Levitiku 24:1-23
24 Yehova shi ôr kwagh a Mose, a kaa ér:
2 “Kaa Mbaiserael ve va a mkurem ma wang ma olev u i kume un yô, sha er a tsaren amenger la aa yeghen hanma shighe yô.+
3 Aron a nôngo sha er a tsaren amenger la, aa yeghen aikighe zan zan sev puaa sha ishigh ki Yehova, ken tenti u kohol ker, ken won u ikyondo i yisan i Shiada la yô. Ka tindi u tsan gbem u ne kuran sha ikyov ikyov yô.
4 A ver amenger la sha daarimenger+ u sha zanaria u wang la vough vough, a luun sha ishigh ki Yehova hanma shighe.
5 “Tôô mwem ma kengese, kaa ikpenberedi i vingir 12. Hanma kpenberedi yô i kaa u sha mwem ma kuman uikyaren uhar-ken-pue u efa.*
6 Ver beredi la atihi ahar sha tebul u zanaria u wang la, sha ishigh ki Yehova,+ hanma tihi yô a lu a ikpenberedi ataratar.+
7 Penda ferankinsensi u wang sha hanma tihi, beredi la a lu nagh ku umbur ku*+ i ne Yehova sha usu yô.
8 Hanma Iyange i Memen yô, a za veren uberedi mbara vough vough sha ishigh ki Yehova.+ Ka ikyuryan yam a Mbaiserael i tsan gbem.
9 Una hingir kwagh u Aron kua ônov nav,+ vea yaan un hen icighanjiir,+ sha ci u ka icighankwagh tsung u a lu sha ci na ken iniav mbi i ne Yehova sha usu yô, ka tindi u tsan gbem.”
10 Tsô orgen lu ken Iserael, ngô na lu Kwaseiserael, ter na gema lu Origipiti,+ tsô or la gba nôngon num a Oriserael ugen ken afo.
11 Wan u Kwaseiserael la maa gba lahan Iti la* shi tuhwan i.+ Nahan i va a na hen Mose.+ Kwagh gema er yô, ngô na lu Shelomiti wan u Diberi u ken ipyaven u Dan.
12 I wuhe un i lu keghen ér Yehova a va ôr kwagh u a er yô.+
13 Tsô Yehova kaa a Mose ér:
14 “Due nen a or u a tuhwa kwagh la ken akôngoafoogh, nahan mba ve ongo la cii ve penda un ave sha ityo, maa ior cii ve ta un awen.+
15 Shi kaa a Mbaiserael wer, ‘Aluer or tuhwa Aôndo u nan yô, nana due iyolishô sha isholibo i nan la ga.
16 Nahan i wua or u a laha iti i Yehova la kpee je.+ Nongoior la cii u ta nan awen keng keng. Aluer ka or u van a va shin or u hen tar la kpa nan laha Iti la yô, i wua nan.
17 “‘Aluer or wua orgen* yô, i wua nan kpee je.+
18 Or u nan gbidi zendenya nan wua yô, nana kimbi un; uma sha uma.
19 Aluer or vihi orgen iyol yô, er nan er nahan kape i er a nan la.+
20 Ishombon sha ishombon, ishe sha ishe, inyigh sha inyi. Or a vihi or iyol yô, nan kpa i vihi nan iyol nahan vough.+
21 Or u nan woo zendenya yô nana kimbi,+ kpa or u nan woo orgen yô, i wua nan.+
22 “‘Or u van a va man or u ken tar la cii, ka tindi môm a ôr ve ijir sha mi ye,+ sha ci u ka mo Yehova m lu Aôndo wen ye.’”
23 Mose maa ôr kwagh a Mbaiserael, nahan ve due a or u a toho kwagh la ken akôngoafoogh, ve va ta un awen.+ Kape Mbaiserael er la, ve er vough er Yehova kaa Mose nahan.
Ngeren mba shin kpe
^ Uhar-ken-pue u efa yange a kuma ulita 4.4. Nenge Ngeren u Seer u B14 la.
^ Shin “a lu anivur u a til sha ityough ki nagh kura jimin cii u.”
^ Ka iti i Yehova je la, er ivur 15 man ivur 16 ve tese nahan.
^ Shin “aluer or gbidye orgen wua.”
