Levitiku 23:1-44
-
Ayange a i tsegh a yô, kua uicighanmbamkohol (1-44)
23 Yehova za hemen u lamen a Mose, a kaa ér:
2 “Lam a Mbaiserael kaa a ve wer, ‘Uiniongo mba Yehova mba sha ashighe ashighe+ mba ne yôôn la,+ ka uicighanmbamkohol. Ka uiniongo av mba sha ashighe ashighe je ne:
3 “‘I̱ eren tom ayange ataratar, kpa iyange i sha utaankaruhar la yô, ka iyange i memen hanma tom cii,+ ka icighanmkohol. De eren nen ma tom ga. Ka iyange i memen i Yehova hen ajiir a ne tem cii.+
4 “‘Ka uiniongo mba Yehova mba sha ashighe ashighe, uicighanmbamkohol mba ne yôôn sha ashighe a i ver ve la je ne:
5 Ken uwer u hiihii ayange 14+ aikighe yô, ka Paseka+ u Yehova.
6 “‘Uwer ne ua luun ayange 15 yô, ka Iniongo i Beredi u I We Kwa sha Mi Ga i Yehova.+ Ne ya beredi u i we kwa sha mi ga yô, ayange ataankarahar.+
7 Sha iyange i hiihii la ne er icighanmkohol.+ De eren nen tom u taver ga.
8 Kpa naan nen Yehova nagh ku sha usu ayange ataankarahar. Sha iyange i sha utaankaruhar la yô, ka icighanmkohol. De eren nen ma tom u taver ga.’”
9 Yehova za hemen u lamen a Mose, a kaa ér:
10 “Lam a Mbaiserael kaa a ve wer, ‘Zum u ne za nyôr ken tar u m lu nan ne la man ne sunda iyiav mbi ker yô, tsua nen ile ken iyiav mbi ne hii sundan la+ va nen a mi hen pristi.+
11 Pristi a̱ cia ile la keen man keen sha ishigh ki Yehova, sha er a lumun ne yô. A̱ cia ile shon sha iyange i i dondo sha Iyange i Memen la.
12 Sha iyange i ne cia ile la, na nen Yehova nagh ku nanden sha gumiyôngo u lun a ihyogholough iyol ga, u a hembe inyom ga yô.
13 Nagh ku sha samuyia ku a na a mi imôngo yô, i lu mwem ma kengese ma nungwan mkurem sha mi, ma ma kom uhar-ken-pue u ikyaren i efa* yô, ka nagh ku i ne Yehova sha usu yô, ka ihyuma i dedoo.* Nagh ku kwaghman ku a na a mi imôngo yô, i lu wain u a kom môm-ken-unyiin u ikyaren i hin* yô.
14 De yaan nen ma beredi shin samuyia u kaan shin samuyia u he ga zan zan saa iyange ne, saa ne vande nan Aôndo wen nagh ve. Ka tindi u tsan gbem u ne eren un sha ikyov ikyov ape ne tem cii yô.
15 “‘Ôr nen ayange a memen ataankarahar, hii sha iyange i i dondo sha Iyange i Memen la je, ka iyange i ne na ile u nagh ku cian la je la.+ Ukasua utaankaruhar mbara ve iv vough.
16 Ôr nen ayange 50+ zan zan i va ar sha iyange i dondon sha Iyange i Memen i sha utaankaruhar la, maa ne va na Yehova nagh ku sha samuyia u he.+
17 Tôô nen ikpenberedi ihiar sha ajiir a en va na nen nagh ku cian a mi. I kaa ve sha mwem ma kengese ma kuman uhar-ken-pue u ikyaren i efa.* I wa kwa sha mi i kaa,+ ve lu iyiagh ki i hii sundan sha u va nan Yehova yô.+
18 Va na nen agumaiyôngo ahar a a lu a ihyogholough iyol ga, a a kom inyom i môm yô, man gumbua môm kua anomaiyôngo ahar, a ikpenberedi la imôngo.+ Ve lu nagh ku nanden ku i ne Yehova, a iniav vev mbi sha samuyia man iniav vev mbi kwaghman imôngo yô. Ka nagh ku i ne Yehova sha usu sha ci u ihyuma i dedoo* yô.
19 Na nen nagh ku isholibo sha anivo+ u a lu inyom i môm yô, man nagh ku bem sha anomaiyôngo ahar a a lu inyom i môm i môm yô.+
20 Pristi una tôô anomaiyôngo a ahar la kua ikpenberedi i i kaa sha iyiav mbi i hii sundan la, una cia keen man keen, a lu nagh ku cian sha ishigh ki Yehova. Vea lu icighankwagh u Yehova sha ci u pristi.+
21 Sha iyange ne, ne yôô+ icighanmkohol sha ci wen. De eren nen ma tom u taver ga. Ka tindi u tsan gbem, u ne kuran un sha ikyov ikyov sha ajiir a ne tem cii yô.
22 “‘Zum u ne sundan iyiav mbi ken tar wen yô, de sundan nen akpi a ishule yen cica cii ga, shi de yaren nen twar hen sunda wen ga.+ Undu nen sha ci u icanor*+ kua or u van a va.+ Ka mo Yehova Aôndo wen.’”
