Levitiku 17:1-16
17 Yehova shi kaa a Mose ér:
2 “Ôr kwagh a Aron man ônov nav kua Mbaiserael cii, kaa a ve wer, ‘Ka kwagh u Yehova a kaa je ne:
3 “‘“Aluer ma or ken ya u Iserael sôngo bua shin iyôngo shin ivo ken afo shin ken akôngoafoogh,
4 nan kera va a mi hen hunda u tenti u kohol ker la, sha u va nan Yehova nagh a mi, sha ishigh ki tabernakel u Yehova ga yô, or la nan kpela iboawambe. Nan haa awambe inya, nahan i wua nan kpee je.*
5 I lu nahan sha er Mbaiserael vea vaan a iniav mbi ve nanden ken akôngo hegen la hen Yehova yô, vea vaan a mi hen pristi hen hunda u tenti u kohol ker la. Ve va a iniav mbin, i lu iniav mbi bem mbi i ne Yehova yô.+
6 Pristi una mishi awambe la sha atse a Yehova a nan nagh, hen hunda u tenti u kohol ker la, shi una nande ahôm la aa lu Yehova ihyuma i dedoo.*+
7 Nahan ve de kera ne azôv a a lu er ka ivo,+ a ve lu eren idya a a* la iniav ga.+ Kwagh ne a lu ne tindi u tsan gbem, sha ikyov ikyov.”’
8 “Kaa ve wer, ‘Hanma or u hen ya u Iserael shin or u van a va u nan tem hen atô wen, u nan ne nagh ku nanden shin ma nagh,
9 man nan kera ve a mi hen hunda u tenti u kohol ker la sha u nana va na Yehova ga yô, i wua nan kpee je.*+
10 “‘Aluer ma or u hen ya u Iserael shin or u van a va u nan tem her atô wen, nan ya awambe a ma kwagh yô,+ me vihi ishima a or u nan ye awambe la, shi me wua nan.*
11 Gadia ka ken awambe uma u inyam a lu ye,+ man mo m na a sha atse+ sha ci wen, sha u a lu iwom sha ci u uuma enev, gadia awambe nga ne iwom+ sha uma u a lu ken a la.
12 Ka nahan man m kaa a Mbaiserael mer: “Or wen môm kpa nana de ye awambe ga, shi ma or u van a va u nan tem hen atô wen kpaa+ nana de ye awambe ga” ye.+
13 “‘Aluer ma or ken Mbaiserael shin or u van a va u nan tem her atô wen, nan ngu yaren ikyôr man nan za kôr inyamtoho shin inyon i i ye yô, nana haa awambe a i hen inya+ nana cir inya sha mi.
14 Gadia uma u hanma inja inyam cii yô ka awambe a i, sha ci u uma ngu ken a. Ka nahan ve m lu ôron Mbaiserael kwagh ne ye, mer: “De ye nen awambe a ma inyam ga, sha ci u uma u hanma inyam yô, ka awambe a i. Or u nan ye a cii yô, i wua nan.”*+
15 Aluer or ya kwagh u kpen, shin ka kwagh u inyamkyume i woo yô, a lu marnya shin a lu or u van a va kpaa,+ nana kire akondo a nan shi nana ôô iyol, nana kera lu wang ga zan zan aikighe;+ ka hen zum la nana hingir wang ye.
16 Kpa aluer nan kire a ga shi nan ôô iyol ga yô, nana due iyolishô sha isholibo i nan la ga.’”+
Ngeren mba shin kpe
^ Zwa Heberu, “i bee a nan hen ior mba nan kera.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Zwa Heberu, “ve de kera za ne ivo i ve lu eren idya a i.”
^ Zwa Heberu, “i bee a nan hen ior mba nan kera.”
^ Zwa Heberu, “me bee a nan hen ior mba nan kera.”
^ Zwa Heberu, “i bee a nan kera.”
