Buhat 6:1-15
6 Hito nga panahon, han nagtitikadamu na an mga disipulo, an mga Judio nga nagyayakan hin Griego nagreklamo kontra ha mga Judio nga nagyayakan hin Hebreo, kay an ira mga balo nga babaye napapabay-an ha adlaw-adlaw nga panhatag hin pagkaon.
2 Salit iginpatawag han 12 nga apostol an ngatanan nga disipulo ngan ginsidngan: “Diri maopay nga bayaan namon an pulong han Dios basi manhatag hin pagkaon.
3 Salit mga kabugtoan, pagbiling kamo hin pito nga lalaki dida ha iyo nga maopay an reputasyon, puno hin espiritu ngan kinaadman, basi tokahan namon hinin importante nga buruhaton,
4 kay gagamiton namon an amon panahon ha pag-ampo ngan pagtutdo han pulong han Dios.”
5 Ini nga desisyon naruyagan han ngatanan nga disipulo. Salit ira ginpili hi Esteban, nga puno hin pagtoo ngan baraan nga espiritu, hira Felipe, Procoro, Nicanor, Timon, Parmenas, ngan an nakombirte nga hi Nicolas nga taga-Antiokia.
6 Gindara nira hira ha mga apostol, ngan katapos mag-ampo, igintungbaw han mga apostol an ira mga kamot ha ira.
7 Tungod hito an pulong han Dios padayon nga nag-uswag, ngan padayon nga nagdamu gud an mga disipulo ha Jerusalem, ngan damu nga saserdote an nagin tumuroo.
8 Hi Esteban, nga puno hin pag-uyon ngan gahum han Dios, nagbubuhat hin dagku nga urusahon nga butang ngan mga tigaman ha atubangan han mga tawo.
9 Pero may mga tawo tikang ha gintatawag nga Sinagoga* han May-Kagawasan nga kinadto pakigdiskusyon kan Esteban, upod an mga taga-Cirene, taga-Alejandria, taga-Cilicia ngan taga-Asia.
10 Kondi diri nira nadadaog an kinaadman ngan an baraan nga espiritu nga naggigiya kan Esteban ha pagyakan.
11 Ngan patago nga nag-aghat hira hin mga tawo nga manumat: “Nabatian namon hiya nga nagyayakan hin maraot kontra kan Moises ngan ha Dios.”
12 Ginsulsolan nira an mga tawo, an katigurangan, ngan an mga eskriba; tungod hito kinadto dayon hira kan Esteban, ginpwersa hiya pag-aresto ngan gindara ha Sanhedrin.
13 Ngan nag-upod hira hin buwa nga mga testigo nga nagsiring: “Ini nga tawo diri naundang pagyakan kontra hinin baraan nga lugar ngan ha Balaud.
14 Pananglitan, hinbatian namon hiya nga nasiring nga ini nga lugar gugub-on hini nga Jesus nga Nazareno ngan babag-uhon an mga kustomre nga iginhatag ha aton ni Moises.”
15 Samtang ginkikinita hiya han ngatanan nga nangangalingkod ha Sanhedrin, nakita nira nga an iya nawong pariho hin kanan anghel.
Mga footnote
^ O “lugar han pagsingba.”
