Le Biblia yertzjoj jojun winäq ri xkikʼwaj jun jïk kʼaslemal pa naʼäy, ye kʼa chrij riʼ xa xkiʼän ri ma ütz ta, achiʼel ri qʼatöy tzij Salomón. Ryä rtaman wä rwäch Jehová chqä rtaman wä achkë rbʼanik kʼo chë nyaʼöx rqʼij, y Jehová kan kʼïy utzil xyaʼ pa rwiʼ. Ye kʼa taq xqʼax ri tiempo, Salomón xa xyaʼ kiqʼij tyox. Jehová xkatäj ryowal chrij rma xuʼän riʼ, rma riʼ jontir ri israelitas kan kʼïy jnaʼ xkitäj poqän rma ri mak xeruʼän re qʼatöy tzij reʼ. Kantzij na wä chë le Biblia nuʼij chë taq ryä xkäm, «xuxlan kikʼë ratiʼt rmamaʼ», ri akuchï chqä xuxlan wä ri qʼatöy tzij David, jun qʼatöy tzij ri kan ütz xtzʼet rma Jehová (1Re 11:5-9, 43; 2Re 23:13). Ye kʼa, ¿ntel komä chë tzij riʼ chë Jehová xtkʼasoj pä rma ke riʼ rbʼanik xmuq? Le Biblia ma nuʼij ta. Jehová xa xuʼ xkerkʼasoj pä ri winäq ri nrajoʼ ryä chë nkiyaʼ rqʼij chpan kikʼaslemal, y nuʼän riʼ rma kowan yerajoʼ (Job 14:13, 14; Jn 6:44). ¿Kʼo Salomón chkikojöl ri winäq riʼ? Xa xuʼ Jehová tamayon riʼ, röj manä. Röj xa xuʼ qataman chë Jehová kan yë ri ütz xtuʼän. w24.05 4 peraj 9

Röj achiʼel ta xq·ok pa rachoch Jehová taq xqajäch qakʼaslemal che rä ryä. Chriʼ nyaʼöx jontir ri nkʼatzin chqë rchë kuw nuʼän qakʼuqbʼäl kʼuʼx chqä kiʼ qakʼuʼx nqakʼwaj qiʼ kikʼë nkʼaj chik ramigos Jehová ri yerskʼin pa rachoch. Ye kʼa ¿akuchï komä kʼo wä re jay reʼ? Ma xa xuʼ ta pa jun tinamït kʼo wä, re jay reʼ kʼo xa bʼa akuchï ye kʼo rsamajelaʼ Jehová ri nkinmaj rtzij ryä. (Ap 21:3). ¿Y achkë nqaʼij chkij rsamajelaʼ Jehová ri ye kamnäq äl chqä xkinmaj rtzij ryä? ¿Kʼa ye kʼo na ryeʼ pa rachoch Jehová? Jaʼ, kʼa ye kʼo na. Nqaʼij riʼ rma le Biblia nuʼij chë ryeʼ ye kʼäs pa rjolon Jehová. Jesús xuʼij reʼ: «Taq xbʼix chë xkekʼastäj na pä ri kamnaqiʼ, Moisés xtzjon chrij riʼ taq xjeʼ chwäch ri koʼöl cheʼ ri xbʼrö pa qʼaqʼ, taq xuʼij chë Jehová ya riʼ ‹rDios Abrahán, rDios Isaac chqä rDios Jacob›. Ryä ma kiDios ta ri kamnaqiʼ, xa kan kiDios ri ye kʼäs, rma chwäch ryä achiʼel ta kʼa ye kʼäs na» (Lu 20:37, 38). w24.06 3, 4 peraj 6, 7

Sadoc xbʼä Hebrón y rkʼwan wä jontir ri nkʼatzin che rä we nchapatäj jun chʼaʼoj (1Cr 12:38). Sadoc ryaʼon wä chwäch ran nbʼä xa bʼa akuchï xtbʼä wä David rchë xtbʼerbʼanaʼ chʼaʼoj chqä rchë yertoʼ ri israelitas chkiwäch ri winäq ri itzel nkinaʼ chkë. Rkʼë jbʼaʼ ryä ma kan ta bʼenäq wä pa taq chʼaʼoj, ye kʼa ma nuxiʼij ta wä riʼ nbʼä chpan jun we nkʼatzin. ¿Achkë xtoʼö rchë Sadoc rchë ma xxiʼij ta riʼ xuʼän ri nrajoʼ Dios? Kantzij na wä chë ri xtoʼö rchë ryä ya riʼ xtzʼët ri xkiʼän nkʼaj chik achiʼaʼ ri ma xkixiʼij ta kiʼ xkiʼän riʼ, achiʼel David. Rma David nukʼwaj wä bʼey chkiwäch ri soldados aj Israel rchë yebʼä pa chʼaʼoj chqä ma nuxiʼij ta wä riʼ nuʼän riʼ, jontir rwinaq xkiyaʼ chkiwäch nkiʼän qʼatöy tzij che rä (1Cr 11:1, 2). Ryä rkʼuqbʼan wä rkʼuʼx chrij Jehová chqä nukʼutuj wä rtoʼik che rä taq ri winäq ri itzel nkinaʼ che rä yekatäj pä chrij (Sl 138:3). Sadoc chqä kʼo kʼïy xtamaj qa chkij nkʼaj chik achiʼaʼ ri ma xkixiʼij ta kiʼ xkiʼän ri nrajoʼ Jehová, achiʼel Jehoiadá y Benaya chqä ri 22 ukʼwäy taq bʼey ri xkitoʼ David (1Cr 11:22-25; 12:26-28). w24.07 3 peraj 5, 6

Saulo aj Tarso kan kowan xertzʼlaʼ ri rtzeqelbʼëy Cristo. Rma riʼ, rkʼë jbʼaʼ kʼïy chkë ryeʼ xkiquʼ chë re jun achï reʼ kan ma xtjäl ta rnaʼoj. Ye kʼa Jesús ma ke riʼ ta xquʼ. Ryä chqä Rtataʼ kan yë ri ütz xkitzʼët chrij Saulo. Jesús xuʼij reʼ: «Rïn nchaʼon re achï reʼ» (Hch 9:15). Ryä kan xuʼän jun milagro xa xuʼ rchë nutoʼ rchë nutzolij riʼ (Hch 7:58-8:3; 9:1-9, 17-20). Jun tiempo chrij riʼ, taq Saulo xok cristiano chqä apóstol Pablo chik xbʼix che rä, kʼïy mul xtyoxij chë Jehová chqä Jesús kan ütz kinaʼoj xkiʼän rkʼë chqä kowan xkipoqonaj rwäch (1Ti 1:12-15). Kʼo jun qʼij, Pablo xkʼoxaj chë ri congregación ri kʼo Corinto chaq ütz wä che rä chë jun cristiano najin wä yeruʼän tzʼil taq bʼanobʼäl. Ri xuʼij Pablo che rä ri congregación kan kʼïy nukʼüt qa chqawäch chrij ri rbʼanik nqrajoʼ chqä nqrqʼïl Jehová, y chrij ri rbʼanik nqakʼän qanaʼoj chrij rma ryä kowan nkyun. w24.08 13 peraj 15, 16

