Levitiku 6:1-30
6 Yehova shi kaa a Mose ér:
2 “Aluer or er isholibo, nan er kwagh a Yehova sha mimi ga,+ sha u tsughun or u wan ndor a nan sha kwagh u i we nan sha ikyev,+ shin kwagh u i ver nan a mi, shin nan ii or u wan ndor a nan gayô nan nyighe nan,
3 shin nan zua a kwagh u a saa kpa nan er aie sha mi, shi aluer nan bum sha aie sha imba isholibo la nahan yô,+ ka kwagh u nana er je ne:
4 Aluer nan er isholibo man nan ngu a ibo yô, nana hide a kwagh u nan ii shin nan ngohol sha apera, shin u nan ngohol sha anyighe, shin kwagh u yange i wa nan sha ikyev shin kwagh u yange saa kpa nan zua a mi la,
5 shin nyityôkwagh i yange nan bum sha aie sha mi cii, nana hide a mi cica cii,+ shi nana seer môm-ken-utaan u ishe i kwagh la sha mi. Nana na or u kwagh sha iyange i i zough nan a ibo la.
6 Shi nana kôr nomiyôngo ken iyôngo i nan u lun a ihyogholough iyol ga, u a kom sha ishe i i lumun a mi la, nana va a mi hen pristi, sha u nan Yehova nagh ku iboogh.+
7 Pristi la una na iwom sha ci u nan sha ishigh ki Yehova, nahan a de nan nyityôkwagh i nan er ve nan ye ibo la cii.”+
8 Yehova shi ôr kwagh a Mose kaa ér:
9 “Kaa a Aron man ônov nav wer, ‘Ka tindi u sha kwagh u nagh ku nanden je ne:+ Nagh ku nanden ku lu sha usu sha atse la zan zan sev mbu kar aven, shi usu u yeghen sha atse la hanma shighe cii.
10 Pristi a hua ikyondo na i eren tom a mi la,+ shi a hua tiôn wondo+ ken atô,* maa a dugh mtwem*+ ma usu u hie nagh ku nanden sha atse ve ma gbe la, a gema ma a ver hen kpeatseegh.
11 Maa a er akondo la sha+ a hua agen, a tôô mtwem mara a due a mi ken akôngoafoogh, a za haa hen ijiir i wang.+
12 Usu u za hemen u yeghen sha atse la, u de pirin ga. Hanma pepe yô, pristi a wa ikyon sha mi,+ maa a tar nagh ku nanden sha mi vough vough, shi a nande ahôm a iniav mbi bem sha mi.+
13 Usu u yeghen sha atse la hanma shighe cii. U de pirin ga.
14 “‘Gema ka tindi u sha kwagh u nagh ku samuyia je ne:+ Ônov mba Aron vea va na ku sha ishigh ki Yehova hen ishigh ki atse a nan nagh la.
15 Or ve môm nana kese mwem ma kengese ma nagh ku sha samuyia la ken ikyevwe poo a mkurem sha mi, kua ferankinsensi u sha nagh ku sha samuyia la cii, nana nande sha atse i lu Yehova ihyuma i dedoo,* sha er a lu un nagh ku umbur yô.*+
16 Aron vea ônov nav ve ya kwagh u a mase shin la.+ I yaan un ken icighanjiir, i lu beredi u i we kwa sha mi ga yô. Ve yaan un hen tembe u tenti u kohol ker la.+
17 I de kaan un a kwagh u i nongo kwa sha mi ga.+ M na mer i lu kwar ve, ken iniav mbi i nem sha usu la.+ Ka icighankwagh tsung,+ er nagh ku isholibo man nagh ku iboogh nahan.
18 Hanma wan u Aron u nomso cii nana yaan ku.+ Ka kwar u vea zuan a mi gbem ken iniav mbi i ne Yehova sha usu yô, sha ikyov yen cii.+ Hanma kwagh u a bende a mbi yô una hingir icighankwagh.’”
19 Yehova shi kaa a Mose ér:
20 “Ka nagh ku Aron vea ônov nav vea na Yehova sha iyange i a shighe un mkurem la je ne:+ mwem ma kengese ma kuman môm-ken-pue u efa,*+ i lu nagh ku sha samuyia ku i ne hanma shighe la,+ i pande ma vough, i na magen pepe, i va na magen aikighe.
21 I kaa sha mkure shin icenge.+ Nungwa un sha mkure tsembelee, va a mi avur avur, i lu kwagh u kaan u ken nagh ku sha samuyia, u i ne Yehova sha ci u ihyuma i dedoo* yô.
22 Wan na u i shigh nan mkurem nan hingir pristi sha ityough nagh la,+ nana na ku. Ka tindi u a kuran gbem yô: Ka nagh ku jimin ku a nanden sha ci u Yehova yô.
23 Hanma nagh ku sha samuyia ku pristi a ne cii, i lu ku jimin. I de ye ku ga.”
24 Yehova shi ôr kwagh a Mose kaa ér:
25 “Kaa Aron vea ônov nav wer, ‘Ka tindi u sha kwagh u nagh ku isholibo je ne:+ I sôngon nagh ku isholibo sha ishigh ki Yehova, hen ijiir i i sôngon nagh ku nanden la.+ Ka icighankwagh tsung.
26 Pristi u a ne ku sha ci u isholibo la una ya ku.+ I yaan ku hen icighanjiir, hen tembe u tenti u kohol ker la.+
27 “‘Hanma kwagh u a bende a inyam i nagh kura cii yô una hingir icighankwagh, shi zum u or nan mishi awambe a ku sha ikyondo i nan yô, kire kwagh u awambe a mishi sha mi la ken icighanjiir.
28 Aluer ka shin tsua u inyaagh i jiidi ku yô i hembe tsua la, kpa aluer ka shin tsua u togula yô, i kember tsua shon shi i kire un sha mnger.
29 “‘Hanma nomsoor ken upristi yô nana ya ku.+ Ka icighankwagh tsung.+
30 Nahan kpa, nagh ku isholibo ku i pande awambe a ku i nyer a mi ken tenti u kohol ker, sha u za nan iwom ken icighanjiir la cii yô, i de ye ku ga.+ I nande ku sha usu.
Ngeren mba shin kpe
^ Shin “mtwem ma lun a ahôm.” Ka mtwem ma ahôm a nagh a haa sha mi je la.
^ Shin “a hua ikyondo i ken atô.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “sha er a lu anivur u a til sha ityough ki nagh kura jimin cii yô.”
^ Môm-ken-pue u efa yange a kuma ulita 2.2. Nenge Ngeren u Seer u B14 la.
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
