Levitiku 27:1-34
27 Yehova shi ôr kwagh a Mose, a kaa ér:
2 “Lam a Mbaiserael, kaa a ve wer, ‘Aluer or tôndo zwa+ ér nana na Yehova inyaregh ki sha ityough ki or, sha u kuren iceghzwa i nan er a na sha or yô, ka ishe i nana na je ne:
3 inyaregh ki sha nomsoor u hii anyom 20 zan zan anyom 60 yô, a lu ushekel mba azurufa 50,* sha shekel u ken icighanjiir la.*
4 Kpa aluer ka kwase yô, inyaregh ki sha ityough ki nan kia lu ushekel 30.
5 Aluer ka mba hii anyom 5 zan zan anyom 20 yô, inyaregh ki sha nomsoor a lu ushekel 20, kwase di a lu ushekel 10.
6 Aluer ka mba hii uwer môm zan zan anyom ataan yô, inyaregh ki sha ityough ki nomsoor a lu ushekel mba azurufa utaan, kwase di a lu ushekel mba azurufa utar.
7 “‘Aluer ka mba ve lu anyom 60 shin i hembe nahan yô, inyaregh ki sha nomsoor a lu ushekel 15, kwase di a lu ushekel 10.
8 Kpa aluer nan gba ican gande u kimbin inyaregh kira yô,+ i va a or shon nana va tile sha ishigh ki pristi, pristi a ôr inyaregh ki sha ityough ki nan ki a kimbi la. Pristi a ôr inyaregh kira er or u nan er iceghzwa la nana fatyô u kimbin yô.+
9 “‘Aluer nan er iceghzwa ka sha ilegh ki a fatyô u nan Yehova yô, kwagh u i lu nan Yehova la cii una hingir icighankwagh.
10 Nana fatyô u van a zendenya ugen sha ityough ki ngula, shin musan u dedoo van a u bo, gayô musan u bo van a u dedoo ga. Kpa aluer nan tôô zendenya ugen nan musan sha ngula yô, u hiihii la man u i ve a mi u musan la cii vea hingir icighankwagh.
11 Aluer ka zendenya u wang ga+ u a fatyô u nan Yehova nagh a mi ga yô, nana va a mi a va tile sha ishigh ki pristi.
12 Pristi maa a ôr inyaregh ki i gbe u a na sha mi la, sha mlu u zendenya la.* Ishe i pristi a kaa cii, kape a lu la.
13 Kpa aluer nan va soo u hiden yamen un yô, nana kimbi ishe la, shi nana seer môm-ken-utaan sha mi.+
14 “‘Aluer or tsegha iyou i nan ér i hingir icighankwagh u nana na Yehova yô, pristi a ôr inyaregh ki a na la sha mlu u iyou shon.* Ka ishe i pristi a ôr la a na sha i ye.+
15 Kpa aluer or u nan tsegh iyou i nan la nan soo u hiden yamen i yô, nana kimbi inyaregh ki i gbe u a na sha i la shi nana seer môm-ken-utaan sha ki, maa ia hingir i nan.
16 “‘Aluer or tsegha vegher u sule u nan sha ci u Yehova yô, i ôr inyaregh ki a fatyô u kimbin sha u la, sha ingyegh ki samuyia u ua kuma u lôôn her la: barli u kuman ikyaren i homa môm,* a lu ushekel mba azurufa 50.
17 Aluer nan tsegha sule la ka sha inyom i Jubilii yô,+ kwagh a de gem sha inyaregh ki i gbe u a kimbi la ga.
18 Man aluer inyom i Jubilii kar kera cii man nan tsegh sule la yô, pristi a ôr nan ishe la sha anyom a a shi cii man inyom i Jubilii i i dondo la, nahan i pande kwagh ken inyaregh ki i gbe u a kimbi la.+
19 Kpa aluer or u nan tsegh sule la nan va soo u hiden yamen u yô, nana kimbi inyaregh ki i gbe u a na sha u la shi nana seer môm-ken-utaan sha mi, maa ua lu u nan her.
20 Man aluer nan hide nan yam sule la ga man i va tee orgen u yô, a kera fatyô u shi hiden yamen u ga.
21 Sule la ua kera va luun sha ikyev i or ga ken inyom i Jubilii yô, ua hingir icighankwagh u Yehova, a lu sule u i tsegh sha ci na yô. A hingir kwagh u upristi.+
22 “‘Aluer or tsegha sule sha ci u Yehova, man ka sule u nan yam a yam, ka dyako u nan ga yô,+
23 pristi una ôr nan inyaregh ki ki kom sha sule shon, hii shighe la zan zan ken inyom i Jubilii la, nahan nana kimbi inyaregh ki shon sha iyange la je.+ Ka icighankwagh u Yehova.
24 Ken inyom i Jubilii la, sule la ua hide hen or u yange nan yam u hen a nan la, or u i lu sule u nan kpôô kpôô la.+
25 “‘Hanma ishe yô i ôr i sha shekel u hen icighanjiir la. Shekel môm a lu ugera 20.*
26 “‘Nahan kpa, waniunda u zendenya yô, or môm nana de tseghan un sha ci u Aôndo ga. Sha ci u kera cii kpa i vande maren un ngu waniunda u nan Yehova.+ A lu bua shin iyôngo kpaa, vande kan kwagh u Yehova.+
27 Aluer ka u ken uzendenya mba lun wang ga, man nan paa un sha inyaregh ki i ôr la yô, nana seer môm-ken-utaan sha mi.+ Kpa aluer i hide i yam un ga yô, i tee un sha ishe i i vande ôron la.
28 “‘Kpa aluer or tsegha ma kwagh ken akaa a nan sha ci u Yehova igbekeke* yô, a fatyô u teen un shin hiden paan un ga, aluer ka orumace shin ka zendenya shin ka sule u nan kpaa. Hanma kwagh u i tsegh un yô, ka icighankwagh hen Yehova tsung.+
29 Or u i kur nan ijir ér gba u a wua nan, i pav nan i ver kposo sha u timin nan yô, a fatyô u paan nan ga.+ I wua nan kpee je.+
30 “‘Môm-ken-pue+ u ken tar la cii ka u Yehova, a lu ken iyiav mbi ken ityev shin ken atamaikyon kpaa, ka icighankwagh hen Yehova.
31 Aluer or va soo u hiden yamen môm-ken-pue u nan la yô, nana kimbi ishe la, shi nana seer môm-ken-utaan u ishe la sha mi.
32 Hide môm-ken-pue u ibua shin iyôngo yô, hanma kwagh u a kar hen gbough ku orkuranilev cii, ilegh ki sha pue kira kia hingir icighankwagh u Yehova.
33 Nana de yengen ki iyol sha u nana fa kia lu dedoo shin kia lu a ihyogholough iyol ga, shi nana de musan ki kpaa ga. Kpa aluer nan va ker ér nana musan ki yô, ki hiihii kira kua ki i ve a mi u musan la cii vea hingir icighankwagh.+ I de hiden i paan ga.’”
34 Ka atindi a Yehova na Mose sha ci u Mbaiserael sha Uwo u Senai je ne.+
Ngeren mba shin kpe
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Shin “sha icighan shekel la.”
^ Shin “una lu gbang gbang shin una lu a ihyogholough kpaa.”
^ Shin “aluer iyou shon i doo shin i doo ga kpaa.”
^ Homa môm yange a kuma ulita 220. Nenge Ngeren u Seer u B14 la.
^ Gera môm yange a yuhwa i kuma ugeram 0.57. Nenge Ngeren u Seer u B14 la.
^ Shin “sha u i tim un.”
