1-2. Sumala sa Buhat 8:27-31, 35-38, unsay nagpalihok sa Etiopianhong eunuko sa pagpabawtismo?

GUSTO ba nimong magpabawtismo ingong tinun-an sa Kristo? Ang gugma ug apresasyon nagpalihok sa daghan nga magpabawtismo. Tagda ang ehemplo sa usa ka opisyal nga nag-alagad sa rayna sa Etiopia.

² Ang Etiopianhon milihok dayon sumala sa iyang nakat-onan sa Kasulatan. (Basaha ang Buhat 8:27-31, 35-38.) Unsay nagpalihok niya? Dayag nga giapresyar niya ang Pulong sa Diyos; nagbasa siyag pipila ka bersikulo sa basahon sa Isaias samtang nagsakay sa karo. Ug sa dihang nakigsulti niya si Felipe, iyang naapresyar ang gihimo ni Jesus para kaniya. Pero nganong miadto man sa Jerusalem ang maong opisyal? Tungod kay naugmad na niya ang gugma kang Jehova. Giunsa nato pagkahibalo? Bag-o pa siyang misimba kang Jehova sa Jerusalem. Dayag nga siya mibiya na sa iyang kanhing relihiyon ug mianib sa bugtong nasod nga napahinungod sa matuod nga Diyos. Kini nga gugma kang Jehova mao sab ang nagpalihok kaniya sa paghimog laing importanteng lakang, ang pagpabawtismo ug pagkahimong tinun-an sa Kristo.​—Mat. 28:19.

3. Unsa tingali makapugong sa usa ka tawo sa pagpabawtismo? (Tan-awa ang kahong “ Unsay Kahimtang sa Imong Kasingkasing?”)

³ Ang gugma kang Jehova makapalihok nimo sa pagpabawtismo. Apan ang gugma posibleng makapugong sab nimo sa pagbuhat niana. Sa unsang paagi? Matikdi ang pipila ka pananglitan. Tingali gimahal nimo pag-ayo ang imong dili Saksing pamilya ug mga higala, ug basin nabalaka ka nga kon magpabawtismo ka, dumtan ka na nila. (Mat. 10:37) O tingali ganahan  ka sa mga batasan nga nahibalo kang gidumtan sa Diyos, ug basin malisdan ka sa pagbiya niana. (Sal. 97:10) O lagmit nagdako ka nga nagsunod sa mga kostumbre nga konektado sa bakak nga relihiyon. Tingali mahinumdom ka nga nalingaw kaayo ka sa maong mga selebrasyon. Busa basig malisdan ka sa pagbiya sa mga kostumbre nga dili makapalipay kang Jehova. (1 Cor. 10:20, 21) Maong kinahanglan nimong pamalandongon kining pangutanaha, “Unsa o kinsa ang labaw nakong gihigugma?”

4. Unsay panguna nimong motibo sa pagpabawtismo?

⁴ Dunay daghang maayong butang nga imong gimahal ug giapresyar. Pananglitan, bisan sa wala pa ka magpa-Bible study sa mga Saksi ni Jehova, tingali gitahod na nimo pag-ayo ang Bibliya. Ug tingali gimahal na nimo si Jesus. Karon nga nailhan na nimo ang mga Saksi ni Jehova, tingali ganahan kang makig-uban nila. Pero bisag gimahal ug giapresyar nimo ang maong mga butang, dili kana igo aron mapalihok ka sa pagpahinungod sa imong kaugalingon kang Jehova ug sa pagpabawtismo. Ang panguna nimong motibo sa pagpabawtismo mao ang imong gugma kang Jehova nga Diyos. Kon gihigugma nimo si Jehova labaw sa tanan, dili ka magpapugong sa bisan unsa o kang bisan kinsa sa pag-alagad kaniya. Ang imong gugma kang Jehova magpalihok nimo sa pagpabawtismo ug makatabang nimo sa pagpabiling matinumanon human sa bawtismo.