Chkipan pa ciento jnaʼ, Jehová eqal xkʼüt achkë nkʼatzin nkiʼän ri winäq rchë jnan nuʼän kiwäch rkʼë. Tapeʼ Adán y Eva xemakun, Abel, ri rkaʼn kalkʼwal, xkʼuqbʼaʼ rkʼuʼx chrij Jehová. Ryä kowan xrajoʼ Dios y kan xkanuj rbʼanik rchë jnan xuʼän rwäch rkʼë. Ri rsamaj ryä ya riʼ yeryuqʼuj karneʼl. Rma riʼ, xerkanuj jojun «naʼäy kal rkarneʼl» rchë xertzüj chwäch Jehová. ¿Xqä komä chwäch Dios ri xuʼän Abel? Jaʼ, le Biblia nuʼij chë «Jehová ütz xtzʼët Abel chqä ri xtzüj chwäch» (Gé 4:4). Kʼïy jnaʼ chrij riʼ, ryä chqä ütz xtzʼët taq ri winäq ri xkajoʼ chqä xkikʼuqbʼaʼ kikʼuʼx chrij, achiʼel Noé, xekiporoj chköp rchë xkitzüj chwäch (Gé 8:20, 21). Ya reʼ xkʼüt chë, tapeʼ ri winäq xa kʼo qa mak chkij, yekowin jnan nuʼän kiwäch rkʼë. w24.08 3 peraj 5, 6

Rkʼë jbʼaʼ röj kan poqän rnaʼon qan rma kʼo jun ma pa rbʼeyal ta xbʼan qkʼë (Ec 7:7). Job chqä Habacuc kan ke riʼ chqä xkinaʼ (Job 6:2, 3; Hab 1:1-3). Tapeʼ majun ta rbʼanon ke riʼ nqanaʼ, kʼo chë nqachajij qiʼ rchë ma xtqaʼän ta jun ri ma ütz ta. Ye kʼa we xtqaʼän riʼ, rkʼë jbʼaʼ xa más kʼayewal xkeqïl. Taq röj nqatzʼët chë majun ta nbʼan chkë ri winäq ri kʼo ma ütz ta nkiʼän chkë nkʼaj chik, rkʼë jbʼaʼ nqaquʼ we kʼo nkʼatzin wä nqaʼän ri ütz o manä. Taquʼ rij ri xqʼaxaj jun chkë ri xtzʼibʼan ri Salmos. Ryä xtzʼët chë ri itzel taq winäq kan itzel kinaʼoj nkiʼän kikʼë nkʼaj chik, y tapeʼ ke riʼ, kan ütz ye bʼenäq pa kikʼaslemal. Rma riʼ xuʼij ya reʼ: «Kan ke riʼ nkiʼän ri itzel taq winäq. Ryeʼ kan majun ta kwest nuʼän chkiwäch» (Sl 73:12). Ryä kan itzel xnaʼ ran rma jontir ri itzelal yebʼan chqä xquʼ chë majun nkʼatzin wä nuyaʼ rqʼij Jehová, rma riʼ xuʼij: «Taq ntäj wä nqʼij rchë nqʼax ya riʼ chi nwäch, rïn kan kwest wä nuʼän chi nwäch» (Sl 73:14, 16). w24.11 3 peraj 5-7

Nqayaʼ rqʼij Jehová rma ryä kan kʼo rqʼij chqawäch. Röj kan kʼo rqʼij Jehová chqawäch. Chqä ma nqaqasaj ta rqʼij rma ryä kʼo ronojel uchqʼaʼ pa rqʼaʼ; rchqʼaʼ Jehová majun bʼëy nkʼis ta (Sl 96:4-7). Chqä, rkʼë jontir ri rbʼanon qa, kan nqʼalajin chë ryä kowan rnaʼoj. Dios ryaʼon qakʼaslemal chqä jontir ri nkʼatzin chqë rchë nqkʼaseʼ (Ap 4:11). Jehová ma yeryaʼ ta qa ramigos (Ap 15:4). Kan ütz ntel jontir chwäch chqä kan nuʼän ri nuʼij (Jos 23:14). Nqʼax kʼa chqawäch achkë rma ri profeta Jeremías xuʼij ya reʼ che rä: «Chkikojöl jontir ri ajnaʼoj taq winäq ri ye kʼo chkipan ri tinamït chqä chpan ri qʼatbʼäl taq tzij, majun ta jun achiʼel rït» (Jer 10:6, 7). Rkʼë ya reʼ nqatzʼët chë kʼo kʼïy rma njeʼ rqʼij Jehová chqawäch chqä ma nqaqasaj ta rqʼij. Ye kʼa ma xa xuʼ ta ya riʼ taqäl chrij, ryä chqä taqäl chrij nqajoʼ. Chqä, ri más kʼo rqʼij ya riʼ, chë nqayaʼ rqʼij Jehová rma kan rkʼë ronojel qan nqajoʼ. w25.01 3 peraj 5, 6

Ri winäq ri itzel nkinaʼ chqë nkitäj kiqʼij rchë rtinamit Jehová ma ütz ta ntzʼet kimä ri winäq. Jun tzʼetbʼäl. Le Biblia nuʼij chë Jehová nrajoʼ chë rsamajelaʼ nkichʼajchʼobʼej kiʼ, nkikʼwaj jun chʼajchʼöj kʼaslemal chqä ma nkitzʼilbʼisaj ta ryaʼik rqʼij ryä. Chqä nuʼij chë, we jun winäq nukʼwaj jun tzʼil kʼaslemal y ma nutzolij ta riʼ che rä rmak, kʼo chë nesäx qa pa congregación (1Co 5:11-12; 6:9, 10). Rma röj yeqasmajij re naʼoj reʼ, ri itzel nkinaʼ chqë nkiʼij chë röj itzel qanaʼoj chqä chë nqaquʼ chë más ütz ri najin nqaʼän röj chkiwäch ri nkʼaj chik. Röj kʼo chë nqatamaj achkë najowan chë ma ütz ta nqtzʼet kimä ri winäq. Satanás, ri achoq rkʼë «xtzʼuktäj wä pä ri tzʼukün tzij», rkʼë ryä yepë wä ri tzʼukün taq tzij ri yebʼix chrij rtinamit Dios (Jn 8:44; Gé 3:1-5). Rma riʼ, qataman chik chë yerksaj jojun winäq rchë yekitzjoj ri naʼoj riʼ. w24.04 10 peraj 13, 14

