Baatlhodi 14:1-20

  • Moatlhodi Samesone o batla mosadi wa Mofilisitia (1-4)

  • Moya wa ga Jehofa o thusa Samesone go bolaya tau (5-9)

  • Samesone o bua thamalakane kwa lenyalong (10-19)

  • Mosadi wa ga Samesone o newa monna yo mongwe (20)

14  Go tswa foo, Samesone o ne a ya kwa Timena, mme fa a le kwa Timena o ne a bona mosadi wa Mofilisitia.*  Ka jalo, o ne a tsamaya mme a bolelela rraagwe le mmaagwe a re: “Fa ke ne ke le kwa Timena, ke ne ka kgatlhiwa ke mosadi mongwe wa Mofilisitia mme ke batla gore lo ye go mo mpatlela gore e nne mosadi wa me.”  Mme rraagwe le mmaagwe ba ne ba mo raya ba re: “A o ka se bone mosadi ope mo losikeng lwa gago le mo bathong botlhe ba garona?+ A o tshwanetse go ya go tsaya mosadi kwa Bafilisitieng ba ba sa rupang?” Le fa go ntse jalo, Samesone o ne a raya rraagwe a re: “Mo mpatlele, ka gonne ke ene yo o ntshiametseng.”*  Rraagwe le mmaagwe ba ne ba sa lemoge gore seo se ne se tswa kwa go Jehofa, ka gonne Modimo o ne a batla tshono ya go tlhasela Bafilisitia ka gonne Bafilisitia ba ne ba busa Baiseraele ka nako eo.+  Ka jalo, Samesone o ne a tsamaya le rraagwe le mmaagwe kwa Timena. E rile a fitlha fa masimong a morara* a Timena, tau* e ne ya tla kwa go ene e kurutla.  Foo moya wa ga Jehofa o ne wa mo naya maatla+ mme a e gagoganya sebedi, fela jaaka motho a gagoganya potsane sebedi ka diatla tsa gagwe. Mme o ne a se ka a bolelela rraagwe kgotsa mmaagwe se a se dirileng.  Go tswa foo, o ne a ya kwa Timena a bo a bua le mosadi yoo, mme Samesone o ne a sa ntse a mo kgatlhegela.+  Moragonyana fa a ne a boela teng a ya go mo tsaya a mo tlisa gae,+ o ne a fapoga a ya go leba setoto sa tau mme o ne a fitlhela motshitshi wa dinotshe le tswina ya dinotshe mo setotong seo sa tau.  Ka jalo, o ne a tabola tswina ya dinotshe a bo a tsamaya a ntse a e ja. Fa a tshwara rraagwe le mmaagwe mo tseleng, o ne a ba naya nngwe ya yone gore ba je. Le fa go ntse jalo, o ne a se ka a ba bolelela gore o ne a tsere tswina eo ya dinotshe mo setotong sa tau. 10  Rraagwe o ne a ya kwa mosading yoo, mme Samesone o ne a dira mokete koo, ka gonne seo ke se makawana a neng a tle a se dire. 11  Fa ba mmona, ba ne ba tlisa bapati ba monyadi ba le 30 gore ba nne le ene. 12  Go tswa foo, Samesone o ne a ba raya a re: “Tsweetswee, mma ke lo bolelele thamalakane. Fa lo ka e rarabolola lo bo lo mpolelela karabo ya yone mo malatsing a le supa a mokete, ke tla tshwanelwa ke go lo naya diaparo tsa letsela le le boleta di le 30 le diaparo tsa mokgabo di le 30. 13  Mme fa lo sa kgone go mpolelela karabo ya yone, lo tshwanetse go nnaya diaparo tsa letsela le le boleta di le 30 le diaparo tsa mokgabo di le 30.” Ba ne ba mo raya ba re: “Re bolelele thamalakane; re batla go e utlwa.” 14  Ka jalo, o ne a ba raya a re: “Go ne ga tswa sengwe sa go jewa mo mojing,Mme mo go se se maatla ga tswa sengwe se se botshe.”+ Go ne ga feta malatsi a le mararo ba sa kgone go rarabolola thamalakane eo. 15  Mo letsatsing la bonê, ba ne ba raya mosadi wa ga Samesone ba re: “Tsietsa monna+ wa gago gore a tle a re bolelele karabo ya thamalakane eno. Go seng jalo, wena le ba lelapa la ga rrago re tla lo fisa ka molelo. A lo re laleditse mono gore lo tle go re tseela thuo ya rona?” 16  Ka jalo, mosadi wa ga Samesone o ne a lelela mo go ene mme a re: “O ntlhoile; ga o nthate.+ O boleletse batho ba gaetsho thamalakane, mme ga o a mpolelela karabo ya yone.” Foo a mo raya a re: “Tota le rre le mmê ga ke a e ba bolelela. Jaanong goreng ke tshwanetse go go e bolelela?” 17  Le fa go ntse jalo, o ne a nna a lelela fa go ene malatsi otlhe a a setseng a mokete wa malatsi a le supa. Kwa bofelong, o ne a mmolelela yone mo letsatsing la bosupa ka gonne o ne a mo emeletse. Go tswa foo, mosadi yoo o ne a bolelela batho ba gagabo karabo ya thamalakane eo.+ 18  Ka jalo, mo letsatsing la bosupa pele letsatsi le phirima,* banna ba motse ba ne ba mo raya ba re: “Ke eng se se botshe go feta tswina ya dinotshe,E bile ke eng se se maatla go feta tau?”+ O ne a ba araba a re: “Fa lo ka bo lo sa lema ka kgongwana+ ya me,Lo ka bo lo sa rarabolola thamalakane ya me.” 19  Foo moya wa ga Jehofa o ne wa mo naya maatla,+ mme o ne a ya kwa Ashekelona+ a bo a kgemetha banna ba koo ba le 30 mme a tsaya diaparo tsa bone a bo a di naya ba ba neng ba arabile thamalakane.+ O ne a boela kwa ntlong ya ga rraagwe a shakgetse. 20  Go tswa foo, mongwe wa bapati ba monyadi+ ba ba neng ba na le ene o ne a newa mosadi wa ga Samesone.+

Dintlha Tse di Kwa Tlase

Seheb., “mosadi wa bomorwadia Bafilisitia.”
Seheb., “yo o siameng mo matlhong a me.”
Kgotsa “diterebe; moretlwa.”
Kgotsa “tawana e e seriri.”
Kgotsa gongwe “pele a tsena kwa phaposing e e kwa teng.”