyo mga Anak?

SI Pavlos, isa ka de-pamilya nga tawo nga taga-nabagatnan nga Europa, talagsa lang nagatener sa ila balay agod maghinguyang sang tion upod sa iya asawa kag mga anak​—⁠duha ka babayi, edad 13 kag 11, kag 7-anyos nga lalaki. Nagabakabaka gid si Pavlos sa madamong inoras sa bug-os nga semana, agod makakita sing bastante nga kuarta para matuman ang iya handum. Luyag niya baklan sing tig-isa ka apartment ang iya duha ka anak nga babayi, kag patindugan sing gamay nga negosyo ang iya anak nga lalaki. Ang iya asawa nga si Sofia nagapanikasog gid nga makatipon sing mga linen, mga kaserola, mga pinggan kag baso, kag mga kubiertos para sa sining palaabuton nga panimalay sang ila mga anak. Kon pamangkuton sila kon ngaa nagabakabaka gid sila, pareho ang ila sabat, “Para sa amon mga anak!”

Kaangay ni Pavlos kag ni Sofia, madamo nga  ginikanan sa bug-os nga kalibutan ang nagatinguha gid agod hatagan ang ila mga anak sing maayo nga umpisa sa kabuhi. Ang iban nagasupot sing kuarta para sa palaabuton sang ila mga anak. Ginasiguro naman sang iban nga makatigayon ang ila mga anak sing nagakaigo nga edukasyon kag makatuon sing mga kalantip nga magamit nila sa ulihi. Bisan pa ginatamod sang kalabanan nga mga ginikanan ining mga regalo subong tanda sang ila gugma, masami nga ang pag-aman sini nagaipit gid sa mga ginikanan nga tumanon ang ginapaabot sang mga paryente, mga abyan, kag sang komunidad nga ila ginapuy-an. Busa, nagakaigo lamang nga mamangkot ang nagakabalaka nga mga ginikanan, ‘Sig-ano gid ang dapat namon ipapanubli sa amon mga anak?’

Paghanda Para sa Palaabuton

Indi lamang natural kundi Makasulatanhon man nga maghanda ang Cristianong mga ginikanan para sa ila mga anak. Ginsingganan ni apostol Pablo ang mga Cristiano sang iya adlaw: “Ang mga anak indi dapat magtipon para sa ila mga ginikanan, kundi ang mga ginikanan para sa ila mga anak.” (2 Corinto 12:14) Nagsiling pa si Pablo nga ang paghanda sang mga ginikanan isa ka mabug-at nga obligasyon. Nagsulat sia: “Kon ang bisan sin-o wala nagaaman para sa ila nga yara sa iya, kag ilabi na para sa mga katapo sang iya panimalay, napanghiwala na niya ang pagtuo kag malain pa sa tawo nga wala sing pagtuo.” (1 Timoteo 5:8) Madamo nga kasaysayan sa Biblia ang nagailustrar nga ang paghanda sing palanublion importante sa tunga sang mga alagad sang Dios sang panahon sang Biblia.​—⁠Rut 2:​19, 20; 3:9-13; 4:1-22; Job 42:15.

Apang, kon kaisa, nagabakabaka gid ang mga ginikanan agod daku ang ila mapapanubli sa ila mga anak. Ngaa? Si Manolis, isa ka amay nga nagsaylo gikan sa nabagatnan nga bahin sang Europa padulong sa Estados Unidos, nagsambit sang isa ka rason: “Ang mga ginikanan nga nag-antos sang kahapayan sang Bug-os Kalibutan nga Inaway II, tiggulutom kag kaimulon, determinado nga patin-aron ang kahimtangan sang ila mga anak.” Nagdugang pa sia: “Bangod sang sobra nga pag-abaga  sa ila salabton kag sang handum nga mahatagan ang ila mga anak sing maayo gid nga pangabuhi, ginahalitan kon kaisa sang mga ginikanan ang ila kaugalingon.” Ginadingutan sang iban nga mga ginikanan ang ila kaugalingon ukon nagakinot sila agod makatipon sing materyal nga mga pagkabutang para sa ila mga anak. Apang maalamon bala nga himuon ini sang mga ginikanan?