Tapeʼ ya xchapatäj yän ri nimaläj tijöj poqonal, rkʼë jbʼaʼ ye kʼo jojun winäq ri xtkitzʼët chë xchup rwäch «Babilonia la Grande», xtnatäj chkë chë ri testigos de Jehová kan kʼïy jnaʼ xkitzjoj chë ya riʼ xtbʼanatäj. ¿Xtkiyaʼ na komä rqʼij Jehová jojun chkë ri winäq riʼ? (Ap 17:5). Tqaquʼ rij ri xbʼanatäj pa rqʼij qa Moisés. Taq ri israelitas xeʼel pä Egipto, kan ye kʼïy winäq ri jalajöj kitinamit xepë kikʼë (Éx 12:38). Rkʼë jbʼaʼ jojun chkë ryeʼ xkikʼuqbʼaʼ kikʼuʼx chrij Jehová taq xkitzʼët chë xebʼanatäj ri 10 plagas ri xertzjoj Moisés. We ke riʼ chqä xtkiʼän jojun winäq taq xtchup rwäch Babilonia la Grande, ¿xtqaquʼ komä chë ma pa rbʼeyal ta xtbʼan we xtyaʼöx qʼij chkë jojun winäq rchë xkeʼok pä qkʼë taq ya xtchapatäj Armagedón? ¡Manä, ma ke riʼ ta xtqaquʼ! Röj nqajoʼ nqakʼän qanaʼoj chrij Qatat kʼo chkaj, ryä «jun Dios ri kan nupoqonaj kiwäch ri winäq, ri ma chanin ta nkatäj ryowal, ri kan nüm rajowabʼäl chqä majun bʼëy nkʼis ta, ri majun bʼëy yeryaʼ ta qa rchiʼil» (Éx 34:6). w24.05 11 peraj 12, 13

¿Achkë rkʼë jbʼaʼ xtbʼanatäj we ma xkeqasmajij ta chik «ri kantzij taq naʼoj»? Tqatzʼetaʼ ri xbʼanatäj pa naʼäy siglo. Ye kʼo jojun cristianos xkesaj rtzjol chë rqʼij Jehová ya xbʼeqä. Rkʼë jbʼaʼ kʼo wä jun carta kikʼë ri nuʼij ya riʼ, ri achiʼel ta yë ri apóstol Pablo xtzʼibʼan rchë. Jojun cristianos aj Tesalónica kan xkinmaj ya riʼ chqä xkesaj rtzjol, y ma xkitzʼët ta na we kantzij o manä. Xa ta ryeʼ xnatäj chkë ri xkʼüt Pablo chkiwäch taq xjeʼ kikʼë, ma ta xeqʼol (2Te 2:1-5). Rma riʼ Pablo xuʼij chkë chë ma tkinmaj ta jontir ri nbʼix chkë. Y, rchë ma nbʼanatäj ta chik jmul ya riʼ kikʼë, ryä xuʼij ya reʼ taq xkʼis ri rkaʼn carta ri xtäq äl chkë: «Rïn, Pablo, nyaʼ äl rtzil iwäch, y kan rkʼë nqʼaʼ ntzʼibʼaj wä äl. Ya reʼ jun ketal ncartas, rma ke reʼ rbʼanik yitzʼibʼan rïn» (2Te 3:17). w24.07 12 peraj 13, 14

Taq más wä najin yenmatäj ri kʼayewal pa kitinamit, ri cristianos aj Judea xkʼatzin xekiköchʼ ri kʼayewal xekïl. Tapeʼ ojer jojun chkë ryeʼ xkiköchʼ yän jojun kʼayewal ri xyaʼöx pa kiwiʼ, ye kʼïy xkitamaj chrij Jesús chpan jun tiempo ri akuchï ma kan ta kʼo kʼayewal xekïl. Ye kʼa ri apóstol Pablo xuʼij chkë chë xtyaʼöx más kʼayewal pa kiwiʼ chqä chë nkʼatzin yekiköchʼ ri kʼayewal riʼ tapeʼ xtkïl kamïk, achiʼel xuʼän Jesús (Heb 12:4). Rma chpan ri tiempo riʼ ye kʼïy wä winäq najin yeʼok cristianos, ye kʼïy judíos xmeqʼeʼ kikʼë. Jojun jnaʼ qa, jun molaj winäq aj chriʼ xekatäj pä chrij. Y más ye 40 judíos «xkiyaʼ chkiwäch chë majun ta jun chkë ryeʼ xtwaʼ kʼa taq» xtkikamsaj Pablo (Hch 22:22; 23:12-14). Tapeʼ ri cristianos riʼ ye kʼo wä chkikojöl winäq ri itzel wä nkinaʼ chkë, ryeʼ nkʼatzin wä nkimöl kiʼ, nkitzjoj rchʼaʼäl Dios chqä nkikanuj rbʼanik rchë nkikʼuqbʼaʼ kikʼuʼx chrij Jehová. w24.09 12 peraj 15

Ri apóstol Juan kan kowan xajowäx rma Jesús (Mt 10:2). Ryä xbʼä rkʼë Jesús rchë xkitzjoj ri ütz taq rtzjol chkë ri winäq, xtzʼët ri milagros xeruʼän chqä xjeʼ rkʼë taq xtäj poqän. Juan xjeʼ rkʼë Jesús taq xkamsäx y xtzʼët taq xkʼasöx yän pä chkikojöl ri kamnaqiʼ. Chqä xtzʼët achkë rbʼanik más winäq xkinmaj chrij Jesús pa naʼäy siglo. Xtzʼët taq xchapatäj pä ri congregación chqä taq xtzjöx yän ri ütz taq rtzjol «chwäch jontir Rwachʼlew» (Col 1:23). Taq Juan ya riʼj wä chik, xksäx rma Jehová rchë xertzʼibʼaj jojun libros chpan le Biblia. Ryä xtzʼibʼaj «ri xkʼut Dios chwäch Jesucristo» (Ap 1:1). Chqä xtzʼibʼaj ri wuj Juan chqä primera, segunda y tercera de Juan. Ri rox rcarta xtzʼibʼaj äl che rä Gayo, jun cristiano ri kan achiʼel ta rkʼajol xtzʼët (3 Jn 1). Ri xtzʼibʼaj qa re achï reʼ kan kowan rkʼuqbʼan kikʼuʼx rtzeqelbʼëy Jesús kʼa pa qaqʼij komä. w24.11 12 peraj 15, 16

