Levitiku 21:1-24
21 Yehova shi ôr kwagh a Mose kaa ér: “Lam a upristi, ônov mba Aron, kaa a ve wer, ‘Or wen môm nana de hôngor iyol i nan sha ci u or u ken ior mba nan u nan kpe la ga.+
2 Kpa nana fatyô u eren nahan sha ci u or u nan u sha tsombor, aluer ka ngô u nan shin ter u nan shin wan u nan u nomso shin wan u nan u kwase, shin anmgbian u nan u nomso kpaa.
3 Shi nana fatyô u hôngor iyol i nan sha ci u anmgbian u nan u kwase u a lu iniuun her, a lu kôôsôô a nan shi a lu a er nom ga la kpaa.
4 Nana de hôngor iyol i nan, nahan nana hingir wang ga sha ci u kwase u a lu a nom ken ior mba nan la ga.
5 Ve de gbongor ityough ga,+ shi ve de hondon indyer ve shin akpekpe shin ve gberen avav iyol ga.+
6 Ve lu uicighanmbaiorov mba Aôndo ve.+ Ve de hôngor iti i Aôndo ve ga,+ sha ci u mba nan Yehova iniav mbi sha usu, ka kwaghyan* u Aôndo ve je la, nahan gba u vea lu uicighanmbaiorov.+
7 Ve de vôson gbagakwase+ shin kwase u i vihi nan shin kwase u nan pav a nom u nan ga,+ sha ci u pristi ka icighanor hen Aôndo na.
8 Tsegha nan kposo,+ sha ci u ka pristi ka nan na kwaghyan* u Aôndo wou ye. Nana lu icighanor hen a we, sha ci u mo Yehova u m lu tseghan ne ne, m ngu icighan je.+
9 “‘Aluer wan u pristi u kwase hôngor iyol i nan sha u eren gbaga yô, nan ngu heen ter u nan. Nahan i nande nan sha usu.+
10 “‘Zegepristi u i tsough nan ken anmgbianev mba nan, i hee nan mkurem sha ityo,+ i ver nan sha tom u pristi* ér nana huan akondo a pristi la,+ nana de den ér ityough ki nan ki lu sha mi meghaa ga, shi nana de anden akondo a nan kpaa ga.+
11 Nana de ze ikyua a orkpen* ga;+ a lu ter u nan shin ngô u nan je kpa, nana de hôngor iyol sha ci u nan ga.
12 Nana de dugh hen icighanjiir kera ga, nana de hôngor icighanjiir u Aôndo u nan kpaa ga,+ sha ci u ikyav i mtsegh, icighanmkure u Aôndo u nan+ ngu sha a nan. Ka mo Yehova.
13 “‘Nana vôso i lu iniuunkwase.*+
14 Nana de vôson kwasecôghol shin kwase u nom u nan a pav a nan shin kwase u i vihi nan shin gbagakwase ga; kpa nana vôso iniuunkwase ken ior mba nan.
15 Nana de hôngor ônov mba nan* ken ior mba nan ga,+ sha ci u ka mo Yehova m lu tseghan nan ye.’”
16 Yehova shi ôr kwagh a Mose kaa ér:
17 “Kaa a Aron wer, ‘Or môm ken ônov ou* u nan lu a iwan iyol cii, nana de kporom ikyua sha u nana va na kwaghyan* u Aôndo u nan ga, ken ikyov ve cii.
18 Aluer or ngu a iwan iyol yô nana de kporom ga: A lu orapirashe shin or u keer shin or u nan gbe iwan sha ishi* shin or u nan hemba nguhar shin uwegh môm,
19 shin or u sombon nguhar shin or u sombon uwegh,
20 shin or u van igyundu shin or u gban zum kpishi,* shin or u van ishange ken ishe shin or u lun a iwav shin or u gban kpesa shin or u i vihi nan ake kpaa.+
21 Or môm ken ônov mba* pristi Aron u nan gbe iwan cii, nana de kporom sha u va nan Yehova nagh sha usu ga. Er nan lu a iwan iyol yô, nana fatyô u kporom sha u nana va na kwaghyan* u Aôndo u nan ga.
22 Nana fatyô u yan kwaghyan* u Aôndo u nan ken uicighanmbaakaav mba hemban cii la,+ man ken uicighanmbaakaav kpaa.+
23 Nahan kpa, nana de ve ikyua a ikyondo i yisan la ga,+ shi nana de mgbôghom a atse a nan nagh ga,+ sha ci u nan ngu a iwan iyol; nana de hôngor a icighanjiir wam kpaa ga,+ sha ci u ka mo Yehova m lu tseghan ve ye.’”+
24 Nahan Mose ôr Aron kua ônov nav man Mbaiserael cii akaa ne.
Ngeren mba shin kpe
^ Zwa Heberu, “ka beredi.” Kwagh ne ngu ôron kwagh u iniav mbi nan.
^ Zwa Heberu, “beredi.”
^ Zwa Heberu, “i iv ave a nan.”
^ Shin “uma u kpen.” I zua ishember i ken zwa Heberu i nephesh la heen vea ishember i ken zwa Heberu igen, i inja i i, i lu u kwagh kpen yô.
^ Shin “kwase u nan lu a yav a or ga yô.”
^ Zwa Heberu, “vor u nan.”
^ Zwa Heberu, “vor wou.”
^ Zwa Heberu, “beredi.”
^ Zwa Heberu, “or u tôndon ahenga.”
^ Shin a fatyô u kaan ér, “or u kanden kôhôlôô.”
^ Zwa Heberu, “vor u.”
^ Zwa Heberu, “beredi.”
^ Zwa Heberu, “beredi.”
