Levitiku 25:1-55
25 Yehova shi ôr kwagh a Mose sha uwo u Senai, a kaa ér:
2 “Lam a Mbaiserael kaa a ve wer, ‘Zum u ne za nyôr ken tar u m lu nan ne la yô,+ a gba u ne de tar la ua mem, ua kura iyange i memen i Yehova.+
3 Kaha iyiav mbi ken sule wou shi sôr ikyon i wain you anyom ataratar, sunda kwagh u u zough a mi ken ityev la.+
4 Kpa ken inyom i sha utaankaruhar la yô, de tar la u mem iyol, ka inyom i memen i Yehova. De lôôn iyiav ken ityev you shin sôron ikyon i ken sule wou u wain ga.
5 De sundan kwagh u a gbe menden iyol na ken tsa u yange u sunda iyiav ker la ga, shi atam a kon u wain wou u u ser u ga la kpa de sondo ga. Tar la u mem iyol ken inyom la jimin cii.
6 Nahan kpa, u fatyô u yan kwaghyan u a mende ken tar la iyol na, ken inyom i tar la u lu memen la; we kua ikpan you i nomso man ikpan you i ukase man or u u tee nan ijodo kua or u van a va u nan va tem her a we la kpaa, ne fatyô u yan,
7 shi uzendenya man inyamtoho i ken tar wou kpaa ia fatyô u yan. A fatyô u yan hanma kwagh u a mende ken tar la cii.
8 “‘U ôr anyom a memen ataankarahar, anyom ataankarahar kwa taankaruhar, nahan shighe u anyom a memen ataankarahar la cii una kohol a lu anyom 49.
9 Maa tôngo korough genger genger ken uwer u sha utaankaruhar ayange pue; sha Iyange i Nan Iwom la,+ tôngo nen korough kura i ungwa ken tar wen cii.
10 Tsegha nen inyom i sha 50 la, shi yôô nen hen mba hen tar la cii ner, ka shighe u pasen akaa shi hiden a akaa.+ I hingir ne inyom i Jubilii, hanma wen nana hide hen kwagh u nan shi hanma wen nana hide hen tsombor u nan.+
11 Inyom i sha 50 la i hingir ne Jubilii. De kera lôôn nen kwagh shin sundan nen kwagh u a hide a mende ken utsa mba yange i kaha iyiav ker, shin kohol nen atam a ikyon yen i wain i ne ser i ga la ga.+
12 Gadia ka inyom i Jubilii, i lu ne icighankwagh. Yaan nen kwagh u a mende ken tar la iyol na la tseegh.+
13 “‘Ken inyom i Jubilii la, hanmô wen nana hide hen kwagh u nan.+
14 Nea lu teen orgen kwagh shin nea lu yamen kwagh hen orgen kpa, de nyighen nen ayol a en ga.+
15 Aluer u ngu yamen kwagh hen or yô, fa anyom a a shi cii man inyom i Jubilii la, shi nana tee u sha ishe i anyom a a mase shin a kahan iyiav la.+
16 Aluer anyom shi her ngee yô, nana seer ishe i teen la, kpa aluer anyom shi her cuku tseegh yô, nana pande ishe i teen la, sha ci u nan ngu teen we ka sha iyenge i u va sunda iyiav her la.
17 Or môm ken a ven nana de nyighen orgen ga,+ cia Aôndo wou,+ gadia mo m ngu Yehova Aôndo wen.+
18 Aluer ne mba dondon akaawan a am shi ne mba kuran atindiakaa a am yô, ne tema ken tar la bem bem.+
19 Tar la ua ume iyiav+ ne ya a kuma ne, ne tema ken u bem bem.+
20 “‘Kpa alaghga ne pine ner: “Aluer ka u se kaha iyiav shin se sunda iyiav ga yô, ka nyi se ya ken inyom i sha utaankaruhar laa?”+
21 Ishima i de ze ne iyol ga, me haa ne iveren yam ken inyom i sha ataratar la, nahan tar la ua ume iyiav a kuma u yan anyom atar.+
22 Maa ken inyom i sha anigheni la ne lôô iyiav, shi ne za hemen u yan mbi tsev mbira her zan zan inyom i sha utaankarunyiin la. Ne ya iyiav mbi tsev zan zan mbi hev mbia kar vian.
23 “‘De teen nen inya la i saan ga,+ sha ci u tar la ka u wam.+ Gadia hen a mo yô, ne mba ior mba van a va man ushirmbaiorov.+
24 Na nen ior ian i hiden paan inya ve ken tar u ne tema ker la cii.
25 “‘Aluer anngôu gba ican je hingir u una tee inya na yô, or u paan u nan hembe lun anmgbian u nan u ikyua ikyua la, nana hide a yam kwagh u anmgbian u nan a tee la.+
26 Aluer or ngu a or u paan ga, kpa nan iyol i nan, nan va hingir u lun a kwagh ave man ka u nana fatyô u hiden paan yô,
27 nana gba kwar inyar sha anyom a a kar hii shighe u yange nan tee inya shon la, nahan nana hide or u yange nan tee nan i la a kwagh u a shi la. Maa nana hide hen inya i nan.+
28 “‘Kpa aluer nan zua a kwagh u hiden paan i sha ikyev i or u nan yam la ga yô, kwagh u nan tee la una lu sha ikyev i or la zan zan inyom i Jubilii la,+ maa ken inyom i Jubilii la una hide a hingir kwagh u nan, nahan nana hide hen inya i nan.+
29 “‘Aluer or tee ya ken gar u i we un igyar yô, hii shighe u yange nan tee ya shon la je, nana lu a ian i paan un zan zan inyom a hide a zua; nana lu a ian i hiden paan ya la+ zan zan inyom jimin.