Ri achï ri nrajoʼ rxjayil nutzʼët rxjayil achiʼel ta jun jaʼäl spanïk ryaʼon Jehová che rä chqä chë kan kowan rqʼij (Pr 18:22; 31:10). Rma riʼ nuloqʼoqʼej, nuchajij, kan ütz rnaʼoj nuʼän rkʼë chqä ma nuqasaj ta rqʼij, yajün taq njeʼ sexo chkiwäch. Ma nutäj ta rqʼij chrij rxjayil rchë nuʼän jun rbʼanik sexo rkʼë ri xa ma ütz ta nunaʼ rxjayil, xa nuqasaj rqʼij o xa nutzʼlaʼ rconciencia. Y ryä chqä nutäj rqʼij chë chʼajchʼöj njeʼ rconciencia chwäch Jehová (Hch 24:16). Achiʼaʼ, tiyaʼ chwäch iwan chë Jehová nutzʼët chqä nuloqʼoqʼej jontir ri niʼän rchë ronojel mul niyaʼ kiqʼij iwixjayil. Tiyaʼ chiwäch ma niʼän ta xa bʼaʼ achkë jun ri xa nuqasaj kiqʼij, ütz inaʼoj tibʼanaʼ kikʼë chqä ma tiqasaj ta kiqʼij. We xtiʼän riʼ, xtikʼüt chkiwäch chë yeʼiwajoʼ chqä chë yeʼiloqʼoqʼej. We rïx niyaʼ kiqʼij iwixjayil, xtikʼüt chë najin nichajij ri kʼo más rqʼij: iwachbʼilanïk rkʼë Jehová (Sl 25:14). w25.01 13 peraj 17, 18

Röj ri testigos de Jehová ma yoj jnan ta kikʼë ri winäq ri nkiʼij chë ye cristianos, rma röj kan nqarayij nqatzjoj le Biblia. ¿Achkë xtqtoʼö rchë ma xtikʼo ta qakʼuʼx xtqatzjoj le Biblia chqä rchë xtqayaʼ más qan chrij ri samaj riʼ? Jun ri xtqtoʼö rchë xtqayaʼ qan chrij rtzjoxik le Biblia, ya riʼ nqatzʼët achkë xuʼän Jesús. Taq ryä xjeʼ chwäch Rwachʼlew, ma xikʼo ta rkʼuʼx xtzjoj rchʼaʼäl Dios, pa rkʼexel riʼ, ryä xyaʼ más ran chrij ri samaj riʼ. Kʼo jun qʼij, Jesús xjnamaj riʼ rkʼë jun achï ri oxiʼ jnaʼ xjeʼ jun rcheʼ higo rkʼë, ye kʼa majun bʼëy xyaʼ ta rwäch. Y ke riʼ chqä xuʼän ryä, oxiʼ jnaʼ xtzjoj rchʼaʼäl Dios chkë ri judíos, ye kʼa xa ye jbʼaʼ ok xeʼok rtzeqelbʼëy. Ye kʼa, achiʼel ri achï ri xuʼän na kwent ri rcheʼ higo rchë nuyaʼ rwäch, Jesús chqä xyaʼ na ran chrij rtzjoxik rchʼaʼäl Dios y ma xikʼo ta rkʼuʼx xuʼän ri samaj riʼ. Ryä xtäj más rqʼij rchë ri winäq nkinmaj ri ütz taq rtzjol chrij Rqʼatbʼäl Tzij Dios (Lu 13:6-9). Taq röj nqatamaj achkë rbʼanik nchʼobʼon Jesús y nqakʼän qanaʼoj chrij ya riʼ nbʼanö chqë chë nqarayij nqatzjoj le Biblia. w25.03 14, 15 peraj 1-4

¿Y si xatzʼët yän jun qachʼalal ri nanaʼ rït chë ütz ntok akʼlaj? ¿Kan nkʼatzin naʼij yän che rä achkë nanaʼ? Le Biblia nuʼij chë ri winäq ri kan kʼo rnaʼoj naʼäy nutamaj jontir chrij ri nrajoʼ nuʼän y chrij riʼ nuʼän riʼ. Rma riʼ ri más ütz naʼän ya riʼ natzʼët na achkë rnaʼoj ri qachʼalal riʼ. Rkʼë jbʼaʼ rït naquʼ ya reʼ: «¿Achkë kʼa rbʼanik ntamaj achkë rnaʼoj ri qachʼalal ri nwajoʼ rïn ntok nkʼlaj?». Rkʼë jbʼaʼ taq yït kʼo pa Salón del Reino o taq imolon iwiʼ kikʼë jojun qachʼalal, yakowin natzʼët achkë yeruʼän, achkë rnaʼoj nuʼän kikʼë jontir, o achkë rbʼanon rachbʼilanïk rkʼë Jehová. ¿Atzʼeton chik achoq kikʼë nukʼwaj wä riʼ? ¿Achkë yertzjoj? (Lu 6:45). Ri nawajoʼ naʼän rït chpan rtinamit Jehová, ¿ya riʼ chqä jbʼaʼ nrajoʼ nuʼän ryä? Rkʼë jbʼaʼ ütz yatzjon kikʼë ri ukʼwäy taq bʼey ri ye kʼo chpan rcongregación, o kikʼë nkʼaj chik qachʼalal ri kitaman rwäch ryä rchë nakʼutuj chkë achkë rnaʼoj kitzʼeton ryeʼ (Pr 20:18). Ütz nakʼutuj chkë achkë rbʼanik nkitzʼët ri nkʼaj chik y achkë ütz taq naʼoj ye kʼo rkʼë (Rut 2:11). Ye kʼa, taq rït xtakanuj rbʼanik rchë xtatamaj achkë rnaʼoj ryä, tatjaʼ aqʼij rchë ryä ma chiʼin ta nunaʼ. Ma tamestaj ta chë ri nanaʼ rït rkʼë jbʼaʼ ma ya riʼ ta nunaʼ ryä, y ma tatäj ta aqʼij chrij rchë ronojel mul nawajoʼ natamaj achkë yeruʼän. w24.05 22 peraj 7, 8

