Levitiku 5:1-19
5 “‘Aluer or er isholibo sha ci u nan ungwa mba yôôn ken igbar ér i va er shiada sha ma kwagh*+ man nan ngu orshiada, shin nan nenge shin nan fa kwagh sha mi kpa nan kera va ôr ga yô, nana due iyolishô sha isholibo i nan la ga.
2 “‘Shi zum u or nan bende a ma kwagh u wang ga, aluer ka inyam i ken toho i wang ga i i kpe, shin ka inyam i ken ya i wang ga i i kpe, shin ankaam mba umav mbagen* mba wang ga mba ve kpe yô,+ nan kera ngu wang ga shi nan ngu a ibo iyol, aluer nan fa nahan ga je kpaa.
3 Shin aluer or bende a hôngor u orumace sha lan+—nyityôkwagh i ia na nana hingir wang ga cii—man nan va fa yô, nan ngu a ibo iyol.
4 “‘Shi aluer or bum gagher ér nana er kwagh—aluer ka kwagh u dedoo shin ka u ifer, a lu nyi je kpaa—man nan fa ga, kpa nan va mase kaven ér nan bum gagher yô, nan ngu a ibo iyol.*+
5 “‘Aluer nan ngu a ibo sha ma kwagh ken akaa ne yô, nana pase isholibo+ i nan er la.
6 Shi nana va na Yehova nagh ku iboogh sha isholibo i nan er la,+ nana tsua ngô ken ilev mbi nan, i lu ngôiyôngo gayô tuleivo sha ci u isholibo i nan la. Maa pristi a na iwom sha ci u nan sha isholibo i nan la.
7 “‘Kpa aluer nan fatyô u van a iyôngo ga yô, nana va na Yehova nagh ku iboogh sha mbaatii uhar, shin sha mkungum ma kiriki mhar+ sha ci u isholibo la, môm sha ci u nagh ku isholibo, ugen la di sha ci u nagh ku nanden.+
8 Nana va a ve hen pristi, pristi di a hii nan u a lu sha ci u nagh ku isholibo la, a sôngo un ikyughur hen gôngor, kpa ityough ki de gbe ken inya ga.
9 A er awambe a nagh ku isholibo la, a mishi ken ambusuatseegh, kpa awambe a a mase shin la yô, a kam a a due a haa hen kpeatseegh.+ Ka nagh ku isholibo.
10 I gema ugen la di i na nagh ku nanden a mi er i vanden eren nahan;+ pristi a na iwom sha ci u nan sha isholibo i nan er la, nahan a de nan i.+
11 “‘Aluer nan fatyô u van a mbaatii uhar shin mkungum ma kiriki mhar ga yô, nana va a mwem ma kengese ma kuman môm-ken-pue u efa,*+ nana va na nagh ku isholibo sha isholibo i nan la. Nana de we mkurem shin ferankinsensi sha mi ga, sha ci u ka nagh ku isholibo.
12 Nana va a mi hen pristi, pristi una ongo ma ken ikyevwe poo, una nande sha atse, a nagh ku a ne Yehova sha usu la imôngo, a lu nagh ku umbur.* Ka nagh ku isholibo.
13 Pristi una na nagh ku iwom sha ci u nan sha isholibo i nan er la, nahan isholibo i nan er ken asorabo ne cii a de nan i.+ Nagh ku ku mase shin la cii ku a hingir kwagh u pristi,+ er nagh ku samuyia kpa i lu nahan.’”+
14 Yehova shi ôr kwagh a Mose kaa ér:
15 “Aluer or er kwagh sha mimi ga, nan er isholibo sha lan, sha u nzughul a uicighanmbaakaav mba Yehova yô,+ nana tsua nomiyôngo ken iyôngo i nan u a lu a ihyogholough iyol ga yô, nana va na Yehova nagh ku iboogh a mi;+ ishe na ken shekel* u azurufa i zua sha myohom ma shekel u ken icighanjiir la.*+
16 Nana kimbi kwagh sha isholibo i nan er nan nzughul a icighanjiir la, nana seer môm-ken-utaan sha mi.+ Nana va na pristi, sha er pristi la una na iwom sha ci u nan,+ sha nomiyôngo u nagh ku iboogh la, nahan a de nan isholibo i nan yô.+
17 “Aluer or er isholibo sha u eren ma kwagh ken akaa a Yehova a kaa ér i de eren ga la yô, aluer nan fa ga je kpa nana lu a ibo, nana due iyolishô sha isholibo i nan la ga.+
18 Nana kôr nomiyôngo ken iyôngo i nan u a lu a ihyogholough iyol ga yô, u a kom sha ishe i i lumun a mi la, nana va a mi hen pristi sha u va nan nagh ku iboogh,+ nahan pristi una na iwom sha ci u nan sha kwaghbo u nan er sha apera ga shi nan fe ga la, nahan a de nan isholibo i nan.
19 Ka nagh ku iboogh. Nan ngu a ibo sha ci u nan er Yehova isholibo.”
Ngeren mba shin kpe
^ Zwa Heberu, “nan ungwa imo i ifyan (mbum).” Alaghga kwaghyôôn ne ka sha kwagh u iferkwagh i or nan er, u i lu yôôn kaan ér, ifyan i kôr or u nan er iferkwagh la, shin or u nan nenge kpa nan va ôr ga la yô.
^ Ka akaa a purugh sha kwavaôndo man a sha tar man a shin mnger, a a zenden akum akum yô.
^ Alaghga inja i kwagh ne ér, nan kure iceghzwa i nan ga.
^ Môm-ken-pue u efa yange a kuma ulita 2.2. Nenge Ngeren u Seer u B14 la.
^ Shin “sha er a lu anivur u a til sha ityough ki nagh kura jimin cii yô.”
^ Shekel môm yange a yuhwa i kuma ugeram 11.4. Nenge Ngeren u Seer u B14 la.
^ Shin “icighan shekel.”