“Walay Pulos kag Daku nga Kapahamakan”

Nagpaandam si Hari Solomon sang dumaan nga Israel tuhoy sa mga palanublion. Nagsulat sia: “Gindumtan ko ang tanan ko nga kinabudlayan nga ginpangabudlayan ko sa idalom sang adlaw, nga bayaan ko para sa tawo nga magasunod sa akon. Kag sin-o ang nakahibalo kon sia mangin maalamon ukon buangbuang? Apang magadumala sia sa tanan ko nga kinabudlayan nga ginpangabudlayan ko kag ginpakitaan ko sing kaalam sa idalom sang adlaw. Ini man walay pulos. . . . Kay may tawo nga nagpangabudlay nga may kaalam kag ihibalo kag pagkasampaton, apang ang iya bahin ihatag sa isa ka tawo nga wala magpangabudlay sing lakas sa sini. Ini man walay pulos kag daku nga kapahamakan.”​—⁠Manugwali 2:18-21.

Subong sang ginpaathag ni Solomon, mahimo nga indi maapresyar sang mga manunubli ang bug-os nga balor sang ila ginpanubli bangod wala nila ginpangabudlayan ini. Busa, mahimo nga indi paghalungan sang mga manunubli ang ginpangabudlayan sang mga ginikanan nga tipunon para sa ila. Mahimo pa gani nga uyangan lang nila ining ginpangabudlayan gid nga mga pagkabutang. (Lucas 15:11-16) Daw ano nga ‘pagkawalay pulos kag daku nga kapahamakan’ ina!

Palanublion kag Kakagod

May isa pa ka butang nga dapat binagbinagon sang mga ginikanan. Sa mga kultura nga nagapabalor gid sa mga palanublion kag mga dote para sa kasal, mahimo nga ang mga anak mangin makagod kag mangayo sila sing propiedad ukon dote nga indi masarangan sang mga ginikanan. “Makaluluoy ka gid kon amay ka nga may duha ukon tatlo ka anak nga babayi,” lahog ni Loukas, nga taga-Gresya. Nagsiling sia: “Mahimo ikomparar sang mga anak nga babayi ang mahatag sang ila amay sa ‘bugana’ nga natipon sang iban nga mga ginikanan para sa ila mga anak. Mahimo masiling sila nga ang ila tsansa nga makapamana mabuhinan kon indi sila makahatag sing nagakaigo nga dote.”

Si Manolis nga ginsambit kaina, nagsiling: “Mahimo nga angan-anganon sang hoben pa nga lalaki ang pagnobyahanay tubtob ang amay sang iya nobya magsaad sa iya sing butang para sa iya nobya, sa masami isa ka propiedad ukon daku nga kantidad sang kuarta. Mahimo ini mangin isa ka sahi sang blackmail.”

Nagapaandam ang Biblia batok sa tanan nga porma sang kakagod. Nagsulat si Solomon: “Ang palanublion ginaagom paagi sa kakagod sa umpisa, apang ang palaabuton sini indi pagpakamaayuhon.” (Hulubaton 20:21) Nagsiling gid si apostol Pablo: “Ang gugma sa kuarta amo ang gamot  sang tanan makahalalit nga mga butang.”​—⁠1 Timoteo 6:10; Efeso 5:5.

“Ang Kaalam nga May Kaupod nga Palanublion”

Matuod, ang palanublion may pila ka balor, apang mas daku ang balor sang kaalam sangsa materyal nga mga pagkabutang. Nagsulat si Hari Solomon: “Ang kaalam nga may kaupod nga palanublion maayo kag mapuslanon . . . Kay ang kaalam pangamlig subong nga ang kuarta pangamlig; apang ang bentaha sang ihibalo amo nga ginatipigan nga buhi sang kaalam ang may iya sini.” (Manugwali 7:​11, 12; Hulubaton 2:⁠7; 3:21) Bisan pa ang kuarta nagahatag sing pila ka pangamlig kag nagabulig sa may iya sini nga matigayon ang iya ginakinahanglan, sarang gihapon ini madula. Sa pihak nga bahin, ang kaalam​—⁠ang ikasarang nga gamiton ang ihibalo sa paglubad sa mga problema ukon sa paglab-ot sa pila ka mga tulumuron​—⁠makaamlig sa isa ka tawo gikan sa paghimo sing makatalagam nga mga kabuangan. Kon napasad sa nagakaigo nga kahadlok sa Dios, makabulig ini sa iya sa pagtigayon sing dayon nga kabuhi sa bag-ong kalibutan sang Dios nga malapit na mag-abot​—⁠isa gid ka hamili nga palanublion!​—⁠2 Pedro 3:13.