30 Kpa aluer nan fatyô u hiden paan ga zan zan inyom jimin bee yô, ya u a lu ken gar u i we un igyar la una hingir u or u nan yam la gbem, sha ikyov i nan cii. Ken inyom i Jubilii kpa nana hide a mi ga.
31 Nahan kpa, uya mba ken agar a i we a ugir ga yô, ve lu inja er ka utsa nahan. A fatyô u paan ve hanma shighe cii, shi i hide a ve ken inyom i Jubilii.
32 “‘Kpa uya mba Mbalevi mba ve lu ken agar a ve yô,+ Mbalevi vea lu a ian i hiden paan ve hanma shighe cii.
33 Aluer Mbalevi fatyô u hiden yamen ya ve ga kpa, a hide ve a ya u ve tee ken gar ve la ken inyom i Jubilii,+ sha ci u uya mba Mbalevi mba ve lu ken agar a ve la, ka kwar ve ken Mbaiserael je.+
34 Shi ve de teen inya i ilev yan toho her,+ i i lu ken akôngo a agar a ve la ga, sha ci u ka kwagh ve gbem je.
35 “‘Aluer anngôu u nan lu ikyua ikyua a we nan gba ican je nan kera fatyô u nengen sha iyol i nan ga yô, wase nan+ er a lu or u van a va shin u nan va tem her a we kpa ma u wase nan nahan,+ sha er nana lu uma her a we imôngo yô.
36 De ye mtsera shin keren liba sha anngôu ga,+ sha er una lu uma vea we her yô, cian Aôndo wou.+
37 De ne un injô wer u zua a mtsera ker ga,+ shi de ne un kwaghyan wou sha u zuan a mtsera ga.
38 Mo m ngu Yehova Aôndo wen, m due a ven ken tar u Igipiti+ mer me va na ne tar u Kaanan, sha u tesen mer m ngu Aôndo wen.+
39 “‘Aluer anmgbian wou u a lu ikyua ikyua a we gba ican je a va tee iyol na u yam un yô,+ de kighir un wer a er tom u kpan ga.+
40 Eren a na er ka or u i tee nan ijodo+ shin or u nan va tem hen a we nahan. Nana er u tom zan zan inyom i Jubilii.
41 Maa nana mough hen a we a ônov mba nan, nana hide hen tsombor u nan. Nana hide a yem hen inya i uter mba nan.+
42 Sha ci u mba ikpan yam i m due a i ken tar u Igipiti kera yô,+ ve de teen ayol a ve er ka i tee kpan nahan ga.
43 De eren nan ican ga,+ cian Aôndo wou.+
44 I lu ken akuraior a a kase ne la zua nen a ikpan yen i nomso man i ukase ye, ne fatyô u yamen kpan wen u nomso shin u kwase ken a.
45 Shi ka ken ônov mba ior mba ve ve a va, ve tem her a ven la+ ne yamen ikpan yen ye, ka ken a ve man ken icombor i ve tser hen tar wen la; vea hingir kwagh wen.
46 Ne fatyô u geman ve vea hingir dyako u ônov enev shighe u ne va kera lu ga la, vea lu ikpan ve gbem. Vea fatyô u shiren ne, kpa anmgbianev enev mba ve lu Mbaiserael a ven imôngo la yô, de eren nen ve ican ga.+
47 “‘Kpa aluer shiror shin or u van a va u nan tem her a we la nan hingir ornyar, man anmgbian wou u a tem her atô wen la gema gba ican je a tee iyol na, shiror shin or u van a va u a tem her atô wou la yam un, shin or u hen tsombor u shiror la nan yam un yô,
48 ian i paan un er a tee iyol na kera la ia za hemen u lun her. Anmgbian na nana fatyô u yamen un hiden a mi,+
49 shin anmgbian u ter na gayô wan u anmgbian u ter na nana fatyô u hiden yamen un. Shi or u hen tsombor na u nan lu ikyua ikyua a na cii nana fatyô u hiden yamen un.
“‘Gayô aluer un iyol na kpa a va hingir ornyar yô, una fatyô u hiden paan iyol na.+
50 A ôr shighe u a kar hen atô, hii ken inyom i yange tee iyol na zan zan va nyôr ken inyom i Jubilii la,+ vea or u yange yam un la, nahan inyaregh ki yange tee iyol na la ki zua sha anyom la.+ I gba kwar sha ayange a yange er tom hen shighe shon la, sha ishe i or u i tee nan ijodo yô.+
51 Aluer anyom shi her kpishi yô, a kimbi ishe i paan iyol na la sha ingyegh ki anyom a a shi her la.
52 Man aluer anyom kera shi vese ga u a nyôr ken inyom i Jubilii yô, a gba kwar nahan a kimbi ishe i paan iyol na la sha ingyegh ki anyom a a shi her la.
53 A za hemen u eren nan tom anyom anyom er ka or u i tee nan ijodo nahan; shi de den wer nana er un ican ga.+
54 Nahan kpa, aluer a fatyô u paan iyol na sha igbenda ne nahan ga yô, a due ken inyom i Jubilii la a yem kwagh na,+ un man ônov nav.
55 “‘Gadia Mbaiserael ka ikpan yam je. Ka ikpan yam i m due a i ken tar u Igipiti kera yô.+ Ka mo Yehova Aôndo wen.
