Levitiku 22:1-33
22 Yehova shi ôr kwagh a Mose kaa ér:
2 “Kaa Aron man ônov nav wer ve wa ikyo sha gbenda u ve eren a* uicighanmbaakaav mba Mbaiserael ve tsegh sha ci wam la,+ sha er vea hôngor a icighanti wam ga yô.+ Ka mo Yehova.
3 Kaa ve wer, ‘Sha ikyov yen cii, aluer ma wan wen nan za ikyua a uicighanmbaakaav mba Mbaiserael ve tsegh sha ci u Yehova la zum u nan lu wang ga yô, i bee a or la sha ishigh yagh kera.*+ Ka mo Yehova.
4 Or môm ken ônov mba Aron u nan lu a imande+ shin kwagh a lu duen nan ken iyol cii,+ nana de ye uicighanmbaakaav mbara ga zan zan saa nana hide a hingir wang.+ Shi or u nan bende a or u nan hôngor iyol i nan sha ikyom i or,+ shin or u mnyandem ma jilen wan ma dugh nan ken iyol,+
5 shin or u nan bende a ma kwagh u uma u wang ga, u a zenden akum akum,+ shin nan bende a or u nan lu wang ga sha nyityôkwagh, man i lu u or shon nana fatyô u hôngor nan cii kpaa, nana de ye ga.+
6 Or u nan bende a ma kwagh ken akaa ne cii, nana kera lu wang ga zan zan aikighe, shi nana fatyô u yan ma kwagh ken uicighanmbaakaav ga, kpa nana ôô iyol sha mnger.+
7 Iyange ia miren yô nana hingir wang. Hen shighe ne nana fatyô u yan uicighanmbaakaav, sha ci u ka kwaghyan u nan.+
8 Shi nana de ye inyam i kpen, shin nyityôkwagh i inyamkyume i woo i ga, sha er nana hôngor iyol i nan sha i ga yô.+ Ka mo Yehova.
9 “‘Gba u vea kuran tindi wam, sha er una na vea er isholibo nahan vea hingir u kpen sha ci u ve hôngor a uicighanmbaakaav ga yô. Ka mo Yehova m lu tseghan ve ye.
10 “‘Or u i ne nan ian ga yô,* nana de ye icighankwagh ga.+ Or u van a va, u nan ve pristi inya, shin or u i tee a tôô nan ijodo kpaa, nana de ye icighankwagh ga.
11 Kpa aluer pristi yam or sha inyaregh nagh yô nana fatyô u yan. Ikpan i i mar i hen ya na kpaa ia fatyô u yan kwaghyan na la.+
12 Aluer wan u pristi u kwase za vôso or u nan lu pristi ga yô,* wankwase la nana de ye uicighanmbaakaav mba i ne nagh a mi la ga.
13 Kpa aluer wan u pristi u kwase la nan hingir kwasecôghol shin nom u nan pav a nan, man nan ngu a wan ga kpa nan hide nan va ngu hen ya u ter u nan er yange nan lu iyev la nahan yô, nana fatyô u yan kwaghyan u ter u nan;+ kpa or u i ne nan ian ga* yô nana de ye ga.
14 “‘Aluer or ya icighankwagh abu yô, nana kimbi icighankwagh u nan ye la hen pristi, shi nana seer môm ken utaan sha mi.+
15 Nahan ve de hôngor a uicighanmbaakaav mba Mbaiserael ve ne Yehova la ga,+
16 sha er vea ya mtsaha sha ci u ve kpela ibo sha u yan uicighanmbaakaav vev ga yô; gadia ka mo Yehova m lu tseghan ve ye.’”
17 Yehova shi za hemen u ôron kwagh a Mose, a kaa ér:
18 “Lam a Aron man ônov nav kua Mbaiserael cii, kaa ve wer, ‘Zum u Oriserael shin or u van a va u nan tem ken Iserael, nan lu van a nagh ku nanden+ ku va nan Yehova sha u kuren uiceghzwa mba nan, shin sha u va nan nagh ku sha ishima i nan yô,+
19 nana tsua i lu nom u a lu a ihyogholough iyol ga yô,+ ken ibua i nan shin ken agumaiyôngo a nan gayô ken ivo i nan, sha er a lumun nan yô.
20 Ma kwagh u a lu a ihyogholough iyol cii de ve nen a mi ga,+ sha ci u una na a kera lumun ne ga.
21 “‘Aluer or ngu va nan Yehova nagh ku bem+ sha u kuren iceghzwa i nan, shin ka sha u i lu nagh ku sha ishima i nan yô, nana kôr ilegh ki ki lu a ihyogholough iyol ga yô, ken ibua i nan shin ken iyôngo i nan, sha er a lumun nan yô. Ki de lun a ihyogholough i môm iyol ga.
22 Ilegh i môm ki i lu nan nagh a mi ki de pirin ishe shin ki sombon shin ki tôndon ivav iyol, shin ki muran ityundu shin ki gbaan lagh shin ki kpesan iyol ga. De va ne nen Yehova kwagh môm u lun a akaa ne, shin va naan nen Yehova imbakwagh la sha atse a nan nagh ga.
23 U fatyô u nan nagh ku sha ishima you sha nombua shin iyôngo i i hembe nguhar shin uwegh môm, gayô i yina nguhar shin uwegh môm yô. Kpa aluer ka nagh ku iceghzwa yô a lumun ga.
24 De va ne nen Yehova kwagh u i vihi un ake shin i cagh un ake shin i dugh un ake gayô i tôndo un ake ga; de ne nen imba zendenya la ken tar wen ga.
25 Shi de ngohol nen ambaakaa ne nahan sha ikyev i or u van a va, naan nen ner ka kwaghyan* u Aôndo wen ga, gadia a vihi shi nga a ihyogholough kpaa. A lumun a sha ci wen ga.’”
26 Yehova shi ôr kwagh a Mose kaa ér:
27 “Aluer i mar wanbua shin waniyôngo shin wanivo yô, a lu vea ngô na ayange ataankarahar,+ kpa hii sha iyange i sha anigheni la yem hemen yô, a lumun ér i va na nagh a mi, nagh ku i ne Yehova sha usu yô.
28 De sôngon bua shin iyôngo a wan na imôngo ken iyange i môm ga.+
29 “Aluer ne mba nan Yehova nagh ku iwuese yô,+ na nen ku sha er una lumun ne yô.
30 I ya ku sha iyange la je. I de undun ma kwagh ér a tsa her ga.+ Ka mo Yehova.
31 “Gba u ne waan atindi a am ikyo shi ne eren sha a.+ Ka mo Yehova.
32 De hôngor nen icighanti wam ga,+ gba u me lu icighan sha ishigh ki Mbaiserael.+ Ka mo Yehova m lu tseghan ne,+
33 shi m lu duen a ven ken tar u Igipiti kera, u tesen mer m ngu Aôndo wen ye.+ Ka mo Yehova.”
Ngeren mba shin kpe
^ Zwa Heberu, “ve lu peleghaa a.”
^ Shin “i wua or la.”
^ Zwa Heberu, “or u ken inya.” Inja na yô, ka or u nan lu ken tsombor u Aron ga je la.
^ Shin “or u ken inya yô.”
^ Zwa Heberu, “or u ken inya.” Inja na yô, ka or u nan lu ken tsombor u Aron ga je la.
^ Zwa Heberu, “beredi.”