Ri ukʼwäy taq bʼey ma chanin ta nkiquʼ chë ri winäq ma nrajoʼ ta nutzolij riʼ. Ye kʼo ri nkitzolij kiʼ taq kʼa riʼ naʼäy mul ntzjon ri comité kikʼë, ye kʼa jojun chik nukʼwaj más tiempo chkiwäch. Rma riʼ, ri ukʼwäy taq bʼey ütz ma xa xuʼ ta jmul nkimöl kiʼ rkʼë ri xmakun. Rkʼë jbʼaʼ, taq naʼäy mul xetzjon rkʼë, ri qachʼalal ri xmakun xtquʼ rij ri xbʼix che rä y ya riʼ xtuʼän chë xtchʼö rkʼë Jehová rchë xtuʼij che rä chë tkyuʼ rmak (Sl 38:18). Chqä rkʼë jbʼaʼ taq ri ukʼwäy taq bʼey xketzjon chik jmul rkʼë, ryä ya rjalon chik rnaʼoj. Rchë nkitoʼ ri winäq rchë nutzolij riʼ, ri ukʼwäy taq bʼey nkʼatzin nqʼax chkiwäch ri nunaʼ ri winäq riʼ chqä nkʼatzin ütz kinaʼoj nkiʼän rkʼë. Ryeʼ nkiʼij che rä Jehová chë tbʼanaʼ chë ütz ntel apü jontir chkiwäch y nkiyoʼej chë ri qachʼalal nqʼax chwäch chë ma ütz ta ri najin nuʼän chqä nutzolij riʼ (2 Ti 2:25, 26). w24.08 22, 23 peraj 12, 13

Jehová ma nrajoʼ ta chë jun winäq nchup rwäch. Ryä nrajoʼ chë ri xeqä pa mak nkitzolij kiʼ rchë jnan chik nuʼän kiwäch rkʼë (2Co 5:20). Rma riʼ, chkipan ri jnaʼ ri ye qʼaxnäq pä, ryä kan kʼïy mul rbʼin chkë ri ma jnan ta chik rbʼanon kiwäch rkʼë chë tkitzolij kiʼ chqä ketzolin rkʼë. Rma riʼ, chkiwäch ri ukʼwäy taq bʼey kan kowan rqʼij chë yekowin yetoʼon rkʼë Jehová rchë yekitoʼ ri xeqä pa mak rchë nkitzolij kiʼ (Ro 2:4; 1 Co 3:9). Tqaquʼ achkë nkinaʼ chlaʼ chkaj taq jun winäq ri xmakun nutzolij riʼ. ¡Ryeʼ kan kiʼ kikʼuʼx nkiʼän! Jehová, ri Qatataʼ kʼo chkaj, kan kiʼ rkʼuʼx nuʼän taq jun chkë ri winäq, ri achiʼel ta jun karneʼl sachnäq, ntzolin pä pa congregación. Rma riʼ ronojel mul tqaquʼ rij ri rbʼanik nupoqonaj qawäch Jehová, ri rbʼanik nuküy qamak chqä ri rnaʼoj nuʼän qkʼë. Ya riʼ xtuʼän chë ronojel qʼij ri xtqʼax más xtqajoʼ (Lu 1:78). w24.08 31 peraj 16, 17

Xa ta Jesús xyaʼ qʼij chë ri winäq xkiʼän ta qʼatöy tzij che rä, xyüj ta riʼ pa política kikʼë ri judíos, ri ye kʼo wä pa rqʼaʼ Roma. Ye kʼa Jesús chanin xanmaj äl pa jyuʼ. Tapeʼ ri winäq xkitäj kiqʼij chrij, ryä ma xtïtzʼ ta riʼ pa política. ¡Ya riʼ chqä nkʼatzin nqaʼän röj! Kantzij na wä chë ri winäq ma xtkiʼij ta chqë chë tqabʼanaʼ jun milagro kikʼë kaxlanwäy o chë keqaknaj ri yawaʼiʼ. Chqä ma xtkitäj ta kiqʼij chqij rchë nq·ok qʼatöy taq tzij. Ye kʼa rkʼë jbʼaʼ xtkitäj kiqʼij chqij rchë nqaʼän votar o rchë nqatoʼ jun winäq ri nkiquʼ ryeʼ chë xtsöl kikʼayewal. Ye kʼa, Jesús xkʼüt qa chqawäch achkë nkʼatzin nqaʼän. Ryä ma xrajoʼ ta xtïtzʼ riʼ pa política. Y chrij riʼ xuʼij ya reʼ: «Nqʼatbʼäl Tzij rïn ma kikʼë ta winäq xtzʼuktäj wä pä» (Jn 17:14; 18:36). Jontir röj ütz nqchʼobʼon achiʼel nchʼobʼon Jesús y nqaʼän ri xuʼän ryä. Röj nqatoʼ Rqʼatbʼäl Tzij Dios, nqatzjoj ri qʼatbʼäl tzij riʼ chkë ri winäq chqä nqaʼij che rä Jehová chë yë Rqʼatbʼäl Tzij ryä tqʼataʼ tzij pa qawiʼ (Mt 6:10). w24.12 4 peraj 5, 6

Taq xtatjoj awiʼ chrij le Biblia, takanuj rbʼanik rchë nasmajij ri natamaj. Rkʼë jbʼaʼ ütz natzʼët achkë rbʼanik nakʼän anaʼoj chrij Jehová, ri kan pa rbʼeyal nuʼän che rä jontir. Rkʼë jbʼaʼ ütz naʼän riʼ taq ütz anaʼoj naʼän kikʼë jontir. Ütz chqä nakʼän anaʼoj chrij Jesús. Ryä kowan xrajoʼ Rtat chqä kowan xerajoʼ ri winäq, y rït xtakʼüt chqä ya riʼ we ma nakʼewaj ta natäj poqän xa rma nayaʼ rqʼij Dios, yeʼatoʼ qachʼalal tapeʼ kʼo sacrificios xtkʼatzin xtaʼän chqä natzjoj le Biblia chkë nkʼaj chik winäq, rchë ke riʼ ryeʼ xkekowin xtkïl utzil rma rkʼaslemal xyaʼ Jesús pa kamïk. Taq más nqʼax chqawäch achkë xkʼatzin xkiʼän Jehová chqä Jesús rchë xojkiköl, más xkeqajoʼ ryeʼ. Y ryeʼ chqä más xkojkajoʼ röj (Snt 4:8). Rma riʼ, tqaksaj jontir ri toʼïk ryaʼon Jehová chqë rchë nqatamaj más chrij ri xuʼän ryä chqä Rkʼajol pa qawiʼ. w25.01 25 peraj 16, 17

