Levitiku 13:1-59
13 Yehova shi ôr kwagh a Mose man Aron, a kaa ér:
2 “Aluer kwagh mura or sha kwavyolough, shin a due nan sha kwavyolough er ka ikyembegh nahan, shin ka ibyeenegh, man ka u una fatyô u hingir imande*+ sha kwavyolough u nan yô, i va a nan hen pristi Aron shin mô ken ônov nav mba ve lu upristi la.+
3 Pristi a nenge kwagh u a er nan sha kwavyolough la. Aluer ice i hen ijiir la hingir pupuu, man ka inja er kwagh u a er nan la saa sha kwavyolough tseegh ga kpa nyôr ken atô yô, ka imande. Nahan pristi una nenge kwagh shon, maa una pase ér nan kera ngu wang ga.
4 Kpa aluer ibyeenegh ki sha kwavyolough u nan la kungu, man ka inja er kwagh shon nyôr ken atô ga, kpa a saa sha kwavyolough tseegh shi ice gema her hingir pupuu ga yô, pristi a pav or u kwagh a dugh nan iyol la a ver kposo ayange ataankarahar.+
5 Maa sha iyange i sha utaankaruhar la pristi shi una nenge nan, aluer ka inja er kwagh shon de, a kera samber nan sha kwavyolough ga yô, pristi shi a hide a ver nan kposo ayange ataankarahar.
6 “Pristi shi a nenge nan sha iyange i sha utaankaruhar la, aluer kwagh u a er nan la bee, a kera samber sha kwavyolough ga yô, pristi una pase ér nan ngu wang;+ yange lu di ikyembegh tsô. Or la maa nana kire akondo a nan, nana hingir wang.
7 Kpa aluer pristi nenge nan, man a kaa ér nan ngu wang, kpa ikyembegh kira* hide za hii u samber nan sha kwavyolough yô, nana hide shi nana va sha ishigh ki pristi.*
8 Pristi a nenge kwagh shon, aluer ikyembegh kira samber sha kwavyolough yô, pristi una pase ér nan ngu wang ga. Ka imande.+
9 “Aluer ikyav i angev mbu imande due or iyol yô, i va a nan hen pristi,
10 pristi a nenge nan.+ Aluer kwagh mura nan sha kwavyolough pupuu, man kwagh la na ice i her kpa hingir pupuu shi kwagh shon u a mura la mindi yô,+
11 ka icôronimande i lu sha kwavyolough u nan ye. Nahan pristi a pase er nan lu wang ga yô, a de veren nan kposo ér ayange a kar tsô a nenge ga,+ sha ci u nan ngu wang ga.
12 Aluer imande cir or sha kwavyolough cii, man pristi nenge er imande la i cir oruange shon iyol, i hii sha ityo zan zan i dugh shin akevangahar,
13 shi pristi la tôv nenge er imande shon i cir nan sha kwavyolough cica cii yô, una pase ér orimande la nan ngu wang.* I gema i hingir pupuu cii, nahan nan ngu wang.
14 Kpa aluer ivav due mape yô, nan ngu wang ga.
15 Pristi una nengen a ivav la yô, una pase ér nan ngu wang ga.+ Ivav la ngi wang ga. Ka imande.+
16 Kpa aluer ivav la hide hingir pupuu yô, nana va hen pristi.
17 Pristi una nenge nan.+ Aluer pristi la nenge ér kwagh u a er nan la hide hingir pupuu yô, a pase ér oruange la kera hôngor ga. Nan ngu wang je.
18 “Aluer ityundu mura or sha kwavyolough man i va bee,
19 kpa kwagh gema mura ape yange ityundu mura la pupuu, shin ibyeenegh ki nyian daalaa due her yô, nana za hen pristi nana za tese un.
20 Pristi a nenge kwagh shon,+ aluer ka inja er a saa sha kwavyolough tseegh ga kpa a za ken atô, shi ice i her kpa hingir pupuu yô, pristi a pase ér nan ngu wang ga. Ka imande i dugh sha ityundu la ye.
