Levitiku 14:1-57
14 Yehova shi ôr kwagh a Mose, a kaa ér:
2 “Ngun ka tindi u i gbe u a dondo sha kwagh u orimande sha iyange i wanger nan, zum u i lu van a nan hen pristi je ne.+
3 Pristi a due a za ken akôngoafoogh a za nenge nan. Aluer imande la i bee orimande shon yô,
4 pristi a kaa nan nana va a inyon i uma ihiar i wang, kua kon u sedar man mou u nyian bong man hisop, sha u wanger nan.+
5 Pristi a na zwa i wua annyon u môm, hen ikyagh ki inyaagh ki i kese mngerem ma kuan shimi yô.
6 Kpa a tôô annyon u uma la kua kon u sedar man mou u nyian bong man hisop la, a gema ve cii a mir shin awambe a annyon u i wua un hen mngerem ma kuan la.
7 Maa a gema a mishi or u nan lu wanger imande i nan la iyol kwa taankaruhar, a pase ér nan ngu wang; shi a pase annyon u uma la a yem ken toho.+
8 “Or u nan lu wanger iyol i nan la nana kire akondo a nan, shi nana hondo ice iyol cica cii, shi nana ôô iyol sha mnger, nahan nana hingir wang. Nana been yô, nana fatyô u hiden nyôron ken afo, kpa nana de nyer ken tenti u nan ga zan zan ayange ataankarahar.
9 Sha iyange i sha utaankaruhar la yô, nana hondo ice i sha ityo man i shin gbem man ingyaashee i nan cica cii. Nana hondon ice ne cii yô, nana kire akondo a nan shi nana ôô iyol sha mnger, maa nana hingir wang.
10 “Sha iyange i sha anigheni la, nana kôr agumaiyôngo ahar a a lu a ihyogholough iyol ga yô, kua tuleiyôngo u a lu a ihyogholough iyol ga,+ shi a hembe inyom ga yô. Shi nana tôô mwem ma kengese ma i nongo mkurem sha mi, ma ma kuma uikyaren utar-ken-pue mba efa yô,* i lu nagh ku sha samuyia.+ Shi nana tôô mkurem ikyaren i logi i môm.*+
11 Pristi u a pase ér nan ngu wang la, una va a or shon u a lu wanger iyol na la kua iniav nav mbira sha ishigh ki Yehova, hen hunda u tenti u kohol ker la.
12 Pristi una kôr gumiyôngo môm una na nagh ku iboogh a mi+ vea ikyaren i logi u mkure la imôngo; una cia ve keen man keen, vea lu nagh ku cian sha ishigh ki Yehova.+
13 Maa una sôngo gumiyôngo la hen ijiir i i sôngon nagh ku isholibo man nagh ku nanden la,+ hen icighanjiir, sha ci u nagh ku iboogh kura ka kwagh u pristi, vough er nagh ku isholibo nahan.+ Ka icighankwagh tsung.+
14 “Pristi maa una er awambe a nagh ku iboogh kura, una kôô hen kpe u tough ku ken iyan ku or u nan lu wanger iyol i nan la, kua sha ihyôwe i nan i tamen i ken iyan man sha ihyônguhar i nan i tamen i ken yan.
15 Shi pristi una pande ikyaren i mkure i logi la,+ una haa ken ikyevwe na i ken imese.
16 Maa pristi una za ihyôwe na i ken iyan shin mkurem ma ma lu ken ikyevwe na i ken imese la, una dugh a mishi sha ishigh ki Yehova kwa taankaruhar.
17 Maa pristi una gema mkurem ma ma shi un ken ikyevwe la, una shighe hen kpe u tough ku ken iyan ku or u nan lu wanger iyol i nan la, man sha ihyôwe i nan i tamen i ken iyan, man sha ihyônguhar i tamen i nan i ken iyan, una shighe ma sha awambe a nagh ku iboogh kura.
