Buhat 22:1-30
22 “Mga kabugtoan, ngan mga amay, pamatii niyo yana an akon depensa.”
2 (Han pakabati nira nga nagyayakan hi Pablo ha ira ha Hebreo nga linggwahe, mas nagmingaw hira, ngan nagsiring hiya:)
3 “Judio ako nga natawo ha Tarso ha Cilicia, pero ineskwela ako dinhi hini nga syudad ngan gintutdoan ni Gamaliel. Gintutdoan ako nga sundon gud an Balaud han aton kaapoy-apoyan, ngan magin aktibo ha pag-alagad ha Dios sugad la ha iyo ngatanan yana.
4 Gintimaraot ko an kalalakin-an ngan kababayin-an nga nasunod hini nga Dalan, iginpaaresto ngan iginpapriso hira ngan iginpapatay.
5 Testigo ko an hitaas nga saserdote ngan an bug-os nga grupo han katigurangan. Gintagan liwat ako nira hin mga surat para ha kabugtoan ha Damasco, ngan nagtikang ako pagbiyahe ngadto basi an mga aadto gapuson ngan dad-on ha Jerusalem basi sirotan.
6 “Pero han udto na, samtang nagbibiyahe ako ngan hirani na ha Damasco, tigda la nga may masilaw nga lamrag tikang ha langit nga nagsanag ha akon palibot.
7 Natumba ako ha tuna ngan nakabati hin tingog nga nasiring ha akon, ‘Saul, Saul, kay ano nga gintitimaraot mo ako?’
8 Binaton ako, ‘Hin-o ka, Ginoo?’ Nagsiring hiya ha akon, ‘Ako hi Jesus nga Nazareno, nga imo gintitimaraot.’
9 An kalalakin-an nga kaupod ko nakakita han lamrag pero waray makabati han tingog han nakikiistorya ha akon.
10 Katapos nagpakiana ako, ‘Ginoo, ano an akon bubuhaton?’ An Ginoo nagsiring ha akon, ‘Buhát, kadto ha Damasco, ngan didto susumatan ka han ngatanan nga sadang mo buhaton.’
11 Pero tungod kay waray ako nakikita kay masilaw gud adto nga lamrag, gintugwayan ako ngadto ha Damasco han akon mga kaupod.
12 “Hi Ananias, nga matinumanon ha Balaud ngan maopay an bantog ha ngatanan nga Judio nga naukoy didto,
13 binisita ha akon. Tinindog hiya hirani ha akon ngan nagsiring, ‘Saul, bugto ko, makakakita ka na utro!’ Hinangad dayon ako ngan nakita ko hiya.
14 Nagsiring hiya, ‘Ginpili ka han Dios han aton kaapoy-apoyan basi mahibaro han iya kaburut-on ngan makakita kan Jesus, an Usa nga matadong, ngan makabati han iya tingog,
15 kay magigin saksi ka niya ha ngatanan nga tawo mahitungod han mga butang nga imo hinkit-an ngan hinbatian.
16 Yana kay ano nga naglalangan ka? Buhát, pagpabawtismo ngan hugasi an imo mga sala pinaagi ha pagtawag han iya ngaran.’
17 “Pero pagbalik ko ha Jerusalem, han nag-iinampo ako ha templo, nagkaada ako hin bisyon
18 ngan nakita ko hiya nga nasiring ha akon, ‘Pag-apura, gawas dayon ha Jerusalem, kay diri hira mauyon han imo pagpamatuod mahitungod ha akon.’
19 Nagsiring ako, ‘Ginoo, maaram gud hira nga hadto akon iginpapapriso ngan iginpapakastigo ha mga sinagoga an mga natoo ha imo,
20 ngan han ginpapatay hi Esteban nga imo saksi, inuyon ako hito samtang natindog ngan nagbabantay ha pantungbaw nga mga panapton han mga nagpapatay ha iya.’
21 Pero nagsiring hiya ha akon, ‘Lakat, kay susugoon ko ikaw ngadto ha higrayo nga mga nasud.’ ”
22 Nagpinamati hira tubtob hini nga iya ginsiring. Katapos ginuliat hira: “Kuhaa ito nga tawo dinhi ha tuna, kay diri hiya angay mabuhi!”
23 Tungod kay naggiginuliat hira, naglalabog han ira pantungbaw nga mga panapton, ngan nagsasabrag hin tapotapo tipaigbaw,
24 nagsugo an kumander han militar nga dad-on hiya ha kwarter han mga sundalo ngan nagsiring nga sadang hiya imbistigaron samtang ginlalatigo basi gud hibaroan kon kay ano nga naggiginuliat hira kontra ha iya.
25 Pero han ira gin-unat hiya basi latiguhon, nagsiring hi Pablo ha opisyal han kasundalohan nga natindog didto: “Uyon ba ha balaud nga iyo latiguhon an usa nga Romano ngan waray pa hukmi?”
26 Pakabati hini han opisyal han kasundalohan, kinadto hiya ha kumander han militar ngan iginsumat ito, katapos nagpakiana: “Ano an imo plano nga buhaton? Romano ngay-an ini nga tawo.”
27 Salit an kumander han militar dinaop kan Pablo ngan nagpakiana: “Sumati ako, Romano ka ba?” Binaton hiya: “Oo.”
28 Nagsiring an kumander han militar: “Ginpalit ko ha daku nga kantidad hin kwarta ini nga mga katungod ha pagin tuminungnong.” Nagsiring hi Pablo: “Pero natawo ako nga Romano.”
29 Salit ginbayaan dayon hiya han kalalakin-an nga mag-iimbistigar unta ha iya samtang ginpapakurian hiya, ngan nahadlok an kumander han militar han iya hinbaroan nga Romano ngay-an hi Pablo, kay iya iginpagapos hiya hin mga kadena.
30 Kinabuwasan, tungod kay karuyag gud hibaroan han kumander kon kay ano nga gin-akusaran hi Pablo han mga Judio, iginpatangtang niya an mga kadena ni Pablo ngan ginsugo an punoan nga mga saserdote ngan an bug-os nga Sanhedrin nga magkatirok. Katapos gindara niya ngadto hi Pablo ngan ginpatindog ha butnga nira.
