Levitiku 26:1-46
26 “‘De eren nen mbaaôndo mba gbilinigh ga,+ shi de timin nen eev mbu gban a gba,+ shin ityôgh ki akombough ki iwenegh sha ci wen ga. Shi de timin nen eev mbu sha iwen+ ken tar wen ner ne gure sha ishigh ki mbu ga;+ gadia ka mo Yehova m lu Aôndo wen ye.
2 Kuran nen ayange a memen a am, shi tese nen icivir sha* icighanjiir wam. Ka mo Yehova.
3 “‘Aluer ne za hemen u dondon akaawan a am shi ne mba kuran atindi a am shi eren sha mi yô,+
4 me nôôn ne ura sha ashighe a u vough vough,+ tar la ua ume iyiav kpishi,+ shi ikyon yen i ken ityev kpaa ia ume atam.
5 Ne shoghor iyiav zan zan shighe u zôron atam a wain a kar kuman, shi ne zôr atam a wain zan zan shighe u lôôn iyiav a kar kuman; ne yaan kwaghyan wen a kuman ne, shi ne tema bem bem ken tar wen.+
6 Me na bem a gba ken tar wen,+ ne yav, or u tan ne mciem iyol nana lu ga;+ me bee a inyamkyume ken tar la kera, shi sanker u utya kpaa una kar ken tar wen ga.
7 Ne zenda mbahyomov enev ijime, vea kpe ku u sanker sha ishigh yenegh.
8 Iorov enev utaan vea zenda iorov 100, iorov enev 100 di vea zenda iorov 10,000. Mbahyomov enev vea kpe ku u sanker sha ishigh yenegh.+
9 “‘Me er a ven a doo,* me na ne mar kpishi ne seer ngeen,+ shi me kure ikyuryan yam a ven.+
10 Er ne lu yan iyiav mbi tsev mbi ken inyom i i kar la her la je, a va gba u ne due a mbi tsev mbira kera sha er ne va a mbi hev yô.
11 Me ver tabernakel wam her atô wen,+ me venda ne ga.
12 Me zende hen atô wen, me lu Aôndo wen,+ ne di ne gema ne lu ior av.+
13 Ka mo Yehova Aôndo wen u yange m due a ven ken tar u Igipiti kera sha u ne kera lu ikpan ve ga la. M kever igbur i sha mon wen kera, shi m er ne zende sha jighilii jighilii.
14 “‘Kpa aluer ne kegh ato a mo ga, shi ne kura atindi ne cii ga,+
15 shi ne venda akaawan a am,+ shi atindiakaa a am ndôhôr ne ishima je ne venda u kuran atindi a am cii, ne vihi ikyuryan yam yô,+
16 ka kwagh u mo di me er a ven je ne: Me tsaha ne sha ican man angev mbu houghbar man fiva. Mbia pir ne ashe shi a vôr ne iyol. Ne lôô ivor yen kpa a saa ne dang, sha ci u mbahyomov enev vea kar a ya.+
17 Me an ne vanger, nahan mbahyomov enev vea hemba ne;+ mba ve ker ne ihyom la vea ndyar ne angahar,+ ne lu yevese man or a lu zendan ne ga.+
18 “‘Aluer nahan je kpa ne kegh ato a mo ga yô, me tsaha ne a hemba nahan kwa taankaruhar, sha ci u asorabo a en.
19 Me bee a ityough ki taver man ihyagh yen la, me na usha enev vea lu er ka iyôgh nahan,*+ man tar wen kpaa ua lu er ka togula nahan.*
20 Ne vihi agee a en gbilin gbilin, sha ci u inya yen ia ume iyiav ga,+ shi ikyon i ken tar wen kpaa ia ume atam ga.
21 “‘Kpa aluer ne za hemen u hendan a mo, ne venda u keghen ato a mo yô, me seer tsahan ne a hemba nahan kwa taankaruhar, sha ci u asorabo a en.
22 Me tindi inyamkyume i ken toho her a ven,+ ia wua ne ônov+ shi ia tim uzendenya enev, ia pande ne iyenge, igbenda yen kpa ia kpe.+
23 “‘Aluer akaa ne cii er ne kpa ne venda mkôôm wam,+ ne za hemen u hendan kwagh a mo her yô,
24 mo kpa me hendan a ven, me tsaha ne kwa taankaruhar sha ci u asorabo a en.
25 Me tindi sanker u oron iyev sha a ven, sha ci u ne vihi ikyuryan la.+ Aluer ne kohol ken agar a en yô, me tindi angev hen atô wen,+ shi a na ne sha ikyev i orhyom wen.+
26 Zum u me kera na ne beredi* ga la,*+ kasev pue vea kaa beredi hen ijiir i kaan beredi i môm, shi vea kar myohom ma beredi wen, vea na ne kpuaa kpuaa;+ nahan ne ya kpa a kuma ne ga.+
27 “‘Aluer nahan kpa shi ne venda u keghen ato a mo, ne sendegh ne mba hendan kwagh a mo her yô,
28 me seer hendan a ven tsung je,+ shi mo iyol yam me tsaha ne kwa taankaruhar sha asorabo a en.
