Buhat 15:1-41
15 May kalalakin-an nga inabot tikang ha Judea ngan nanutdo ha kabugtoan: “Kon diri kamo magpaturi uyon ha balaud ni Moises, diri kamo matatalwas.”
2 Pero han hira Pablo ngan Bernabe waray umuyon ngan nakigdiskusyon ha ira, nagdesisyon an mga tigurang nga sugoon hira Pablo, Bernabe, ngan an iba pa nga kumadto ha mga apostol ngan mga tigurang ha Jerusalem basi ipakiana ini nga gindidiskusyonan.
3 Salit katapos igdul-ong han kongregasyon hin pipira ka distansya, hira Pablo ngan Bernabe nagpadayon ngadto ha Fenicia ngan Samaria. Detalyado nga iginsaysay nira didto an kakombirte han mga tawo han mga nasud, ngan nalipay gud hito an ngatanan nga kabugtoan.
4 Pag-abot nira Pablo ngan Bernabe ha Jerusalem, gin-abiabi hira hin maopay han kabugtoan ha kongregasyon, han mga apostol, ngan han mga tigurang. Ira iginsumat an damu nga ginbuhat han Dios pinaagi ha ira.
5 Pero an iba tikang ha sekta han mga Pariseo nga nagin tumuroo binuhát ha ira mga lingkoran ngan nagsiring: “Kinahanglan turion hira ngan obligaron nga tumanon an balaud ni Moises.”
6 Salit nagkatirok an mga apostol ngan an mga tigurang basi hisgotan ito.
7 Katapos hin maiha nga diskusyon, binuhát hi Pedro ngan nagsiring ha ira: “Mga kabugtoan, maaram gud kamo nga ginpili ako han Dios tikang ha iyo basi pinaagi han akon baba mabatian han mga tawo han mga nasud an maopay nga sumat ngan tumoo hira.
8 An Dios, nga maaram han kasingkasing, nagpamatuod nga gin-uuyonan niya hira pinaagi ha paghatag ha ira han baraan nga espiritu, sugad la han iya ginbuhat ha aton.
9 Waray gud hiya ginpapaurog ha aton ngan ha ira, lugod ginputli an ira kasingkasing tungod han ira pagtoo.
10 Salit kay ano nga ginsasarihan niyo yana an Dios pinaagi ha pagbutang hin yugo ha liog han mga disipulo nga bisan an aton kaapoy-apoyan o kita diri nakakaakos pagpas-an?
11 Lugod, natoo kita ngan sugad man hira nga makakarawat an katalwasan pinaagi han diri-matupngan nga pagkabuotan han Ginoo nga hi Jesus.”
12 Han ginsiring ito ni Pedro, nagmingaw an ngatanan, ngan namati hira kanda Bernabe ngan Pablo samtang ira iginsasaysay an damu nga tigaman ngan urusahon nga mga butang nga ginbuhat han Dios ha mga nasud pinaagi ha ira.
13 Katapos nira magyakan, nagsiring hi Santiago: “Mga kabugtoan, pamatii ako niyo.
14 Iginsaysay pa la ni Simeon nga ginkarawat na han Dios an mga nasud, basi tikang ha ira makapili an Dios hin katawohan nga magdadara han iya ngaran.
15 Ngan nauyon hini an mga pulong han mga Propeta, sugad la han nahisurat,
16 ‘Katapos hini nga mga butang, mabalik ako ngan titindugon utro an narumpag nga balay ni David; aaydon ko an mga naguba ngan igpapahiuli ko ito,
17 basi sinsero nga pamilngon hi Jehova han nanhibilin nga katawohan, pati han mga tawo han ngatanan nga nasud, mga tawo nga gintatawag ha akon ngaran, siring ni Jehova, nga nagbubuhat hini nga mga butang
18 nga ira hinbaroan tikang ha kadaan nga panahon.’
