Utor u sha Uhar 18:1-37
18 Ken inyom i sha utar i Hoshea+ wan u Ela lu tor u Iserael la, Hesekia+ wan u Ahashi+ tor u Yuda hingir tor.
2 Lu anyom 25 shighe u tema tor la, a hemen ken Yerusalem anyom 29. I yilan ngô na ér Abi,* lu wan u Sekaria.+
3 Lu eren kwagh u vough sha ishigh ki Yehova,+ vough er ter na u tamen Davidi er nahan.+
4 Lu un bee a ajiir a taven,+ shi hembe mtôm ma akombom ma awenem, shi gber mtôm ma akombom ma sha ikyon* kera ye.+ Shi hembe iyô i sha togula i Mose er la avur avur;+ sha ci u ior i Iserael lu nanden i nagh, mnyim lu duen zan zan hen shighe la, nahan i yilan i ér, eev mbu iyô i sha togula.*
5 A suur sha Yehova+ Aôndo u Iserael; ator a Yuda cii or môm lu er un ga, ken hemen na, shin mba ve vande lun a na la kpaa ga.
6 A var a Yehova gbang.+ A de u dondon un ga; shi a za hemen u kuran atindi a Yehova na Mose la.
7 Shi Yehova lu a na. Hanma ijiir i una za cii, a er kwagh sha kwaghfan. A hemba tor u Ashiria ato, a venda u eren un tom.+
8 A hemba Mbafiliti ityav+ zan zan nyôr Gasa kua uharegh nav, hii hen iyoukura zan zan nyôr hen gar u lun a gir u taver.*
9 Ken inyom i sha unyiin i Tor Hesekia la, ka inyom i sha utaankaruhar i Hoshea,+ wan u Ela lu tor u Iserael je la, Shalmaneser tor u Ashiria kôndo va u va tan ityav sha Samaria, a kase un a wa atô.+
10 Anyom atar nga been yô, ve ngohol un.+ Ken inyom i sha ataratar i Hesekia, ka inyom i sha utaankarunyiin i Hoshea lu tor u Iserael je la, i ngohol Samaria.
11 Tsô tor u Ashiria kura ior i Iserael yem a mi uikyangen+ ken Ashiria, a za ver ve ve lu ken Hala man ken Habor, hen ifi u Gosan kua ken agar a Mbamede.+
12 Kwagh lu nahan sha ci u ve venda u ungwan imo i Yehova Aôndo ve, ve gema ve za hemen u vihin ikyuryan na, ka akaa a Mose ortom u Yehova ôr ve cii je la.+ Ve venda u ungwan shin eren sha mi.
13 Ken inyom i sha 14 i Hesekia tema tor la, Senakeribi tor u Ashiria+ kôndo va ta ityav sha agar a Yuda, a i wa a ugir mba taver la cii, ngohol a.+
14 Tsô Hesekia tor u Yuda, tindi i za kaa a tor u Ashiria hen Lakishi ér: “Ka ibo yam. Kura ikyav due hen a mo kera, nahan me na u hanma kwagh u u kaa wer m na cii.” Nahan tor u Ashiria kaa a Hesekia tor u Yuda ér a ta un kpandegh ku kuman azurufa utalenti* 300 man zanaria utalenti 30.
15 Tsô Hesekia na azurufa u i zua a mi ken iyou i Yehova man ken ayou a koson akaainjaa hen iyou i tor la cii.*+
16 Hen shighe la, Hesekia dugh* ihinda i tempel+ u Yehova man ikpande i ihinda i Hesekia tor u Yuda iyol na, cir zanaria sha mi la,+ na tor u Ashiria.
17 Tor u Ashiria maa tindi Tartan* man Rabesari,* kua Rabeshake,* a ikyumutya i vesen hen Lakishi+ ér, ve za hen Tor Hesekia ken Yerusalem.+ Ve kôndo ve za ken Yerusalem, ve za tile hen gôngormnger u ityungu i sha, u a lu sha gbenda u vesen u zan ken sule u orkirenakondo la.+
18 Mba za yer ér tor a due a va yô, Eliakim+ wan u Hilkia u nengen sha ya u tor la, man Shebena+ u lu akawe la, kua Yoa wan u Asav u lu orngeren la, ve due ve va hen a ve.
19 Tsô Rabeshake kaa a ve ér: “Nea lumun yô, kaa nen a Hesekia ner, ‘Ka kwagh u zegetor, tor u Ashiria a kaa je ne, ér: “Ka nyi u suur sha mi ve u lu a vangertiôr nahana?+
20 U ngu kaan wer, ‘M fa kwagh u me er yô, shi m ngu a tahav mbu nôngon ityav,’ kpa mkaanem man ka ma gbilinigh tsô. Ka sha an u suur ve, u cihi u hembem ato?+
21 Nenge! U ngu suur sha Igipiti, u a lu er iyiagh ki ki sombo ne wer a wase u,+ man yô aluer or suur sha ki yô, kia kuma nan ken ikyevwe a pev. Kape Farou tor u Igipiti a lu hen mba ve suur sha a na la cii je la.
