Buhat 14:1-28
14 Ha Iconio, hira Pablo ngan Bernabe magkaupod nga sinulod ha sinagoga han mga Judio ngan nagpahayag hin maopay salit damu gud nga Judio ngan Griego an nagin tumuroo.
2 Pero an mga Judio nga waray tumoo nagsulsol ngan nag-impluwensya ha mga tawo han mga nasud nga maghunahuna hin maraot kontra ha kabugtoan.
3 Salit ha sulod hin pipira ka semana, pinaagi han awtoridad ni Jehova, waray kahadlok nga nagsangyaw hira han mensahe mahitungod han iya diri-matupngan nga pagkabuotan, nga iya ginpamatud-an pinaagi ha paghatag ha ira hin gahum ha paghimo hin mga tigaman ngan urusahon nga mga butang.
4 Pero nagkabahinbahin an kadam-an han mga tawo ha syudad; may dinapig ha mga Judio pero an iba ha mga apostol.
5 Han an mga tawo han mga nasud ngan an mga Judio upod an ira mga opisyal nagplano pagmaltrato ngan pagbato kanda Pablo ngan Bernabe,
6 may nagpahibaro ha ira mahitungod hito, salit pinalagiw hira ngadto ha mga syudad han Licaonia, Listra, Derbe, ngan ha mga baryo nga hirani hito.
7 Didto nagpadayon hira ha pagpasamwak han maopay nga sumat.
8 Ha Listra may tawo nga nagliliningkod nga baldado an mga tiil. Piay hiya tikang ha katawo ngan diri gud nakakalakat.
9 Nagpinamati hiya kan Pablo. Han ginkinita hiya ni Pablo ngan naobserbaran nga natoo hiya nga mag-oopay hiya,
10 nagsiring hi Pablo ha daku nga tingog: “Tindog.” Salit tinindog dayon hiya ngan nagtikang paglakat.
11 Pakakita han mga tawo han ginbuhat ni Pablo, ginuliat hira ha pinulongan han Licaonia: “An mga dios nagin pariho han mga tawo ngan linusad nganhi ha aton!”
12 Ngan hi Bernabe gintawag nira nga Zeus, pero hi Pablo gintawag nga Hermes, kay hiya an nangunguna pagyakan.
13 Hirani ha Listra an templo ni Zeus, ngan an iya saserdote nagdara ngadto ha mga ganghaan han syudad hin mga baka nga lalakí ngan mga korona nga dahon ngan bukad kay karuyag niya maghalad upod han damu nga tawo.
14 Pero pakabati hito nira apostol Bernabe ngan Pablo, gin-gisi nira an ira pantungbaw nga panapton, dinalagan ngadto ha mga tawo ngan ginuliat:
15 “Mga kasangkayan, kay ano nga ginbubuhat niyo ini? Mga tawo liwat kami nga may mga kaluyahan pariho ha iyo. Iginsasangyaw namon ha iyo an maopay nga sumat basi bayaan niyo inin waray pulos nga mga butang ngan magsingba ha buhi nga Dios nga naghimo han langit, tuna, dagat, ngan han ngatanan nga butang nga aada hito.
16 Ha naglabay nga mga henerasyon iya gintugotan an ngatanan nga nasud nga magbuhat han ira karuyag,
17 bisan kon pirme hiya nagpapakita hin pamatuod han mag-opay nga iya ginbubuhat pinaagi ha paghatag ha iyo hin uran tikang ha langit ngan hin mga panahon han abunda nga pamunga, gintatagan kamo hin damu nga pagkaon ngan ginpupuno an iyo kasingkasing hin kalipay.”
18 Pero bisan pa hini nga ira ginsiring, nakurian gud hira pagkombinse ha mga tawo nga diri maghalad ha ira.
19 Kondi may inabot nga mga Judio tikang ha Antiokia ngan Iconio ngan ginkombinse an mga tawo, salit ginbato nira hi Pablo ngan gindanas tipagawas han syudad kay kahuna nira nga patay na hiya.
20 Pero han ginpalibotan hiya han mga disipulo, binuhát hiya ngan sinulod ha syudad. Kinabuwasan, kinadto hiya ha Derbe upod hi Bernabe.
21 Kahuman isangyaw an maopay nga sumat hito nga syudad ngan buligan an pipira nga magin disipulo, binalik hira ha Listra, ha Iconio, ngan ha Antiokia.
22 Ginparig-on nira an mga disipulo didto, gindasig hira nga magpadayon ha pagtoo ngan ginsidngan: “Kinahanglan mag-agi kita hin damu nga kasakitan basi makasulod ha Ginhadian han Dios.”
23 Nagpili hira hin kalalakin-an nga magigin mga tigurang ha tagsa nga kongregasyon. Nag-ampo hira ngan nagpuasa, ngan ira igintapod kan Jehova ini nga mga tigurang nga natoo ha iya.
24 Katapos, kinadto hira Pablo ngan Bernabe ha Pisidia ngan ha Pamfilia,
25 ngan kahuman ipahayag an Pulong han Dios ha Perga, kinadto hira ha Atalia.
26 Tikang didto, nagbiyahe hira ha dagat tipakadto ha Antiokia, diin iginpakita ha ira han Dios an diri-matupngan nga pagkabuotan basi mahimo nira an buruhaton nga natuman gud nira yana.
27 Pag-abot nira ha Antiokia, nakigkatirok hira ha kongregasyon, ngan iginsumat nira an damu nga ginbuhat han Dios pinaagi ha ira, ngan an pag-abrihi niya para ha mga nasud han purtahan ngadto ha pagtoo.
28 Salit nakig-upod hira ha mga disipulo didto hin hurohilawig nga panahon.