Jun chik rbʼanik ütz nbʼan ke reʼ chë rä ri texto rchë komä ya riʼ: «Awesan äl jontir nmak chawäch». Reʼ ntel chë tzij chë, taq röj nqatzolij qiʼ, Jehová achiʼel ta yerkʼäq äl qamak akuchï majun bʼëy chik xkertzʼët ta. Re texto reʼ ütz chqä nbʼan ke reʼ che rä: «Chawäch rït, achiʼel ta majun bʼëy ximakun ta». Le Biblia nuyaʼ más rchqʼaʼ re naʼoj reʼ rkʼë ri nuʼij chpan Miqueas 7:18, 19. Chriʼ nuʼij chë Jehová nukʼäq äl jontir qamak chpan ri mar. Ojer qa, taq kʼo achkë jun ntzaq äl pa mar, ri winäq ma yekowin ta chik nkesaj pä. Kikʼë re ejemplos reʼ xqatamaj qa chë taq Jehová nqrküy, yerkʼwaj äl qamak, ke riʼ nresaj ri al ejqaʼn riʼ chqij. Y, achiʼel xuʼij David: «Kan kiʼ kikʼuʼx ri winäq ri xmestäx yän ri ma ütz ta xekiʼän chqä ri xkuy yän kimak» (Ro 4:7). ¡Kantzij na wä chë Jehová kantzij nkyun! w25.02 9 peraj 7, 8

Pa qaqʼij komä, jontir röj, rsamajelaʼ Jehová, achiʼel ta yoj kʼo chwäch jun jaʼäl ilew ri akuchï kan kʼïy achkë jun yeqaʼän. Chwäch ri ilew riʼ, yoj kʼo kan pa millón winäq ri majun ta chʼaʼoj chqawäch chqä qayaʼon chwäch qan majun bʼëy nq·el ta qa chwäch. Chqä nqajoʼ chë más winäq yepë qkʼë. Ri akuchï yoj kʼo wä, röj nqaʼij jaʼäl ilew che rä. Jehová rbʼanon chë kan jaʼäl nqanaʼ nqjeʼ chpan rtinamit tapeʼ yoj kʼo chkikojöl winäq ri nkitzelaj kiʼ, yekiʼän itzelal chqä nkiʼän chë ri nkʼaj chik nxiʼin rij kikʼaslemal (1Jn 5:19; Ap 12:12). Ryä rtaman achkë rbʼanik yojkitzʼlaʼ rwinaq Satanás. Ye kʼa, rma ryä kowan nqrajoʼ, xqrkʼäm pä chpan rtinamit, ri akuchï majun ta jun nbʼanö chqë chë nqaxiʼij qiʼ chqä nqkowin kan kiʼ qakʼuʼx nqayaʼ rqʼij ryä. Chpan Rchʼaʼäl nuʼij chë ri jaʼäl ilew ri akuchï yoj kʼo wä achiʼel jun peraj ilew akuchï ütz nqatoʼ wä qiʼ y achiʼel «jun jardín ri kan jaʼäl yiʼan» (Is 4:6; 58:11). Rkʼë rtoʼik Jehová, ri ye kʼo chwäch ri jaʼäl ilew riʼ kan kiʼ kikʼuʼx nkinaʼ chqä majun ta jun nbʼanö chkë chë nkixiʼij kiʼ tapeʼ ye kʼo chpan re rkʼisbʼäl taq qʼij reʼ ri kan kʼayewal rbʼanon (Is 54:14; 2Ti 3:1). w24.04 20 peraj 1, 2

We rït nawajoʼ yakʼleʼ, rkʼë jbʼaʼ abʼin chik ya riʼ che rä Jehová. Kantzij na wä chë Jehová ma rbʼin ta chawä chë xtkanuj akʼlaj. Ye kʼa Jehová nqʼax chwäch achkë nanaʼ chqä rtaman achkë nkʼatzin chawä, y xkaturtoʼ pä rchë xtawïl jun qachʼalal ri achoq rkʼë ütz xkakʼleʼ wä. Rma riʼ ronojel mul taʼij che rä achkë nawajoʼ rït chqä achkë nanaʼ (Sl 62:8). Taʼij che rä chë katurtoʼ pä rchë ma nikʼo ta akʼuʼx yayoʼen chqä chë tyaʼ pä anaʼoj (Snt 1:5). ¿Y si nqʼax ri tiempo y ma nawïl ta jun qachʼalal ri achoq rkʼë ütz yakʼleʼ wä? Ma tamestaj ta chë Jehová xtyaʼ jontir ri nkʼatzin chawä rchë xkaturchajij chqä rchë kiʼ akʼuʼx xtaʼän (Sl 55:22). Ye kʼa, ma tayaʼ ta qʼij chë ri njeʼ más rqʼij chawäch rït ya riʼ nakanuj achoq rkʼë ütz yakʼleʼ wä (Flp 1:10). Ri nbʼanö chë jun cristiano kiʼ rkʼuʼx nuʼän, ya riʼ chë jnan rbʼanon rwäch rkʼë Jehová y ma ya riʼ ta chë kʼlan o ma kʼlan ta (Mt 5:3). Chqä, komä ri ma yït kʼlan ta, rkʼë jbʼaʼ más nrïl chawäch naʼän más samaj chpan rtinamit Jehová (1Co 7:32, 33). Rma riʼ tabʼanaʼ jontir ri yakowin naʼän komä ri ma yït kʼlan ta. w24.05 21 peraj 4; 22 peraj 6

¿Jaruʼ tiempo nkʼatzin nichʼaʼej iwiʼ? Taq ma naquʼ ta na ri nachaʼ naʼän, kʼo mul xa kʼayewal nukʼäm pä chawij (Pr 21:5). Rma riʼ, rït yatzʼetö jaruʼ tiempo nkʼatzin chawä rchë natamaj rwäch qachʼalal ri najin nichʼaʼej iwiʼ rkʼë. Ye kʼa ma tayaʼ ta kʼïy tiempo che rä, rma le Biblia nuʼij chë «taq kʼo jun ayoʼen ye kʼa ma nbʼanatäj ta yän, xa nuyaʼ ryabʼil awan» (Pr 13:12). ¿Achkë ütz nkiʼän ri nkʼaj chik rchë yekitoʼ qachʼalal ri najin nkichʼaʼej kiʼ? Rkʼë jbʼaʼ ütz nqbʼebʼyaj kikʼë, yeqaskʼij rchë yewaʼ qkʼë o rchë nqayaʼ rqʼij Jehová pa qachoch (Ro 12:13). We nkʼatzin chkë, ütz nqatzüj qiʼ rchë nqjeʼ kikʼë, rchë yeqakʼwaj akuchï nkajoʼ wä ryeʼ o yeqaskʼij chqachoch rchë yekowin yetzjon; ke riʼ ma kiyonïl ta xkejeʼ (Gál 6:10). ¿Y si ryeʼ nkiʼij chqë chë qjeʼ kikʼë? Tqaquʼ chë ya riʼ jun rbʼanik nqkowin yeqatoʼ. Tapeʼ ke riʼ, nkʼatzin chqä nqatzʼët ajän nkajoʼ ryeʼ yetzjon chkiwäch chqä nqakanuj rbʼanik rchë ma kiyonïl ta xkekanaj qa. w24.05 30 peraj 13, 14

