Levitiku 11:1-47
-
Akaauma a lun wang man a lun wang ga (1-47)
11 Tsô Yehova kaa a Mose man Aron ér:
2 “Kaa nen Mbaiserael ner, ‘Ka akaauma a sha tar* a ne fatyô u yan je ne:+
3 Hanma inyam i i pav apande tsembelee shi i kengese kwaghyan cii ne fatyô u yan.
4 “‘Kpa annyamev mba ve kengese kwaghyan shin ve pav apande mban nahan yô de ye nen ga: ka rakumi, kengese kwaghyan, kpa a pav apande ga. A lu ne kwagh u a lu wang ga yô.+
5 Man ikuwa,+ sha ci u i kengese kwaghyan, kpa i pav apande ga. I lu ne kwagh u a lu wang ga yô.
6 Man alôm, sha ci u kengese kwaghyan kpa a pav apande ga. A lu ne kwagh u a lu wang ga yô.
7 Kua igyo,+ sha ci u i pav apande kpa i kengese kwaghyan ga. I lu ne kwagh u a lu wang ga yô.
8 De ye nen inyam i ishôso ne ga, shi de benden nen gundu u i ave kpaa ga. I lu ne kwagh u a lu wang ga yô.+
9 “‘Ken akaa a shin mnger yô, ka kwagh u ne fatyô u yan je ne: Hanma kwagh u shin mnger u a lu a iese* man akembe cii, a lu shin uzegembamngerev shin uifi kpaa, ne fatyô u yan.+
10 Kpa hanma kwagh u shin uzegembamngerev man shin uifi u a lu a iese* man akembe ga, ken akaa a a zenden shin mnger akum akum man hanma kwagh u uma ugen u shin mnger cii, a lu ne kwagh u ndôhôrshima.
11 Een, a lu ne kwagh u ndôhôrshima, de ye nen inyam i a ga,+ shighe u ve kpe kpaa ve ndôhôr ne ishima.
12 Hanma kwagh u a lu shin mnger u a lu a iese* ga shi a lu a akembe ga cii yô, a lu ne kwagh u ndôhôrshima.
13 “‘Ka akaauma a purugh a aa lu ne kwagh u ndôhôrshima je ne; i de ye a ga, sha ci u ka akaa a ndôhôrshima: ka igyuve+ man gafa man apu u il,+
14 man azembe kua hanma inja tsoghor cii,
15 man hanma inja ôô-ôô,
16 man konkofi man ivungu man gôô* man hanma inja i ihyembetsoghor cii,
17 man kaaki man inyon-sua man mtsaan,
18 man suwan* man akumedu man apu,
19 man ayamcambem kua hanma inja i ipyevnor cii, man hoopo* man inima.
20 Ankaam mba lun a ingyur mba lun a angahar anyiin, mba ve zenden akum akum cii yô, ve lu ne kwagh u ndôhôrshima.
21 “‘Ken ankaam mba lun a ingyur mba ve zenden akum akum, ve lu a angahar anyiin mba ne fatyô u yan yô, ka mba ve lu a agbeen a tsuen a mi yô.
22 Ka mba ne ya je ne: hanma inja i ikyomon i i zenden imôngo, man ikyomon i yan+ man ahungwajaa man mbaahungwa kpaa.
23 Ankaam mba lun a ingyur mbagen mba lun a angahar anyiin mba ve zenden akum akum cii yô, ve lu ne kwagh u ndôhôrshima.
24 Akaa ne aa fatyô u hôngor ne. Hanma or u nan bende a mô ve u a kpe yô nana kera lu wang ga zan zan iyange ia kar been.+
25 Or u nan tôô mô ve u a kpe yô nana kire akondo a nan;+ nana kera lu wang ga zan zan iyange ia kar been.
26 “‘Hanma annyam u a pav apande tsembelee ga, shi a kengese kwaghyan ga yô, a lu ne kwagh u a lu wang ga yô. Or u nan bende a ve cii nana kera lu wang ga.+
27 Hanma inyam i i zenden sha akev ken ishôso i i zenden sha angahar anyiin cii yô, i lu ne kwagh u a lu wang ga yô. Hanma or u nan bende a mô ve u a kpe yô, nana kera lu wang ga zan zan iyange ia kar been.
28 Or u nan tôô mô ve u a kpe yô, nana kire akondo a nan,+ nana kera lu wang ga zan zan iyange ia kar been.+ Ve lu ne kwagh u a lu wang ga yô.