5. Unsang mga pangutana ang atong hisgotan?

⁵ Si Jesus miingon nga kinahanglang higugmaon nato si Jehova sa tibuok natong kasingkasing, kalag, hunahuna, ug kusog. (Mar. 12:30) Sa unsang paagi maugmad nimo ang lawom nga gugma ug pagtahod kang Jehova? Ang pagpamalandong kon unsa ka dako ang gugma ni Jehova kanato makapalihok nato sa paghigugma sab kaniya. (1 Juan 4:19) Unsa pay imong bation ug himoon kon maugmad na nimo kining kinalabwang gugma? *

6. Sumala sa Roma 1:20, unsay usa ka paagi nga makakat-on ka bahin kang Jehova?

⁶ Pagkat-on bahin kang Jehova pinaagi sa iyang mga linalang. (Basaha ang Roma 1:20; Pin. 4:11) Pamalandonga ang kaalam ni Jehova nga klaro kaayong makita diha sa disenyo sa mga tanom ug hayop. Pagkat-og diyutay kon unsa ka katingalahan ang pagkahimo sa imong lawas. (Sal. 139:14) Ug hunahunaa kon unsa ka dakong enerhiya ang gibutang ni Jehova sa adlaw, nga kon buot hunahunaon, ang adlaw usa lang sa bilyonbilyong bituon. * (Isa. 40:26) Kon imo nang himoon, molawom ang imong pagtahod kang Jehova. Pero bisag importante ang pagkahibalo nga si Jehova maalamon ug gamhanan, kinahanglan kang makakat-on ug dugang bahin kaniya aron molig-on ang imong gugma kaniya.

7. Aron molawom ang imong gugma kang Jehova, kinahanglang kombinsido ka sa unsa?

⁷ Kinahanglang kombinsido ka nga gimahal gyod ka ni Jehova. Malisdan ka ba sa pagtuo nga ang Maglalalang sa langit ug yuta nakakita ug nagmahal nimo? Kon mao, hinumdomi nga si Jehova “dili layo sa matag usa kanato.” (Buh. 17:26-28) “Ginasusi ni Jehova ang tanang kasingkasing,” ug siya nagsaad kanimo, sumala sa giingon ni David kang Solomon, nga “kon imo siyang pangitaon, iyang itugot nga makaplagan nimo siya.” (1 Cron. 28:9) Gani nagtuon ka karon sa Bibliya tungod sa giingon ni Jehova, “Ikaw akong gikabig nganhi  kanako.” (Jer. 31:3) Samtang magkalawom ang imong apresasyon sa tanang gibuhat ni Jehova kanimo, magkalawom sab ang imong gugma kaniya.

8. Sa unsang paagi mabalosan nimo ang gugma ni Jehova?

⁸ Ang usa ka paagi nga mabalosan nimo ang gugma ni Jehova mao ang pagpakigsulti kaniya sa pag-ampo. Molawom ang imong gugma kaniya samtang isulti nimo ang imong mga kabalaka ug pasalamatan siya sa tanan niyang gihimo para nimo. Ug mas masuod ka kang Jehova sa dihang makita nimo kon giunsa niya pagtubag ang imong mga pag-ampo. (Sal. 116:1) Makombinsir ka nga nakasabot siya nimo. Pero aron masuod kang Jehova, kinahanglang masabtan nimo ang iyang panghunahuna. Ug kinahanglang mahibaloan nimo kon unsay gusto niyang ipabuhat kanimo. Makat-onan lang nimo kana pinaagi sa pagtuon sa iyang Pulong, ang Bibliya.

9. Unsaon nimo pagpakita nga giapresyar nimo ang Bibliya?

⁹ Ugmara ang apresasyon sa Pulong sa Diyos, ang Bibliya. Diha lang sa Bibliya makita ang kamatuoran bahin kang Jehova ug sa iyang katuyoan para nimo. Imong ikapakita nga giapresyar nimo ang Bibliya pinaagi sa pagbasa niini kada adlaw, pagpangandam una mag-Bible study, ug pagpadapat sa imong nakat-onan. (Sal. 119:97, 99; Juan 17:17) Naa ba kay eskedyul sa pagbasa sa Bibliya? Ginasunod ba nimo kana ug naningkamot nga basahon ang Bibliya adlaw-adlaw?

