Levitiku 9:1-24
-
Aron na iniav (1-24)
9 Tsô sha iyange i sha anigheni la,+ Mose yila Aron vea ônov nav man mbatamen mba Iserael.
2 A kaa a Aron ér: “Kôr wanbua u za nan nagh ku isholibo sha ci wou,+ man nomiyôngo u za nan nagh ough ku nanden, ve cii ve de lun a ihyogholough iyol ga, va a ve sha ishigh ki Yehova.
3 Kpa gema kaa Mbaiserael wer, ‘Va nen a kpev sha ci u nagh ku isholibo man wanbua kua nomiyôngo, sha ci u nagh ku nanden, hanmô ve a lu inyom i môm, shi ve de lun a ihyogholough iyol ga.
4 Shi va nen a nombua kua nomiyôngo sha ci u iniav mbi bem,+ u va nan nagh sha ishigh ki Yehova, shi va nen a nagh ku sha samuyia+ ku i nongo mkurem sha mi yô, gadia nyian ne Yehova una ande hen a ven.’”+
5 Tsô ve va a akaa a Mose kaa ér ve va a mi la hen ishigh ki tenti u kohol ker la. Mba ve kohol la cii ve kporom ve va tile sha ishigh ki Yehova.
6 Maa Mose kaa ér: “Ka kwagh u Yehova a kaa ér ne ne er je ne, sha er iengem i Yehova ia ande hen a ven yô.”+
7 Mose maa kaa a Aron ér: “Kporom hen atse a nan nagh, va na nagh ough ku isholibo+ man nagh ough ku nanden, na iwom sha ci wou iyol you+ man sha ci u ya wou. Na nagh sha ci u ior kpaa,+ na iwom sha ci ve+ vough er Yehova a kaa nahan.”
8 Fese je Aron kporom hen atse a nanden nagh la, sôngo wanbua u nan nagh ku isholibo sha ci na iyol na la.+
9 Ônov mba Aron va na un awambe la,+ nahan a za ihyôwe shin awambe la a dugh a kôô sha akor a atse a nanden nagh la, maa a gema awambe a a mase shin la a haa hen kpeatseegh.+
10 A gema ahôm kua ahi man ishwalegh ki mtema ki nagh ku isholibo la a nande sha atse, vough er Yehova kaa Mose nahan.+
11 A gema a nande inyam kua ikyôvor kira ken akôngoafoogh.+
12 Maa Aron sôngo nagh kura, ônov nav na un awambe la, a gema a a mishi ken ambusu a atse la cii.+
13 Ve na un aci a nagh ku nanden kura kua ityough, a gema a nande sha atse.
14 Maa a ôô myam mara man akusu, a gema a nande sha nagh ku nanden ku sha atse la.
15 Been yô, a na nagh ku ior, a kôr anivo u nagh ku isholibo u lu sha ci u ior la, a sôngo a na nagh ku isholibo a mi er u hiihii la nahan.
16 Shi a na nagh ku nanden, a er a mi vough er ka i er la.+
17 U dondon yô, a na nagh ku sha samuyia,+ a ongo ku ken ikyevwe a nande sha atse, u seer sha nagh ku nanden ku pepe la.+
18 Maa Aron sôngo nombua man nomiyôngo u nagh ku bem ku sha ci u ior la. Tsô ônov nav na un awambe la, maa a gema a mishi ken ambusu a atse la cii.+
19 Ve gema ve tôô aci a ahômough a nombua la,+ man tsa u ahômough u nomiyôngo la, man ahôm a a kase ikyav mbi ken atô man ahi man ishwalegh ki mtema,+
20 ve penda aci a ahômough ne cii sha ugugu mbara, maa ve nande aci a ahômough la sha atse.+
21 Kpa ugugu mbara man namegh ku ken iyan kura yô, Aron tôô ve cia keen man keen, lu nagh ku cian sha ishigh ki Yehova, vough er Mose kaa nahan.+
22 Aron ne nagh ku isholibo man nagh ku nanden man iniav mbi bem been yô, a samber ave sha ior a ver ve doo doo+ maa a hungwa.
23 Ken masejime yô, Mose vea Aron ve nyôr ken tenti u kohol ker la, ve hide ve due maa ve ver ior doo doo.+
Tsô iengem i Yehova ande hen ior cii,+
24 maa usu due hen Yehova+ gba hian nagh ku nanden man aci a ahômough a sha atse la. Ior cii mba nengen nahan yô, ve gba gbiren awer, ve gba ve cir ishigh inya.+