29 “‘Ka akaa a kpelan inya a aa lu ne kwagh u wang ga je ne: ijuhyev man ihyev+ man hanma inja i avange cii,
30 man veendeve man huel man avange u shin mnger man ishondo man hum.
31 Inyam i kpelan inya ne cii i lu ne kwagh u a lu wang ga yô.+ Hanma or u nan bende a mô ve u a kpe yô, nana kera lu wang ga zan zan iyange ia kar been.+
32 “‘Hanma kwagh u ve gbe sha mi zum u ve kpe cii, una kera lu wang ga, a̱ lu ikyagh ki i er sha kon shin a lu ikyondo shin ikyôvor shin ikyondo i huan zungwen kpaa. Hanma ikyagh ki i eren kwagh a mi cii, i mir ki shin mnger, kia kera lu wang ga zan zan iyange ia kar been cii ve kia mase hingir wang ye.
33 Aluer ve gba ka shin ikyagh ki inyaagh yô, i hembe ki, shi kwagh u a lu shimi cii una kera lu wang ga.+
34 Nyityô kwaghyan i mngerem ma shin ikyagh kira ma bende a mi cii, ia kera lu wang ga, shi nyityô kwaghman i i lu shin ikyagh kira kpaa, ia kera lu wang ga.
35 Kwagh u gundu ve a bende a mi cii una kera lu wang ga. A lu atse shin kwagh u pendan tsua sha mi* kpaa, i hembe un kera. Vea kera lu wang ga, shi vea za hemen u lun ne kwagh u a lu wang ga yô.
36 Ka mngerem ma shin hwembe shin ma shin ijôr tseegh ma a za hemen u lun wang ye. Kpa hanma or u nan bende a mô ve u a kpe cii yô nana lu wang ga.
37 Aluer gundu ve bende a ivor i i ver u za lôôn yô, ia lu wang.
38 Kpa aluer i haa mngerem sha ivor man ma ilyeegh ki kwagh u a kpe la gba sha mi yô, vor la ua kera lu ne kwagh u wang ga.
39 “‘Aluer ma inyam i ne ye kpaa i kpe yô, or u nan bende a gundu u i la nana kera lu wang ga zan zan iyange ia kar been.+
40 Or u nan ye inyam i i kpe cii yô, nana kire akondo a nan; nana kera lu wang ga zan zan aikighe.+ Or u nan tôô mô ve u a kpe yô, nana kire akondo a nan; nana kera lu wang ga zan zan iyange ia kar been.
41 Akaauma a a zenden hen inya akum akum cii, a lu ne kwagh u hôngorough.+ I de ye a ga.
42 De ye nen ma kwagh u a kpelan iyav inya shin kwagh u a zenden angahar anyiin ga, shin hanma kwagh u a zenden akum akum sha tar u a lu a angahar kpishi kpaa ga, gadia akaa ne ka akaa a hôngorough.+
43 De hôngor nen ayol a en sha akaa a a zenden akum akum sha tar la ga, shi de den nen ner a hôngor ne sha er ne kera lu wang ga ze.+
44 Gadia mo m ngu Yehova Aôndo wen,+ gba kpee u ne tsegha ayol a en ne hingir uicighanmbaiorov,+ sha ci u mo m ngu icighan je.+ Nahan de hôngor nen ayol a en sha akaa a a zenden akum akum sha tar la ga.
45 Gadia ka mo Yehova m lu hemen ne duen a ven ken tar u Igipiti kera, sha u tesen ne mer m ngu Aôndo ye.+ Nahan gba u ne lu uicighanmbaiorov,+ sha ci u mo m ngu icighan je.+
46 “‘Ka tindi u sha kwagh u annyamev man akaa a purugh man hanma kwagh u uma u a zenden shin mnger man hanma kwagh u a zenden akum akum sha tar je ne,
47 sha er mkposo una lu hen atô u kwagh u a lu wang ga man kwagh u wang, kua hen atô u akaauma a a fatyô u yan man a a fatyô u yan ga la kpaa yô.’”+
Ngeren mba shin kpe
^ Shin “annyamev mba sha tar.”
^ Shin “ayange; asagher.”
^ Shin “ayange; asagher.”
^ Shin “ayange; asagher.”
^ Ka inyon i shin kpezegemnger i i yer ken zwa Buter ér gull la.
^ Inyon ne ngi er ikpande nahan kpa i hemba kehen.
^ Ka annyon u i yer ken zwa Buter ér hoopoe la. A wa zan er ka gberkôkô nahan.
^ Inja na yô, ka kwagh u jiidi kwaghyan sha mi.
