Buhat 1:1-26
1 Ha siyahan nga surat ko ha imo, Teofilo, iginsaysay ko an ngatanan nga ginbuhat ngan igintutdo ni Jesus,
2 tubtob ha adlaw nga gindara hiya ha langit, katapos niya maghatag hin mga instruksyon pinaagi han baraan nga espiritu ha mga apostol nga iya ginpili.
3 Katapos niya mag-antos, damu ka beses nga nagpakita hiya ha ira sugad nga masasarigan nga ebidensya nga buhi hiya. Nakita nira hiya ha sulod hin 40 ka adlaw ngan iginsaysay niya ha ira an mahitungod han Ginhadian han Dios.
4 Ngan han nakigkita hiya ha ira, iya gintugon hira: “Ayaw kamo pagbaya ha Jerusalem, lugod padayon nga maghulat kamo ha iginsaad han Amay nga hinbatian niyo ha akon;
5 kay hi Juan nagbawtismo ha tubig, pero diri mag-iiha katapos hini, babawtismohan kamo pinaagi han baraan nga espiritu.”
6 Han nagkatirok hira, nagpakiana hira ha iya: “Ginoo, igpapahiuli mo ba an Ginhadian ha Israel hini nga panahon?”
7 Binaton hiya: “Diri niyo kinahanglan hibaroan an mga panahon o itinanda nga mga adlaw, kay an Amay la an may awtoridad ha pagdesisyon;
8 kondi makarawat kamo hin gahum kon an baraan nga espiritu umabot na ha iyo, ngan magigin mga saksi ko kamo ha Jerusalem, ha bug-os nga Judea ngan Samaria, ngan tubtob ha pinakahirayo nga lugar ha tuna.”
9 Katapos niya igyakan ini, gindara hiya tipaigbaw samtang nagkikinita hira, ngan gintabonan hiya hin dampog ngan waray na nira hiya makita.
10 Samtang ginkikinita nira hiya nga nagtitipaigbaw ngadto ha langit, tigda la nga may tinindog ha sapit nira nga duha nga lalaki nga busag an bado
11 ngan nagsiring ha ira: “Mga taga-Galilea, kay ano nga nagkikinita kamo ha langit? Hi Jesus nga gindara ngadto ha langit makanhi ha paagi nga pariho han nakita niyo nga pagkadto niya ha langit.”
12 Katapos, binalik hira ha Jerusalem tikang ha Bukid han mga Olibo, nga puydi baktason* ha adlaw han Sabbath* tikang ha Jerusalem.
13 Salit pag-abot nira Pedro, Juan, Santiago, Andres, Felipe, Tomas, Bartolome, Mateo, Santiago nga anak ni Alfeo, Simon nga usa nga aktibo,* ngan Judas nga anak ni Santiago, sinaka hira ha ira inuukyan nga kwarto ha igbaw.
14 Hira ngatanan urosa nga nag-inampo, upod an pipira nga kababayin-an ngan hi Maria nga nanay ni Jesus ngan an Iya kabugtoan.
15 Hito nga panahon, tinindog hi Pedro ha butnga han kabugtoan ngan nagsiring (mga 120 hira ka tawo nga nakadto):
16 “Mga kabugtoan, kinahanglan matuman an kasuratan nga igintagna han baraan nga espiritu pinaagi kan David mahitungod kan Judas nga naggiya han mga nag-aresto kan Jesus,
17 kay usa hiya ha amon ngan kaupod namon hiya ha sagrado nga buruhaton.
18 (Ini nga tawo pinalit hin tuna tikang ha suhol han iya pagkadiri-matadong, ngan han kahulog niya nga una an ulo, naburit an iya tiyan ngan nahigawas an ngatanan nga tinai niya.
19 Hinbaroan ini han ngatanan nga taga-Jerusalem, salit ito nga tuna gintawag nga Akeldama ha ira linggwahe, nga nangangahulogan, Tuna han Dugo.)
20 Kay iginsurat ha libro han Mga Salmos, ‘An iya inuukyan nga lugar magigin binayaan, ngan waray na maukoy didto,’ ngan ‘An iya pribilehiyo sugad nga paramangno mahingangadto ha iba.’
21 Salit kinahanglan saliwnan hiya hin usa han kalalakin-an nga nakig-upod ha amon ha bug-os nga panahon nga kaupod namon an Ginoo nga hi Jesus,
22 tikang han ginbawtismohan hiya ni Juan tubtob ha adlaw nga gindara hiya ha igbaw tikang ha amon, ngan kinahanglan usa liwat hiya han nakakita han Iya kabanhaw.”
23 Salit nagrekomenda hira hin duha, hi Jose nga gintatawag nga Barsabas nga kilala liwat nga Justo, ngan hi Matias.
24 Katapos nag-ampo hira: “O Jehova, ikaw nga maaram han aada ha kasingkasing han ngatanan, alayon ipakita kon hin-o hini nga duha an imo pipilion
25 nga masaliwan hini nga sagrado nga buruhaton ngan pagkaapostol nga ginbayaan ni Judas nga nagbuhat han iya karuyag.”
26 Salit nagripa* hira, ngan hi Matias an napili, ngan igindugang hiya ha 11 nga apostol.
Mga footnote
^ O “mga usa ka kilometro.”
^ Kitaa an “Sabbath” ha Glossary.
^ O “debotado; madasigon.”
^ Kitaa an “Pagripa” ha Glossary.