22 Man aluer ne kaa a mo ner, ‘Se mba suur sha Yehova Aôndo wase’ yô,+ kera ka un Hesekia a bee a ajiir a na a taven man atse a na a nan nagh,+ a gem a kaa a Yuda man Yerusalem ér, ‘Gure nen sha ishigh ki atse a nan nagh, a ken Yerusalem ne’ ga zee?”’+
23 Nahan hegen nea lumun yô, ta ase nen hwande a terem tor u Ashiria: Mo me na ne anyinya 2,000 aluer ne fatyô u zuan a mbahendan a cii yô.+
24 Aluer ne mba suur sha Igipiti ner, a na ne akekeautya man mbahendananyinya yô, a er nan ve ne fatyô u hemban gomna môm, u a hembe gban ijime ken mbatomov mba terem la sha wono?
25 Ka Yehova a nem ian ér m kôndo m va ta ityav sha ijiir ne, m tim i kera gaa? Yehova iyol na kaa a mo ér, ‘Kôndo va ta ityav sha tar ne, tim u kera.’”
26 Tsô Eliakim wan u Hilkia man Shebena+ kua Yoa kaa a Rabeshake ér:+ “Wea lumun yô, lam a mbayev ou ken zwa Aram,*+ sha ci u se mba ongo u; de lamen a vese ken zwa u Mbayuda wer ior mba ve lu sha kpekpe la ve ungwa ga.”+
27 Kpa Rabeshake kaa a ve ér: “Ka hen teru man hen a we tseegh, terem a tindim ér m va ôr mkaanem man yee? Ka hen ior mba ve tem sha kpekpe, ve mba vea ya ambi a ve, shi vea ma mnyandem vem a ven imôngo la kpaa a tindim ye gaa?”
28 Rabeshake maa tile ôr kwagh genger genger ken zwa u Mbayuda, kaa ér: “Ungwa nen mkaanem ma zegetor, tor u Ashiria ne.+
29 Ka kwagh u tor a kaa ne, ér, ‘De deen nen ner Hesekia a bume ne ga, gadia una fatyô u yiman ne sha ikyev yam ga.+
30 Shi de deen nen ner Hesekia a na ne suur sha Yehova, a kaan ér: “Yehova una yima se kpee a bunde ga, shi a na gar ne sha ikyev i tor u Ashiria kpaa ga” ze.+
31 De keghen nen ato a Hesekia ga, sha ci u tor u Ashiria kaa ér: “Lu nen ken bem vea mo shi haa nen ikyav inya, nahan hanma wen nana ya atam a kon u wain u nan man atam a kon u tur u nan, shi nana ma mngerem ma shin ijôr i nan,
32 zan zan me va, me va kura ne, me yem a mi ken tar ugen u lun er u wen nahan,+ tar u lun a samuyia man wain u he, tar u lun a kwaghyan man ishuleikyon i wain, tar u lun a ikyon i olev man iyough. Nahan ne lu uma, ne kpe ga. De keghen nen ato a Hesekia ga, sha ci u ngu tsughun ne kaan ér, ‘Yehova una yima se.’
33 I lu nahan ma aôndo ken mbaaôndo mba akuraior yima tar u nan sha ikyev i tor u Ashiria vee?
34 Mbaaôndo mba Hamati+ man Arpadi mba hana? Mbaaôndo mba Sefarvaim+ man Hena kua Iva, mba hana? Ve yima Samaria sha ikyev yam kpa?+
35 Ken mbaaôndo mba ityar la cii, ka hanma aôndo a yem tar u nan sha ikyev yam ve, Yehova una yima Yerusalem sha ikyev yama?”’”+
36 Kpa ior lu ving, ve ôr kwagh môm a na ga, sha ci u tor kaa ér, “De lamen nen a na ga.”+
37 Kpa Eliakim wan u Hilkia u nengen sha ya u tor la, man Shebena u lu akawe la, kua Yoa wan u Asav u lu orngeren la, ve va hen Hesekia a akondo a anden iyol, ve va ôr un mkaanem ma Rabeshake.
Ngeren mba shin kpe
^ Ka gbenda u ngeren Abiya tiônôô.
^ Nenge Ngeren u Pasen Asember, “Ityôgh ki akombough ki sha kon.”
^ Shin “i yilan i ér Nehushetan.”
^ Ka hanma ijiir cii, a lu ijiir i ior ve lu kpishi ga, shin ve lu kpishi kpaa.
^ Talenti môm yange a lu ukilogeram 34.2. Nenge Ngeren u Seer u B14 u la.
^ Shin “ya u tor.”
^ Zwa Heberu, “tôndo.”
^ Shin “kurutya.”
^ Shin “or u eren tom ken ya u tor u tagher tagher.”
^ Shin “orvesen u mbatoon tor kwaghman.”
^ Shin “Shiria.”
