Baatlhodi 13:1-25

  • Moengele o etela Manoa le mosadi wa gagwe (1-23)

  • Samesone o a tsholwa (24, 25)

13  Baiseraele ba ne ba dira se se bosula gape mo matlhong a ga Jehofa,+ mme Jehofa o ne a ba tsenya mo seatleng sa Bafilisitia+ dingwaga di le 40.  Ka yone nako eo, go ne go na le monna mongwe wa lelapa la Badana+ kwa Sora,+ yo leina la gagwe e neng e le Manoa.+ Mosadi wa gagwe o ne a sa tshole.+  Fa nako e ntse e tsamaya, moengele wa ga Jehofa o ne a bonala kwa mosading yono mme a mo raya a re: “Bona, o moopa e bile ga o na ngwana. Le fa go ntse jalo, o tla ima mme o tla tshola ngwana wa mosimane.+  Jaanong o nne kelotlhoko gore o se ka wa nwa beine kgotsa sepe fela se se tagang+ e bile o se ka wa ja sepe se se seng phepa.+  O tla ima mme o tla tshola ngwana wa mosimane, mme moriri wa gagwe o se ka wa kgaolwa le ka motlha+ ka gonne ngwana yoo o tla nna Monasirite wa Modimo go tloga fela fa a tsholwa,* mme ke ene yo o tla gololang Baiseraele mo seatleng sa Bafilisitia.”+  Go tswa foo, mosadi o ne a tsamaya mme a bolelela monna wa gagwe jaana: “Monna wa Modimo wa boammaaruri o ne a tla kwa go nna, mme o ne a lebega jaaka moengele wa Modimo wa boammaaruri, a boifisa thata. Ga ke a ka ka mmotsa gore o ne a tswa kae e bile ga a ka a mpolelela leina la gagwe.+  Mme o ne a nthaya a re, ‘O tla ima mme o tla tshola ngwana wa mosimane. Jaanong o se ka wa nwa beine kgotsa sepe fela se se tagang e bile o se ka wa ja sepe se se seng phepa, ka gonne ngwana yoo o tla nna Monasirite wa Modimo go tloga fela fa a tsholwa* go fitlha ka letsatsi le a swang ka lone.’”  Manoa o ne a rapela Jehofa a re: “Intshwarele Jehofa. Tsweetswee, a monna wa Modimo wa boammaaruri yo o sa tswang go mo romela, a tle gape gore a re rute se re tshwanetseng go se dira ka ngwana yo o tla tsholwang.”  Ka jalo, Modimo wa boammaaruri o ne a reetsa Manoa, mme moengele wa Modimo wa boammaaruri o ne a tla gape kwa mosading yono fa a ne a ntse mo tshimong; monna wa gagwe e bong Manoa o ne a se na le ene. 10  Mosadi yono o ne a siana ka bonako mme a ya go bolelela monna wa gagwe a re: “Tla o bone! Monna yo o neng a iponatsa kwa go nna maloba, o tlile gape mo go nna.”+ 11  Foo Manoa o ne a ema a bo a tsamaya le mosadi wa gagwe. O ne a tla kwa monneng yono mme a mo raya a re: “A ke wena monna yo o neng o bua le mosadi wa me?” Mme ene o ne a re: “Ke nna.” 12  Go tswa foo, Manoa o ne a re: “E kete mafoko a gago a ka diragala. Ngwana yoo o tla tshela botshelo jo bo ntseng jang e bile o tla dira tiro efe?”+ 13  Ka jalo, moengele wa ga Jehofa o ne a raya Manoa a re: “Mosadi wa gago o tshwanetse go tila go dira dilo tsotlhe tse ke di mmoleletseng.+ 14  Ga a tshwanela go ja sepe fela se se tswang mo setlhareng sa morara,* ga a tshwanela go nwa beine kgotsa sepe fela se se tagang+ e bile ga a tshwanela go ja selo sepe fela se se seng phepa.+ A ikobele sengwe le sengwe se ke se mo laetseng.” 15  Jaanong Manoa o ne a raya moengele wa ga Jehofa a re: “Tsweetswee nna fano, mme mma re go baakanyetse potsane.”+ 16  Le fa go ntse jalo, moengele wa ga Jehofa o ne a raya Manoa a re: “Le fa nka nna fano, ga nkitla ke ja dijo tsa gago; mme fa o batla go isetsa Jehofa setlhabelo se se fisiwang, o ka se isa.” Manoa o ne a sa itse gore e ne e le moengele wa ga Jehofa. 17  Foo Manoa o ne a raya moengele wa ga Jehofa a re: “Leina la gago ke mang,+ gore fa lefoko la gago le diragala re tle re kgone go go tlotla?” 18  Le fa go ntse jalo, moengele wa ga Jehofa o ne a mo raya a re: “Ke ka ntlha yang fa o botsa leina la me, e re ka e le le le gakgamatsang?” 19  Go tswa foo, Manoa o ne a tsaya potsane le setlhabelo sa dijo tsa ditlhaka a bo a di isetsa Jehofa mo lejeng. Mme Modimo o ne a dira sengwe se se gakgamatsang fa Manoa le mosadi wa gagwe ba ntse ba lebile. 20  Fa kgabo ya molelo e tlhatlogela ntlheng ya legodimo e tswa mo sebesong, moengele wa ga Jehofa o ne a tlhatloga mo kgabong eo ya molelo a tswa mo sebesong Manoa le mosadi wa gagwe ba ntse ba lebile. Ka yone nako eo, ba ne ba wela fa fatshe ka difatlhego. 21  Moengele wa ga Jehofa o ne a se ka a bonala gape mo go Manoa le mosadi wa gagwe. Ka yone nako eo, Manoa o ne a lemoga gore e ne e le moengele wa ga Jehofa.+ 22  Go tswa foo, Manoa o ne a raya mosadi wa gagwe a re: “Ruri re tlile go swa ka gonne re bone Modimo.”+ 23  Mme mosadi wa gagwe o ne a mo raya a re: “Fa e le gore Jehofa o ne a batla go re bolaya, a ka bo a sa amogela setlhabelo se se fisiwang+ le setlhabelo sa dijo tsa ditlhaka go tswa mo seatleng sa rona, a ka bo a sa re bontsha dilo tseno tsotlhe e bile a ka bo a sa re bolelela sepe sa dilo tseno.” 24  Moragonyana mosadi yono o ne a tshola ngwana wa mosimane mme a mmitsa Samesone;+ mme fa mosimane a ntse a gola, Jehofa o ne a tswelela a mo segofatsa. 25  Fa nako e ntse e tsamaya, moya wa ga Jehofa o ne wa tla mo go ene+ a le kwa Mahane-dana,+ fa gare ga Sora le Eshetaole.+

Dintlha Tse di Kwa Tlase

Seheb., “fa a tswa mo popelong.”
Seheb., “fa a tswa mo popelong.”
Kgotsa “diterebe; moretlwa.”