Buhat 11:1-30
11 Hinbaroan han mga apostol ngan han kabugtoan ha Judea nga an mga tawo han mga nasud kinarawat liwat han pulong han Dios.
2 Salit pagkadto ni Pedro ha Jerusalem, nakigdiskusyon ha iya an mga nasuporta ha pagturi,
3 kay nasiring hira nga kinadto hiya ha balay han mga tawo nga diri-turi ngan kinaon upod nira.
4 Salit igin-esplikar ha ira ni Pedro an mga detalye. Nagsiring hiya:
5 “Han nag-iinampo ako didto ha syudad han Jope, nakakita ako ha bisyon hin nagtitipaubos nga surudlan nga pariho hin halapad nga tela nga pinaagi han upat nga kanto hito igintutunton ito ha tuna, ngan inabot ito ha akon.
6 Samtang ginkikita ko ito hin maopay, nakita ko an mga hayop ha tuna nga upat an tiil, an ihalas nga mga mananap, an mga reptilya, ngan an katamsihan ha langit.
7 Nakabati liwat ako hin tingog nga nasiring, ‘Buhát Pedro, pag-ihaw ngan kaon!’
8 Pero nagsiring ako, ‘Diri ako, Ginoo, kay waray pa gud sinulod ha akon baba nga mahugaw o diri limpyo.’
9 An tingog tikang ha langit nahibatian ha ikaduha nga higayon, ‘Ayaw na pagtawaga nga mahugaw an mga butang nga ginlimpyohan na han Dios.’
10 Nahibatian na liwat ito ha ikatulo nga higayon, katapos ginbutong an ngatanan tipabalik ha langit.
11 Hito nga oras, may tulo ka tawo nga inabot ha balay nga amon inuukyan, nga ginsugo ha akon tikang ha Cesarea.
12 Salit ginsidngan ako han baraan nga espiritu nga umupod ha ira ngan diri gud magruhaduha. Pero ini nga unom nga kabugtoan inupod liwat ha akon, ngan sinulod kami ha balay hito nga tawo.
13 “Iginsumat niya ha amon nga nakakita hiya hin anghel nga natindog ha iya balay ngan nagsiring, ‘Pagsugo hin mga tawo ngadto ha Jope ngan pakanhia hi Simon nga ginngangaranan liwat nga Pedro.
14 Isusumat niya ha imo an mga butang nga pinaagi hito mahimo ka matalwas ngan an ngatanan nga imo sulod-balay.’
15 Pero han nagyayakan na ako, nakakarawat liwat hira han baraan nga espiritu sugad han pakakarawat naton hito ha tinikangan.
16 Salit nahinumdoman ko an ginsiniring hadto han Ginoo, ‘Hi Juan nagbawtismo ha tubig, pero kamo babawtismohan pinaagi han baraan nga espiritu.’
17 Kon sugad, kon gintagan liwat hira han Dios han regalo nga waray bayad nga pariho han iginhatag niya ha aton nga natoo ha Ginoo nga hi Jesu-Kristo, hin-o ako nga magpupugong ha Dios?”
18 Pakabati nira hini, waray na hira makigdiskusyon kan Pedro. Gindayaw nira an Dios ngan nagsiring: “Kon sugad, gintagan han Dios hin higayon nga magbasol an mga tawo han mga nasud basi makakarawat liwat hira hin kinabuhi.”
19 An mga disipulo nga nagpatlaag tungod han kasakitan nga resulta han nahitabo kan Esteban nakaabot tubtob ha Fenicia, Ciprus, ngan Antiokia, pero ha mga Judio la nira iginsusumat an mensahe.
20 Kondi an iba ha ira nga tikang ha Ciprus ngan Cirene nga kinadto ha Antiokia nagpinakiistorya ha mga tawo nga Griego an linggwahe, ngan iginpahayag ha ira an maopay nga sumat mahitungod han Ginoo nga hi Jesus.
21 Ngan an kamot ni Jehova nakada ha ira, salit damu gud an nagin tumuroo ngan sinunod ha Ginoo.
22 An sumat mahitungod ha ira hinbatian han kongregasyon ha Jerusalem, ngan ginpakadto nira hi Bernabe tubtob ha Antiokia.
23 Han inabot hiya ngan nakita niya an diri-matupngan nga pagkabuotan han Dios, nalipay gud hiya ngan gindasig hira ngatanan nga kinasingkasing gud nga magpabilin nga maunungon ha Ginoo;
24 kay maopay hiya nga tawo, puno han baraan nga espiritu ngan may pagtoo. Ngan damu gud nga tawo an tinoo ha Ginoo.
25 Katapos, kinadto hiya ha Tarso basi pamilngon hin maopay hi Saul.
26 Han hin-agian niya hi Saul, iya igin-upod hiya ha Antiokia. Salit ha bug-os nga tuig nagkatirok hira upod han kongregasyon ngan damu an ira gintutdoan. Ha Antiokia siyahan nga gintawag nga mga Kristiano an mga disipulo pinaagi han giya han Dios.
27 Hito nga panahon, may mga propeta tikang ha Jerusalem nga kinadto ha Antiokia.
28 An usa ha ira nga Agabo an ngaran tinindog ngan nagpahibaro pinaagi han espiritu nga hirani na umabot an daku nga gutom ha bug-os nga tuna, ngan nahitabo gud ito ha panahon ni Claudio.
29 Salit an mga disipulo nagdesisyon nga magpadara hin ayuda ha kabugtoan ha Judea uyon han maaakos han tagsa ha ira.
30 Ito gud an ira ginbuhat, ngan ira iginpadara ito ha mga tigurang pinaagi kanda Bernabe ngan Saul.