Ri ukʼwäy taq bʼey nkitzʼët achkë rkʼë jbʼaʼ xbʼanö chë jun winäq xmakun. Ryeʼ nkitäj kiqʼij rchë nkitamaj achkë rma xkʼis qa rkʼuqbʼäl kʼuʼx. Rma riʼ nkiquʼ rij reʼ: ¿kʼa nutjoj na riʼ chrij le Biblia chqä kʼa ntel na chutzjoxik?, ¿chaq taqïl na nchʼö rkʼë Jehová chqä kʼa nuʼij na che rä achkë nunaʼ?, ¿xyaʼ qʼij chë ri itzel taq raynïk xbʼä rkʼamal pa ran?, ¿achkë rchiʼil ye kʼo?, ¿achkë nutzʼët, nukʼoxaj o nuskʼij rwäch?, ¿xa ya riʼ komä xbʼanö che rä rchë xqä pa mak?, ¿nqʼax chwäch chë ri xuʼän xyaʼ bʼis pa ran ri Qatataʼ Jehová? Ri ukʼwäy taq bʼey xtkiʼän kʼutunïk che rä ri qachʼalal. Ryeʼ xtkiquʼ na achkë xtkikʼutuj che rä chqä ma xtkikʼutuj ta jun ri ma nkʼatzin ta nkitamaj. We ryeʼ ütz kinaʼoj xtkiʼän rkʼë, ya riʼ xtuʼän chë ri qachʼalal ma xtxiʼij ta riʼ xttzjon chqä xttoʼ rchë xtqʼax chwäch achkë xbʼanö che rä rchë xqä pa mak (Pr 20:5). Chqä, ütz yekiksaj kʼambʼäl taq tzij rchë nkitoʼ ri qachʼalal rchë nutzʼët chë ri xuʼän ma ütz ta. Rkʼë jbʼaʼ, ri naʼäy mul ri xketzjon ri ukʼwäy taq bʼey rkʼë xttiʼon ran rma ri xuʼän, o rkʼë jbʼaʼ kan xttzolij riʼ. w24.08 22 peraj 9-11

Jesús xyaʼ ran chrij rtzjoxik «ri ütz taq rtzjol chrij Rqʼatbʼäl Tzij Dios» rma rtaman wä chë ya riʼ wä nrajoʼ Dios rchë nuʼän. Chwäch Jesús, ri samaj riʼ ya riʼ wä ri kʼo más rqʼij pa rkʼaslemal. Y taq xa xuʼ wä chik 6 ikʼ kʼo chwäch Rwachʼlew, ryä «xok chpan nmaʼq chqä koköj taq tinamït rchë xkʼüt rchʼaʼäl Dios chkiwäch ri winäq» (Lu 13:22). Chqä xertjoj más winäq rchë xkiʼän chqä ri samaj riʼ (Lu 10:1). Pa qaqʼij komä, ri rtzjoxik ri ütz taq rtzjol chrij Rqʼatbʼäl Tzij Dios ya riʼ ri samaj ri nkajoʼ Jehová chqä Jesús rchë nqaʼän (Mt 24:14; 28:19, 20). Jun chik ri xtqtoʼö rchë kan más na chik xtqarayij xtqatzjoj le Biblia, ya riʼ yeqatzʼët ri winäq achiʼel yertzʼët Jehová. Ryä kʼo ta nrajoʼ chë jontir ta winäq nkikʼoxaj ri ütz taq rtzjol chqä nkinmaj (1Ti 2:3, 4). Rma ri nqatzjoj chkë ri winäq xtuʼän chë ryeʼ xtkïl kikʼaslemal, Jehová nrajoʼ nqrtoʼ pä rchë más ütz rbʼanik nqaʼän ri samaj riʼ. Ye kʼa, tapeʼ komä ma xtkinmaj ta ri xtqatzjoj chkë, rkʼë jbʼaʼ xtkiʼän riʼ taq ya xa nkʼis ri nimaläj tijöj poqonal. w25.03 15, 16 peraj 5-7

Chqajujnal nkʼatzin nqaksaj ri naʼoj qataman chpan le Biblia rchë nqatzʼët we nqachʼaʼej o manä. Rkʼë jbʼaʼ ye kʼo jojun majun rbʼanon ta chkiwäch nkichʼaʼej ri winäq taq napon pa Salón o taq kʼo chik chriʼ. Ye kʼa ri ma xtqaʼän ta, ya riʼ nqamäj tzij rkʼë o nqakʼwaj qiʼ rkʼë. Ye kʼa, rkʼë jbʼaʼ nqaquʼ reʼ: «¿Ma nuʼij ta le Biblia kʼa chë ri nchʼaʼen kichë ri winäq riʼ ntok kichiʼil chubʼanik ri ma ütz ta yekiʼän?» (2Jn 9-11). Ri contexto nukʼüt chë ri apóstol Jn najin wä ntzjon chkij ri apóstatas o chrij xa bʼa achkë winäq ri nuʼän chë ri nkʼaj chik nkiqʼäj rtzij Jehová (Ap 2:20). Rma riʼ, we jun winäq nbʼeʼok apóstata o nuʼän chë ri nkʼaj chik nkiqʼäj rtzij Jehová, ri ukʼwäy taq bʼey ma xtkibʼechʼaʼej ta. Tapeʼ ke riʼ, re winäq reʼ rkʼë jbʼaʼ xttzolij na riʼ. Ye kʼa we ma nbʼanatäj ta riʼ, röj ma xtqachʼaʼej ta nixta xtqaʼij che rä chë ütz napon pa qareunión. w24.08 30 peraj 14, 15

Taq Jesús xertzüq yän ri winäq, xuʼij chkë rapóstoles chë kebʼä äl pa barco rchë yetzolin Capernaúm, y ryä xbʼä äl pa rwiʼ jyuʼ rchë ri winäq ma nkiʼän ta qʼatöy tzij che rä (Jn 6:16-20). Taq ri apóstoles ye bʼenäq äl pa barco, xpë jun nüm jöbʼ chkij ri kowan kaqʼiqʼ chpan chqä kowan rwiʼ yaʼ xuʼän. Jesús xbʼiyïn äl pa rwiʼ yaʼ rchë nbʼä apü kikʼë chqä xuʼij che rä ri apóstol Pedro chë tbʼiyïn chqä pa rwiʼ yaʼ (Mt 14:22-31). Taq Jesús xjoteʼ pa barco, xchameʼ qa ri kaqʼiqʼ, y ri apóstoles, ri ma nkinmaj ta wä ri xkitzʼët, xkiʼij ya reʼ che rä: «Kantzij na wä chë yït rït Rkʼajol Dios» (Mt 14:33). Re tzij reʼ kan kowan rqʼij, rma ryeʼ ma xkiʼij ta ya reʼ taq Jesús xuʼän ri milagro kikʼë ri kaxlanwäy. Tapeʼ ke riʼ, ryeʼ kan ma nkinmaj ta wä ri xkitzʼët y Marcos xuʼij achkë rma, rma «ma xkitzʼët ta achkë xkʼüt qa chkiwäch ri milagro xuʼän ryä kikʼë ri kaxlanwäy» (Mr 6:50-52). Ri apóstoles ma qʼaxnäq ta wä chkiwäch jaruʼ uchqʼaʼ xyaʼ Jehová pa rqʼaʼ Jesús rchë xeruʼän milagros. w24.12 5 peraj 7