18 Pristi maa una gema mkurem ma ma shi un ken ikyevwe la, una shighe or u nan lu wanger iyol i nan la sha ityo, shi pristi una na iwom sha ci u nan sha ishigh ki Yehova.+
19 “Pristi la una na nagh ku isholibo,+ una na iwom sha ci u or u nan lu wanger hôngor u nan la, una been yô, una sôngo nagh ku nanden.
20 Pristi una gema nagh ku nanden man nagh ku sha samuyia la+ una na sha atse, nahan pristi una na iwom sha ci u nan,+ maa nana hingir wang.+
21 “Nahan kpa, aluer nan ngu icanor, nan ngu a kwagh ave ga yô, nana va a gumiyôngo u nagh ku iboogh sha ci u nagh ku cian, sha er a na iwom sha ci u nan yô. Nana va a mi kua mwem ma kengese ma i nongo mkurem sha mi, ma ma kom môm-ken-pue u efa yô,* i lu nagh ku sha samuyia. Shi nana va a mkurem ma kuman ikyaren i logi i môm
22 man mbaatii uhar shin mkungum ma kiriki mhar, er nan fetyô la, u môm sha ci u nagh ku isholibo, ugen la di sha ci u nagh ku nanden.+
23 Sha iyange i sha anigheni la,+ nana va a akaa la sha u va wanger iyol i nan. Nana va a mi hen pristi hen hunda u tenti u kohol ker la, sha ishigh ki Yehova.+
24 “Pristi a kôr gumiyôngo u nagh ku iboogh kura,+ shi a tôô ikyaren i logi u mkure la, a cia keen man keen, i lu nagh ku cian sha ishigh ki Yehova.+
25 Maa pristi a sôngo gumiyôngo u nagh ku iboogh la, a er awambe a nagh ku iboogh la a shighe hen kpe u tough ku iyanegh ku or u nan lu wanger iyol i nan la, man sha ihyôwe i nan i tamen i ken iyan, kua sha ihyônguhar i nan i tamen i ken iyan.+
26 Pristi a pande mkurem mara a haa ken ikyevwe na i ken imese,+
27 maa a za ihyôwe na i ken iyan shin mkurem ma ma lu ken ikyevwe na i ken imese la, a dugh a mishi sha ishigh ki Yehova kwa taankaruhar.
28 Shi pristi a er mkurem ma ma lu un ken ikyevwe la a kôô hen kpe u tough ku iyanegh ku or u nan lu wanger iyol i nan la, kua sha ihyôwe i nan i tamen i ken iyan, man sha ihyônguhar i nan i tamen i ken iyan, sha ajiir a a vande kôôn awambe a nagh ku iboogh la.
29 Pristi maa a gema mkurem ma ma shi un ken ikyevwe la, a shighe or u nan lu wanger iyol i nan la sha ityo, sha er una na iwom sha ci u nan sha ishigh ki Yehova yô.
30 “Nana̱ tsua atii môm shin ikyungugh ki ki lu a tsa kpishi ga la i môm, nana na er tahav mbu nan mbu kom la,+
31 ka kwagh u nan fetyô u nan je la, i lu nagh ku isholibo. Nana gema ugen la di nana na i lu nagh ku nanden+ a nagh ku sha samuyia la imôngo; pristi la a na iwom sha ci u or u nan lu wanger iyol i nan la, sha ishigh ki Yehova.+
32 “Ka tindi u sha kwagh u or u nan lu a angev mbu imande kpa nan lu a kwagh u nan sha u wanger iyol i nan ga je la.”
33 Maa Yehova kaa a Mose man Aron ér:
34 “Aluer ne za nyôr ken tar u Kaanan+ u m lu nan ne mer u lu kwagh wen la,+ man m haa angev mbu imandev sha ma iyou i ken tar wen la yô,+
35 or u i lu ya u nan la nana va nana va kaa pristi ér, ‘Kwagh ngu duen ken iyou yam er ka angev nahan.’
36 Pristi a ôr i due a ikyav ken iyou la cica, cii man una va u va nengen angev mbura ye, sha er una va pase ér hanma kwagh ken iyou la cii hôngor ga yô. A been yô, pristi a va nyôr a nenge iyou shon.
