Levitiku 19:1-37
-
Atindi kposo kposo sha kwagh u mlu u wang (1-37)
19 Yehova shi ôr kwagh a Mose, a kaa ér:
2 “Ôr kwagh a nongoior u Iserael cii, kaa a ve wer, ‘Lu nen uicighanmbaiorov, sha ci u mo Yehova Aôndo wen m ngu icighan je.+
3 “‘Hanmô wen nana naan ngô u nan man ter u nan icivir,*+ shi kuran nen ayange a memen a am.+ Mo m ngu Yehova Aôndo wen.
4 De gem nen hen* mbaaôndo mba gbilinigh ga,+ shi de eren nen mbaaôndo mba keren a ker kpaa ga.+ Ka mo Yehova Aôndo wen.
5 “‘Aluer ne mba nan Yehova nagh ku bem yô,+ na nen ku sha gbenda u una lumun ne yô.+
6 I ya ku sha iyange i i ne ku la man kpernan, kpa kwagh u a neer her zan zan iyange i sha utar yô, i nande un sha usu.+
7 Nahan kpa, aluer i ya ku sha iyange i sha utar la yô, ka kwagh u ndôhôrshima u a lumun un ga yô.
8 Or u nan ye ku la nana due iyolishô sha isholibo i nan la ga, sha ci u nan hôngor a icighankwagh u Yehova, shi i wua or la kpee je.*
9 “‘Zum u ne lu sundan iyiav mbi ken tar wen yô, de sundan nen mbi sha akpi a ishule yen vindi vindi ga, shi de sangen nen kwagh u a shi u yaren twar ken kwagh u ne sondo la kpaa ga.+
10 Shi de yaren twar ken sule wou u wain, shin sangen atam a wain a a hee wue wue ken sule wou u wain la ga. Undu a sha ci u icanor*+ kua or u nan ve a va yô. Ka mo Yehova Aôndo wen.
11 “‘De iin nen ga,+ shi de eren nen aie ga,+ de eren nen kwagh a ayol a en sha icugh kpaa ga.
12 De bumun nen ken iti yam sha aie ga,+ sha er ne hôngor iti i Aôndo wen ga yô. Ka mo Yehova.
13 De nyighen or ga,+ shi de ngohol or kwagh sha apera kpaa ga.+ Injar i or u u tee nan ijodo la i de lun sha ikyev you zan zan sev mbu aven ga.+
14 “‘De toho orakondoato ga, shi de veren orapirashe kwagh u nôngon gbeev sha gbenda ga,+ cian Aôndo wou.+ Ka mo Yehova.
15 “‘De ôron nen ijir sha aie ga. De gbe zungwen icanor mhôônom wer ka icanor yum ga, shi ornyar kpaa de gbe eren a nan doo doo tsô ga.+ Ôron ior ijir sha mimi.
16 “‘De zenden anger hen ior ou ga.+ De keren u haan awambe a orgen inya ga.*+ Ka mo Yehova.
17 “‘De ker anngôu ihyom ken ishima you ga.+ Nôngo sha afatyô wou cii kôôm or u wan ndor a we,+ sha er u ya ibo a nan imôngo ga yô.
18 “‘De oron iyev+ shin waan kwagh ken ishima a ônov mba ior ou ga, or u wan ndor a we nana doo u ishima er iyol you nahan.+ Ka mo Yehova.
19 “‘Kuran nen atindiakaa a am: De deen uzendenya ou anza kposo kposo ahar a unden ga. De lôôn ivor ken sule wou anza kposo kposo ahar ga,+ shi de huan ikyondo i i nongo umou kposo kposo uhar i tum ga.+
20 “‘Aluer or yav a kwase, man kwase la ka kpankwase u i ver sha ci u orgen, kpa mba a paa un shin i pase un ér a yem ga yô, i tsaha ve. Nahan kpa i de wuan ve ga, sha ci u mba a pase kwase la a due ken kpan kera ga.