23 Yehova za hemen u lamen a Mose, a kaa ér:
24 “Kaa Mbaiserael wer, ‘Ken uwer u sha utaankaruhar iyange i môm yô, i lu iyange i memen hanma tom cii, ka iyange i tôngon busa umbur ior i,+ ka icighanmkohol.
25 De eren nen tom u taver ga, shi na nen Yehova nagh ku sha usu.’”
26 Yehova shi ôr kwagh a Mose kaa ér:
27 “Nahan kpa, uwer u sha utaankaruhar ne ua luun ayange pue yô, a lu Iyange i Nan Iwom.+ Er nen icighanmkohol shi er nen ayol a en ican,*+ shi na nen Yehova nagh ku sha usu.
28 Gba u ne er ma tom môm sha iyange ne ga, sha ci u ka iyange i nan iwom i a na iwom+ sha ci wen, sha ishigh ki Yehova Aôndo wen yô.
29 Anti or u nana er iyol i nan ican* sha iyange ne ga yô, i wua nan.*+
30 Or u nan er ma tom sha iyange ne yô, me tim nan hen ior mba nan kera.
31 De eren nen ma tom môm ga. Ka tindi u tsan gbem u ne kuran sha ikyov ikyov sha ajiir a ne lu cii yô.
32 Ka iyange i ne mem hanma tom cii yô, shi ne er ayol a en ican+ ken uwer la sha iyange i sha utaankarunyiin la, aikighe. Kuran nen iyange i memen la, hii hen aikighe la zan zan kpernan aikighe.”
33 Yehova za hemen u lamen a Mose, a kaa ér:
34 “Kaa Mbaiserael wer, ‘Uwer u sha utaankaruhar shon ne ayange 15 yô, ka Iniongo i Atumbe.* A er i zan zan ayange ataankarahar sha ci u Yehova.+
35 A er icighanmkohol sha iyange i hiihii la, de eren nen ma tom u taver ga.
36 Ne na Yehova nagh ku sha usu ayange ataankarahar. Sha iyange i sha anigheni la yô ne er icighanmkohol,+ ne na Yehova nagh ku sha usu. Ka icighanmkohol je. De eren nen ma tom u taver ga.
37 “‘Ka uiniongo mba Yehova mba sha ashighe ashighe+ mba ne yôôn ner ka uicighanmbamkohol,+ sha u nan Yehova nagh ku sha usu je ne: naan nen nagh ku nanden+ man nagh ku sha samuyia+ a nagh kura imôngo, kua iniav mbi kwaghman+ er i gbe u a naan hanma iyange la.
38 Ka akaa a ne naan u seer sha kwagh u i ne sha ayange a memen+ a Yehova man uiyua enev+ man iniav yenev mbi iceghzwa+ man iniav mbi sha asema a en+ mbi i lu u ne naan Yehova la je ne.
39 Nahan kpa ken uwer u sha utaankaruhar ayange 15, sha shighe u ne kur a iyiav mbi ken tar wen kera la yô, er nen Yehova iniongo ayange ataankarahar.+ Sha iyange i hiihii la, mem nen hanma tom cii. Sha iyange i sha anigheni la kpa mem nen hanma tom cii.+
40 Sha iyange i hiihii la, ne tôô atam a ikyon i hemban doon man andaravilegh+ man agbaa a ikyon i ngeen a ikya man a ikyon i menden shin pev,* ne ember+ sha ishigh ki Yehova Aôndo wen ayange ataankarahar.+
41 Er nen iniongo ne ayange ataankarahar ken inyom, i lu iniongo i Yehova.+ Eren nen i ken uwer u sha utaankaruhar, ka tindi u tsan gbem sha ikyov yen cii.
42 Ayange ataankarahar cii tsaan nen ken atumbe.+ Mbaiserael cii ve tsaan ken atumbe,
43 sha er ikyov yen i ken hemen cii ia fa+ er yange m kaa a Mbaiserael mer ve tsaan ken atumbe, shighe u m lu duen a ve ken tar u Igipiti kera la yô.+ Ka mo Yehova Aôndo wen.’”
44 Nahan Mose ôr Mbaiserael kwagh u uiniongo mba Yehova mba sha ashighe ashighe mbara.
Ngeren mba shin kpe
^ Uhar-ken-pue u efa yange a kuma ulita 4.4. Nenge Ngeren u Seer u B14 la.
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Hin môm yange a kuma ulita 3.67. Nenge Ngeren u Seer u B14 la.
^ Uhar-ken-pue u efa yange a kuma ulita 4.4. Nenge Ngeren u Seer u B14 la.
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “or u kwagh a tser nan la.”
^ Shin “er nen uuma enev ican.” I nenge ér, ishember i “or eren iyol i nan ican” la ngi hemban ôron kwagh u or nyumen iyol i nan akaa kpishi, kua u hôron kwaghyan kpaa.
^ Shin a fatyô u kaan ér, “u nana hôr kwaghyan.”
^ Zwa Heberu, “i bee a nan hen ior mba nan kera.”
^ Shin “Ajiir a Teman sha Anshighe Kpuaa.”
^ Shin “shin uwagh.”
