Utor u sha Uhar 15:1-38
15 Asaria*+ wan u Amashia+ tor u Yuda tema tor+ ken inyom i sha 27 i Yeroboam* lu tor u Iserael la.
2 Lu anyom 16 shighe u tema tor la, a hemen anyom 52 ken Yerusalem. I yilan ngô na ér Yekolia, lu kwase u ken Yerusalem.
3 Lu eren kwagh u dedoo sha ishigh ki Yehova, vough er ter na Amashia er nahan.+
4 Nahan kpa, i bee a ajiir a taven la ga,+ shi ior lu nan iniav shi ve lu nanden iniav, mnyim lu duen sha ajiir a taven la her.+
5 Nahan Yehova tsaha tor, a lu orimande+ zan zan iyange i kar kpen la; a lu ken iyou igen kposo,+ Yotam+ wan u tor gema lu nengen sha ya, ôron ior mba ken tar la ijir.+
6 Akaa agen ken yiase i Asaria+ cii, akaa a a er cii, i nger ken takeda u yiase i sha ayange a ator a Yuda la.
7 Tsô Asaria kpe, i ii un vea uter nav+ ken Gar u Davidi; maa wan na Yotam kar tema tor sha ityough nagh.
8 Ken inyom i sha 38 i Asaria+ lu hemen Yuda la, Sekaria+ wan u Yeroboam tema tor sha Iserael ken Samaria; a hemen iwer ataratar.
9 A er kwaghbo sha ishigh ki Yehova, vough er yange uter nav er nahan. A undu asorabo a Yeroboam wan u Nebati yange na Iserael er la ga.+
10 Maa Shalum wan u Yabeshi zua zwa sha a na, wua un+ hen Ibeleam.+ Woo un kera yô, a kar a tema tor sha ityough nagh.
11 Akaa agen ken yiase i Sekaria cii, i nger ken takeda u yiase i sha ayange a ator a Iserael la.
12 Kwagh ne maa kure kwaghôron u Yehova ôr a Yehu la, ér: “Ônov ou vea tema sha ikyônough ki torough ki Iserael+ zan zan ikyov inyiin.”+ Man lu kwagh u er je la.
13 Shalum wan u Yabeshi tema tor ken inyom i sha 39 i Ushia+ lu hemen Yuda la, a hemen ken Samaria uwer jimin.
14 Maa Menahem wan u Gadi, mough ken Tirsa+ kôndo va ken Samaria, va wua Shalum+ wan u Yabeshi ken Samaria. Woo un kera yô, a kar a tema tor sha ityough nagh.
15 Akaa agen ken yiase i Shalum cii man zwa u a zua la, i nger ken takeda u yiase i sha ayange a ator a Iserael la.
16 Lu hen shighe ne, Menahem mough ken Tirsa va ta num sha Tifesa, wua ior mba ve lu ker cii, kua mba hen haregh na ye, sha ci u ve lumun u bughun un ihinda ve ga. A ta num sha a ve, shi a pav kasev vev mba uyaav igbor.
17 Ken inyom i sha 39 i Asaria lu hemen Yuda la, Menahem wan u Gadi tema tor sha Iserael, a hemen anyom pue ken Samaria.
18 Lu eren kwaghbo sha ishigh ki Yehova. Sha ayange a uma na cii, a undu asorabo a Yeroboam wan u Nebati na Iserael er la cii ga.+
19 Pul+ tor u Ashiria yange va ken tar la, nahan Menahem na Pul azurufa utalenti* 1,000 sha ci u wase un seer taver tartor na.+
20 Menahem zua a azurufa la sha kpandegh ku wa ior mba tagher tagher man mbanyarev mba ken Iserael la.+ Yange na tor u Ashiria azurufa ushekel* 50 sha ityough ki hanma nomsoor. Nahan tor u Ashiria hide yem, kera lu ken tar la ga.
21 Akaa agen ken yiase i Menahem cii,+ akaa a a er cii, i nger ken takeda u yiase i sha ayange a ator a Iserael la.
22 Tsô Menahem kpe, i ii un vea uter nav; wan na Pekahia kar tema tor sha ityough nagh.
23 Ken inyom i sha 50 i Asaria tema tor sha Yuda la, Pekahia wan u Menahem tema tor sha Iserael ken Samaria, a hemen anyom ahar.
24 Lu eren kwaghbo sha ishigh ki Yehova. A undu asorabo a Yeroboam wan u Nebati na Iserael er la ga.+
25 Tsô orutya na u vesen Peka+ wan u Remalia zua zwa sha a na, va wua un ken Samaria, ken iyou i taver i taven i ken ya u tor, un vea Argobi kua Arie. Peka lu vea ior mba ken Gileadi, iorov 50. Woo un kera yô, a kar a tema tor sha ityough nagh.
26 Akaa agen ken yiase i Pekahia cii, akaa a a er cii, i nger ken takeda u yiase i sha ayange a ator a Iserael la.
27 Ken inyom i sha 52 i Asaria lu tor u Yuda la, Peka+ wan u Remalia tema tor sha Iserael ken Samaria, a hemen anyom 20.
28 Lu eren kwaghbo sha ishigh ki Yehova, a undu asorabo a Yeroboam wan u Nebati na Iserael er la ga.+
29 Sha ayange a Peka tor u Iserael la, Tigelati-pileser+ tor u Ashiria, nyôr va ngohol Iyon man Abel-bete-maaka+ man Yanoa man Kedeshi+ man Hasor man Gileadi+ man Galilia kua tar u Nafetali cii,+ shi a kura ior mba ker, a yem a ve uikyangen ken Ashiria.+
30 Nahan Hoshea+ wan u Ela, zua zwa sha Peka wan u Remalia wua un; maa a kar a tema tor sha ityough nagh ken inyom i sha 20 i Yotam+ wan u Ushia la.
31 Akaa agen ken yiase i Peka cii, akaa a a er cii, i nger ken takeda u yiase i sha ayange a ator a Iserael la.
32 Ken inyom i sha uhar i Peka wan u Remalia lu tor u Iserael la, Yotam+ wan u Ushia+ tor u Yuda hingir tor.
33 Lu anyom 25 shighe u tema tor la, a hemen ken Yerusalem anyom 16. I yilan ngô na ér Yerusha, lu wan u Sadoki.+
34 Lu eren kwagh u dedoo sha ishigh ki Yehova, vough er ter na Ushia er nahan.+
35 Nahan kpa, i bee a ajiir a taven la ga, shi ior lu nan iniav shi ve lu nanden iniav, mnyim lu duen sha ajiir a taven la her.+ Yange lu un maa hunda u iyou i Yehova u sha la ye.+
36 Akaa agen ken yiase i Yotam cii, kwagh u er la, i nger ken takeda u yiase i sha ayange a ator a Yuda la.
37 Sha ayange la, Yehova mgbegha Reshin tor u Shiria, man Peka+ wan u Remalia, ve gba va tan ityav sha Yuda.+
38 Tsô Yotam kpe, i ii un vea uter nav ken Gar u Davidi ter na u tamen. Maa wan na Ahashi kar tema tor sha ityough nagh.
Ngeren mba shin kpe
^ Inja na yô ér, “Yehova Wa̱se.” I yila un ér Ushia ken 2Ut 15:13; 2Kr 26:1-23; Yes 6:1; kua Sek 14:5.
^ Ka Yeroboam u sha Uhar je la.
^ Talenti môm yange a lu ukilogeram 34.2. Nenge Ngeren u Seer u B14 la.
^ Shekel môm yange a lu ugeram 11.4. Nenge Ngeren u Seer u B14 la.