37 Una va nenge ijiir i kwagh shon a er la, man aluer kpekpe u iyou la piin ajiir agen shi ka her agbedang shou shou shin nyian, man ka inja er kwagh shon saa sha kpekpe tseegh ga, a za ken atô yô,
38 pristi una due ken iyou la una za tile sha hunda, una wuhe iyou la ayange ataankarahar.+
39 “Maa sha iyange i sha utaankaruhar la, pristi una hide a va nenge iyou la. Aluer angev mbura samber sha kpekpe u iyou la yô,
40 pristi una na zwa, a dugh awen a angev mbura mbu lu sha mi la, a za haa ken won gar, hen ijiir i haan akaa a wang ga.
41 Shi una kaa a kember iyou la ken atô tsembelee, a due a inya i i kember la a za haa ken won gar, hen ijiir i i haan akaa a wang ga la.
42 A hide a wa awen agen hen ijiir i i dugh awen a tse la, shi a hôr inya igen a shighe iyou la.
43 “Kpa aluer angev mbura shi hide due ken iyou shon, zum u i dugh awen la, i kember iyou shon shi i hide i shighe i kera yô,
44 pristi una nyôr a za nenge i. Aluer angev mbura samber ken iyou shon yô, ka imande i bo.+ Iyou la ngi wang ga.
45 Maa una na zwa a yôhôr iyou la—a yôhôr awen a i man ikyon i i, kua inya i i shighe sha iyou la cii—a kura a za haa ken won gar, hen ijiir i i haan akaa a wang ga la.+
46 Nahan kpa, or u nan nyer ken iyou la sha ayange a i wuhe i la yô,+ nana kera lu wang ga zan zan aikighe.+
47 Or u nan yav ken iyou la yô nana kire akondo a nan, shi or u nan ye kwagh ken iyou la kpaa nana kire akondo a nan.
48 “Nahan kpa, aluer i hide i shighe iyou la ken kpekpe, man pristi la va nenge angev mbura kera samber ga yô, a pase ér iyou la ngi wang, sha ci u angev mbura bee.
49 A kôr annyonov uhar shi a tôô kon u sedar kua mou u nyian bong man hisop, sha u wanger hôngor u* iyou la.+
50 A wua annyon môm hen ikyagh ki inyaagh ki i kese mngerem ma kuan shimi yô.
51 Maa una tôô kon u sedar man hisop man mou u nyian bong man annyon u uma la, una wa shin awambe a annyon u i wua un la, kua shin mngerem ma kuan mara, una dugh a mishi vegher u iyou la i lu la kwa taankaruhar.+
52 Una wanger hôngor u* iyou la, sha awambe a annyon la, kua sha mngerem ma kuan mara, man sha annyon u uma la, man kon u sedar man hisop man mou u nyian bong la.
53 Maa una za pase annyon u uma la ken won gar, una yem ken toho; nahan una na iwom sha ci u iyou la, ia hingir wang.
54 “Ka tindi u sha kwagh u hanma imande, shin kwagh u a er or sha ityo shin shin gbem,+
55 shin imande i sha ikyondo+ shin i ken iyou,+
56 man akaa a muran man akembe a a te or iyol man abeen a a dugh or iyol je la,+
57 sha er una wase u fan shighe u kwagh a lu wang ga,+ man shighe u kwagh a lu wang yô. Ka tindi u sha kwagh u imande je la.”+
Ngeren mba shin kpe
^ Uikyaren utar-ken-pue mba efa yange ve kuma ulita 6.6. Nenge Ngeren u Seer u B14 la.
^ Logi môm yange a kuma ulita 0.31. Nenge Ngeren u Seer u B14 la.
^ Môm-ken-pue u efa yange a kuma ulita 2.2. Nenge Ngeren u Seer u B14 la.
^ Zwa Heberu, “isholibo i.”
^ Zwa Heberu, “isholibo i.”
