Levitiku 10:1-20
10 Shighe kar yô, Nadabi man Abihu,+ ônov mba Aron, tôô agbande a usu, hanmô ve haa usu shin gbande, penda insensi+ sha mi. Maa ve gba nanden usu u i na zwa ga yô sha ishigh ki Yehova,+ lu kwagh u na zwa ér ve er ga yô.
2 Tsô usu due hen Yehova va hia ve,+ nahan ve kpe sha ishigh ki Yehova.+
3 Mose maa kaa a Aron ér: “Ka kwagh u Yehova a kaa je ne, ér, ‘Gba u me lu icighan hen mba ve lu ikyua a mo la,+ shi me lu a icivir sha ashe a ior cii.’” Kpa Aron huan ving.
4 Nahan Mose yila Mishael man Elisafan, ônov mba Ushiel,+ anngô u ter u Aron, a kaa a ve ér: “Va nen va tôô nen anmgbianev enev sha ishigh ki icighanjiir ne kera, due za ver nen ken akôngoafoogh.”
5 Nahan ve kporom ve va tôô ior mbara a akondo ve iyol, ve due a ve ve za ver ken akôngoafoogh vough er Mose ôr ve nahan.
6 Mose maa kaa a Aron kua Eleasar man Itamar, ônov nav mbagen mbara ér: “De deen nen ityough yenegh ki luun sha mi nzegha nzegha ga, shi de anden nen akondo a en kpaa ga,+ sha er ne kpe ga shi ishima a vihi Aôndo a nongoior ne cii ga yô. Anmgbianev enev mba ve lu ya u Iserael cii la vea vaa ku u ior mba Yehova a woo sha usu ne.
7 De dugh nen hen hunda u tenti u kohol ker la ga, sha er ne kpe ga yô, gadia icighanmkure u Yehova ngu sha a ven.”+ Nahan ve er sha mkaanem ma Mose mara vough.
8 Yehova maa kaa a Aron ér:
9 “We man ônov ou cii, de me nen wain shin msôrom magen zum u ne lu nyôron ken tenti u kohol ker la ga,+ sha er ne kpe ga yô. Ka tindi u tsan gbem u i lu u ne kuran sha ikyov ikyov yô.
10 Ka sha u mkposo a lu hen atô u icighankwagh a kwagh u hôngorough, man kwagh u wang ga a kwagh u a lu u wang la yô,+
11 man sha u tesen Mbaiserael atindi a Yehova a ôr a ve sha ikyev i Mose ér ve kuran la cii.”+
12 Mose maa lam a Aron kua Eleasar man Itamar, ônov mba Aron mba ve mase shin her mbara, a kaa a ve ér: “Tôô nen kwagh u a shi her ken nagh ku sha samuyia ku i ne Yehova sha usu la, ya nen ikyua a atse a nan nagh la, ka beredi u i we kwa sha mi ga yô,+ gadia ka icighankwagh tsung je.+
13 Ya un nen ken icighanjiir,+ sha ci u ka kwar wen man kwar u ônov enev, ken iniav mbi i ne Yehova sha usu la, gadia ka kwagh u i kaam je la.
14 Shi ya nen gugu u nagh ku cian kura, man namegh ku icuwan ci la+ hen ijiir i wang, we vea ônov ou mba nomso man mba kasev cii,+ sha ci u ka akaa a i ne u a lu kwar wou man kwar u ônov ou ken iniav mbi bem mbi Mbaiserael ve ne la je la.
15 Vea va a namegh ku icuwan ci la man gugu u nagh ku cian la, a ahôm a i ne iniav mbi sha usu a mi la imôngo, sha er a cia nagh ku cian kura keen man keen sha ishigh ki Yehova yô. A lu kwar wou man kwar u ônov ou gbem,+ vough er Yehova a kaa nahan.”
16 Tsô Mose tôv sha kwagh u ivo i nagh ku isholibo la vie vie,+ nahan a mase kaven ér i nande i kera. Nahan ishima vihi un a Eleasar man Itamar, ônov mba Aron mba ve mase shin her la tsung, a kaa ér:
17 “Ne ya inyam i nagh ku isholibo la ken icighanjiir ga ner nyi?+ Gadia ka icighankwagh tsung, man a na ne sha er ne tôô ibo i nongoior ne cii, shi ne na iwom sha ci ve sha ishigh ki Yehova gaa?
18 Nenge! I nyôr a awambe a i ken icighanjiir kpaa ga.+ Ma ne ye inyam ne ken icighanjiir vough er i kaam nahan.”
19 Aron gema kaa a Mose ér: “Nenge! Nyian ne ior va a nagh vegh ku isholibo man nagh vegh ku nanden sha ishigh ki Yehova,+ kpa akaa ne gema erem; mea ye nagh ku isholibo la nyian nahan ma i doo Yehova kpa?”
20 Mose ongo kwagh la yô, kuma un.
