Levitiku 8:1-36
-
I ver tsombor u Aron sha tom u pristi (1-36)
8 Yehova shi ôr kwagh a Mose kaa ér:
2 “Kua a Aron man ônov nav,+ shi tôô akondo la+ kua mkurem ma tseghan kwagh a mi,+ man nombua u nagh ku isholibo la, man anomaiyôngo ahar, man ikyese i uberedi mba i we kwa sha mi ga la,+
3 shi kohol ior cii imôngo hen hunda u tenti u kohol ker la.”
4 Tsô Mose er vough er Yehova kaa un nahan, ikpelaior la va kumba hen hunda u tenti u kohol ker la.
5 Mose maa kaa a ior mba ve kohol la ér: “Ka kwagh u Yehova a kaa ér se er je ne.”
6 Tsô Mose kporom a Aron man ônov nav ikyua, a ôô ve iyol sha mnger.+
7 Maa a hua un ikyondo i elemeen la,+ shi a kange un ikyondo i shin iwenge la,+ a hua un riga u lun a ave ga la+ kua efodi,+ maa a tsule un kwange u tumen*+ u sha efodi la, sha er ua kange efodi la nyôôsôô una tile yô.
8 Maa a var un ikpa i sha vanger la,+ a wa Urim man Tumim+ ken ikpa i sha vanger shon.
9 Maa a kange un tsar u sha ityo la,*+ shi a wa ankpande u sha zanaria u engem u a lu icighanikyav i mtsegh la hen ishigh ki tsar shon,+ vough er Yehova kaa Mose nahan.
10 Mose maa tôô mkurem ma tseghan shighe tabernakel la kua akaa a a lu ker cii,+ a tsegha ve.
11 Been yô, a pande ma a mishi sha atse la kwa taankaruhar, a shighe atse la mkurem kua ikyav mbi a cii, man gbangi kua kwagh u veren un sha mi la, a tsegha ve.
12 Maa a pande mkurem ma tseghan mara a haa Aron shin ityo, a shighe un mkurem sha u tseghan un.+
13 Mose maa kporom a ônov mba Aron ikyua, a hua ve akondo a elemeen la, shi a kange ve akondo a shin iwenge kua atsar a sha ityo la,+ vough er Yehova kaa Mose nahan.
14 Maa a va a nombua u nagh ku isholibo la, nahan Aron vea ônov nav ve penda ave sha ityough ki nombua u nagh ku isholibo la.+
15 Mose sôngo un, maa a er awambe+ sha ihyôwe a kôô sha akor a atse la sha avegher la cii, a wanger isholibo sha atse la kera. Kpa awambe agen a a mase shin la yô, a gema a haa hen ityô i atse la, sha er a tsegha a, nahan a na iwom sha a yô.
16 Mose been yô, a tôô ahôm a sha mya la cii, kua ishwalegh ki mtema man ahi a ahar la kua ahôm a a, a nande sha atse la.+
17 Maa i za nande hanma kwagh u nombua la ugen u a mase shin cii, kua ikyôvor nagh man inyam na man ambi na ken akôngoafoogh,+ vough er Yehova kaa Mose nahan.
18 Tsô a kporom a nomiyôngo u nagh ku nanden la, nahan Aron vea ônov nav ve penda ave sha ityough ki nomiyôngo la.+
19 Mose maa sôngo nomiyôngo la, a mishi awambe a na ken ambusu a atse la cii.
20 Mose bur nomiyôngo la, a tôô ityough nagh man aci na, kua ahôm a a kase ahi la a nande.
21 Shi Mose ôô myam man akusu la sha mnger, a nande nomiyôngo la cii sha atse a nanden nagh la. Lu nagh ku nanden sha ci u ihyuma i dedoo.* Lu nagh ku i na Yehova sha usu yô, vough er Yehova kaa Mose nahan.
22 Maa a va a nomiyôngo u sha uhar, nomiyôngo u veren or sha tom la,+ nahan Aron vea ônov nav ve penda ave sha ityough ki nomiyôngo la.+
23 Mose sôngo nomiyôngo la, a er awambe a na a kôô hen kpe u tough ku Aron ku ken iyan, kua sha ihyôwe na i tamen i ken iyan, man sha ihyônguhar na i tamen i ken iyan.
24 Maa Mose kporom a ônov mba Aron, a kôô awambe la hen kpe u tough vev ku ken iyan man sha ihyôwe ve i tamen i ken iyan kua sha ihyônguhar ve i tamen i ken iyan; kpa awambe a a mase shin la yô, Mose gema mishi ken ambusu a atse a nanden nagh la cii ningir tser.+
25 Maa a tôô ahôm a na kua tsa u lun a ahôm la, man ahôm a sha mya la cii, kua ishwalegh ki mtema man ahi a ahar la kua ahôm a a man namegh ku ken iyan kura.+
26 Maa a za a dugh kpenberedi u vingir môm u i we kwa sha mi ga yô, man beredi u vingir môm u i nongo mkurem sha mi yô,+ kua beredi u par par môm shin ikyese i beredi u i we kwa sha mi ga, i i lu sha ishigh ki Yehova la.+ A gema ve a ver sha aci a ahômough la kua sha namegh ku iyanegh kura.
27 Been yô, a gema ve a ver sha akevaveegh a Aron man akevaveegh a ônov nav, a gba cian keen man keen, lu nagh ku cian sha ishigh ki Yehova.
28 Mose maa tôô ve akaa ne sha ave sha gema nande sha atse, sha nagh ku nanden kura. Lu nagh ku veren or sha tom sha ci u ihyuma i dedoo.* Lu nagh ku i na Yehova sha usu yô.
29 Mose maa tôô gugu la cia keen man keen, lu nagh ku cian sha ishigh ki Yehova.+ Nahan gugu u nomiyôngo u veren or sha tom la hingir kwar u Mose, vough er Yehova kaa Mose nahan.+
30 Shi Mose pande mkurem ma tseghan kwagh a mi+ kua awambe a a lu sha atse la, a mishi Aron iyol kua sha akondo a na, shi a mishi ônov nav mba ve lu vea na la iyol kua sha akondo a ve. Kape i tsegha Aron kua akondo a na, man ônov nav+ kua akondo a ve la.+
31 Tsô Mose kaa a Aron man ônov nav ér: “Jiidi+ nen inyam la hen hunda u tenti u kohol ker la, ya nen i her kua beredi u a lu shin ikyese i veren or sha tom la, vough er yange i kaa a mo nahan, ér, ‘Aron man ônov nav ve ya i.’+
32 Inyam i i neer her kua beredi la yô nande nen sha usu.+
33 De dugh nen hen hunda u tenti u kohol ker la ga zan zan ayange ataankarahar. Lu nen her zan zan ayange a veren ne sha tom la aa kar been, sha ci u a tôô ayange ataankarahar u veren ne sha tom u pristi.*+
34 Yehova kaa ér se er kwagh u se er nyian ne sha er a na iwom sha ci wen yô.+
35 Ne lu hen hunda u tenti u kohol ker la tetan man tugh zan zan ayange ataankarahar.+ Ne eren tom u Yehova a we ne la sha er ne kpe ga yô;+ sha ci u ka kwagh u i ôr a mo je la.”
36 Tsô Aron vea ônov nav er akaa a Yehova kaa Mose la cii.
Ngeren mba shin kpe
^ Shin “tsar u shin iwenge.”
^ Shin “adikpo.” Yange i kange tsar ne sha ityo a lu er ka idyer nahan.
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Zwa Heberu, “u ivin ave a en.”
