Levitiku 15:1-33
-
Akaa a wang ga a a due or hen ilyeegh ki hen ikyum yô (1-33)
15 Yehova shi ôr kwagh a Mose man Aron, a kaa ér:
2 “Lam nen a Mbaiserael, kaa nen a ve ner, ‘Aluer kwagh due nomsoor ken ilyeegh ki hen ikyum* yô, kwagh u a dugh nan ken iyol la na nan kera ngu wang ga.+
3 Nan kera ngu wang ga sha ci u kwagh u a dugh nan ken iyol la. Aluer kwagh shon ngu duen her shin a kondo ian i ilyeegh ki nan kpaa, nan ngu wang ga.
4 “‘Gambe u or u kwagh a lu duen nan ken iyol la nan yav sha mi cii, una kera lu wang ga, shi ikyagh ki nan tem sha mi kpaa kia kera lu wang ga.
5 Or u nan bende a gambe u or la cii nana kire akondo a nan, shi nana ôô iyol, nana kera lu wang ga zan zan iyange ia kar been.+
6 Hanma or u nan tem sha ikyagh ki or u kwagh a lu duen nan ken iyol la nan tem sha mi cii yô, nana kire akondo a nan shi nana ôô iyol sha mnger, nana kera lu wang ga zan zan iyange ia kar been.
7 Or u nan bende a or u kwagh a lu duen nan ken iyol la cii nana kire akondo a nan shi nana ôô iyol, nana kera lu wang ga zan zan aikighe.
8 Aluer or u kwagh a lu duen nan ken iyol la nan ta or u lun wang azer iyol yô, or u nan lu wang la nana kire akondo a nan shi nana ôô iyol sha mnger, nana kera lu wang ga zan zan aikighe.
9 Shidi* u or u kwagh a lu duen nan ken iyol la nan tem sha mi cii, una kera lu wang ga.
10 Hanma or u nan bende a kwagh u nan tem sha mi yô, nana kera lu wang ga zan zan aikighe. Shi hanma or u nan tôô ikyagh ki shon kpaa, nana kire akondo a nan shi nana ôô iyol, nana kera lu wang ga zan zan aikighe.
11 Aluer or u kwagh a lu duen nan ken iyol la+ nan ôô ave ga man nan bende a orgen yô, or la nana kire akondo a nan shi nana ôô iyol, nana kera lu wang ga zan zan aikighe.
12 Ikyagh ki inyaagh ki or u kwagh a lu duen nan ken iyol la nan bende a mi cii, i hembe ki, man aluer ka ma ikyagh ki sha kon yô, i kire sha mnger.+
13 “‘Zum u kwagh u yange lu duen or la ken iyol la a va de, nan hingir wang yô, nana tôô ayange ataankarahar u wanger iyol i nan. Nana kire akondo a nan, shi nana ôô iyol sha mngerem ma ma lu kuan yô, nahan nana hingir wang.+
14 Sha iyange i sha anigheni la, nana kôr mbaatii uhar shin mkungum ma kiriki mhar,+ nana va sha ishigh ki Yehova hen hunda u tenti u kohol ker la, nana va na pristi.
15 Pristi una gema ve a na nagh a mi, u môm a lu nagh ku isholibo, ugen la di a lu nagh ku nanden; nahan pristi una na iwom sha ci u nan sha ishigh ki Yehova, sha ci u kwagh u a dugh nan ken iyol la.
16 “‘Aluer mnyandem ma jiren wan due nomsoor ken iyol yô, nana ôô iyol i nan cii sha mnger, nana kera lu wang ga zan zan aikighe.+
17 Nana kire ikyondo shin ikyôvor ki mnyandem mara ma lu sha mi cii sha mnger, kwagh la una kera lu wang ga zan zan aikighe.
18 “‘Zum u nomsoor nan yav a kwase man nan nyande yô, ve cii ve ôô iyol sha mnger, vea kera lu wang ga zan zan aikighe.+
19 “‘Aluer kwase nan due won yô, nana za hemen u lun wang ga zan zan ayange ataankarahar, sha ci u won u nan dugh la.+ Or u nan bende a nan cii nana kera lu wang ga zan zan aikighe.+
20 Hanma kwagh u nan yav sha mi shighe u nan dugh won nan kera lu wang ga la cii, una kera lu wang ga, shi hanma kwagh u nan tem sha mi kpaa una kera lu wang ga.+
21 Hanma or u nan bende a gambe u nan cii yô, nana kire akondo a nan, shi nana ôô iyol, nana kera lu wang ga zan zan iyange a kar been.
22 Hanma or u nan bende a kwagh u nan tem sha mi cii, nana kire akondo a nan shi nana ôô iyol, nana kera lu wang ga zan zan iyange a kar been.
23 Aluer nan tema sha gambe shin sha ikyagh kigen man or bende a mi yô, or u nan bende a mi la nana kera lu wang ga zan zan iyange a kar been.+
24 Aluer or yav a kwase la, man won u kwase la nan dugh ve nan kera lu wang ga la bende a or la yô,+ or la nana kera lu wang ga zan zan ayange ataankarahar, shi gambe u nan yav sha mi cii kpaa una kera lu wang ga.
25 “‘Aluer awambe due kwase ayange kpishi,+ man ka hen shighe u nan u duen won la ga, shin awambe due nan ken iyol shighe gôgônan hemba ayange a nan dugh won la yô,+ nana kera lu wang ga ken ayange a awambe a lu duen nan ken iyol la cii, er ka nan lu wang ga shighe u nan dugh won nahan.
26 Hanma gambe u nan yav sha mi ken ayange a awambe a lu duen nan ken iyol la cii, una lu er gambe u nan ka a lu shighe u nan dugh won nan kera lu wang ga la nahan,+ shi hanma ikyagh ki nan tem sha mi cii kia kera lu wang ga, vough er mlu u nan u wang ga u shighe u nan dugh won la nahan.
27 Or u nan bende a akaa ne cii nana kera lu wang ga, nana kire akondo a nan shi nana ôô iyol, nana kera lu wang ga zan zan aikighe.+
28 “‘Nahan kpa awambe la aa va tôndon yô, nana ôr ayange ataankarahar, aa been yô, nana hingir wang.+
29 Sha iyange i sha anigheni la, nana kôr mbaatii uhar shin mkungum ma kiriki mhar,+ nana va a mi hen pristi hen hunda u tenti u kohol ker la.+
30 Pristi una na nagh ku isholibo a môm, ugen la di una na nagh ku nanden a mi, pristi una na iwom sha ci u nan sha ishigh ki Yehova, sha ci u kwagh u wang ga u a dugh ken iyol i nan la.+
31 “‘Kape ne pav Mbaiserael a mlu ve u wang ga la je la, sha er vea hôngor a tabernakel wam u a lu hen atô ve la, nahan vea hingir u kpen ken mlu ve u wang ga la ga yô.+
32 “‘Ngun ka tindi u sha kwagh u or u kwagh a dugh nan ken iyol, man or u nan lu wang ga sha ci u mnyandem ma jiren wan due nan ken iyol,+
33 kua kwase u nan dugh won nahan nan kera lu wang ga,+ man hanma nomsoor shin kwase u kwagh a lu duen nan ken iyol,+ kua or u nan yav a kwase u nan lu wang ga je ne.’”
