Levitiku 2:1-16
-
Nagh ku sha samuyia (1-16)
2 “‘Aluer or soo u nan Yehova nagh ku sha samuyia yô,+ nagh ku nan kura i lu mwem ma kengese, nana haa mkurem sha mi shi nana wa ferankinsensi sha mi.+
2 Maa nana va a mi hen upristi, ônov mba Aron, nahan pristi una ongo mwem ma kengese mara ken ikyevwe poo, a mkurem man ferankinsensi u sha mi la cii, una nande ma sha usu sha atse la, a lu nagh ku umbur.*+ I lu nagh ku nanden ku i ne Yehova sha ci u ihyuma i dedoo* yô.
3 Kwagh u a shi ken nagh ku sha samuyia la cii, ka u Aron man ônov nav,+ ka icighankwagh tsung+ u a dugh ken iniav mbi Yehova mbi i ne sha usu yô.
4 “‘Aluer ka nagh ku sha samuyia ku i kaa sha atse u lu van a mi yô, i lu ku sha mwem ma kengese. I lu ikpenberedi i vingir i i we kwa sha mi ga, i nongo mkurem sha mi yô, gayô beredi u par par u i we kwa sha mi ga, i shigh mkurem sha mi yô.+
5 “‘Aluer nagh ough ku sha samuyia ka ku i kaa sha icenge yô,+ i lu sha mwem ma kengese ma i we kwa sha mi ga, i nongo mkurem sha mi yô.
6 I vur ku a vur; shi haa mkurem sha mi.+ Ka nagh ku sha samuyia.
7 “‘Aluer nagh ough ku sha samuyia kura ka ku i kaa shin tsua yô, i lu ku sha mwem ma kengese ma i nongo mkurem sha mi yô.
8 Va a nagh ku sha samuyia ku i er sha akaa ne la hen Yehova, va na pristi, un di una va a mi ikyua a atse a nanden nagh.
9 Pristi una pande nagh ku sha samuyia kura una nande ku sha atse la, a lu nagh ku umbur,*+ ku a lu nagh ku nanden ku i ne Yehova sha ci u ihyuma i dedoo* yô.+
10 Kwagh u a shi ken nagh ku sha samuyia la cii ka u Aron man ônov nav, ka icighankwagh tsung u a dugh ken iniav mbi Yehova mbi i ne sha usu yô.+
11 “‘Nagh ku sha samuyia ku ne lu nan Yehova cii ku de lun a kwa sha mi ga,+ sha ci u kwa* man iyough cii, gba u ne naan Yehova nagh ku sha usu a mi ga.
12 “‘Ne fatyô u va nan Yehova nagh ku iyiav mbi i hii sundan yô a mi,+ kpa i de vaan a mi hen atse ér ka ihyuma i dedoo* ga.
13 “‘Hanma nagh ku sha samuyia ku u lu van a mi cii, wa bar sha mi; bar u ikyuryan i Aôndo wou a de banen sha nagh ough ku sha samuyia ga. Hanma nagh ough yô na ku a bar sha mi.+
14 “‘Aluer u ngu nan Yehova nagh ku sha samuyia, sha iyiav mbi u hii sundan yô, va a iyiav mbi hev mbi* i mgbagh a mgbagh man sam u he u i dorough a dorough yô. I lu nagh ku sha samuyia ku iyiav mbi u hii sundan yô.+
15 Haa mkurem sha mi, shi wa ferankinsensi kpa sha mi. Ka nagh ku sha samuyia.
16 Pristi una nande ku, a lu nagh ku umbur;*+ ka kwagh u i pande ken sam u i dorough kua mkurem man ferankinsensi u i we sha mi la je la. Ka nagh ku sha usu ku i ne Yehova yô.
Ngeren mba shin kpe
^ Shin “sha er a lu anivur u a til sha ityough ki nagh kura jimin cii yô.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “sha er a lu anivur u a til sha ityough ki nagh kura jimin cii yô.”
^ Shin “mwem ma hôron ma i nongo kwa sha mi.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “asagher a ndor a.”
^ Shin “sha er a lu anivur u a til sha ityough ki nagh kura jimin cii yô.”
