Buhat 3:1-26
3 Han hira Pedro ngan Juan tikadto ha templo para ha pag-ampo han mga alas-3 ha kulop,*
2 may usa nga lalaki nga piay tikang pa ha katawo nga gindadara ngadto. Kada adlaw iginbubutang nira hiya hirani ha ganghaan han templo nga gintatawag nga Makaruruyag nga Ganghaan basi makilimos ha mga tisulod ha templo.
3 Pakakita niya kanda Pedro ngan Juan nga tisulod ha templo, nakilimos hiya.
4 Kondi ginkita hiya nira Pedro ngan Juan ngan ginsidngan: “Kitaa kami.”
5 Salit iya ginkinita hira, kay naglalaom hiya nga may makakarawat hiya tikang ha ira.
6 Pero nagsiring hi Pedro: “Waray ako silber ngan bulawan, kondi kon ano an may-ada ako ihahatag ko ha imo: Ha ngaran ni Jesu-Kristo nga Nazareno, lakat!”
7 Ginkaptan ni Pedro an too nga kamot han lalaki nga piay ngan ginpatindog hiya. Tigda nga nagbaskog an iya mga rapadapa ngan mukobuko;
8 ngan han nakalugaring na hiya pagtindog, nagtikang hiya paglakat. Katapos inupod hiya ha ira ngadto ha templo, ngan samtang tipakadto, naglalakat hiya, naglulukso-lukso, ngan nagdadayaw ha Dios.
9 An ngatanan nga tawo nga nakadto nakakita ha iya nga naglalakat ngan nagdadayaw ha Dios.
10 Nakilala nira nga hiya an tawo nga nagliliningkod hadto ha Makaruruyag nga Ganghaan han templo basi makilimos. Salit nahipausa gud hira ngan diri makatoo han nahitabo ha iya.
11 Samtang nakapot ini nga tawo ha kamot nira Pedro ngan Juan, an ngatanan nga tawo didto nagdadlagan ngadto ha ira ha gintatawag nga portiko* ni Solomon, ngan nanhipausa gud hira han nahitabo.
12 Han nakita ini ni Pedro, ginsidngan niya an mga tawo: “Mga taga-Israel, kay ano nga nahipapausa gud kamo hini, o kay ano nga ginkikinita niyo kami nga sugad hin napalakat namon hiya pinaagi han kalugaringon namon nga gahum o tungod ha debosyon ha Dios?
13 An Dios ni Abraham ngan ni Isaac ngan ni Jacob, an Dios han aton kaapoy-apoyan, naghimaya han iya Surugoon nga hi Jesus, nga iginsalikway ngan igintubyan niyo basi patayon bisan kon nagdesisyon hi Pilato nga buhian hiya.
14 Oo, iyo iginsalikway an usa nga baraan ngan matadong, ngan naghangyo lugod kamo nga pagawson an tawo nga parapamatay,
15 kondi iyo ginpatay an lider nga ginpili ha paghatag hin kinabuhi. Pero ginbanhaw hiya han Dios, ngan kami mismo mga testigo hito.
16 Salit pinaagi han iya ngaran ngan han amon pagtoo ha iya ngaran, nagmakusog ini nga tawo nga iyo nakikita ngan nakikilala. An pagtoo pinaagi ha iya nakaopay gud hini nga tawo, sugad han iyo nakikita.
17 Ngan yana, mga kabugtoan, maaram ako nga ginbuhat niyo ito tungod ha kaignorante, pariho han iyo mga magmarando.
18 Kondi hito nga paagi gintuman han Dios an mga butang nga abanse nga iginpahayag niya pinaagi ha baba han ngatanan nga propeta, nga mag-aantos an Kristo.
19 “Salit pagbasol kamo ngan pagbag-o basi pasayloon* an iyo mga sala, basi umabot ha iyo an panahon han pagrepresko tikang kan Jehova mismo,
20 ngan basi sugoon niya an Kristo nga ginpili para ha iyo, hi Jesus.
21 Kinahanglan magpabilin hiya ha langit tubtob ha panahon nga mahibalik ha orihinal nga kahimtang an ngatanan nga ginsiring han Dios pinaagi ha baba han iya baraan nga mga propeta hadto.
22 Ha pagkamatuod, hi Moises nagsiring, ‘Hi Jehova nga Dios magpipili para ha iyo hin propeta nga pariho ha akon tikang ha iyo kabugtoan. Kinahanglan mamati kamo han bisan ano nga iya igsusumat ha iyo.
23 Ha pagkamatuod, pupoohon han Dios an ngatanan nga kalag nga diri namamati hito nga Propeta.’
24 Ngan an ngatanan nga propeta, tikang kan Samuel ngan an mga sumunod, nagpahayag liwat mahitungod hini nga mga adlaw.
25 Mga anak kamo han mga propeta ngan han kasabotan nga ginhimo han Dios ha iyo kaapoy-apoyan. Nagsiring hiya kan Abraham: ‘Pinaagi han imo tulin* an ngatanan nga pamilya ha tuna bibendisyonan.’
26 Katapos pilion han Dios an iya Surugoon, ginsugo hiya siyahan ngada ha iyo basi bendisyonan kamo pinaagi han pagpatalikod han tagsa ha iyo ha maraot nga mga buhat.”
Mga footnote
^ O “ikasiyam nga oras.”
^ Aragian nga may atop.
^ Ha literal, “paraon.”
^ Ha literal, “binhi.”