10. Unsay usa sa talagsaong mga bahin sa Bibliya?

¹⁰ Ang usa sa talagsaong mga bahin sa Bibliya mao ang mga asoy gikan sa mga tawo nga nakakita kang Jesus. Kini lang ang dunay tukmang rekord nga nagpatin-aw sa gihimo ni Jesus para nimo. Sa dihang imong makat-onan ang gisulti ug gihimo ni Jesus, lagmit mapalihok ka sa pagpakighigala kaniya.

11. Sa unsang paagi maugmad nimo ang gugma kang Jehova?

¹¹ Ugmara ang imong gugma kang Jesus, ug molawom ang imong gugma kang Jehova. Ngano? Tungod kay hingpit nga gisundog ni Jesus ang mga hiyas sa iyang Amahan. (Juan  14:9) Busa samtang magkalawom ang imong kahibalo bahin kang Jesus, magkalawom sab ang imong pagsabot ug apresasyon kang Jehova. Hunahunaa ang pagkamabination ni Jesus sa mga tinamay​—mga pobre, masakiton, ug kadtong dili makapanalipod sa kaugalingon. Hunahunaa sab ang praktikal nga tambag nga iyang gihatag nimo ug kon sa unsang paagi miuswag ang imong kinabuhi tungod sa pagsunod niana.​—Mat. 5:1-11; 7:24-27.

12. Samtang makakat-on ka bahin kang Jesus, lagmit mapalihok ka sa pagbuhat sa unsa?

¹² Ang imong gugma kang Jesus lagmit mas molig-on kon pamalandongon nimo pag-ayo ang paghalad niya sa iyang kinabuhi aron mapasaylo ang atong mga sala. (Mat. 20:28) Sa dihang imong masabtan nga si Jesus kinabubut-ong namatay para nimo, tingali mapalihok ka sa paghinulsol ug pagpangayog pasaylo kang Jehova. (Buh. 3:19, 20; 1 Juan 1:9) Ug sa dihang mahigugma ka kang Jesus ug kang Jehova, mas gusto nimong makig-uban sa mga tawo nga nahigugma sab kanila.

13. Unsay gihatag ni Jehova kanimo?

¹³ Ugmara ang imong gugma sa pamilya ni Jehova. Ang imong dili Saksing pamilya ug kanhing mga higala dili tingali makasabot kon nganong gusto nimong ipahinungod ang imong kaugalingon kang Jehova. Tingali lutoson pa gani ka nila. Si Jehova motabang nimo pinaagi sa paghatag kanimog espirituwal nga pamilya. Kon makigsuod ka niana nga pamilya, imong makita ang gugma ug pagpaluyo nga imong gikinahanglan. (Mar. 10:29, 30; Heb. 10:24, 25) Ngadtongadto, ang imong pamilya basig moduyog nimo sa pag-alagad kang Jehova ug pagsunod sa iyang mga sukdanan.​—1 Ped. 2:12.

14. Base sa 1 Juan 5:3, unsay imong nakita bahin sa sukdanan ni Jehova?

¹⁴ Ugmara ang imong apresasyon sa sukdanan ni Jehova ug paningkamoti nga ipadapat kini. Sa wala pa ka makaila kang Jehova, tingali duna kay kaugalingong sukdanan sa husto ug sayop, pero karon nakita nimo nga mas maayo ang sukdanan ni Jehova. (Sal. 1:1-3; basaha ang 1 Juan 5:3.) Hunahunaa ang tambag sa Bibliya sa mga bana, asawa, ginikanan, ug mga anak. (Efe. 5:22–6:4) Samtang gipadapat nimo ang maong tambag, nakita ba nimo nga nahimong mas malipayon ang imong pamilya? Samtang gisunod nimo ang mga sugo ni Jehova bahin sa pagpilig maayong mga higala, nakita ba nimo nga nahimo kang mas maayong tawo? Nahimo ka bang mas malipayon? (Prov. 13:20; 1 Cor. 15:33) Lagmit oo ang imong tubag sa maong mga pangutana.

