Levitiku 16:1-34
-
Iyange i Nan Iwom (1-34)
16 Tsô Yehova ôr kwagh a Mose, zum u ônov mba Aron mba uhar mbara kpe kera shighe u ve za sha ishigh ki Yehova la.+
2 Yehova kaa a Mose ér: “Kaa anngôu Aron wer a de gbe va nyôron ken icighanjiir+ hen ikyondo i yisan,+ hen ishigh ki kuur u a lu sha Areki la hen shighe u a soo cii tsô ga, sha er una kpe ga yô;+ sha ci u me ande hen kuur la+ ken ibyeen.+
3 “Ka kwagh u Aron una va a mi shighe u a lu nyôron ken icighanjiir je ne: a va a gumbua sha ci u nagh ku isholibo,+ man nomiyôngo sha ci u nagh ku nanden.+
4 A hua icighanikyondo i elemeen la,+ shi a hua tiônwondo u sha mou u dedoo ken atô,*+ shi a tsule ikyondo i kangen shin iwenge,+ kua tsar u kangen sha ityo* u sha mou u dedoo la.+ Ka uicighanmbaakondov.+ A ôô iyol sha mnger+ maa a hua a.
5 “A ngohol anikpevev uhar hen mkohol u Mbaiserael+ sha ci u nagh ku isholibo, man nomiyôngo môm sha ci u nagh ku nanden.
6 “Aron maa a va a nombua u nagh ku isholibo u a lu sha ci na la, a va na iwom sha ci na+ kua sha ci u ya na kpaa.
7 “Una kôr anivoov mba uhar mbara una va a ve, vea va tile sha ishigh ki Yehova, hen hunda u tenti u kohol ker la.
8 Aron una er ishor sha anivoov mba uhar mbara, ishor i môm sha ci u Yehova, ishor igen la di sha ci u Asasel.*
9 Aron una va a anivo u ishor i tese+ ér ka u Yehova la, una va na nagh ku isholibo a mi.
10 Kpa anivo u ishor i tese ér ka u sha ci u Asasel la yô, i va a na uma sha ishigh ki Yehova, sha er a na iwom sha ityough nagh, nahan a pase un una yem ken taaikyôngo sha ci u Asasel yô.+
11 “Aron una va a nombua u nagh ku isholibo u sha ci na la, una va na iwom sha ci na man sha ci u ya na; una been yô una sôngo nombua u nagh ku isholibo u sha ci na la.+
12 “Una tôô gbande u usu,+ una dugh akaausu a kpenger kpenger ken atse+ a a lu sha ishigh ki Yehova la una haa shimi poo, shi una er insensi u human doon u lun lueen akevaveegh ahar poo,+ una nyôr a mi ken ikyondo i yisan la.+
13 Una gema insensi la una haa sha usu la sha ishigh ki Yehova,+ nahan mnyim ma insensi la ma a kpurum sha kuur u Areki+ u i cir sha Ikyuryan la,+ sha er una kpe ga yô.
14 “Una er awambe a nombua la+ sha ihyôwe, una mishi hen ishigh ki kuur la, vegher u sha ityoughkitaregh, shi una er awambe la sha ihyôwe una mishi sha ishigh ki kuur la kwa taankaruhar.+
15 “Maa una sôngo anivo u nagh ku isholibo u a lu sha ci u ior la,+ una nyôr a awambe a na ken ikyondo i yisan la,+ una va er a a+ vough er ashen a er a awambe a nombua la nahan; una mishi a vegher u kuur la man sha ishigh ki kuur la.
16 “A na iwom sha ci u icighanjiir la, sha ci u akaa a wang ga a Mbaiserael ve er la, man sha ci u atindi a peren kua asorabo a ve.+ Ka kwagh u una er sha ci u tenti u kohol ker u a lu hen a ve, hen atô u aeren a ve a wang ga la kpaa je la.
17 “Or môm nana de lun ken icighanjiir la shighe u a nyer u za nan iwom la ga zan zan una kar duen. Una na iwom sha ci na man sha ci u ya na+ man sha ci u nongo u Iserael cii.+
18 “Maa una due a va hen atse a nan nagh+ a a lu sha ishigh ki Yehova la, una va na iwom sha ci u a. Una er awambe a nombua la, shi una er awambe a anivo la, una kôô sha akor a atse a nan nagh la cii una ningir a tser.