21 Kpa aluer pristi nenge kwagh shon man a nenge a ice i pupuu her ga, shi ka inja er kwagh shon saa sha kwavyolough tseegh shi ngu been yô, pristi a pav nan a ver kposo ayange ataankarahar.+
22 Man aluer kwagh la samber sha kwavyolough je ka ashe tugh ga yô, pristi a pase ér nan ngu wang ga. Ka angev.
23 Kpa aluer ibyeenegh kira ki ijiir i môm, ki samber ga yô, ka ityundu la tsô shi i hide i mura ye, nahan pristi a pase ér nan ngu wang.+
24 “Shi aluer usu hia or man ikyembegh ki sha ivav la hingir ibyeenegh ki nyian daalaa, shin ki pupuu yô,
25 pristi a nenge kwagh shon. Aluer ice i hen ibyeenegh kira hingir pupuu, man ka inja er kwagh shon saa sha kwavyolough tseegh ga, a za ken atô yô, ka imande i dugh sha ikyembegh kira ye, nahan pristi a pase ér nan ngu wang ga. Ka angev, ka imande je.
26 Kpa aluer pristi nenge kwagh shon, man ka inja er ice i pupuu ngi sha ibyeenegh kira ga, shi kwagh shon saa sha kwavyolough tseegh a za ken atô ga shi ngu been yô, pristi a pav nan a ver kposo ayange ataankarahar.+
27 Sha iyange i sha utaankaruhar la pristi a nenge nan, man aluer kwagh la samber sha kwavyolough je ka ashe tugh ga yô, pristi a pase ér nan ngu wang ga. Kwagh la ka angev, ka imande.
28 Kpa aluer ibyeenegh kira saa ijiir i môm, ki samber sha kwavyolough ga shi ki been yô, ka ape ikyembegh ki te la tsô shi i hide i mura ye, nahan pristi a pase ér nan ngu wang, ka ivav la i hide i mura ye.
29 “Aluer nomsoor shin kwase gba ivav sha ityo shin shin gbem yô,
30 pristi a nenge ivav la.+ Aluer i saa sha kwavyolough tseegh ga kpa i za ken atô, shi ice i her nyian kaang shi ngi vende vende yô, pristi a pase ér or la nan ngu wang ga; ka angev mbu sha ityo gayô mbu shin gbem. Ka imande i sha ityo gayô i shin gbem.
31 Kpa aluer pristi la nenge ér ivav la saa sha kwavyolough tseegh, i za ker ga, shi ice i il ngi her ga yô, pristi la a pav or u a gbe ivav la a ver kposo ayange ataankarahar.+
32 Sha iyange i sha utaankaruhar la yô, pristi a nenge ivav la. Aluer ivav la samber ga, shi ice nyian kaang hen ijiir shon ga, shi ka inja er ivav la saa sha kwavyolough, i za ken atô ga yô,
33 or shon nana hondo ityough gayô gbem, kpa nana tsegha ijiir i ivav i lu la. Pristi a pav or u nan lu a ivav la a ver kposo ayange ataankarahar.
34 “Sha iyange i sha utaankaruhar la yô, shi pristi a nenge ivav shon. Aluer ivav i shin ityo gayô shin gbem la samber sha kwavyolough ga, shi ka inja er i saa sha kwavyolough, i za ken atô ga yô, pristi a pase ér nan ngu wang, shi nana kire akondo a nan nana hingir wang.
35 Kpa, aluer i vande pasen ér nan ngu wang, man ivav la shi hide hii u samber nan sha kwavyolough yô,
36 pristi una nenge nan, nahan aluer ivav la ngi samber nan sha kwavyolough seer yô, ityôkyaa kera ngi i pristi una ker ice i nyian kaang ga; or la nan ngu wang ga.
37 Kpa aluer i nenge kwagh la man tese ér ivav la samber ga, shi ice i il mende her yô, ivav la bee je ve. Nan ngu wang, nahan pristi a pase ér nan ngu wang.+
38 “Aluer abeen ta nomsoor shin kwase sha kwavyolough man abeen la kungu yô,
39 pristi a nenge a.+ Aluer abeen a sha kwavyolough la kungu fuee yô, ka a bo ga, ka di iyolkuran tsô. Or la nan ngu wang.
40 “Aluer ice tsor or sha ityo nan kpur ityough yô, nan ngu wang.
41 Aluer ice tsor nan hen icur man nan kpur ityough yô, nan ngu wang.
42 Kpa aluer ityundu i nyian daalaa mura nan ape ityough ki kpur la shin hen icur yô, ka imande i lu duen ape nan kpur ityough la shin hen icur i nan ye.
43 Pristi a nenge nan, aluer kwagh u a mura nan sha ivav i i lu ape nan kpur ityough shin sha icur la ngu nyian daalaa, shi ngu inja er ka imande i lu sha kwavyolough u nan yô,
44 nan ngu orimande. Nan ngu wang ga, pristi a pase ér nan ngu wang ga, sha ci u angev mbu mbu lu nan sha ityo la.
