Levitiku 1:1-17
-
Nagh ku nanden (1-17)
1 Tsô Yehova yila Mose, a ôr kwagh a na ken tenti u kohol ker la+ a kaa ér:
2 “Lam a Mbaiserael* kaa a ve wer, ‘Aluer or u ken a ven nan ngu van a nagh ku va nan Yehova ken ilev mbi nan yô, nana tsua nagh kura ken ibua i nan shin iyôngo i nan, gayô ivo i nan.+
3 “‘Aluer nan tsua nagh ku nanden kura ka ken ibua i nan yô, nana va a mi i lu nom u a lu a ihyogholough iyol ga yô,+ nana na a ishima i nan+ sha ishigh ki Yehova, hen hunda u tenti u kohol ker la.
4 Nana penda uwegh sha ityough ki nagh ku nanden kura, nahan a lumun ku sha ci u nan, ku a hingir iwom sha ci u nan.
5 “‘Maa i̱ sôngo gumbua la sha ishigh ki Yehova. Upristi, ônov mba Aron,+ ve̱ va a awambe la ve va mishi ken ambusu a atse la cii,+ atse a a lu hen hunda u tenti u kohol ker la.
6 I̱ hua ikyôvor ki nagh ku nanden kura shi i̱ bur ku.+
7 Upristi, ônov mba Aron, ve keer usu sha atse la,+ shi ve wa ikyon sha usu la vough vough.
8 Upristi, ônov mba Aron, ve ver aci a nagh kura+ kua ityough man ahôm a a kase ahi la sha ikyon i i lu sha usu u sha atse la.
9 I̱ ôô myam man akusu sha mnger, maa pristi la a nande akaa ne cii sha atse, i lu nagh ku nanden, ka nagh ku nanden sha usu ku i ne Yehova sha ci u ihyuma i dedoo* yô.+
10 “‘Aluer ka ken ikyumuile nan lu tsuan nagh ku nanden kura,+ ken agumaiyôngo shin ivo yô, i lu nom u a lu a ihyogholough iyol ga yô.+
11 I̱ sôngo un sha ishigh ki Yehova, ken vegher u imbusutarimese i atse a nanden nagh la. Nahan upristi, ônov mba Aron, vea mishi awambe la ken ambusu a atse la cii.+
12 A bur un aci aci, pristi a ver a kua ityough man ahôm a a kase ahi la sha ikyon i sha usu u sha atse la.
13 Una ôô myam man akusu sha mnger, pristi una va a akaa ne cii una va nande sha atse la. Ka nagh ku nanden, nagh ku nanden sha usu ku i ne Yehova sha ci u ihyuma i dedoo* yô.
14 “‘Kpa aluer ka ken inyon nan lu tsuan nagh ku nanden kura nan Yehova yô, nana va a mbaatii gayô mkungum ma ma lu a tsa kpishi ga yô.+
15 Pristi a va a mi hen atse a nanden nagh la, a va sôngo un ikyughur hen ikyer shi a nande un sha atse la, kpa awambe a na yô i kam a haa hen kpeatseegh.
16 A dugh un kerker shi a tsor un ingyur a haa hen kpeatseegh, vegher u ityoughkitaregh hen ijiir i i haan mtwem* la.+
17 A̱ pav un ikyua a akper a na la, kpa a de paven avegher a ahar la a gbaan ken inya ga. Maa pristi una nande un sha atse la, sha ikyon i i lu sha usu la. Ka nagh ku nanden, nagh ku nanden sha usu ku i ne Yehova sha ci u ihyuma i dedoo* yô.
Ngeren mba shin kpe
^ Zwa Heberu, “ônov mba Iserael.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
^ Shin “mtwem ma lun a ahôm,” ka mtwem ma ahôm a nagh a haa sha mi je la.
^ Shin “ihyuma i doon; ihyuma i kundun iyol.” Zwa Heberu, “ihyuma i nan mmem.”