19 Shi una er awambe la sha ihyôwe una mishi sha a kwa taankaruhar, una wanger a shi una tsegha a sha ci u aeren a wang ga a Mbaiserael la.
20 “Una naan iwom+ sha ci u icighanjiir la man tenti u kohol ker la man atse la+ una been yô, una va a anivo u uma la kpaa.+
21 Aron una kohol ave a na ahar una penda sha ityough ki anivo u uma la, una pase akaabo a Mbaiserael cii, man atindi a peren a ve cii, kua asorabo a ve cii, una gema a una haa sha ityough ki anivo la.+ Maa una gema un una na sha ikyev i or u i vande tsuan yô,* nana za pase un ken taaikyôngo.
22 Anivo la una tôô asorabo a ve cii sha ityough nagh,+ una yem a mi ken desereti;+ nahan una pase un una yem ken taaikyôngo.+
23 “Aron maa una hide a nyôr ken tenti u kohol ker la, una er akondo a sha mou u dedoo a ashen a lu nyôron ken icighanjiir ve a hua la, una gema a una ver her.
24 Una ôô iyol+ ken icighanjiir, maa una hua akondo a na;+ una due a va na nagh ku nanden sha ci na+ man sha ci u ior,+ una na iwom sha ci na man sha ci u ior cii.+
25 Una nande ahôm a nagh ku isholibo kura sha atse la.
26 “Or u a za pase anivo u a lu sha ci u Asasel la+ kpa a kire akondo a na shi a ôô iyol, una been yô una hide ken afo.
27 “Nombua u nagh ku isholibo man anivo u nagh ku isholibo mba i nyer a awambe a ve ken icighanjiir sha u nan iwom a mi la yô, i tôô ve i due a mi ken akôngoafoogh i za nande akôv a ve man inyam ve man ambi a ve sha usu.+
28 Or u nan za nande ve la nana kire akondo a nan shi nana ôô iyol, nana been yô nana nyôr ken afo.
29 “Kwagh ne a lu ne tindi u tsan gbem: Ken uwer u sha utaankaruhar ayange pue la, er nen ayol a en ican,* de eren nen ma tom ga,+ a lu marnya shin or u van a va u nan tem her a ven kpaa.
30 A na iwom sha ci wen sha iyange ne,+ sha er a pase ér ne mba wang yô. A wanger asorabo a en cii sha ishigh ki Yehova, ne hingir wang.+
31 Ka iyange i ne mem hanma tom wen cii yô, er nen iyol yen ican.*+ Ka tindi u tsan gbem.
32 “Pristi u i tsegh nan+ i ver nan* ér nana er tom u pristi+ sha ityough ki ter u nan la,+ nana na iwom, shi nana hua akondo a sha mou u dedoo la,+ ka uicighanmbaakondov mbara je la.+
33 Nana na iwom sha ci u icighanjiir+ man tenti u kohol ker la,+ man sha ci u atse a nanden nagh la;+ shi nana na iwom sha ci u upristi man sha ci u nongoior la cii.+
34 Kwagh ne a lu ne tindi u tsan gbem,+ i̱ naan iwom sha ci u asorabo a Mbaiserael cii kwa môm ken inyom.”+
Nahan a er er Yehova kaa Mose nahan vough.
Ngeren mba shin kpe
^ Shin “a cir idyelegh na.”
^ Shin “adikpo.” Yange i kange tsar ne sha ityo a lu er ka idyer nahan.
^ Alaghga inja na yô ér, “Ivo i Yemen Saan.”
^ Shin “or u nan til nan lu keghen a kegh la.”
^ Shin “er nen uuma enev ican.” I nenge ér ishember i “or eren iyol i nan ican” la, ngi hemban ôron kwagh u or nyumen iyol i nan akaa kpishi, kua u hôron kwaghyan kpaa.
^ Shin “er nen uuma enev ican.”
^ Zwa Heberu, “i iv nan ave.”
