Levitiku 20:1-27
20 Yehova shi za hemen u ôron kwagh a Mose, a kaa ér:
2 “Kaa Mbaiserael wer, ‘Aluer ma or ken Iserael, shin or u van a va u nan tem ken Iserael, nan tôô wan u nan nan na Moleki yô, i wua nan kpee je.+ Ior mba ken tar la ve ta nan awen nana kpe.
3 Mo iyol yam me vihi ishima a or la, me wua nan,* sha ci u nan tee wan u nan nan ne Moleki, nan hôngor a icighanjiir wam+ shi nan laha icighanti wam kpaa yô.
4 Kpa aluer ior mba hen tar la gema ashe kera sha kwagh u or la nan er, sha u tôôn wan u nan nan Moleki la, ve wua nan ga yô,+
5 mo iyol yam me vihi ishima a or la kua tsombor u nan.+ Me wua nan,* kua ior mba ve kohol nan u eren idya a Moleki la cii.
6 “‘Or u nan undum nan ze hen mba lamen a ujijingi mba mbakpenev,+ man hen mbatsenganpasenakaa,+ sha er nana za civir mbaaôndo mbagen yô,* ishima a vihim a imbaor la, me wua nan.*+
7 “‘Gba u ne tsegha ayol a en, ne hingir uicighanmbaiorov,+ sha ci u mo Yehova m ngu Aôndo wen.
8 Shi gba u ne waan atindi a am ikyo, ne kuran a.+ Ka mo Yehova m lu tseghan ne ye.+
9 “‘Aluer or tuhwa ter u nan shin ngô u nan yô, i wua nan kpee je.+ Er nan toho ter u nan shin ngô u nan yô, awambe a nan nga sha ityough ki nan.
10 “‘Aluer or er idya a kwase u orgen yô, i wua or u nan er idya a kwase u orgen la kpee, i de bundu ga. Or u nan er idya la kua kwase u a er idya la cii, i wua ve.+
11 Or u nan yav a kwase u ter u nan yô, nan tsen kunya* u ter u nan ken igbar.+ Ve mba uhar mbara cii i wua ve kpee je. Awambe a ve aa lu sha ityouv vev.
12 Aluer or yav a kwase u wan u nan yô, ve uhar cii i wua ve kpee je. Ve per tindi u sha gbaaôndo. Awambe a ve aa lu sha ityouv vev.+
13 “‘Aluer nomsoor yav a nomsoor ugen er i yaven a kwase nahan yô,* ve uhar cii ve er kwagh u ndôhôrshima.+ I wua ve kpee je. Awambe a ve aa lu sha ityouv vev.
14 “‘Aluer or yav a kwase kua ngô u kwase la yô, ka ieren i ndôhôrshima.*+ I nande nan kua ve cii,+ sha er ieren i ndôhôrshima ia za hemen hen atô wen ga yô.
15 “‘Aluer or yav a zendenya yô, i wua nan kpee je, wua nen zendenya la kpaa.+
16 Aluer kwase za ér zendenya a yav a nan yô,+ wua kwase la kua zendenya la. I wua ve kpee je. Awambe a ve aa lu sha ityouv vev.
17 “‘Aluer or yav a anmgbian u nan u kwase yô, kwase shon nana lu wan u ter u nan shin nana lu wan u ngô u nan kpaa, er nan nenge idyelegh na, un kpa a nenge idyelegh u nan yô, ka kwagh u ihyeenegh.+ I wua ve* sha ashe a ônov mba ior vev. Nan hee ingyôr i nan ken igbar.* Nana due iyolishô sha kwaghbo u nan la ga.
18 “‘Aluer or yav a kwase shighe u nan lu duen won la, nan bugh idyelegh na yô, nan tsen imborawambe i kwase la ken igbar, kwase la kpa tsen imborawambe na ken igbar.+ Nahan ve cii i wua ve.*
19 “‘De yaven a anmgbian u ngôu u kwase shin anmgbian u teru u kwase ga. Aluer kwagh ngu nahan yô, a lu u tsenen kunya u anmgbian ken igbar.+ Nahan ne cii ne due iyolishô sha kwaghbo wen la ga.
20 Aluer or yav a kwase u anmgbian u ter u nan yô, nan tsen kunya* u anmgbian u ter u nan ken igbar.+ Ve de dugh iyolishô sha kwaghbo u ve er la ga. I wua ve, ve de maren ga.
21 Aluer or ngohol anmgbian u nan kwase yô, ka kwagh u ndôhôrshima.+ Nan tsen kunya* u anmgbian u nan ken igbar. Ve de veren tse ga.
22 “‘Dondon nen akaawan a am man atindiakaa a am cii,+ eren nen sha a,+ sha er tar u m lu zan a ven mer za tema nen ker la ua sua ne kera ga yô.+
23 De dondon nen aeren a akuraior a m lu zendan a sha ishigh yenegh kera la ga;+ gadia a er akaa ne cii, nahan a ndôhôr mo ishima.+
24 Ka nahan man m lu ôron ne kwagh ne ye, mer: “Ne ngohol tar ve la, me na ne u ua hingir kwagh wen, tar u u mgbough a atumba man iyough la.+ Ka mo Yehova Aôndo wen u m pav ne m ver kposo a akuraior agen la.”+
25 Pav nen inyam i i lu wang la kposo a i i lu wang ga la, man inyon i i lu wang ga a i i lu wang la kpaa;+ de hôngor nen ayol a en sha ma inyam shin inyon shin ma kwagh u a kpelan a kpela inya, u m pav un m ver kposo mer a lu ne kwagh u hôngorough la ga.+
26 Lum nen uicighanmbaiorov, sha ci u mo Yehova m ngu icighan,+ man m ngu paven ne a akuraior agen veren kposo sha er ne hingir kwagh wam yô.+
27 “‘Nomsoor shin kwase u nan lamen a jijingi u orkpen, shin nan tsenganpasen akaa* cii yô, i wua nan kpee je.+ Ior ve ta ve awen ve kpe. Awambe a ve nga sha ityouv vev.’”
Ngeren mba shin kpe
^ Zwa Heberu, “me bee a nan hen ior mba nan kera.”
^ Zwa Heberu, “me bee a nan hen ior mba nan kera.”
^ Shin “sha er nana za er idya i ken jijingi a ve yô.”
^ Zwa Heberu, “me bee a nan hen ior mba nan kera.”
^ Zwa Heberu, “idyelegh.”
^ Shin “aluer nomsoor yav a nomsoor yô.”
^ Shin “ieren i kunya; ieren i hôngorough.”
^ Zwa Heberu, “i bee a ve hen ior vev kera.”
^ Zwa Heberu, “nan bugh idyelegh u ingyôr i nan.”
^ Zwa Heberu, “i bee a ve hen ior vev kera.”
^ Zwa Heberu, “idyelegh.”
^ Zwa Heberu, “idyelegh.”
^ Shin “nan lu a jijingi u tsenganpasen akaa.”
