Levitiku 18:1-30
18 Yehova shi ôr kwagh a Mose kaa ér:
2 “Ôr kwagh a Mbaiserael kaa a ve wer, ‘Mo m ngu Yehova Aôndo wen.+
3 De eren nen kwagh er i eren ken tar u Igipiti ape yange ne lu la nahan ga, shi de eren nen kwagh er i eren ken tar u Kaanan ape m lu zan a ven la nahan kpaa ga.+ De dondon nen aeren a ve ga.
4 Eren nen sha atindiakaa a am shi kuran nen atindi a am, dondon nen a.+ Ka mo Yehova Aôndo wen.
5 Gba u ne waan akaaôron a am ikyo shi ne kuran atindiakaa a am; hanma or u nan eren nahan yô nana lu uma sha a.+ Ka mo Yehova.
6 “‘Or wen môm nana de mgbôghom a anmgbian u nan ér nana yav a nan ga.*+ Ka mo Yehova.
7 De yaven a teru ga, shi de yaven a ngôu kpaa ga. Ka ngôu, nahan de yaven a na ga.
8 “‘De yaven a kwase u teru ga.+ U eren nahan la ka u tsenen kunya u teru ken igbar.*
9 “‘De yaven a anmgbian wou u kwase ga, a lu wan u teru u kwase shin a lu wan u ngôu u kwase kpa de yaven a na ga; a mar un hen ya môm vea we shin a mar un ape gen kpaa.+
10 “‘De yaven a wankwase u wan wou u nomso a mar shin wan wou u kwase a mar ga, sha ci u idyelegh ve ka idyelegh wou je.
11 “‘De yaven a wan u kwase, u kwase u teru a mar ga, ka wan u teru je la, sha ci u ka anmgbian wou u kwase.
12 “‘De yaven a anmgbian u teru u kwase ga. Ka anmgbian u teru u sha ngô je.+
13 “‘De yaven a anmgbian u ngôu u kwase ga, sha ci u ka anmgbian u ngôu u sha ngô je.
14 “‘De tsenen kunya u anmgbian u teru ken igbar* sha u yaven a kwase na ga. Kwase la ka anngôu je.+
15 “‘De yaven a kwase u wan wou ga.+ Ka kwase u wan wou je, nahan de yaven a na ga.
16 “‘De yaven a kwase u anmgbian wou ga,+ sha ci u u eren nahan la ka u tsenen kunya u anmgbian wou ken igbar je la.*
17 “‘De yaven a kwase kua wan u nan u kwase ga.+ De tôôn wan u kwase, u wan u nan u nomso shin wan u nan u kwase a mar, sha u u yav a nan ga. Ka ior mba nan mba ikyua ikyua je; kwagh ne ka ieren i ndôhôr ishima.*
18 “‘De vôson wonou seer sha anngô na u kwase wer a va hingir wuhe na,+ nahan yaven a na shighe u anngô na u kwase a lu uma her la ga.
19 “‘De mgbôghom a kwase shighe u nan dugh won, nan kera lu wang ga la wer u yav a nan ga.+
20 “‘De yaven a kwase u orgen* hôngor iyol you ga.+
21 “‘De lumun wer i kôr wan wou môm i na Moleki* ga.+ De hôngor a iti i Aôndo wou sha imba gbenda la ga.+ Ka mo Yehova.
22 “‘De yaven a nomsoor er i yaven a kwase nahan ga.*+ Ka ieren i ndôhôr ishima tsung.
23 “‘Nomsoor nana de yaven a zendenya sha er nana hôngor iyol i nan ga; shi kwase kpa nana de ze ér zendenya a yav a nan ga.+ Kwagh ne ka u peren tindi u sha gbaaôndo.
24 “‘De hôngor nen ayol a en sha ma kwagh u ken akaa ne ga, gadia ka sha akaa ne cii man akuraior a m lu zendan a sha ishigh yenegh kera la a hôngor ayol a a ye.+
25 Sha nahan yô, tar la hôngor, nahan me tsaha u sha ci u aferakaa a u la, tar la ua sua ior mba ve tem ken u la kera.+
26 Kpa ne yô, waan nen akaaôron a am man atindiakaa a am ikyo.+ A lu marnya shin or u van a va u nan tem her atô wen kpaa, nana de eren ma kwagh ken akaa a ndôhôrshima ne ga.+
27 Gadia mba yange ve lu ken tar la cii man ne la ve eren akaa a ndôhôrshima ne cii,+ nahan hegen tar la hôngor.
28 Nahan tar la ua kera sua ne kera ér ne hôngor u, er u lu va suan akuraior a a vande lun cii man ne la nahan ga.
29 Aluer ma or er ma kwagh ken akaa a hôngorough ne yô, a̱ lu nyityô or je kpaa, i̱ wua nan kpee je.*
30 Ver nen ishima sha kwagh u m we ne ne, sha u palegh akaa a hôngorough a yange ve vande eren cii man mve wen la,+ sha er ne hôngor ayol a en sha a ga yô. Ka mo Yehova Aôndo wen.’”
Ngeren mba shin kpe
^ Zwa Heberu, “sha u bughun idyelegh u nan ga.” Sha ajiir agen a dondon a ishember ne i dugh la kpa kape i lu je la.
^ Zwa Heberu, “ka idyelegh u teru je.”
^ Zwa Heberu, “de bughun idyelegh u anmgbian u teru.”
^ Zwa Heberu, “sha ci u ka idyelegh u anmgbian wou.”
^ Shin “ieren i kunya; ieren i hôngorough.”
^ Shin “or u wan ndor a we; huror wou.”
^ Shin “i tsegha un sha ci u Moleki; i na Moleki nagh a mi.”
^ Shin “nomsoor nana de yaven a nomsoor ugen ga.”
^ Zwa Heberu, “i bee a nan hen ior mba nan kera.”