21 Or la nana va a nagh ku iboogh hen Yehova, hen hunda u tenti u kohol ker la, nana va a iyôngo i nagh ku iboogh.+
22 Pristi a gema iyôngo i nagh ku iboogh la a na iwom sha ci u nan sha ishigh ki Yehova, sha ci u isholibo i nan er la, nahan a de nan isholibo i nan.
23 “‘Zum u ne za nyer ken tar la man ne lee ma kon u i ye yô, atam a u a lu ne kwagh u wang ga u i tswer ne yô. I tswer ne a anyom atar. I de ye a ga.
24 Kpa ken inyom i sha unyiin la yô, atam a u cii a lu ne icighankwagh u va nan Yehova saan saan.+
25 A luun ken inyom i sha utaan la yô, ne fatyô u yan atam a u, u seer sha akaa agen a ne sunda la. Ka mo Yehova Aôndo wen.
26 “‘De ye nen ma kwagh u a lu a awambe sha mi ga.+
“‘De kpehen nen ishor ga, shi de eren nen ahir kpaa ga.+
27 “‘De tseven nen ityough ga, shi de hondon nen akpekpe a indyer yen ga.*+
28 “‘De tôndon nen avav iyol sha ci u or u nan kpe la ga,*+ shi de gberen nen akaa* iyol ga. Ka mo Yehova.
29 “‘De heen wan wou u kwase sha u geman un wer a hingir gbagakwase ga,+ sha er tar la ua er idya nahan ua iv a aeren a ndôhôrshima ga yô.+
30 “‘Kuran nen ayange a memen a am,+ shi tese nen icivir sha* icighanjiir wam. Ka mo Yehova.
31 “‘De ze nen hen mba lamen a ujijingi mba mbakpenev ga,+ shi de pinen nen mbatsenganpasenakaa kwagh kpaa ga,+ sha er vea na ne hôngor ayol a en ga yô, ka mo Yehova Aôndo wen.
32 “‘Mough tile sha, sha ishigh ki or u menden ivu,+ na orbeenyol icivir,+ cia Aôndo wou.+ Ka mo Yehova.
33 “‘Aluer or u van a va nan tema ken tar wen yô, de nzughul nen a nan ga.+
34 Or u van a va u nan tem twev hen a ven la nana lu ne er ka marnya nahan;+ nana doo u ishima er iyol you nahan, sha ci u ne kpa yange ne lu shir ken tar u Igipiti.+ Ka mo Yehova Aôndo wen.
35 “‘De tôôn nen uikyaren mba icughugh karen nen ilihen shin myohom shin mngee u kwagh a mi ga.+
36 Karen nen kwagh a myôm ma karen kwagh a mi ma vough, kua uikyaren mba vough mba karen myohom, man uikyaren mba vough mba karen ishamakaa,* kua uikyaren mba vough mba karen zarkwagh.*+ Mo m ngu Yehova Aôndo wen u yange m due a ven ken tar u Igipiti kera la.
37 Eren nen sha akaawan a am man atindiakaa a am cii, dondon nen a.+ Ka mo Yehova.’”
Ngeren mba shin kpe
^ Zwa Heberu, “nana cian ngô u nan man ter u nan.”
^ Shin “de dondon nen.”
^ Zwa Heberu, “i bee a or la hen ior mba nan kera.”
^ Shin “or u kwagh a tser nan.”
^ Shin a fatyô u kaan ér, “De til kenger a kenger zum u or tagher ishigh a kwagh u wuan nan la ga.”
^ Ikyav tese ér kwagh ne lu ieren i mbafanaôndoga.
^ Shin “uma u a kpe la ga.” Ishember i ken zwa Heberu i nephesh i i ter heen ne ngi ôron kwagh u orkpen.
^ Shin “tatuu.”
^ Shin “ihindi i ta ne iyol a.” Zwa Heberu, “cia nen.”
^ Zwa Heberu, “efa u vough.” Nenge Ngeren u Seer u B14 la.
^ Zwa Heberu, “hin u vough.” Nenge Ngeren u Seer u B14 la.
