Levitiku 4:1-35
-
Nagh ku isholibo (1-35)
4 Yehova shi kaa a Mose ér:
2 “Kaa Mbaiserael wer, ‘Aluer or er isholibo sha lan,+ sha u eren ma kwagh u Yehova a kaa ér i de eren ga yô, ka kwagh u una lu je ne:
3 “‘Aluer pristi u i shigh un mkurem+ er isholibo,+ haa ior ibo iyol yô, a̱ va na Yehova nagh ku isholibo sha gumbua u a lu a ihyogholough iyol ga yô, sha ci u isholibo i a er la.+
4 Una va a bua la sha ishigh ki Yehova hen hunda u tenti u kohol ker la,+ una penda bua la uwegh sha ityo, maa una sôngo bua la hen ishigh ki Yehova.+
5 Maa pristi u i shigh un mkurem la+ a pande awambe a nombua la, a nyôr a mi ken tenti u kohol ker la;
6 pristi la a za ihyôwe shin awambe la,+ a mishi awambe la kwa taankaruhar+ sha ishigh ki Yehova, hen ishigh ki ikyondo i yisan i ken icighanjiir la.
7 Pristi la shi a er awambe la, a kôô sha akor a atse a nanden insensi u human doon,+ a a lu sha ishigh ki Yehova ken tenti u kohol ker la; a gema awambe a nombua la a a mase shin la cii a haa hen kpe u atse a nanden nagh,+ a a lu hen hunda u tenti u kohol ker la.
8 “‘Maa a dugh ahôm a nombua u nagh ku isholibo la cii, kua ahôm a a cir sha mya man ahôm a a kase myam la,
9 man ahi a ahar kua ahôm a a cir sha a, a a lu ikyua a iwenge la. Shi a dugh ishwalegh ki mtema a ahi la imôngo.+
10 I lu kwaghmôm a kwagh u ka i dugh sha nombua u nagh ku bem la.+ Pristi a nande akaa ne sha atse a nanden nagh la.
11 “‘Kpa ikyôvor ki nombua la kua inyam na man ityough nagh man akusu a na man myam nam man ambi a na+—
12 hanma kwagh ugen u nombua la u a mase shin cii, a̱ kaa i due a mi ken akôngoafoogh hen ijiir i wang, ape i haan mtwem* la. A wa usu sha ikyon a nande un.+ I nande un ape i haan mtwem la.
13 “‘Aluer nongo u Iserael cii er isholibo sha lan haa ibo iyol,+ kpa mkohol u nongoior la gema fa ér ve er kwagh u Yehova a vende ér i de eren ga la ga,+
14 man isholibo shon va hingir u duen ken igbar yô, mkohol la cii a va a gumbua sha ci u nagh ku isholibo, a va a mi hen hunda u tenti u kohol ker la.
15 Mbatamen mba nongoior la ve penda ave sha ityough ki nombua la sha ishigh ki Yehova, maa i sôngo nombua la sha ishigh ki Yehova.
16 “‘Maa pristi u i shigh un mkurem la a pande awambe a nombua la, a nyôr a mi ken tenti u kohol ker.
17 Pristi la a za ihyôwe shin awambe la, a mishi awambe la kwa taankaruhar sha ishigh ki Yehova, hen ishigh ki ikyondo i yisan la.+
18 Maa a er awambe la a kôô sha akor a atse a nan nagh+ a a lu sha ishigh ki Yehova, ken tenti u kohol ker la. A gema awambe a nombua la a a mase shin la cii, a haa hen kpe u atse a nanden nagh, a a lu hen hunda u tenti u kohol ker la.+
19 A dugh ahôm a na cii a nande a sha atse.+
20 A er a nombua ne vough er a er a nombua ugen u i ne nagh ku isholibo a mi la nahan. Kape a er a ngun kpaa la, pristi a na iwom sha ci ve,+ nahan a de ve isholibo ve.
21 A ôr i tôô nombua la i due a mi ken akôngoafoogh a za nande un, vough er a nande nombua u hiihii la nahan.+ Ka nagh ku isholibo sha ci u mkohol la.+
22 “‘Zum u ortaregh+ nan per ma tindi sha lan, sha u eren ma kwagh u Yehova Aôndo u nan a vende ér i de eren ga la, man nan hee ibo iyol,
23 shin zum u nan va kav ér nan er isholibo, nan per tindi yô, nana va na nagh sha kpev* u a lu a ihyogholough iyol ga yô.
24 Nana penda kpev la uwegh sha ityo, maa nana sôngo un hen ape i sôngon nagh ku nanden sha ishigh ki Yehova la.+ Ka nagh ku isholibo.
25 Pristi a er awambe a nagh ku isholibo la sha ihyôwe na, a kôô sha akor+ a atse a nanden nagh la, a gema awambe a a shi la cii a haa hen kpe u atse a nanden nagh la.+
26 A nande ahôm a na cii sha atse la, er ka ahôm a nagh ku bem la nahan.+ Pristi la a na iwom sha ci u nan, sha isholibo i nan la, nahan a de nan isholibo la.
27 “‘Aluer ma orgen hen tar la nan er isholibo sha lan, sha u eren ma kwagh u Yehova a kaa ér i de eren ga,+
28 shin aluer nan va kav er nan er isholibo yô, nana va a tuleivo u a lu a ihyogholough iyol ga yô, nana va na nagh sha ci u isholibo i nan er la.
29 Nana penda nagh ku isholibo kura uwegh sha ityo, maa nana sôngo nagh ku isholibo kura hen ijiir i i sôngon nagh ku nanden la.+
30 Pristi a er awambe la sha ihyôwe, a kôô sha akor a atse a nanden nagh la, a gema awambe a a mase shin la cii a haa hen kpe u atse la.+
31 A̱ dugh ahôm a na cii,+ er ka i dugh ahôm a nagh ku bem nahan,+ nahan pristi a nande ahôm la sha atse, i lu Yehova ihyuma i dedoo;* nahan pristi una na iwom sha ci u nan, maa a de nan isholibo i nan.
32 “‘Kpa aluer nan ngu nan nagh ku isholibo sha waniyôngo yô, nana va a tuleiyôngo u a lu a ihyogholough iyol ga yô.
33 Nana penda nagh ku isholibo kura uwegh sha ityo, maa nana sôngo nagh ku isholibo kura hen ijiir i i sôngon nagh ku nanden la.+
34 Pristi a er awambe a nagh ku isholibo kura sha ihyôwe, a kôô sha akor a atse a nanden nagh la,+ a gema awambe a a mase shin la cii a haa hen kpe u atse la.
35 A dugh ahôm a na cii, er ka i dugh ahôm a gumiyôngo u nagh ku bem la nahan, pristi a penda a sha atse, sha nagh ku i ne Yehova sha usu la a nande;+ nahan pristi una na iwom sha ci u nan, sha isholibo i nan er la, maa a de nan i.+