Jun rbʼanik nqtyoxin che rä Jehová rma nqrajoʼ chqä xtäq pä Rkʼajol rchë xkäm qmä röj, ya riʼ taq nqaʼän jontir ri kʼo pa qaqʼaʼ rchë nqanataj rkamik Jesús. Tapeʼ röj qachʼobʼon chik nqjeʼ chpan ri moloj xtbʼan rchë xtqanataj rkamik Jesús, ütz chqä yeqaʼän invitar nkʼaj chik winäq. Taq xtqaʼän riʼ, tqakʼutuʼ chkiwäch ri winäq achkë xtbʼan chpan ri moloj riʼ ri kan kowan rqʼij. Ütz nqakʼüt chkiwäch re videos reʼ ri ye kʼo pa jw.org: ¿Achkë rma xkäm Jesús? Chqä Tqanataj rukamik Jesús. Ri ukʼwäy taq bʼey xtkikanuj rbʼanik rchë yekiʼän invitar ri qachʼalal ri ye kanajnäq qa. ¿Achkë komä xtkinaʼ ri ye kʼo chkaj, o achkë xtqanaʼ röj we jojun chkë rkarneʼl Jehová ri ye sachnäq äl xketzolin pä chpan rtinamit? ¡Kantzij na wä chë ri ye kʼo chkaj kan kiʼ kikʼuʼx xtkiʼän, y röj chqä! (Lu 15:4-7). Ütz chqä nqayaʼ chqawäch chë taq xtbʼeqä ri qʼij ri xtqanataj rkamik Jesús, ma xa xuʼ ta nqachʼaʼej qiʼ ri ya qataman chik qawäch, ütz chqä yeqachʼaʼej ri kʼa riʼ naʼäy mul yeʼapon o ri ya kʼo chik tiempo ye kanajnäq qa. ¡Tqabʼanaʼ chë jontir ütz nkinaʼ yejeʼ qkʼë! (Ro 12:13). w25.01 29 peraj 15

Rkʼaslemal xyaʼ Jesús pa kamïk nukʼüt chë Jehová kan pa rbʼeyal nuʼän che rä jontir, ye kʼa nukʼüt chqä chë ryä kowan nqrajoʼ (Jn 3:16; 1Jn 4:9, 10). Jehová xyaʼ Rkʼajol pa kamïk rma nrajoʼ chë röj nqïl qakʼaslemal ri ma nkʼis ta chqä nq·ok chpan rfamilia. Taquʼ rij ya reʼ: taq Adán xmakun, ryä xel qa chpan rfamilia Jehová. Rma riʼ taq röj xqaläx, ma xqaläx ta chpan rfamilia Dios. Ye kʼa rma rkʼaslemal xyaʼ Jesús pa kamïk, ri winäq ri nkikʼuqbʼaʼ kikʼuʼx chrij Dios chqä nkinmaj rtzij, kʼo jun qʼij xkekowin na xkeʼok chpan rfamilia Dios. Yajün komä Jehová nuküy qamak chqä nuyaʼ qʼij chqë rchë jnan nuʼän qawäch rkʼë ryä chqä kikʼë qachʼalal pa congregación. ¡Kantzij na wä chë Jehová kowan nqrajoʼ! (Ro 5:10, 11). w25.01 21 peraj 6

¿Tapeʼ chë kan jun nüm spanïk xyaʼ Jehová chqë taq xyaʼ Rkʼajol pa kamïk qmä röj? (2Co 9:15). Rma ri spanïk riʼ, röj nqkowin nq·ok ramigos Jehová chqä nqkowin nqïl qakʼaslemal ri majun bʼëy xtkʼis ta. Kʼo kʼïy rma rchë nqtyoxin che rä Jehová, ri xyaʼö re spanïk reʼ chqë rma kowan nqrajoʼ (Ro 5:8). Rchë ronojel mul nqtyoxin che rä Jehová chqä rchë ma nqamestaj ta ri xuʼän ryä chqä Rkʼajol qmä röj, Jesús xuʼij chë ronojel jnaʼ nkʼatzin nqanataj rkamik (Lu 22:19, 20). Re jnaʼ reʼ, xtqanataj rkamik Jesús ri jueves 2 de abril rchë 2026. Kantzij na wä chë jontir nqajoʼ nqapon chpan ri moloj xtbʼan ri qʼij riʼ. Ye kʼa taq majanä tbʼeqä ri qʼij riʼ o taq ya xqʼax, ütz nqchʼobʼon chrij ri xkiʼän Jehová chqä Jesús qmä röj. w25.01 20 peraj 1, 2

Taq yachʼobʼon chrij ri xkiʼän Jehová chqä Jesús qmä röj, xtatamaj más chrij rbʼanik yojkajoʼ ryeʼ. Rkʼë jbʼaʼ ütz naskʼij jun o más Evangelios taq nbʼeqä ri qʼij ri xtqanataj rkamik Jesús. Tatjaʼ aqʼij rchë ma kʼïy ta naskʼij jun qʼij, rchë ke riʼ xkakowin xtatzʼët achkë nkʼaj chik nbʼanö chawä chë nawajoʼ Jehová chqä Jesús. Y ma tamestaj ta ya reʼ: takanuj rbʼanik rchë natzjoj chkë nkʼaj chik ri natamaj. We rït kan kʼïy chik jnaʼ yït kʼo chpan rtinamit Jehová, rkʼë jbʼaʼ naquʼ we kʼa kʼo na más naʼoj natamaj qa chrij rbʼanik nuqʼät tzij Dios, chrij rbʼanik najowan o chrij rkamik Jesús. Ye kʼa ma tamestaj ta chë ronojel mul kʼo kʼakʼakʼ taq naʼoj nqkowin nqatamaj qa chrij riʼ. ¿Achkë xkatoʼö rchë xkeʼawïl ri naʼoj riʼ? Ri xkatoʼö ya riʼ nakanuj más anaʼoj chpan qapublicaciones. w25.01 24, 25 peraj 13-15