45 Or shon u nan lu a angev mbu imandev la yô, nana hua akondo a anden, nana de ityough ki nan ki lu nzegha nzegha, shi nana cir akuzwa u nan, nana yôôn ér, ‘Wang ga, wang ga!’
46 Sha ayange a nan lu a angev mbura cii nana lu wang ga. Er nan lu wang ga yô, nana de lun ikyua a ior ga. Ijiir i nan i lu ken won u afoogh.+
47 “Aluer imande ngi sha ma ikyondo, aluer ka ikyondo i sha aive shin ka i sha mou,
48 shin ka sha gwarmou u senen a sen shin u teran a tera u sha ikyondo i sha mou, shin i sha aive, shin ka sha ikyôv, shin ka sha ma kwagh ugen u i er sha ikyôv,
49 man angev mbu shon mbu mbu hee sha ikyondo shin sha ikyôv shin sha mou u senen a sen shin mou u teran a tera, shin sha ma kwagh ugen u i er sha ikyôv la, mbu iyol agbedang shough shough shin nyian yô, ka imande i hee sha mi ye, nahan i za tese pristi.
50 Pristi a nenge angev mbura, nahan a ver kwagh u a lu a angev mbura sha mi la kposo ayange ataankarahar.+
51 Pristi una nenge angev mbura sha iyange i sha utaankaruhar la, man aluer a nenge ér mbu samber sha ikyondo la, shin sha mou u senen a sen shin mou u teran a tera shin sha ikyôvor kira yô, (a lu nyi je i eren a ikyôvor kira kpaa), angev mbura ka imande i bo, nahan kwagh la kera ngu wang ga.+
52 A nande ikyondo, shin mou u senen a sen shin mou u teran a tera shin aive shin ikyondo i sha mou, shin nyityôkwagh i i er i sha ikyôv i angev mbura mbu lu sha mi la cii, sha ci u ka imande i bo. I nande kwagh shon sha usu.
53 “Kpa aluer pristi nenge man angev mbura samber sha ikyondo shin sha mou u senen a sen shin mou u teran a tera shin sha kwagh u i er sha ikyôv la ga yô,
54 pristi a kaa i kire kwagh u angev mbu hee sha mi la, shi a hide a ver kwagh shon kposo ayange ataankarahar.
55 A kiren kwagh u angev mbu hee sha mi la tsembelee yô, pristi shi a nenge un. Aluer angev mbu mbu hee sha mi la bugh ga yô, angev mbura mbua samber ga je kpa, ngu wang ga. Nande un sha usu, sha ci u mbu ya un, mbua ya un a lu ken atô shin a lu ken won kpaa.
56 “Kpa aluer i kire kwagh la tsembelee, man pristi nenge ér angev mbu mbu hee sha mi la pande bugh hen ijiir shon yô, a ande ikyondo la shin ikyôvor kira shin mou u senen a sen shin mou u teran a tera la hen ijiir shon kera.
57 Nahan kpa, aluer shi mbu hide mbu due hen ijiir igen sha ikyondo la, shin sha mou u senen a sen shin sha mou u teran a tera shin sha ma kwagh u i er sha ikyôv yô, tese ér mbu samber, nahan nande kwagh u angev mbu hee sha mi la sha usu.+
58 Kpa aluer i kire ikyondo i angev mbu hee sha mi la, shin mou u senen a sen shin mou u teran a tera shin kwagh u i er sha ikyôv la man angev mbura bee yô, shi i kire kwagh shon sha kwa har, nahan una hingir wang.
59 “Ka tindi u sha kwagh u angev mbu imandev mbu sha ikyondo i sha aive shin i sha mou, shin imande i sha mou u senen a sen shin i sha mou u teran a tera shin i sha nyityôkwagh i i er sha ikyôv, sha u tesen ér kwagh shon ngu wang shin ngu wang ga je la.”
Ngeren mba shin kpe
^ Ishember i ken zwa Heberu i i gem ér imande la, i wa akaa ker kpishi. A fatyô u lun iangev mbi sha kwavyolough kposo kposo mbi tsaren, shi a fatyô u lun iangev mbigen mbi ka mbi lu sha akondo shin ken ayou la kpaa.
^ Shin “kwagh u a er nan la.”
^ Shin “nana hide shi nana va sha ishigh ki pristi sha kwa har.”
^ Shin “imande i nan la ia fatyô u tsaren orgen ga.”
