Baatlhodi 12:1-15

  • Bagileade ba tlhabana le Baeferaime (1-7)

    • Ba laelwa gore ba re “Shibolethe” (6)

  • Baatlhodi Ibesane, Elone le Abedona (8-15)

12  Go tswa foo, banna ba Eferaime ba ne ba phuthega mme ba kgabaganyetsa kwa Safone* mme ba raya Jefetha ba re: “Goreng o ne o sa re bitse gore re tsamaye le wena fa o ne o kgabaganya o ya go tlhabana le Baamone?+ Re tla go fisetsa mo ntlong ya gago.”  Mme Jefetha o ne a ba raya a re: “Nna le batho ba me re ne ra nna le kganetsano e kgolo le Baamone. Ke ne ka lo bitsa gore lo tle go nthusa, mme ga lo a ka lwa nkgolola mo seatleng sa bone.  E rile ke bona gore lo ka se mpoloke, foo ke ne ka swetsa ka gore ke tsenye botshelo* jwa me mo kotsing, ka ya go tlhasela Baamone+ mme Jehofa o ne a ba tsenya mo seatleng sa me. Jaanong ke ka ntlha yang fa gompieno lo tlile go tla go tlhabana le nna?”  Foo Jefetha o ne a phutha banna botlhe ba Gileade+ mme ba ne ba tlhabana le Baeferaime; banna ba Gileade ba ne ba fenya Baeferaime, ba ba kileng ba re: “Lo batshabi fela ba ba tswang kwa Eferaime, lona Bagileade ba ba mo Eferaime le Manase.”  Gileade o ne a gapa karolo e batho ba kgabaganyang Joredane+ mo go yone kwa pele ga Eferaime; mme fa banna ba Eferaime ba ne ba leka go tshaba ba ne ba tle ba re, “Mma ke kgabaganye”; foo banna ba Gileade ba ne ba tle ba botse mongwe le mongwe wa bone ba re, “A o Moeferaime?” Fa a ne a araba a re, “Nnyaa,”  ba ne ba tle ba mo reye ba re, “Tsweetswee e re Shibolethe.” Mme ene o ne a re, “Sibolethe,” ka gonne a ne a sa kgone go bitsa lefoko leno sentle. Foo ba ne ba mo tshwara ba bo ba mmolaela fa karolong e batho ba kgabaganyang Joredane mo go yone. Ka jalo, ka nako eo go ne ga wa Baeferaime ba le 42 000.  Jefetha o ne a atlhola Iseraele dingwaga di le thataro, mme morago ga moo Jefetha wa Mogileade o ne a swa mme a fitlhelwa kwa motseng wa gagwe kwa Gileade.  Ibesane yo o tswang kwa Bethelehema o ne a atlhola Baiseraele morago ga gagwe.+  O ne a na le barwa ba le 30 le barwadi ba le 30. O ne a romela bomorwadie gore ba nyalwe ke banna ba e seng ba kgotla ya gagwe e bile o ne a tlisetsa bomorwawe basadi ba le 30 gore ba ba nyale. O ne a atlhola Baiseraele dingwaga di le supa. 10  Go tswa foo, Ibesane o ne a swa mme a fitlhelwa kwa Bethelehema. 11  Morago ga gagwe, Elone wa Mosebulone o ne a atlhola Baiseraele; o ne a atlhola Baiseraele dingwaga di le lesome. 12  Go tswa foo, Elone wa Mosebulone o ne a swa mme a fitlhelwa kwa Aijalona mo lefatsheng la Sebulone. 13  Morago ga gagwe, Abedona morwa Hilele wa Mopirathone o ne a atlhola Baiseraele. 14  O ne a na le barwa ba le 40 le ditlogolwana tsa basimane di le 30 ba ba neng ba palama ditonki di le 70. O ne a atlhola Baiseraele dingwaga di le robedi. 15  Go tswa foo, Abedona morwa Hilele wa Mopirathone o ne a swa mme a fitlhelwa kwa Pirathone mo lefatsheng la Eferaime kwa thabeng ya Moamaleke.+

Dintlha Tse di Kwa Tlase

Kgotsa gongwe “ba kgabaganyetsa kwa ntlheng ya bokone.”
Seheb., “ne′phesh.Bona Ditlhaloso Tsa Mafoko.