Ginapakita sang Cristianong mga ginikanan ini nga kaalam paagi sa pagpahamtang sing nagakaigo nga mga prioridad para sa ila kaugalingon kag sa ila mga anak. (Filipos 1:10) Indi dapat pag-unahon ang pagtipon sing materyal nga mga butang para sa mga anak sangsa espirituwal nga mga butang. Ginlaygayan ni Jesus ang iya mga sumulunod: “Padayon, nian, nga pangitaa anay ang ginharian [sang Dios] kag ang iya pagkamatarong, kag ining tanan iban pa nga mga butang idugang sa inyo.” (Mateo 6:33) Ang mga ginikanan nga nagapahamtang sing espirituwal nga mga tulumuron para sa ila Cristianong pamilya makapaabot nga padyaan sing bugana. Nagsulat ang maalamon nga si Hari Solomon: “Ang amay sang matarong pat-od nga magakalipay; ang isa nga nangin amay sang isa nga maalam magakalipay man sa iya. Magakasadya ang imo amay kag ang imo iloy, kag magakasadya sia nga nagpanganak sa imo.”​—⁠Hulubaton 23:​24, 25.

Isa ka Dayon nga Palanublion

Para sa mga Israelinhon sang dumaan nga tion, importante gid ang ginpanubli nga mga pagkabutang. (1 Hari 21:2-6) Apang, ginlaygayan sila ni Jehova: “Ining mga pulong nga ginasugo ko karon sa imo dapat mangin sa imo tagipusuon; kag ipatudok mo ini sa imo anak kag ihambal mo ini kon nagapungko ka sa imo balay kag kon nagalakat ka sa dalan kag kon nagahigda ka kag kon nagabangon ka.” (Deuteronomio 6:​6, 7) Ginasugo man ang Cristianong mga ginikanan: ‘Padayon nga padakua ang inyo mga anak sa disiplina kag sa nagatadlong nga panghunahuna ni Jehova.’​—⁠Efeso 6:4.

Nahibaluan sang mga ginikanan nga may espirituwal nga pagtamod nga ang pag-aman para sa ila panimalay nagalakip sang paghatag sing instruksion gikan sa Biblia. Nagkomento si Andreas nga may tatlo ka anak: “Kon makatuon ang mga kabataan sa pag-aplikar sang diosnon nga mga prinsipio sa ila kabuhi, mas masangkapan sila para sa palaabuton.” Ini nga palanublion nagapadaku man sang pagbulig sa ila nga makatukod kag makapalambo sing personal nga relasyon sa ila Manunuga.​—⁠1 Timoteo 6:19.

Nabinagbinag na bala ninyo ang paghanda para sa espirituwal nga palaabuton sang inyo anak? Halimbawa, ano ang mahimo sang mga ginikanan kon ang ila anak yara sa bug-os tion nga ministeryo? Bisan pa indi dapat mangayo ukon magpaabot ang isa ka bug-os tion nga ministro sing pinansial nga bulig, mahimo mamat-od ang mahigugmaon nga mga ginikanan nga ‘paambitan sia suno sa iya mga kinahanglanon’ agod buligan sia nga makapabilin sa bug-os tion nga pag-alagad. (Roma 12:13; 1 Samuel 2:​18, 19; Filipos 4:14-18) Mahamuot gid si Jehova sa sining mabinuligon nga panimuot.

Kon amo, ano ang dapat ipapanubli sang mga ginikanan para sa ila mga anak? Luwas sa ila materyal nga mga kinahanglanon, pat-uron sang Cristianong mga ginikanan nga makabaton ang ila mga anak sing bugana nga espirituwal nga palanublion nga makahatag sa ila sing kaayuhan tubtob sa walay katubtuban. Nian, magamatuod ang mga pulong nga masapwan sa Salmo 37:18: “Nahibaluan ni Jehova ang mga adlaw sang mga wala sing kakulangan, kag ang ila gid palanublion magapadayon bisan tubtob sa walay latid nga tion.”

[Retrato sa pahina 26, 27]

Ano nga palaabuton ang ginahunahuna ninyo para sa inyo mga anak?