15. Unsay imong mahimo kon nagkinahanglan kag tabang sa pagpadapat sa mga prinsipyo sa Bibliya?

¹⁵ Usahay dili tingali ka kahibalo kon unsaon pagpadapat ang mga prinsipyo sa Bibliya nga imong nakat-onan. Busa gigamit ni Jehova ang iyang organisasyon sa pagtagana nimog binase sa Bibliya nga mga publikasyon nga makatabang nimo sa pag-ila kon unsay husto ug sayop. (Heb. 5:13, 14) Kon imo ning basahon ug tun-an, makita nimo kon unsa kini ka praktikal ug ka espesipiko, ug lagmit gusto nimong mahimong bahin sa organisasyon ni Jehova.

16. Giunsa pag-organisar ni Jehova ang iyang katawhan?

¹⁶ Ugmara ang imong gugma sa organisasyon ni Jehova ug paningkamoti nga paluyohan kini. Giorganisar ni Jehova ang iyang katawhan ingong mga kongregasyon; ang iyang Anak, si Jesus, ang ulo sa tanang kongregasyon. (Efe. 1:22; 5:23) Si Jesus nagpilig pipila ka dinihogang lalaki sa pagpanguna sa pag-organisar sa buluhaton nga gusto niyang malampos karon. Gitawag niya kining grupoha ingong “ang matinumanon ug maalamong ulipon,” ug seryoso nilang gituman ang ilang responsibilidad sa pagpakaon ug pagpanalipod kanimo sa espirituwal.  (Mat. 24:45-47) Ang usa sa mga paagi nga giatiman ka sa matinumanong ulipon mao ang pagseguro nga kuwalipikado nga mga ansiyano ang matudlo sa paggiya ug pagpanalipod kanimo. (Isa. 32:1, 2; Heb. 13:17; 1 Ped. 5:2, 3) Ang mga ansiyano andam sa paghimo sa ilang maarangan para nimo, sa paghupay kanimo, ug sa pagtabang kanimo nga mas masuod kang Jehova. Pero ang usa sa kinamaayohang butang nga ilang mahimo mao ang pagtabang kanimo sa pagtudlo sa uban bahin kang Jehova.​—Efe. 4:11-13.

17. Sumala sa Roma 10:10, 13, 14, nganong makig-estorya ta sa uban bahin kang Jehova?

¹⁷ Tabangi ang uban nga makakat-on sa paghigugma kang Jehova. Gisugo ni Jesus ang iyang mga sumusunod sa pagtudlo sa uban bahin kang Jehova. (Mat. 28:19, 20) Posible nga sundon nimo ning sugoa kay mibati kang obligado sa pagsunod niini. Pero samtang magkalawom ang imong gugma kang Jehova, mobati ka sa gibati ni apostol Pedro ug Juan, kinsa miingon: “Dili mi makahunong sa pagsulti bahin sa mga butang nga among nakita ug nadungog.” (Buh. 4:20) Mobati gyod tag dakong kalipay kon makatabang ta sa uban sa paghigugma kang Jehova. Hunahunaa ang kalipay nga gibati sa ebanghelisador nga si Felipe sa dihang natabangan niya ang usa ka Etiopianhon nga makakat-on sa kamatuoran diha sa Kasulatan ug magpabawtismo! Kon imong sundogon si Felipe ug tumanon ang sugo ni Jesus nga mosangyaw, gipamatud-an nimo nga gusto nimong mahimong Saksi ni Jehova. (Basaha ang Roma 10:10, 13, 14.) Nianang tungora, tingali makapangutana ka sama sa Etiopianhon: “Unsay nakapugong nako nga mabawtismohan?”​—Buh. 8:36.

18. Unsay atong hisgotan sa sunod nga artikulo?

¹⁸ Ang imong desisyon nga magpabawtismo mao ang pinakaimportanteng desisyon nga imong mahimo. Kay seryoso kaayo ni nga desisyon, kinahanglang konsiderahon nimo pag-ayo kon unsay kahulogan niini. Unsay kinahanglan nimong mahibaloan bahin sa bawtismo? Unsay kinahanglan nimong himoon una ug human sa bawtismo? Kining mga pangutanaha tubagon sa sunod nga artikulo.