29 Nahan ne ya inyam i ônov enev mba nomso, shi ne ya inyam i ônov enev mba kasev kpaa.+
30 Me tim ajiir a en a taven a akombo,+ shi me vihi atse a en a nanden kwaghhumandoon sha mi, me haa akom a en sha akom a ieev yenev mbi ndôhôrshima,*+ me gema ijime a ven sha ci u ne ndôhôr mo ishima.+
31 Me gema akaa a en me na sha ikyev i sanker,+ me gema ajiir a en a i tsegh a la kpaa aa hingir atse, me lumun ihyuma i dedoo* i iniav yenev la ga.
32 Me gema tar wen ua hingir ice,+ mbahyomov enev mba ve tem ker la vea kenger u a kpiligh ve iyol.+
33 Me sambe ne ken akuraior,+ me tsua sanker a ven.+ Tar wen ua hingir ice,+ agar a en kpaa aa yôhôr kera.
34 “‘Sha ayange a tar la ua lu ice la cii, ua mem sha ayange a memen a u, zum u ne lu ken tar u mbahyomov enev la. Hen shighe la tar la ua mem iyol,* sha ci u ua lu memen sha ayange a u fatyô u memen ga la.+
35 Sha ayange a ua lu ice la cii ua zua a mmem, sha ci u yange u fatyô u memen sha ayange a memen a en hen shighe u ne lu ken u la ga.
36 “‘Mba ve war la kpaa,+ me er asema a ve aa ure kpishi ken tar u mbahyomov vev; vea yevese iov i kwa u ahumbe a lu purugh a mi yô, vea yevese er or ka nan yevese sanker nahan, vea gba, man or a lu zendan ve ga.+
37 Vea wever sha mbagenev vea gbidye inya er ka mba ve lu yevese sanker nahan, man or kpa nana lu zendan ve ga. Ne fatyô u hendan a mbahyomov enev ga.+
38 Ne tim ken akuraior,+ tar u mbahyomov enev ua mena ne.
39 A de ne mbagenev mba ne shi her la ne hôô ken tar u mbahyomov enev+ sha ci u kwaghbo wen. Mimi je vea hôô kera sha ci u asorabo a uter vev.+
40 Nahan vea pase kwaghbo ve ayol a ve,+ kua kwaghbo man akaa a uter vev yange ve er shami ga la, vea lumun ibo er yange ve er kwagh sha mimi ga sha u hendan a mo,+
41 nahan mo kpa m hendan a ve+ sha u van a ve ken tar u mbahyomov vev yô.+
“‘Alaghga shighe la ishima ve i cighir la ia hide ijime,+ vea zua a injar i kwagh u ve er shami ga la.
42 Hen zum la me umbur ikyuryan yam a Yakob,+ man ikyuryan yam a Isaka,+ me umbur ikyur i m ye a Aberaham la,+ shi me umbur tar la kpaa.
43 Shighe u ve undu tar shon la, u lu memen sha ayange a memen a u,+ zum u ve undu u u hingir ice, ve lu za kimbin injar i isholibo ve la. Sha ci u ve venda atindiakaa a am, shi akaawan a am ndôhôr ve ishima.+
44 Nahan cii kpa, er vea lu ken tar u mbahyomov vev la, me hungur a ve gbindigh gbindigh ga,+ shi me ta ve kera je me va hingir u timin ve kera vindi vindi ga, sha ci u kwagh la una vihi ikyuryan yam+ a ve, gadia mo Yehova m ngu Aôndo ve.
45 Sha ci ve yô, me umbur ikyuryan yam a uter vev+ mba yange m due a ve ken tar u Igipiti sha ashe a akuraior,+ sha u me tese mer m ngu Aôndo ve la. Ka mo Yehova.’”
46 Ka atindiakaa man ajiraôron kua atindi a Yehova ver hen atô na a Mbaiserael, sha Uwo u Senai sha ikyev i Mose je ne.+
Ngeren mba shin kpe
^ Shin “ihindi i ta ne iyol a.” Zwa Heberu, “cia nen.”
^ Zwa Heberu, “me gema her a ven.”
^ Inja na yô, ura a kera sen sha ga.
^ Inja na yô, tar ua uma sha ci u ura a kera nôô ga.
^ Zwa Heberu, “me kever igbough yen la.” A̱ shi nan kpa mba ôron kwagh u igbough i yange i koson beredi a mi yô.
^ Shin “kwaghyan.”
^ Alaghga ishember i ken zwa Heberu i i gem nahan ne zua vea ishember i “ambi a uile,” u tesen ér kwagh la ndôhôr ishima.
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “ua kura iyange i memen.”