19 Salit iginsusuhestyon ko nga diri samukon adton nadaop ha Dios nga tikang ha mga nasud,
20 kondi suratan hira nga maglikay ha mga butang nga nahugawan han mga dios-dios, ha imoralidad,* ha pagkaon hin natilo nga hayop, ngan ha dugo.
21 Kay tikang pa ha kadaan nga panahon may mga nagsasangyaw han mga sinurat ni Moises ha tagsa nga syudad, ngan ha kada sabbath ginbabasa ito ha daku nga tingog ha mga sinagoga.”
22 Salit an mga apostol, an mga tigurang, ngan an bug-os nga kongregasyon nagpili hin duha nga lalaki tikang ha ira. Ginpili nira hi Judas nga gintatawag nga Barsabas ngan hi Silas, nga mga nangunguna ha kabugtoan, basi umupod kanda Pablo ngan Bernabe ngadto ha Antiokia.
23 Hira an nagdara hini nga ira surat:
“Tikang ha iyo kabugtoan nga mga apostol ngan mga tigurang, para ha kabugtoan ha Antiokia, Sirya, ngan Cilicia nga tikang ha mga nasud. Hinigugma nga kabugtoan:
24 Tungod kay hinbaroan namon nga may pipira tikang ha amon nga nakasamok ha iyo tungod han ira ginyakan, basi bungkagon an iyo pagtoo, bisan kon waray namon hira sugoa,
25 nagkauruyon kami nga magpili hin mga lalaki nga pakakadaon ha iyo upod han amon hinigugma nga hira Bernabe ngan Pablo,
26 nga nameligro an mga kalag* tungod ha ngaran han aton Ginoo nga hi Jesu-Kristo.
27 Salit amon ginsusugo hira Judas ngan Silas basi isumat liwat nira ini ha iyo.
28 Kay an baraan nga espiritu ngan kami mismo nagkauruyon nga diri kamo dugangan hin pinas-an, labot la han masunod nga ginkikinahanglan:
29 an padayon nga paglikay ha mga butang nga iginhalad ha mga dios-dios, ha dugo, ha pagkaon hin natilo nga hayop, ngan ha imoralidad. Kon maglikay gud kamo hini nga mga butang, maghihingaopay kamo. Hinaot maopay an iyo panlawas!”
30 Salit ini nga kalalakin-an kinadto ha Antiokia, ngan gintirok nira an damu nga disipulo ngan iginhatag ha ira an surat.
31 Katapos ito basahon, nagkalipay hira tungod han pagparig-on.
32 Hira Judas ngan Silas, nga mga propeta liwat, binulig ngan nagparig-on ha kabugtoan pinaagi hin mga diskurso.
33 Paglabay hin pipira ka panahon didto, han paglakat nira igindul-ong hira tipagawas han kabugtoan, ngan binalik hira ha mga nagsugo ha ira.
34 *——
35 Pero hira Pablo ngan Bernabe nagpabilin ha Antiokia basi manutdo ngan magsangyaw han maopay nga sumat han pulong ni Jehova, upod an iba pa.
36 Paglabay hin pipira ka adlaw, nagsiring hi Pablo kan Bernabe: “Balikon ngan bisitahon naton an kabugtoan ha tagsa nga syudad nga aton ginsangyawan han pulong ni Jehova basi kitaon an ira kahimtang.”
37 Karuyag ni Bernabe nga iupod hi Juan nga gintatawag nga Marcos.
38 Pero waray maruyag hi Pablo nga ig-upod hiya kay binulag hiya ha ira ha Pamfilia ngan waray na umupod ha ira ha buruhaton.
39 Tungod hito, nasisina gud nga nagrasonay hira, salit nagbulag hira; igin-upod ni Bernabe hi Marcos ngan nagbiyahe hira ha dagat ngadto ha Ciprus.
40 Ginpili ni Pablo hi Silas ngan linakat katapos nga igintapod hiya han kabugtoan ha diri-matupngan nga pagkabuotan ni Jehova.
41 Ginlibot niya an Sirya ngan Cilicia basi parig-unon an mga kongregasyon.
